TITUS
Svan (Lashx) Texts ed. A. Oniani
Part No. 11
Previous part

Text: 11 
Page: 34 
Line: 6 
XI. ლა̄შხე ლაგჳან-ლაშდხჳა̄ლ ლეჯგრი-ი̀ ლაშრაჳა̄ლ.


Line: 7       ეჯემ ჩუ იდგარი მა̄რე ჲედ ზურა̄ლ, ჩიქ ასაბიაჲ მიჩა ი ღო მესჳფელ
Line: 8    ჴედნი მაგ ი ჩუ იგჳა̄ნეხ თჳთო̄ლაჟი მაგ. ეჩჷნღო ჩეჳეხ მეხჳბარალ
Line: 9    უშხჳა̄რისა ი ხაკფჷნეხ ლჷდგარა ქორშალს, ლაგჳან ლოქ ამკალიბ
Line: 10    ლჷჩმჷნად ი ხა̄ლ მოშ ხოჩულ ლაგჳანს ხაჩმა̄ნდჳნეხ, ეჯი ხოშა ჟახე
Line: 11    ხაბჟახ, ცხიდ დეშერდ ხეკჳეს ოხკჷდის ეჯ ლაგჳანს ი ეჩქა̀ ყჷლეხ ერე
Line: 12    ძღჷდ ჟახი̄რიან ლაგჳან ლოქ ლას, სერ ამშა გუ̄ნღა დესამამ აზა̄რეხ.
Line: 13    ხეღჳე̄ნჲა მო̄დე ლჷდგარა პატრონ მეზგას, ეჩა̀ სერდე და̄ს ხა̄რ, ღო ქა
Line: 14    ჳოდიხ გიმს ი ეჩა ნაფასჳშ იყდიხ ლელგჳან კეთილს, კჳეცენს კაკალდ
Line: 15    ჲედ ლუგჳეჲს ი არაყს. ხა̄ლ ჩჳედდაგრი მა̄რე მეზგა̄ჲსა, შიშდ ჟი
Line: 16    იბნეხ ლირბიელს ეჯ ქორისა მეხჳბარალე ზურა̄ლე̄ლ ი აშ ირბიელხ
Line: 17    ლაგჳან-ლადეღნუნ. ქა ინგრიშეხ, მინე სოფელისა ჳოშა ქუნ მა̄რე არი
Line: 18    ჲედ ჳოშა მჷნწჳარი ჴედნი ლაგჳან ლადეღჟი ი ეჩა ანგრიშჟი ანმა̄რნეხ
Line: 19    კჳეცნა სეფესკჳერს ი არაყს მუგჳანა̄ლა ლეთრად.

Line: 20       ჩულჷდგარჷნღო მე̄რმა ლადეღ კუბი მჷტა̄ბა̄ლას ჴჷდეხ ი ჲერუ
Line: 21    ლადეღ ჟატა̄ბიხ კუბს ი ქალჷგა̄თუნღო სგა̄სგჳჯინეხ კუბთეჲსა
Line: 22    ლჷდგარს ი კუბ სგობინისა ჩჳაფი̄ნეხ ნაბადს, სგა ერ ხოჩქოჳიხ
Line: 23    ლჷდგარს. ეჯჲარე მორდები გუ̄ნღა იჩოხ. ღულა̄რ ლოქ დო̄სა
Line: 24    ოხგებეხ სგირიჟი ცარჲელ გიმჟი ნაჩქოჳ. ლჷდგარა მე̄რმა ლესგხენ
Line: 25    ჯო̄დი სკამ ლჷგ ი ეჩეჟი სგურხ ლჷდგარა ასაბიე̄ლ. მუგჳა̄ნა ერ
Line: 26    ჴედნიხ, ჳაჲ-ჳაჲს ესტუ̄ლნეხ ი ასაბიაი̄ ჳაჲ-ჳაჲს ლე̄ქჳნე, ეჩქა̀
Line: 27    მუგჳა̄ნე სგა ლოხჩოქჳი ლჷდგარს ი ხაშჷლდანი ამბჳარს, მა̄ჲმა
Line: 28    ხაშყიდ ეჩა̀ ლუჳარდ ლარდოშ ნაჩომ-ნა̄ქჳი̄ს, ამჟი ქა̄ჯო̄დჳნე ლიგჳა̄ნეს
Line: 29    ჳობა ხანს. ამშა ლაგჳა̄ნაჟი ჩუმესგჳრე ასაბიაჲ ჩულუჩჳმე ლიხ
Line: 30    მაგ ი ქა ერ ადგა̄თჳნე ეჯი ლიგჳა̄ნეს, აჯაღ-უდ ლე̄ქჳნე ჳაჲ ჳაჲჲ
Line: 31    ლოქ ი ეჩქა̀ მე̄რმახენ ასაბაჲაჲ ოსცა̄დუნნე ჳაჲ-ჳაჲჲ ლოქ ი ამჟი
Line: 32    ქე̄ნხირსი თჳითო̄ლაჟი. ჲერჳა̄ჲ ჩუ ი̄რდიხ ეჩეჩუ მუგჳა̄ნა̄ლა. ლაგჳა̄ნ
Page: 35  Line: 1    ლადეღდ ასკბეხ ჩულჷდგარჷნღო მესმა ლადეღს. ძინარს დო̄სგ ჩიქე
Line: 2    ჟენხურჲელი სოფელ ლჷდგარ მეზგე̄მი კალისა ი კარპანისა, ეჩეჩუ
Line: 3    ჟილჷმა̄რე ლიხ ჩი̄მიშჳდ ლესჳფელად ლასგჳრე̄ლ ი ტაბგარ, ნე̄სგა
Line: 4    კალთე ანჴდეხ ჭყინტარ ხოშა ცხიკო̄ლარშჳ ქამჷნაყ სეფსკჳერალს ი
Line: 5    ჩჳესგემხ ნე̄სგა კალისა. ანჴდეხ არაყს უსგჳა იშგჳიდ დორაჲს ი თხუმ
Line: 6    ლჷცი̄ნცას ჩჳესგემხ ეჯისი̄ ცხიკო̄ლარცახან. ზურა̄ლე̄ლს ოხღჳახ ჩი̄ხენ
Line: 7    სოფელხენ ნა̄ყუნჳარ ჩოინ-ი-ცხჳადჳარშ ი ეჯჲარსი̄ ჩჳესგემხ დიარშჳ
Line: 8    გოში ცხიკო̄ლარცახან. მო̄შ ესგემხ ეშხუ ტაბაგს, ჟესსყე̄ნეხ
Line: 9    ეჩეჟი ჲეშდჲერუ სეფსკჳერს, შოთარსი ქჷნშა̄რალსი̄ ი ფაკნიარშჳ
Line: 10    ნა̄ყუნჳარს, იმშა̄ჲ ჩუ ხეღჳენიხ, ჩი̄მიშს. ჭიქარს ესგემხ ტაბაგჟი
Line: 11    არაყჳშ გოშის, ჟანტჳარნეხ სემი მუტჳარს, ესტუ̄ლნეხ: "ჯიმ ლოქ ნო̄სა
Line: 12    ოგჳე̄შდჷ̄ნდეს", ანჴდეხ ჯიმს ი სერ ქა ხაბჟი̄ნეხ ბაპარს, ტაბაგი
Line: 13    ლაჯგირთე ლოქ ანჴადდ, ბაპ ქა ჴედნი ი ჩჳაჯგრი ტაბაგს, ეჩჷნღო
Line: 14    ღოშგინ პილს ლიჯგრი̄ ქალიგა̄თჳა̄ლთე ტოტჳშ ენკედ ბაპ ჯიმს ი
Line: 15    ჟესპიო̄სნე სგობინჩუ მჷსყა ტაბაგჟი დიარალს, არაყს ი ნა̄ყუნჳარს ი სერ
Line: 16    ტაბაგ ძინრი ხეჳსობაშ ჩულჷჯგირ ლი ი ჩუ ისგჳრა̄ლ მაგ მესჳფელ
Line: 17    მა̄რე, ბობშ ი ზურა̄ლ ჟილჷმა̄რა ლასგჳრე̄ლჟი, სგა ხესგჳრიხ ტაბაგს
Line: 18    ი იბნეხ ლიხე̄ჳსა̄ლს ძინრიშს, მახე ჭყინტარ ამღჳინეხ არაყს, ჟი
Line: 19    ხაგხ თხუმჟი ჩუმესგჳრა̄ლას ი ხაჭმი̄ნეხ ლამღჳინა ჭიქს მა̄რემი ქუნე
Line: 20    შელდჟი ჩი̄ს.

