TITUS
Svan (Lashx) Texts ed. A. Oniani
Part No. 10
Previous part

Text: 10 
Page: 29 
Line: 22 
X. ლი̄ხჳა̄ლ მჷლა̄შხიშ.


Line: 23       ათხე̀ დეშერ იჩო, მარა̀ ეჩქა̀დ ლეჩი̄ჟჷ̄რი̄ ქორშალს ჲერჳაჲ მეზგე̄მი
Line: 24    დი̄ნა ლეხსჲამო̄ლხ ჲედ მეზგე ხესჲამო̄ლხ ძახლარდ, ანღინახ ი
Line: 25    ფინთიხს ადკჳა̄ნნახ ლაჴჳრახენქა ქორთე̄ჲსა ი ეჩჷნღო ხოჩა დედე̄-გეზალ
Line: 26    ი̄როლ, დო̄მ ლახო̄დნა ეჯჲარს ეჯ დი̄ნას. მარა̀ ათხე̀ დროჲჟი მა̄მ
Line: 27    ლი სერ. ლეჲხუ̄რი ჭყინტ ერ ხეყე̄ნი მჷლაშხს, ახა̄ზიხ ნე̄სგამე̄ზჲარ
Line: 28    ჩი ჴეჳხენ ი ხაკჷფნეხ: "ალ დი̄ნა ლოქ ხოჩა მეზგე̄მიში-ი̀ ხოჩა გჳარიშ
Line: 29    ლოქ ლი ი ქა ლოქ ხიშგომ ჲეხჳდ ისგჳაჳ". ჲედ ლეჩი̄ჟჷ̄რის ხაკფჷნეხ
Line: 30    ი ჲედ მიჩა მუს ი შომა̄ჲ ერ ჟახუნდუნა̄ლჳნიხ, ჩჳასკბეხ დი̄ნა
Line: 31    ასაბჲაჲცახან, მაჲ ღენ ლე̄თ ხეკჳდიხ სახლინახობ. მა̄ჲ ლე̄თი̄შჳდი̄
Line: 32    ჩჳედსკი̄ბი სახლნიხობ ლე̄თ, ეჯ ლე̄თიშჳდ ანღინე ნე̄სგამე̄ზი, ოხჟოღჳნი
Page: 30  Line: 1    ლეჩი̄ჟჷ̄რი̄ ქორხენ ღჳაჟარს, ჲედ ლეჩი̄ჟჷ̄რი̄ ქორშალ ი̄რიხ ჲერხი-ი̀
Line: 2    ჲედ მიჩა მეხჳბარალე ღჳაჟარ უსგჳა იშგჳიდთე ქა ი ნე̄სგამე̄ზი̄
Line: 3    ცახანლანჴრინუშ სგა ლეხგენიხ ლე̄ჲხუ̄რი̄ ქორშალს. ეჯჲარ ლჷმა̄რე ესხჳიხ
Line: 4    ჩინოჳშ. ხოხა̄ლდახ სგობდ ერე ეჯ ლე̄თ ლჷმა̄რე ხაკუჩ ლჷმა̄რე̄ლასხ ი,
Line: 5    მაჲ საკჳრელ ლი, სერ ერე ლჷმა̄რე ესხჳე̄ნხ მჷყდა̄ნა̄ლას. ლჷძჲე ხეყე̄ნი
Line: 6    ხამ ლებტკჷ̄რიდ, ლორ მჷჯაბ ჲედ მე̄რმე ლაძჲა ხეყე̄ნი მა̄ლე ი ჩჳესსგურნეხ
Line: 7    ქორს ტაბაგჟი. ანჴდეხ არაყს, ენმეზრიხ ღერთალს ერ ჩჳეთმურჯე̄ნდეს
Line: 8    ბა̄ზი̄ ლე̄თ, მაჩე̄ნა̄მდ ე̄ს ხამურჯე̄ნდეს ლა̄შხე გიმჟი, ეჩჷნღო
Line: 9    ჟენგენი ლეჩი̄ჟჷ̄რი̄ მუ, ენკედ ეშხუ ჭიქ არაყს, ქა̄დინე მიჩა
Line: 10    ლეთრეღლჷ̄ლი დი̄ნათე, ჩჳესჩოქჳი მიჩა სგობინ, ჩჳადმეზრი ამჟი ერე მაჩე̄ნე
Line: 11    ე̄ს ხა̄ფსე̄ნს მიჩა გჳარისა დი̄ნას, ეჩთა̄ნუ ლოქ აჯფასე̄ნა სი̄ საბრა ლოქ
Line: 12    მიჩა ლეთრეღლჷ̄ლის, არაყს ჩუ ლეჲთრე ი დი̄ნას ქა ლახო̄დნე
Line: 13    ჳოხუშდ მანათს ი ჲედ თუმანს ჲედ სემი მანათს ნაყდა̄ნჳად-ლჷშანდ.
Line: 14    სერ თერღლა ლი, ათხა̀დ ლეთრეღლჷ̄ლი ი ხოსგდიხ იმჟი̄ კალონიერ
Line: 15    ჲეხჳს, ამჟი̄ ამჷნღო, სერ ჩი̄ჟასი̄ ჟახა ლჷმდად ხაყლეხ ჩი̄ჟას ი ლე̄ჲხუ̄რის
Line: 16    ჲეხჳს, ქალჷფი̄თქ ლი სერ გჳეშ, ლეპჟუნე დე̄სამა არი. ათხად და̄ს
Line: 17    მა ხოხა̄ლდა ალ გჳეშიშ დე მეზჳბელს დე მესჳფელს დე ნა̄თჳარალს ი
Line: 18    დე და̄ს ი ათხე სერ მაგ ჩჳედკჳი̄ნე, ალჲარე ლიბრჲა̄ლ ი ლიღრა̄ლ ჲესჳა̄ჲ
Line: 19    ლეხსჷმი ერე ეჩა დი̄ნა ლოქ ოსყედნა გოჩშა ჯაბას მიჩა ჭყინტიშდ.
Line: 20    ჲერხი ლე̄ქჳნეხ ერე გოჩშე̄რ ლოქ ოსყედნახ. სახლინახობ ლე̄თ
Line: 21    ძღჷდ ხინ ხე̄რიხ. ალ დი̄ნა̄ ქორშალე მეხჳბარალი̄ ჟი ერ ენბაჟნეხ სახლინახობ
Line: 22    ლე̄თს, ქა̄ნჴდენიხ უწჲა-მაწჲად ი ეჯჲარსი̄ ხინ ხე̄რიხ ეჯჲარცახან.
Line: 23    ჲერხი მა̄რე მე̄რმა ლადეღ მუყჳსგიდ ჴედნი, ჩუ ერ ედკჳი̄ნე, ეჩეჩუ
Line: 24    ხინ ლოქ ლი. მე̄რმა ლადეღ ნებოზნუნ აშ ილხნჷნიხ ეჯ მეზგამჷყ,
Line: 25    ლითოფი̄ მე̄ჳარ ხე̄რიხ ყაბახთე-ლჷშანთე ჲედ ხამი თხუმ ხეგნიხ ლჷშანდ
Line: 26    ი ჲედ აშ ლჷშან. მე̄რმა ლე̄თ ნებოზთე ნაღალდ მე̄ჳარ მაშდმა̄რ ადინეხ
Line: 27    მინე აგითე მაგ. ჩი̄ჟო̄ლ ჩჳასდენი მიჩა ლამთილარმჷყ. ეჩჷნღო
Line: 28    ჲეს ლეჟა ღჷ̄რნი ჩი̄ჟე მიჩა აგითე ი ჲეს ლექჳა ჴედნო̄ლნი
Line: 29    ლამთილართე. ლიგჳირგჳინა̄ლნუნ აშ იზელა̄ლნი ლეჟა ჲედ ჟიჩუ მიჩა
Line: 30    ქორთე ი მიჩა ლამთილართე.