Line: 21       ეშხუ ხოშა ლალხოშ მა̄რე ჩუ იგნი მჷმზჷრა̄ლიდ ი მასძელსი̄
Line: 22    ბოდიშს ხაყლე ერე ამშელდ მა̄რე მე̄რმაჟი ისგჳემჷყ ლაქორწილდ ი
Line: 23    ლაპრისდა̄ლდუ ლოქ ალხურჲელე̄ლი, ამკალიბ ლოქ ქალჷქა̄ბნეუ ჯა̄რ
Line: 24    სალხინდუ ლოქ ლაჯჴედა ალე მაგ მუშგჳრი მე̄რმაჟი, ლედგარს ლოქ
Line: 25    შჳენდბაუ ხა̄რ ი სგაჲ შჳიდბა, მარშჳნიშ ლოქუ ლი ალ ქორისა
Line: 26    ამკალიბობ ი ეჩჷნღო ჩუ მესგჳრა მესჳფელას ხე̄ქჳნე ერე ჲერჳაჲდ ლოქ
Line: 27    ლადი ხოჩა̄მდ ჟენჷლხინას ი ლჷდგარს შჳენდბა ოთჭირას ი მასძელ
Line: 28    ხოლა̄მდ მო̄დ ანურშონას, ჲერს მადილ ლოქ ხე̄რი ი ჲერს ჟახე ი
Line: 29    შჳენდბა ლჷდგარს ი შჳიდბა ლოქ სგაჲუ ჯა̄რ ი ჩოსშჷნდობნე
Line: 30    ჭიქხენქა ლჷდგარს ი ლე̄ქჳნე აჯაღ: მაჲ ლოქ ამა-ბუა̄სდს ლირდე ეჯთჳაფ
Line: 31    საბრა ლოქ გოგი ჲედ გეგი (მაჲ ი̄რი ლჷდგარა ჟახე, ეჯის ანჷრშონნე),
Line: 32    ეჯი ლოქ ღე̄რბათს ეჩა-ბუა̄სდს ლოქ ლოხტი̄ხა ისგჳაჳ ხოჩა̄მშჳ,
Line: 33    ალე მაგ მასძელ ი კეთილ მაგ ზეთ ლჷჯგირდუ ლოქ ლაჯზაზე̄ნა
Line: 34    ეჩა-ბუა̄სდთე ი ჩულეჲთრე კაჩუშ. ჭიქი ქალჷცრიელან ჩოსჴჳა̄მნე
Page: 36  Line: 1    მე̄რმა ხოშა ი ხომჩა მა̄რას. ეჯი̄ ამჟი ლე̄ქჳნე, იმჟი ამნე̄მ ლე̄ქჳ ი ქე̄სჭიმ,
Line: 2    ეჩჟი ჩი̄ს მიჩა მიჩა ნა̄თიჟი მაგ ამზჷრი მასძელს ი ხოშჷნდობი
Line: 3    ლჷდგარს. ლაშჷნდობჟი ჴაცდ იყდა̄ნიხ გოში ჭიქს ი ქა ბჷბეხ კო̄ჭოლს
Line: 4    ტაბაგთეჟი არაყს ი ალეს ხა̄ჲშხა ლიშჷნდობი ლჷდგარაშ.

Line: 5       ტაბაგჟი ხოსყა ჩი̄ს თჳით სემი სეფსკჳერ ჲედ თჳთ ჳო̄შთხჳ ი
Line: 6    თჳით ფაკან ნა̄ყუნ ჲედ მერხელ ჲედ ლობიო ი ჲედ იშგენ, ტელე̄ფი,
Line: 7    ქალაკოდაჲ, მანჭკჳარაჲ ი ჭა̄ნტი, მარა̀ ჭა̄ნტის ხოშა ლუგჳნიანდ
Line: 8    ხოგდურიხ ი ბაპრე სგობინთე გარ ჴჷდეხ, იშგენს დეშ ხეხჳი ჩი̄ის
Line: 9    ლერგაჳიდ.