Line: 31       ეშხუ ნაგზი ერ ქა̄დინე ლჷყდა̄ნჷნღო, ლოხჟოღჳნიხ ლამთილარს,
Line: 32    ლამთილარე ღჳაჟარჷნქა მინე მეხჳბარალს ინჴრა̄ნეხ მახა ძახლართე
Line: 33    ფი̄შირ მა̄რას ი ლეჟა ღჷრიხ. ჩი̄ჟა̄ ქორთე ჲერუ ნაზემ ღჷრიხ.
Line: 34    ჩი̄ჟემი ქორხენ სგობნე სალინახობჟი ე უსგჳა მა̄რე ი̄რო̄ლ მეჴედ,


Page: 31 
Line: 1       ათხე̀ დი̄ნა̄ ქორხენ ღჷრიხ სახლინახობჟი̄ნაშდ ჩი̄ჟე̄მი ქორთე
Line: 2    ჲეშდ ჲერუ მა̄რე ი იმჟი̄ ლამთილარმჷყ ხინ ლას, ჲერუ ნაზუმ
Line: 3    ხეკჳეს ღალ ჩი̄ჟე̄მი ქორისა ხაყრიხ ხინ ლიზობშჳ, ლითრეჳშ,
Line: 4    ლითოფშჳ, ლიღრა̄ლ-ლიბრჲა̄ლშჳ ი ჩინოჳშ, ოდო ეში̄ ხემდეხ
Line: 5    ლეჩჟჷ̄რი̄ ქორშალს თხუმს ი ძღჷდს იზჷ̄ლჲელხ ი იღუ̄ლჲელხ. მასძელ
Line: 6    ქორხენ ლიღრეს ქუნუშ არი, მარა̀ თხუმს ეში̄ ხემდეხ ეჩხა̄ჳ ი ძღჷდს
Line: 7    იჳდჲერა̄ლხ. ლეთრეღლჷ̄ლი ერ ხოლა ხეყე̄დეხ, ეში̄ იჳდჲერა̄ლხ, ოდო
Line: 8    ჩუ ერ ადჷმჯა̄რჳახ, ღო ცჳერა ხეფსი ეჩქა,* მეჲად ღალ ხაკუჩდ თხუმ მენკჳად
Line: 9    ი ლათა̄ჳსა̄ლუშ ეხჩჷ̄დეს, ოდო ლემყალ ლი ცჳერობაშ, ეჩქა̀ ღო
Line: 10    ქა ხაყა თელდ მეზგე, ნაჳბედრი ი̄რი̄, ე ცჳერობ ხეფსი. ნებოზს
Line: 11    ლი̄ზა̄ლთე ნაღალდ ქა̄ნგენნეხ ძახლარ მაჩე̄ნე ჴანარ, მა̄ჲმა ხეყე̄ნი ქორისა
Line: 12    ი ალჲარ, დი̄ნა̄ მაყრალშა̄ლ მჷნჴრინა̄ლა, ენთიშნეხ მაჩე̄ნა ჴანს, ლეხჟოღჳნიხ
Line: 13    სგობინ ი ანჲესხ აგითე, მარა̀ აშ მაშდმა̄რა̄ლ ი̄რიხ ერე ეშ
Line: 14    იტჷრტანჲელხ მაგ ი ეშ იბჷრცანჲელხ ნამშდჷმოშ, ჲერხი შუკჳარისა
Line: 15    სედნი ნამშდჷმოშ. ალ ჴანს ხა̄იშხა კეცხა თხუმ. კეცხა თხუმი ნაჳდუნ
Line: 16    ლი ალე. მა̄ჲ მაჩე̄ნე ხებნი გჳალა თხუმს, ეჯის ხა̄ჳდიხ ათხე̀ კეცხა
Line: 17    თხუმდ, სერ გარჯ ლი ცჳერა ამჷნღო, კეცხა თხუმ ერ ქა ლჷჳოდ ხა̄რ,
Line: 18    ალეს ღო დაგრობ ხეფსი ხჳაჲდინ. შომა̄ჲ ცჳერობ ხეფსი, ემოშ
Line: 19    იჴერჴი ნამსყი, ღო ლიმო̄რაჳ ხეფსი უდგა̄რჲელად, ედოშ იჴჷრჴი
Line: 20    ნამსყი, ღო დაგრობ ლი ეშიჲეში̄. კეცხა თხუმი ლუჳოდჷნღო დი̄ნასი̄
Line: 21    აჲესხ ჩი̄ჟემი ქორთე ლამჳერხენ (მიჩა ქორხენ) ლამთილთე ი ჲეს
Line: 22    ლამთილს არი დი̄ნა ი ჲეს ლამჳერს ი ჩი̄ჟეი̄ ამჟი იჩო, ჲეს მიჩა ქორს
Line: 23    არი ი ჲეს ლამთილს ჲეხჳცახან. ლიგჳირჳინა̄ლნუნ ამჟი ლი.

Line: 24       ჩუ̄ჲ ხექდიხ, ემოშ ითხე̄ლიხ თხუმს შდა̄შჳდ ჭყინტ ი დი̄ნა, ქუნუშ
Line: 25    არიხ უშხჳა̄რე ლითხნეს. ეშჲეში̄ მე̄ჳარ ხოდრჳანიხი̄ დე̄მამ აგი̄შარ ალ
Line: 26    ბედი გჳეშარს ლიგჳირგჳინალნუნ ლეჭშჷრის ი ლე̄ჲხუ̄რის. დოსგჷნღო
Line: 27    მჷრე̄ს ლი წესდ ამჟი ი ათხე̄ჲ ამჟი ხა̄რხ. სერ ხემა̄რა̄ლხ ლექორწილ
Line: 28    კეთილი ლიმა̄რეს ი ნაჭჳლაშდ ნაჳდუნი ლიმა̄რეს. ნაჭჳლაში ლიჳდი
Line: 29    ლირგაჳა̄ლჟი ლი. სგობდ ასკბეხ ნაჭჳლაში გჳეშს: "ამზუმს ლოქ იშგოხ
Line: 30    დი̄ნა̄ ქორშალ". ხენდიხ; ედჴიდეხ ი დი̄ნას ადჲესხ ი ხენდიხი̄, დემ
Line: 31    ედჴიდეხ ეჯზუმს ი დი̄ნასი̄ დეშ ადჲესხ. მეცჳრე ი̄რიხ ი კინჩ მექჳცე
Line: 32    ჴეჳისა. ათხა̀დ ხოშა ხახლე̄ნახ ნაჭჳლაშ, ჲერუ სემი უ̄ღჳა ჴანარ, მარა̀
Line: 33    ათხე̀ დროჲჟი ხოხრა ხოხალხ ნაჭჳლაშ. ბარგიშდ ხა̄რხ ფას ლეჳდი
Line: 34    დი̄ნა̄ მუეშჳდ, მაჲ ზუმსი̄ ესგიჭხ, ეჯი დი̄ნა̄ მანდა ლი ბარგი ფას.
Page: 32  Line: 1    მინეშჳდ ხეხჳიხ ნაჭჳლაშდ ნაკიდ კეთილ ი ბარგი ფასდ იმჳა̀ჲ ედჴიდეხ,
Line: 2    ეჯნო̀ჳშ ბარგ ხეკჳეს ენყიდე̄ნდეს. ნაჭჳლაშჟი ერ ჩჳედსყიხ ი ქა ერ
Line: 3    ედჴიდეხ კეთილს, ეჩჷნღო ასკბეხ ლემჟღორად ქორწილს. ჩი̄ჟე̄მი ქორისა
Line: 4    ძღჷდ დო̄სგნეშ ენმა̄რიხ ლა̄ნშყა ხამარშჳ, ლაძჲა ჴანშჳ ი არყი
Line: 5    ლი̄რაყიჳშ. ნათხუმ არაყს მო̄შ ადშხუნნეხ ი ჲერხის არაყს ქა̄ჲ ადსიპნეხ.