Line: 10       ისგ-ხეჳსობჟი ენთიშნე სოფელ მოსფლაჳა მა̄რე̄ლს სემი-ღე̄თს
Line: 11    თემნ ი თემნ ი ადზჷზნეხ საყდრი სუფთე საფლაჳი მუქჳცად.
Line: 12    ისგლიდჲარა̄ლჷნღო ქა ჴედნიხ ქორხენ ლჷდგარა ასაბიე̄ლ, ხოფშირა ლიხ
Line: 13    ზურა̄ლე̄ლ, ფათჳარ ჩი̄ს ჩულჷფხი̄ჟ ხა̄რხ ი ლარჭა̄ლუშ მაგ ი
Line: 14    ლატე̄ნტა̄ლუშ ქა̄ნჴდენიხ ქორხენ ი ჩჳესსგურიხ კალეპილისა, უშგჳ ჩი̄ს
Line: 15    მესჳფელ ჩუმესგჳრე მოხე̄ჳსა̄ლ ხალხთე ხე̄რიხ ი ჟი იბნე ეშხუ, ხედი̄
Line: 16    ხოჩულ მორე̄ჭა̄ლ ი̄რი, ლირე̄ჭეს მე̄ჳარ კჷლთხი ჲერშჳ ერე ჩი̄ს ქა̄თსჷ̄ნდეს
Line: 17    ჩუმესგჳრა ხეჳსობდ ლჷმშდჷმა ხალხს. ეჩა ლირჭა̄ლს სგამჷნჴრი
Line: 18    მიჩა ზურა̄ლე̄ლ ხოქჳიქჳინიხ, ჳოშელდინი̄ ჩჳაქცე, ეჩშელდინ ი
Line: 19    ეჯი ქა იშჷლდანი ჩი̄ს ლარჭა̄ლუშ, მაგჳარღენი̄ ლას ლჷდგარ, მარა̀
Line: 20    ხჳა̄ჲდინ სურუს აფშჳდიხ გარ ი ხოლა ე̄სამა ხოჩმი̄ნა ჲედ მედგარი ლას
Line: 21    არგებს ხოლა მა̄რე, ეში̄ აფშჳდიხ ი ხოლა ლიმა̄რს და̄რ არშჳნი ათხე̀
Line: 22    ლარჭა̄ლჟი. ქა ერ აგა̄თჳნი ლირჭა̄ლს, ხე̄ქჳნე მესჳფელას ლარჭა̄ლუშ
Line: 23    ერე ჳოდ ლოქ ამჷნღო სგაჲ ლოქ დო̄სა ლეჯნეჩდე̄ნდეხ ხინჟი̄ ჭირჟი
Line: 24    საბრა ლოქ (ჲერჳაჲ ლჷდგარ ლი, ეჩა ჟახე ხეკჳეს ლე̄ქჳას), ეჩქა̀დ ლოქ
Line: 25    ისგჳე ხოლა ნო̄სუ ხასმა. მესჳფელახენ ჟი უდ ენგენი ხომჩა ლალხოშ
Line: 26    მა̄რე, ლეჲყედნი ჭიქს, ხექჳნე მჷრჭა̄ლს, შჳიდობდუ ლოქ ალშუმე̄ლხი,
Line: 27    ი ჩოსშჷნდობნე ლჷდგარს. ამჩემჟი მაგ ეჩეჩუ მესგჳრა̄ლა ჩოსშჷნდობნეხ
Line: 28    ი ჩუ ლე̄ჲთრეხ გოში ჭიქარს არაყჳშ. ჳო̄ბა ხანს ლი ძინრი
Line: 29    ხეჳსობ, ჳოდ გულჲანდ ჩუ დო ედშდჷმიხ მაგ
Line: 30    ლუზურა̄ლ-ლჷბობშ-ლუღჳაჟმა̄რდ ი ჟენგენიხ სერ ტაბაგხენ.

Line: 31       ათხე̀ მასძელა მეღჳნა ჭყინტარ ჩჳესგემხ კალისა ტაბაგს ი ეჩეჟი
Line: 32    გობჳშ არაყს ესდე̄სხ, დიარალი̄ ჩუ ი̄რდიხ, მარა̀ ფიშირ მა̄მა ი ჲერჳაჲს
Line: 33    ხეკჳდი არაყ, ითრჷნი აჯაღ ამეჩუ. ალეს საყე̄ნს ხაყლეხ. ასაბია
Line: 34    სგა ხასგურ ლჷდგარა კუბს ათხე̀.


Page: 37 
Line: 1       სერ იბნი ლიგჳა̄ნე მესჳფელახან ი მჷნწჳარახენ. კუბი ნაფდიაქა
Line: 2    ზარს ყჷლეხ მოზარა ჲერუ ბუნდ, ეჯჲარს მინე არყი მჷმღჳინე ჟი
Line: 3    ხა̄გხ ი ჩი შელდჟი ხომღჳინე. მუგჳა̄ნა̄ლა ანღრიხ თჳითჟი ი ჩუ
Line: 4    იგჳა̄ნეხ, იმჟი ჟიხი ხაჲრა, ეჩჟი. ზარ ჩუ უქჳი̄ცად ლი მეჲად. კუბჟი
Line: 5    ლჷდგარა აჳეჯ მაგ ჟი ხა̄ზ, მუთთუნი ე ლას, ღო ყა̄ლჲანშჳ თუთუნი
Line: 6    ლათთუნა̄რი ჟი ხა̄ზ კუბს. თოფ, ტამბაჩაჲ ხანჯარ, ე
Line: 7    ხუღჳა̄ნ დაშნაი̄, ლა̄რტყ, ალჲარ მაგ ჟი ხა̄ზხ კუბს. მესჳფელჷნქა
Line: 8    ჴედნიხ მე̄რმა სოფლარხენ ტერ-მოყჳარ მაგ ლჷნწჳარდ, ძახლარალ
Line: 9    ლჷნწჳარდ. ნაწჳარდ ოხღჳახ აშირ ი ჲეშდ დიარ, სეფსკჳერ,
Line: 10    დორაჲ არაყ ი მიჩა ნა̄ყუნ. სგამჷნჴრი ხეყე̄ნი, ხა̄ლ მოშ ხოფშირა̄მ
Line: 11    ითხე̄ლნე ლანწჳართე მჷნჴრი მა̄რას, ეჩშელდ, ჲერჳეშდ-სემეშდთექა
Line: 12    ეში̄. მუნწჳარს, ჳოდ ჩუ იგჳა̄ნეხ, ეჩქა̀დ ჩჳასგჳრეხ კალისა ჲედ მეზჳბელი
Line: 13    ქორისა ი ხევსობს ხაბნა̄სჳნეხ. ხოჴდეხ სეფსკჳერალს, არაყს,
Line: 14    ნა̄ყუნს ი იხე̄ჳსა̄ლხ მუნწჳარა, ეშხუ მჷრე̄ჭა̄ლ ეჯჲართე̄ჲ ქა̄ნჴდენი.
Line: 15    ლიმზჷრა̄ლს ი ლიშჷნდობის მუნწჳარა̄ჲ იჩოხ ეჩჟი, იმჟი̄ მესჳფელ იჩმჷდა
Line: 16    ხეჳსობჟი̄ნ. ხევსობჷნღო ჟენგენიხ მუნწჳარა, სგა ღჷრიხ ლჷდგარა
Line: 17    ქორთე ი ჩუ იგჳა̄ნეხ ლჷდგარს. ძინრი ხეჳსობჟი ტაბგი ნაჯგრუ̄ლ
Line: 18    ბაპს ხაჳდიხ ჲეშდჲერუ სეფსკჳერს ი ეშხუ ბოთ არაყს. ლიმა̄ჲდა̄ლე
Line: 19    დროჲს ერ ხათერხ, ეჩქა̀ სერ ასაბიაჲს ხაბნა̄ლჳნეხ გამოთხოჳებას ი
Line: 20    ეჩჷნღო ქა̄სგჳჯინეხ ლჷდგარს ყო̄რქა ი ჲეზჳისა ხეჩოხ ბაპარ წეს-აგებას.
Line: 21    თჳით მუტჳარ-ჟი ლუტჳარ ჩი̄ს ში̄სა ხოყდა̄ნახ წეს-აგებაჟი. ქა
Line: 22    ერ ედგა̄თჳი ბაპარხენ მინე გჳეშ, ჟალჯენიხ კუბს თეკჳარშჳ ი ქა̄სგჳჯინეხ
Line: 23    საყდრი სუფთე. ლასგჳჯინაჟი ლჷდგარაშ ზარ უქჳი̄ცად ხეკჳეს
Line: 24    ლე̄სეს. ჩუმექჳცა საფლაჳისა ჩჳაშდხჳიხ ლჷდგარს.