Line: 6    ხოშა ბჷგი ხეფსი ი ხოშა შდჷმაჲ ი̄რი. ნა̄თ-მჷნა̄თის ჩი̄ს ქა ხაბჟი̄ნნეხ
Line: 7    ი ეჯჲარი̄ ჟენმა̄რიხ მინეშხენ ი ეჯ ლადეღ, ლჷწჲად ერ ანჴდენიხ,
Line: 8    ნაწჳარდ ბატკს ოხჴიდეხ ი ეშხუ სტამა̄ნ არაყს. ჲერხი მჷქორწილ
Line: 9    მეზგას ჲერჳეშდთექა ხენზო̄რი ბატკარ. ხოშა ნაღალდ ბატკარს ხამრა̄შს
Line: 10    ხაყლეხ. ნაწჳარდ ლაქორწილჟი წეს ლი ნა̄თიხენქა ბატკი ლიჴდე

Line: 11       გამდრჳალ მუჟღორ ი̄რი ქორწილ, ბაპს ლიგჳირგჳინა̄ლ-ლადეღნუნ
Line: 12    და̄რ მა̄მ ხაბჟი̄ნეხ. მესკბა ლადეღ ლაქორწილჲაშ ანჴდენიხ ჩი̄ჟე̄მი
Line: 13    მაყრალ, ჩი̄ჟე არგებს ანჴეს ლაქორწილჟი ლამთილართე ი არგებს მა̄მა
Line: 14    მაყრალცახან, ეჯი მიჩა მანდა ლი. ხეჟბი, ანჴდენი. მა̄ ხეჟბი̄ დეშ
Line: 15    ანჴდენი. ამნო̀ჳშ გჳეშ მა̄მ იდა̄ჳში, ეჩა ლიჴედჳშ ი ნაუჴედაჳშ. ჩი̄ჟემი
Line: 16    ქორხენ ჲერჳაჲ ი̄რი, მა̄მა სერდე ლი ი ემო̄დ ი̄რიხ ჲადურდ, ეჯღა̄ჲ
Line: 17    მა̄მა ი̄რი. მინე ნაზჷზ მაყრალ ჩუ̄ ლიხ ი სერ ეჯი მა̄მ სერდე-მერდე
Line: 18    ლი. დი̄ნა̄ ქორისა მაყრალ კოჭო̄ლს გარ ირა̄გეხ ლალხინდ, ნებოზს
Line: 19    ერ ანჴდენიხ ეჯ ლე̄თ, თერღლასი̄ ადჲესხ ი ატხენიხ უდ. ოთჷნჴერნიხ
Line: 20    წჳილს ფი̄შირ მაყარ ჲერჳეშდთე ქა. დი ჩჳასდენი ეჯ ლე̄თ აგის ი
Line: 21    იშგენს ჲერჳაჲს ხენდიხ, ადინეხ ლაქორწილთე ჩი̄ჟემი ქორთე. ადჲესხ
Line: 22    მინეცახან ეშხუ უ̄ღჳა ჴანარს ბარგი მჷჲესდ ი კალათი მჷჲესდ.
Line: 23    კალათად აჲესხ ჲედ ფურს ჩულჷძჲას ჲედ ხამს, ეჯისი ჩულჷძჲას ი
Line: 24    მეყჳფას, ეშხუ დორაჲ არაყს ქანასიპს ი აშირ შჳეთს. ალ ჴიდს
Line: 25    ხა̄ჲშხა კალათი ლიჴდე ი ალე ამჟი ლი წეს ლა̄შხისა.

Line: 26       ძღჳენშა̄ლ ოსღჳახ დი̄ნაცახან კალათ ჴანარშჳ. მექორწილთე ერ
Line: 27    აჴდენიხ, ი̄რი ჲეზჳისა ლითოფ, სგა̄დჲესხ ქორთე. ყო̄რალჟი ხანჯრალ
Line: 28    ხებკიხ ეჩხენ ამხენ ი ეჩა ჩუქჳან ადგჳეწჳნიხ თერღლას. ალეს ი ლითოფს
Line: 29    ეჯღა იჩოხ ერე ქორთე ლოქ დო̄სამა ეხყე̄დეს ჲე მათხეფ ჲედ ქაჯიჲ-ეშმაჲ
Line: 30    ჲედ ხოლა თეჲაყბა. სგა̄დჲესხ ქორთე, გირგტანდ ახციპჳნიხ
Line: 31    ლერსგჳენთე ნაღალდ კერჲაჲს, ლოხხელნეხ შაქრი ნაკჳიშუ̄ლს ი ხე̄ქჳნეხ:
Line: 32    "ა̄მჟი მუჭხჳიდ ლოქუ ოგმეჩე̄ნახ". ისერ ტაბაგჟი ჩუ ლისგჳრა̄ლდ
Line: 33    დედჳფალია̄ქ წჳილ ი მიჩა ლჷჭშჷ̄რი ჭყინტ მინე მაყრალშჳ ჲედ ეჯ
Line: 34    ლე̄თ ი ჲედ მე̄რმა ლადეღ წირი დროჲჟი ჟადრი̄ნეხ საყდართეჟი ი
Page: 33  Line: 1    ეჩეჩუ ჩჳადგჳირგჳნი ეჯჲარს ბაპ. ჯჳინელ ჩიქა ხენდო̄ლ ა მო̄დე დი̄ნას
Line: 2    ეჯ მიჩა ლეჭშჷ̄რი̄ლ ჭაშდ, ქა დეშსა მოშ ყჷლა ჳარს. ლიწჳი̄ლესი̄
Line: 3    და̄რ ხეჭჳდიელდა. იმჟი̄ მიჩა დის ი მუს ხო̄ნდახ, ეჯჟი იჩმჷდახ. ეჩხა̄ჳ
Line: 4    ადწჳი̄ლნახ ა ამხა̄ჳ, ეჯი მინე მანდა ლას დი̄ნა̄ უჭჳდიელად. ჩიქე ათხეი̄
Line: 5    ამჟი ღო̄თაშ ლი აჯაღ, მარა̀ ზჷმჳშ ქა ხეჭჳდიელხ ლეწჳი̄ლე დი̄ნას,
Line: 6    მარა̀ ეჯზუმს დე̄მამ ეშჲეში̄. ხჳა̄ჲდინ ღალ იღჳრჲელ დი̄ნო̄ლ: "დედე̄
Line: 7    ლირდე ღჳარა, ეჯი ლოქ მა̄ მაკუჩ ჭაშდ", მარა ეჩა ჳარა ლი̄ქჳი̄სს და̄რ
Line: 8    ხაჭიმ ი ეჩა ნაგჷრგალი სერდე̄ჲ მა̄მა ხა̄რხ.

Line: 9       ჩუ ერ ედგჳირგჳნიხ ი დი̄ნა ლამთილთე ადინე. ე კეცხაშ მო̄ ხენდო̄ლ
Line: 10    ეშხა̄ჳ ლიწჳი̄ლე, დე̄მ იგნი ეჩქა̀ ლამთილჟი ი ხეჩე̄დჳრიელ
Line: 11    ჭაშს ი ხოლა ლიჲახჳ-ლიჭაშ ხა̄რს. ნაგჳირგჳინა̄ლუნ ბაპს ჲერ
Line: 12    სემი მანათს ხა̄ჳდიხ, ჲერხი ჳოხუშდს ი ჲერხი იშგჳიდთექა, მარა̀
Line: 13    მე̄ჳარ მამჭირჳა̄ლდ იჴდეხ თეთრს. ჩჳანტხენიხ ლიგჳირგჳინა̄ლჷნღო
Line: 14    ქორთე ძღჷდ ლათფუშ ი ლაბრჲა̄ლუშ. მეფე-დედფალ უშხჳა̄რ
Line: 15    ხოგდურიხ ი სგობინ ხოჟოღჳხ ჩის მინე მჷნჴრა̄ლას ი ჩჳანჴდენიხ