Line: 25       ჩუნატეხჷნღო ხაზნახ ქორს, ლჷდგარა ნარდჳისა აზმა̄ ლიჩომ.
Line: 26    აზმანღო ჴჷდეხ ნაწჳარალს მინე ნაჴიდს მონწჳარა ი ჩჳაჯგრიხ ბაპარ
Line: 27    ი აჯაღ ჩუ უდ ისგჳრიხ დი̄რობდ. მონწჳარა მინე ნაჴიდს იზბიხ ი
Line: 28    სოფლი მა̄რა̀ს მასძელ ხოჴდე სეფსკჳერალს ი არაყს ი ხა̄რხ ჳო̄ბა ხანს
Line: 29    ლიდჲარა̄ლ ი ლითრე. ხჳა̄ჲდინ ძღჷდ ლიცჳა̄ლიელ ხაზნახ ლაგჳნობჟი
Line: 30    მუწჳრი ი მუწჳრი ამკალიბ ჩიქა ხედრა̄ლხ უშხჳა̄რ ლეთხნად. მაშდმა̄რჟი
Line: 31    არყი ნათუნ ერ ლიხ, ეჩქა̀ დე̄სამამ ხერი̄და̄ლხ ი ხჳაჲდინ ლი
Line: 32    ძღჷდ ხანჯრა̄ლობ ი ლიქა̄ჩიელ. მახმა̄რჟი შჳანისა ძჳირდ ე̄სა ლი
Line: 33    ლიყა̄რიელ, მარა̀ ჩიგარ მაშდმა̄რჟი ხაზნახ ლიყა̄რიელ.

Line: 34       ჩულუშდხჳან ლჷდგარაშ ეჩქად ხოხა̄ლდახ "ლარგაჳ". ჳოშა̄ჲ სოფელისა
Page: 38  Line: 1    მა̄რე, ბობშ, ზურა̄ლ ი̄რდი, ეჩშელდ ჲერუ სეფსკჳერს ხორგაჳდახ
Line: 2    ჩი̄ს სოფელისა მერდას, აშ ერე მეზგა̄ჲსა ჲერჳეშდ ქუნ ე ი̄რდიხ,
Line: 3    ეჩქა̀ ჳო̄შთხჳეშდ სეფსკჳერ ხეხჳი ეჯ მეზგას ი ჲერუ მა̄რემი ქუნჟი
Line: 4    ეშხუ ყურუშგაჲ არაყ, ჩარექი ნაზჷმ. არყი მჷქაფ ღჳინელს ხორგაჳდახ,
Line: 5    მარა̀ ლეჩხუმს ერ ჟენძჳირა̄ნ ღჳინელ, ამხაჳ შჳანთეჲ ძჳირდ ე̄ს
Line: 6    ოხღჳახ. ათხე̄ დროჲჟი ლარგაჳ ქამეშყდე ლი, მარა̀ ეჩა̀ მჷქაფ ლაგჳანს
Line: 7    ლეხცხა̄ნ ი ძღჷდს იმკჳედეხ ლაგჳან ლადეღ.

Line: 8       ლაგჳანჷნღო მესმა ჲედ მეჳშთხჳა ლადეღ ბაპს წირს ხაჩმუ̄ნდჳნეხ
Line: 9    ჳორა ყჳიჟიშს. ითხე̄ლიხ ჳორა ყჳიჟიშდ ჟინაღს ჲე ღოლჲა̄ქს, ღუნსი̄
Line: 10    ლებტკჷ̄რი ხამსი̄ ი ლორს, ანყეხ ფიშირ დიარალს, ჲერხის ლჷჩი̄დარს
Line: 11    არაყს ხჳაჲს ამა̄რეხ. წირი ქამეჩდან ჟანსყიხ ტაბაგს, ჟი იდე̄სხ
Line: 12    ეჩეჟი გობარშჳ ლეღჳარს, ბატკიშ მო̄შ, ლორიშ მო̄შ, ჟინღიშს მო̄შ,
Line: 13    ღუნიშ მო̄შ, ლჷჯმარე̄ლს, თაშა̄რალს, ლჷჩი̄დარს, შჳეთარს. ნე̄სგა
Line: 14    ტაბაგჟი კამარაჲს ესგემხ წჷრნი ი თჳეთჳნე ლჷგრალშჳ ლჷსკო̄რას ჩი̄ხენ.
Line: 15    ხილსი̄ დე̄ ხაკჳდა̄ნეხ ტაბაგს. ლაძჲელე ტუფჳარს ტაბაგ ჩუ ქჳა̄ნ
Line: 16    იდე̄სხ, თხუმჳარსი̄. მუთთუნი ე ი̄რო̄ლ ლჷდგარ, თუთუნი ი̄რდი,
Line: 17    ყა̄ლჲანი̄ ჟი ლჷბდინე. მაგ ერ ამჟი ენგა̄წყობ ლი, ჯიმ ლოქ ნო̄სა
Line: 18    ოგჳე̄შდჷნდეს, ლე̄ქჳნეხ ი როდინშჳ ჯიმს ესგემხ ი ეშხუ ზურა̄ლ, ხედი̄ ხოშა
Line: 19    ძირიშ ი̄რი ჩულჷდგარაშ, ანღინე, ჩჳესსგური ტაბგი თხუმისა ი ჟენბინნე
Line: 20    წყნა̄რო̄ლდ ჩიქე ლიქჳიქჳინის, ღო ჟი ლახცხემ ჲერს ი ღოშგან
Line: 21    პილთე კჷ̄ლთხიდ ხერჭა̄ლ ჳო̄ბა ხანს ლჷდგარს. ამჷნღო ჟენკიდ
Line: 22    დი̄კონ ეშხუ ჭიქ არაყს, სგა̄დკჳა̄ნნე ეჩხა̄ჳთე̄ჲსა ლეღჳი ნახჳიტუ̄ლს ი
Line: 23    თჳითო̄ლაჟი ქა̄ხჭემნეხ ჩი̄ს ქორს მერდა̄ლას, ქა ლეჲხუ̄ლნეხ კოჭო̄ლს
Line: 24    ჭიქხენქა არაყე̄ლს ი ჩოსშჷნდობნეხ ლჷდგარს. მაგ იჩო ამჟი ქორშალ
Line: 25    ი ნაქა̄მჳარ ალ მეზგა̄ჲსა, მარა̀ ჲერჳაჲ მე̄ჳარ სგა̄ხი̄შ ი̄რი ლჷდგარაშ,
Line: 26    ეჯი დე̄მ ხაგემ შდიქს. ათხე̀ ჳოხდრისს ხოშა ტაბგი ლიჯგრა̄ლნუნ-ლიშრაჳა̄ლნუნ,
Line: 27    ალ ლადეღ დე̄მ აშრაჳიხ. ჲერხი გარ აშრაჳიხ ქორშალარ
Line: 28    ი ნაქა̄მ მეხჳბარალ. ალ ლადეღ ლჷწჲე ლიხ მეხჳბარალ ჲერხი
Line: 29    ძახლარ, მოსფლაჳა ი მომსახჳრა. ჭყინტარს ჩი̄ს ჩჳესსგურნეხ ი ხე̄რიხ
Line: 30    ხინ ეჯ ლადეღ. ალე ი̄რი ჳორა ყჳიჟ.

Line: 31       სერ ჳორა ყჳიჟჷნღო ლეხმა̄რიხ მუჟღჳრაშჳდ ხოშა ტაბგი ლიჯგრის.
Line: 32    ეჩქა̄შიშჳდ ძღჷდ ლიმა̄რა̄ლ ხაწჷხხ. ეჩქა̀ ხჳაჲ ხარჯ ხედი
Line: 33    ღალ ეჯ ლჷდგარა პატრონ მეზგას. ძღჷდ დო̄სგნეშ ხაგნეხ ლა̄ნშყას.
Line: 34    ხოშა ნაღალდ ხამს, დო̄რიღოი̄ ჴანს ჲედ ფურს, ლებტკჷ̄რისი̄
Page: 39  Line: 1    ათხანეშ ლეხმა̄რიხ ი ა̄ნშყეხ. ერ ასკბეხ ლეჯგრი ლე̄თს, ეჯ ლადღიშდ
Line: 2    ენჲერნეხ ზარჳლარს ი ლეღჳარე მჷმა̄რა̄ლას, ქა ხაწჳე̄ნნეხ ზარჳლარს
Line: 3    ლუჳარდ ლაძჲე̄ლს ჩი̄ს, მა̄ჲმა ხაყახ ლეჯგრი ლე̄თიშჳდ ი იშგენ
Line: 4    კეთილსი̄ ქო̄ხჳიდეხ სგობინჩუ. სერ მასძელი შგურ ი ჟახე მაგ
Line: 5    ზარჳლარე გჳეშ ლი. მაგჳარდი̄ ხოჩა̄მდ ი გაგფი̄რიანდ ესჭემნიხ მინე
Line: 6    კი̄ნჩხთეჟი ლჷჴი̄დ გჳე̄შს, ეჯი მინე შგურ ი ჟახე ლი სერ. კეთილს ე დოშ
Line: 7    ოხჴიდე მასძელ, ეჯი ლი მასძელი შგურ, ოდო კეთილ ჩუ ი̄რდი ი
Line: 8    ალჲარ ე დოშ ათხჳი̄ნეხ სახ-კაფს, ეჯი სერ მინე კი̄ნჩხი ქჳეცა ი̄რი, ოდო
Line: 9    მასძელიშ მა̄მა სერ. ჲაღო, საბრა, ამჟი ლი ალე! ეშხუ მა̄რას ადზჷზნეხ
Line: 10    დო̄სგა̄რა მჷწჲენა̄ლიდ ლეწჲენა̄ლიშ, ძახლარალეშ ჩი̄თე, იმე̄ჲ ჩუ
Line: 11    ხეყე̄ნი მასძელს მიჩა ეზარ-მა̄რე. ბა̄ზი ეზარ-მა̄რე მაგ ჩულეწი̄ ხა̄რხ,
Line: 12    ლახჳმარა̄ლ გჳეშ მა̄ ლი ლიჯგრი ლე̄თ, ხოშა ლაშრაჳა̄ლ ლე̄თ ლი ალ
Line: 13    ლე̄თ ი მაგ ხეკჳეს ხეწეს, მაგჳარ ლაშრაჳა̄ლ ლე̄თს ედჩო ი მაგჳარ
Line: 14    ჟახი̄რიან ტაბაგს ოსჯგირნეხ ლეშჷნდობი გეგის (ჲედ მა̄ჲ ი̄რი ლჷდგარა
Line: 15    ჟახე, ეჯის ლე̄ქჳნეხ). მესჳფელი ლაწი̄თე ნებჳზა პილთე გარ აზჷზიხ
Line: 16    მჷწჲანჲელას. თჳით მა̄რე მეზგახენ ჲედ თჳით ჲერუ ი̄რიხ
Line: 17    ლჷწჲე. ხოჩა ლჷცხირდ ხო̄მბჳიხ მჷწჲანჲელა ლეწი̄ მეზგას ერე ამშელდ
Line: 18    ი ამშელდ ლოქ ხიდ ბა̄ზი ლაშრაჳი̄ნა̄ლთე ლჷწჲე ხაბაჲშე̄რთე
Line: 19    ლოქ (ჲედ მე̄რმა თემი გჳარს ხე̄ქჳნეხ, იმე̄ჲ ლიშრაჳი̄ნა̄ლ ხე̄რიხ).
Line: 20    ლჷწჲე̄ლ ხჳაჲს მა̄მ ირა̄გეხ ჩუ ლჷწჲანღო ი ჴედნიხ დროჲა̄შ ეჯჟი ერე
Line: 21    მჷსყა ლეჯგრი ტაბაგს ხეკჳეს ჟესი̄დეხ, ოდო ამგჳარ მა̄ჲ ხჳაჲხან ხე̄რი
Line: 22    ლეღლი მასძელს ლჷწჲე̄ლეშჳდ, მუშგჳრალე უწედდ ტაბგი ლიჯგრი ეში̄
Line: 23    წეს მა̄ ლი. სოფლი მა̄რე მეზგაჟი თჳით ჲედ თჳით ჲერუ მაგ ლეწი̄
Line: 24    ლი ლაშრაჳა̄ლთე ეჯ ლე̄თიშდ. სგა ლიჴდა̄ლს ლჷწჲე̄ლ მაგ ამჟი ყჷლეხ,
Line: 25    სგა ერ ხოქა̄ბიხ ქორა ლაგა̄გის: სალხნიაშუ ლოქ ლი მე̄რმაჟი ალ ქორისა
Line: 26    ამკალიბობ. ალე ლი სგა ლიჴდა̄ლე სალამ. ჩუ ერ ედლე̄თი ნებოზს,
Line: 27    ლჷწჲე̄ლ მაგ მეჴდე ლიხ ქორთე. ლემეს ძღჷდ ლუღუ̄ზე ხეკჳეს
Line: 28    ხეშჳე̄ნდეს გაგანიაჲ ქორს ლასგიდი გუ̄ნღა გარ. ჟი ერ ენზორი მაგ,
Line: 29    ნაქა̄მ მუშგჳრალ ი მესჳფელ ლჷწჲელ, ქორ თელდ გოში ლი მა̄რაჳშ,
Line: 30    ბობშ ი ზურა̄ლშჳ ი მაგ მჷსყა ტაბაგთე ღალ ისგდი, ქუნუშ არიხ, შომა
Line: 31    ლოქ ედჯგირი. ერე ლისგჳრე ი ლილხნე ხეღრისე̄ნდეხ, ხოშა ნაღალდ
Line: 32    ლეღჳი გუმა̄რა ხა̄რხ.