Line: 16    ქორთე. ყო̄რალჟი ჩუ უდ ესხჳიხ დაშნაჲშჳ ი ხანჯარიშჳ ქალჷწა̄ნაჳშ
Line: 17    ი ეჩა ჩუქჳა̄ნქა ადგჳეწჳნიხ მეფე-დედფალს, ჩჳესსგურნეხ
Line: 18    ქორს, ჩოსგემხ ტაბაგს, ოხჴიდეხ თუს ჲედ შაქარს, ქალახლო̄კჳნიხ
Line: 19    მუჭხჳიო̄ლს ჲერქდა̄შ-ი̀ ხე̄ქჳნეხ: "ამჟი თუდ ი შაქარდ ლოქ
Line: 20    ოგმეჩე̄ნად!" ჩოსგემხ ჭიქს საჩაინს ჲედ საინს ი მანკჳი ძმობილ
Line: 21    ჲერჳაჲ ი̄რი, ეჯი ესდე̄ს თაჳგადასაგდებს ი ეჩჷნღო იშგენ ეჩეჩუ
Line: 22    მერდე̄ლ ოთჴიდეხ ი სგე̄სდე̄სხ საინთე ჲედ ჭიქთე. თაჳგადასაგდებობ
Line: 23    ერ ქე̄დგა̄თჳი, მეფე-დედფალს ჟანგენა̄ლნეხ ტაბაგხენ ი სერ ხეშდბიხ
Line: 24    ქორს ლიმსახურს მაყრალეშ ი მუშგჳრალეშ. დედფალს ხონჴრი
Line: 25    ლამჳორხენ დად. დად ზურა̄ლს ხაჟხა დედფალი მჷნჴრის ლამჳორხენ. მე̄რმა
Line: 26    ლადეღ დედფალი დიე ლაჴდათე აზზიხ მა̄რას მჷწი̄ს ი ჴჷდეხ
Line: 27    ქორწილთე მე̄რმა ლადეღ გარ. დადს ეჩქა̀დ ხაშჩუქრუდახ იმჳა̄ლამ, მარა̀
Line: 28    ათხე̀ ზჷმჳშ გარ. მექორწილა ერ ჴედნიხ, ეჯ ლე̄თ ტოლიბაშ მასძელიშ
Line: 29    ლი, მე̄რმა ლადეღ მაყრიშ ლი. ხჳაჲდან ლიცჳა̄ლ ხოჩჷ̄დნიხ მაყრალს
Line: 30    წჳილი მჷნჴრის ი მესჳფელს, მასძელი ლჷწჲა მუშგჳრალს,
Line: 31    ი ხო̄გხ ხანჯრა̄ლობ. ხრმჷნ-ტურმუნ ი ჲესიჲეს ძღჷდ ბჷგი ლიქა̄ჩიელი̄
Line: 32    ლი. მასძელარ აზჳიხ, ხა̄ლ მოშ ხა̄ჲმედახ, ი ლაზჳენჟი მინს ერ
Line: 33    ე̄სამა ხორკენიხ, ნაყირ კადარდ ჲედ მჷძღირდ. ეჩქა̀ ხაყლეხ ერე
Line: 34    ღერბეთხჳარა ჩუ ლოქ ეთზაჳა̄ნდ, ოდო მუ̄მბჳიდ ლოქ და̄ს აჯფშჳდე აგითე.
Page: 34  Line: 1    ქორს ერ ჟენგენიხ მაყრალ ქა̄მ ჲეზჳისა, ლი̄ზა̄ლჲა ტაბაგს უდ ხოგემხ
Line: 2    ი ეჩჷნღო ედმუშგჳა̄ნნეხ ლაბჷრცანჲელუშ ი ლატჷრტანჲელუშ მაშდმა̄რ
Line: 3    მუშგჳრალს ი მაყრალს. დედფალი დი ჩუ სედნი ეჯ ლე̄თ ძახლარმჷყ,
Line: 4    მე̄რმა მესმა ლადეღ გარ ღჷრი აგითე. ედგა̄თჳან ქორწილ ლა̄შხისა
Line: 5    ლჷჩმი̄ნ.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.