Line: 33       ლეღჳ მე̄ჳარ ხალატ ჩი̄ს მუშჳან მა̄რას. ძღჷდ ხასჲამხ ხოჩა ლუგჳარ
Line: 34    ხამრა̄ ლიქლა̄თე ხოჩა გეჩჳშჳ. გეჩარ ლეღჳი ლახტუ̄რად ჩი̄ს
Page: 40  Line: 1    მინე-მინეშ ხა̄ბ ქა ლა̄რტყქა, ხოჩა ტუფი ჳორჩხჳშ ჩულჷწი̄ბ. გეჩარ
Line: 2    აშ ლჷშე̄რე ხუღჳახ ერე ფათჳს იკედ. ეჯ კალიბ ლჷშე̄რა გეჩს ხაყლეხ
Line: 3    ერე ლჷსჷნსალე გეჩ ლოქ ხა̄ბ ეჯის, ამჟი არშჳნიხ გეჩი პატრონს. ხჳაჲ
Line: 4    ე ხერა̄გიხ ტაბგი ლიჯგრა̄ლნუნ, ჲერხი ღალ მე̄ჳარ იკჷლდა̄ლ, გჳიან
Line: 5    ლოქ ლი ეში̄ ი იმშა მჷღლი ლოქ ხიდ სერ, ჩუ ლოქ ელსგუ̄რდედ.
Line: 6    გობარშჳ ერ თუ̄რეხ ხოჩა-ხოჩა შუმიშინუკჳი ლეღჳარ ტაბაგჟი,
Line: 7    მუშჳან მა̄რე სურუ გუმა̄რუშ მეწჳინდ ლისგდის დეშ ღალ აბდაჳი
Line: 8    ტაბაგთე ნაღალდ, ეშ გარ ხეჭყჲოლა̄ლ მე̄რმა სგირიხენ ხჷნსგად ჩუ
Line: 9    ლუტკუ̄ნა თე̄რალშჳ ლეღჳი ლიზობი ნამწაჳოშ ი გუმა̄როშ. ლეღჳაჲ მაგ
Line: 10    ძღჷდ ლი მუშჳან მა̄რე. აშ ლეზობსი̄ ჳო̄ბაშს იზბი მუშჳან, მარა
Line: 11    ლეღჳილაზობისა დე̄მსგი მა̄რე მოშ ხეგნი სგა. მი მიცჷხ, ამშა მჷ̄ირენის,
Line: 12    ჲერხი ეჯ კალიბ ლეღჳაჲ მა̄რე ერე ეშხუ ხოჩა ლაძჲას საკჳთარდ ჩუ
Line: 13    იზბიხ, მინე მანდაჟი ე ხეღჳე̄ნიხ. მასძელს, ჯეი̄ მუშჳან ლი, ალე მაგ
Line: 14    ჩუ ხოხალ ი მაჲ საკჳრელ ლი, ხჳაჲ ლეღჳ ხეკჳეს ენმა̄რას ლაშრაჳა̄ლჟი̄ნაშჳდ,
Line: 15    ოდო მა̄ნკჳი̄ ნაჴიდს ლაგფარს ერ ჩჳესურტყჳნეხ მიჩა მუშგჳრალ
Line: 16    ი ეჩჷნღო ტაბაგჟი დო̄სამა ხეგფიხ ი ცარჲელაჲ ტაბაგ გარ
Line: 17    ხეგმიხ სგობინჩუ, ალე ძღჷდ შგურ ლი ლუშნუ წესჟი̄ნ ი ძღჷდ
Line: 18    თაჳლაფი თხეფა მასძელიშ ერე მუშგჳრალ ლოქ ჩჳაწჲე, ლაშრაჳა̄ლთე-ი̀
Line: 19    ტაბაგთე ლეჴდე ლოქ დე̄სამა ხუღჳა̄ნდა საბრა ლოქ ეჯის ი ალეს
Line: 20    სერ ძღჷდშჳ დაგრა ხოჩა ლუშნუ წესჟი ი ძღჷდ კი̄ნჩხ მექჳცე ხაბჟახ ეჯ
Line: 21    მეზგე ი იჳალადღი საყდურდ ხესდენი მეზგას ეჯ ლე̄თი სახმახი
Line: 22    კჳედა. მაგ ხეკჳეს უზმად ხუღჳა̄ნდეს. ხა̄ლ ლახთერ ერე ტაბაგჟი ლეღჳ
Line: 23    ი დიარ ხეკჳდენო̄ლნიხ, შიშდ ხეკჳეს ხოქმჷდეს მახა-მახად ნაჴიდ ლაგფარს
Line: 24    ი დიარალს ტაბაგთეჟი: "ეშუ ჯა̄რ ღერთა ჟჷრ! ლეღჳ ე საყოფდ
Line: 25    ჩუ ხეღჳე̄ნიხ, ეჯი გემჟი ენსრა̄სახ მუშგჳრიდ ი მასძელდი̄ ნო̄მ ჯალა".
Line: 26    ამკალიბობ ბეგარშა̄ლ ხაგადხ სოფლიშ ი ეშ დე̄მამ იმდუნეხ ეჯ მეზგახენ,
Line: 27    იმე̄ჲ იბზიხ. ლადი ეჯის ხეყარ ალ გჳეშ, მჷხარ მე̄რმას ხელკი,
Line: 28    მჷხარ ეჩხენ მესმას ი ამჟი ქა იხრისი მაგ. ჭირიში ი ხინი ულაკ და̄რ
Line: 29    ლი, ალე ლაჲრაკდ არი, მიჩა მიჩა დროჲჟი ჩი̄ს ლოქ ყო̄რს ხეგნი
Line: 30    მიჩა ნა̄თი ჭირიხინ. მიშგჳამჷყი̄ ლოქ ამჟი მე̄რი ლეჩომ ი სერ იმნარ
Line: 31    ლოქ ათზა̄რა ამეჩუ̄ნა კეთილ ლეზობ-ლეთრად. მი ლოქ და̄რ ამზა̄რნე
Line: 32    ეში̄ ი ალეს ერ აჭკჳარიხ, ჩუ დე̄სა იზბიხ ლიზობჳშ ი ლითრეჳშ.
Line: 33    ლაჲყრა̄ლს ხაგნეხ ლეჟრი მჷხჷრჯი მეზგას ღალ, მარა̀ ცოდ მა̄მა ლი ეჯი̄.
Line: 34    ეჯი̄ ამჟი იჩო, ქა ლახ ადრი მე̄რმა აგითე ლჷწჲად. ლეზობ-ლეთრას
Page: 41  Line: 1    ლოქ ერ ხა̄ჳდი ღე̄რბეთ მა̄რას, ეჯის ლოქ ჟი ლიჴმარი ხაკუჩ. ჲერჳაჲს
Line: 2    ლოქ მო̄მა ლოხმამა ი ლოხო̄შჳა, ეჯის ლიტმე ლოქ გარ ლახსედა.
Line: 3    ალ არაკ ჩი̄ს გუ̄ჲსა ხო̄ზ ი ლა̄ქჳისდ ხუღჳახ ი აშ აჭკჳარი მაგ ი
Line: 4    ამღა და̄რ აზა̄რე უშხჳა̄რ, მჷიმახჳიერ ხოგდურიხ ლაზობ-ლათრაჟი
Line: 5    უშხჳა̄რ. ლიშრაჳი̄ნა̄ლ ლე̄თ ჩჳადშარჳიხ ლეშრაჳი̄ნეს, ჲერჳაჲ ი̄რი ჩუ
Line: 6    მესდე ქორისა უშრაჳი̄ნად, ხოშა ნაღალდ ზურა̄ლ სედნი უშრავად
Line: 7    ამზუმ ხანს ლეჯგრინუნ. ლიშრავი̄ნეს შდიქილიგემს ხაყლეხ ი ეჯჟი̄ნ
Line: 8    იჩოხ, იმჟი ჳორა ყჳიჟჟი̀ ლას. ჩულჷშრაჳან ბაპ ტაბაგს ადჯგირნე,
Line: 9    ეჯ ლადეღ მინე მჷმწირჳელი ი̄რო̄ლ ბაპ ი ჩჳესსგურიხ ლაზობ-ლათრად
Line: 10    ეჩეჩუ მერდე მაგ. ღჳაჟარ მო̄შ ი ბობშ ი ზურა̄ლ მო̄შ ეშხუდ, ადგენნეხ
Line: 11    ტოლჷბაშს ი ანჷრშონნეხ ლჷდგარა ქუნარს, ჩოსშჷნდობნეხ
Line: 12    ჭიქჳშ ი ჟენბინი ხინ. ლეღჳილაგაფს მიჩა ულუფს ოთჴიდეხ ჩი̄ს ი
Line: 13    ჟანკო̄ჩნეხ ეჩა სგობინ ტაბაგს ფოშა ლაგფარშჳ ი დიარალშჳ. მეღჳნა
Line: 14    ჟი ხეგნიხ თხუმჟი სტამა̄ნარშჳ არაყჳშ გოშიჳშ ი ხომღჳინეხ მა̄რა̄
Line: 15    შელდჟი. ქა ჴედნი ისგ დი̄რობჷნღო გჳეშ წკაპართექა. ჩიქ თჳით
Line: 16    ჲერუ ჭიქჳშ ლეჲთჷრეხ, ღო თჳით სემიჳშ, ღო თჳით ჳო̄შთხჳშ, ღო
Line: 17    ჳოხუშდშჳ, უსგჳაჳშ ი ხა̄ლ მოშ ლეხგეჭნიხ უშხჳა̄რ ლათრას, ეჩქა̀დ აშ
Line: 18    ხოქმჷნიხ ჭიქარე შელდს ი ამშელდინ ლეჲთრეხ არაყს. ჲერჳაჲ სურუს
Line: 19    ედშდჷმი ი ლირთე მო̄მა ხე̄ჲმედი, ჟენგენი ი ქა̄დინე მე̄რმა სგირითე
Line: 20    ჲედ აგითე ადინე მიჩა ი ჲერჳაჲ ღოშგინ პილდ ჩჳასდენი
Line: 21    ტაბაგისა მჷთრად, ეჯი ი̄რი ჩიმი მჷსრე ეჯ ლე̄თჲა ლათრაჟი. არგებს
Line: 22    ტოლიბაში̄ ჟანგჷნა̄ლას ჲერჳა̄ლად ტაბაგხენ, ხოჩულ მჷთრე ე̄რ ხეჩჷდი
Line: 23    ეჩშელდ მა̄რა̄ჲსა. ჳო̄ბაშ მე̄რმა ლადღიშდ ასდენიხ ხოშა ნაღალდ
Line: 24    ნაქა̄მჳარ. ლიშრაჳი̄ნა̄ლ ლე̄თ ჩიგარ ლელე̄თად ხოხალხ

Line: 25       ტაბგი ლაჯგირჟი, იმჟი̄ ერ ლუჳარ მა̄რე ლეხსგური ტაბაგს, ამჟი
Line: 26    ანსყე̄ნნეხ ლელშანს ლერქჳალეშს. არშულ-ფატანს ლახდე̄სხ ჯჳარი
Line: 27    სახდ მჷსყა ფაუს, სგა ლახქჳემხ საგულს, შარჳალს, ჩლუქჳარს,
Line: 28    მესტარა̄ლს ი წუღზარა̄ლს, ჳოსარს, ლარტყს ქა ლახბემხ, ხანჯარს.
Line: 29    ტამბაჩაჲს ჲედ ლიჳერს ჩოხწებნეხ, ფაყჳს ჲედ ბაშლჷყს ჟესგემხ
Line: 30    თხუმჟი ი ალ ლელშანს ხერე̄ჭა̄ლხ ზურა̄ლე̄ლ ლეჯგრი ლე̄თ ტაბაგჟი
Line: 31    ჩუ ლიჯგრა̄ლნუნ ტაბგიშ. ეჩჷნღო ჟი იკედხ ი ლერექჳს ჩჳაშხჳნიხ
Line: 32    მინეშდ. შჳანს ლერექჳს ჩი̄ს ბაპს ხაჳდიხ, ნაჯგირ მინეშდ მა̄ შიდ, ბაპაშ
Line: 33    ლი, მარა̀ ლა̄შხს დე̄მ ხაჳდიხ ბაპს ლელშან-ლერქჳალს, მინეშჳდი̄
Line: 34    დე̄მ იწნაჳიხ. ჯჳინელდ ლა̄შხსი̄ ქა ხა̄ჳდინახ, მარა̀ ათხე̀ სერ და̄რ ხაჳდიხ
Page: 42  Line: 1    ლელშან-ლერქჳალს ბაპარს. ლჷდგარ ე ზურა̄ლ ი̄რო̄ლ, ღო ლეზჳრა̄ლ
Line: 2    ლერქჳალს ხოჯგრიხ ლჷშანდ, ჩი̄ს ეჩჟი ლჷგაწყობლად, იმჟი
Line: 3    ლუჳარდ ლარდუშ ირქჳა̄ლნო̄ნ ეჯ ზურა̄ლ.

Line: 4       სერ ლუშნუ ხოშა-ხოშა წესარ ჩუ ლჷჩომ ლი ლჷდგარაშ, მარა̀
Line: 5    საკურთხალ ხა̄რ ლეჴდე ლჷდგარა პატრონ მეზგას ჩიგარ ხოშა გაჲნგალ
Line: 6    ლადღარჟი: თანაფს, ანღლებს, პერპო̄ლდაშს, ლიმრიეს, ქრისდე̄შჲელ
Line: 7    ი აღაბისა̄ საფტინს, სულთა̄ საფტინს ხაყლეხ, ეჯისი̄ ეჩქა̀ ჴჷდეხ
Line: 8    საკურთხს.

Line: 9       ლაგჳან-ლაშდხჳა̄ლ ი მიჩა სახმახარ ეჩანღო̄ნაშ ქე̄დსრულა̄ნ. ამჷნღო
Line: 10    ზაჲსა სუმინ ჳო̄შთხჳინ ე̄სა ადჲესხ საკურთხ, აგის ლიფა̄ნეს ჳო̄ბაშინ
Line: 11    იჩოხ. ათხად* ჲერჳაჲ ლჷკთილ ლას ეჯჲარ ლუჳარდ იჩმჷდახ აღაპს ი
Line: 12    მინ ლუჳარდ ლარდუშ ჟესჯგირიხ ტაბაგჟი: ლელშანარს ერ იგემხ, ეჩა
Line: 13    მჷქაფ მინ ხესგჳრიხ სგა ლუჳარდ. ჲერუ სემი უ̄ღჳა ჴანარს აძჲენდახ.
Line: 14    მესჳფელჷნქა თელდ ჴეჳს აწი̄ნახ ი ჩჳადბიზნახ ი ჩჳადშდჷმნახ ჩი̄ს.
Line: 15    ათხე̀ დროჲჟი დეშერ იჩო ლუჳარდ ლარდუშ აღაპს მეხჳტე̄ლჷნქა.
Line: 16    ეჯჲარ იჩოხ ჲერხი აგის. ლოშგმა̄ჳ მა̄მა ხოსდენიხ გეზლი̄რ ი ნათსაჳ
Line: 17    ი მინე ქუნე გუ̄ნღა დე̄მამ აზა̄რეხ მინე მაღჳე̄ნს ი სგა ხაკჳი̄ხ აღაპი
Line: 18    ლიჩომს.

Line: 19       იმჟი ერე ლეჯგრიჟი ლი სახმახარ, ეჯკალიბდ ლი აღაპჟი̄, მარა̀ ხოშა
Line: 20    ხჳაჲ კეთილ ხა̄რხ ლემა̄რე, იშგენ წესარ მაგ ლეჯგრიშა̄ლ ლიხ. ბაპარს
Line: 21    აღაპჟი ხე̄ქჳნეხ ერე მჷსყე გოში ჟილჷმა̄რე ტაბაგჟი ლოქ ოგჯგირედ.
Line: 22    მო̄ მიხალ ლუჳარ მა̄რას, იმჟი ხოჯგრჷნიხ ბაპარ ტაბაგს. ლჷდგარჟი
Line: 23    ლე̄ქჳი̄ს ლუჳარ მა̄რაჟი მა̄დ ი̄ქჳი ი ჳარს ე ხე̄ქჳნე ჩუ ლიჯგრი̄შს, ეჩქა̀
Line: 24    სურუ ლესდიკად ჴედნი გჳეშ. ალე მაგ ლჷმა̄რე კეთილ ჩულჷქრაჳად
Line: 25    ხაბჟახ, ბაპარ ე დო̄მ ოთჯგირნეხ ი ბაპარ ლჷდგარა წესი მჷქაფ ლუჳარდ
Line: 26    მერდა მა̄რე̄მი წესარს იჩოხ ტაბაგჟი ი ჟილეჯგრი მა̄რე̄ლს,
Line: 27    ლუჳარდ მერდე̄ლს, ბაპარ ლოცს ლახ ქა ლე̄ქჳნეხ, სერ მინე მჷჯგრი
Line: 28    ხაბჟახ. მაჲ საკჳრელ ლი, ბაპარ სამშჳიდობო პარაკლისს იჩოხ, მა̄დე̄ჲ
Line: 29    ლჷდგარა პანაშუდს.

Line: 30       ეშხუ გჳეშ ღო̄თაშდ ოგჳე̄შდჷ̄ნდა. ალე ლას ლაშდხჳა̄ლჟი ლჷდგარს
Line: 31    ერ ჩჳაშდხჳიხ საფლაჳისა ი ეჩჷნღო დი̄რობდ ერ ისგჳრი სოფელ
Line: 32    ი მუნწჳარა, ხაჭიმხ ხოჩა მოღრა̄ლ ჭყინტარ ისგდი̄რობჷნღო
Line: 33    "შო̄ნდო̄ ლიღრა̄ლ"ს ი ამჟი ლაღრა̄ლუშ ქა̄ხჭიმხ ჩის ჩუ მესგჳრა̄ლას.
Line: 34    მოღრა̄ლა ლიხ "შო̄ნდო̄შ" იშგჳიდ არა მა̄რე, ჲერ კიჳანს
Page: 43  Line: 1    ყჷლე, ჲერხი ბანს ი ჲერხი მაჟოღჳს. ლიღრა̄ლ შო̄ნდო̄შ ხაჯეშ საღჷრბეთს
Line: 2    მა̄მა, აშ სალხნია ლიღრა̄ლს ხაჯეშ. მოღრა̄ლას შო̄ნდო̄შ ხოჟოღჳ
Line: 3    სგობინ ეშხუ მა̄რე, ჩოინ-ი-ცხჳად ხოყდა̄ნა შიარისა, ეჩე̄ჲსა
Line: 4    ლემეს არი ლჷღჷ̄რჩე. მე̄რმა მა̄რას ლაფექჳშ კჳეცნა გატ ხოყდა̄ნა ში̄სა
Line: 5    ი ქა ერ ახჭიმ, ჩი̄ს ხეკჳეს ლახბიშას ლაფექ ი ჟი ხეკჳეს ეხკჷდი
Line: 6    ლაფექხენჟი ეშხუ ფხა̄ნჭჳა გატ ი ჟესშჷდი ჩოინიცხჳადთე ღჷრჩალჟი.
Line: 7    გატ ერ იშხი, ეჩე̄ჲსა კჳა̄მე საკმეჳელშა̄ლ. ჲერჳაჲ ლაგჳანისა̄ ჩუ
Line: 8    ი̄რდი მა̄რე, ჩიემ ერ მო̄დ ოსტუ̄სას ცხჳადთე გატ, ეჯი მა̄ შიდ
Line: 9    ღოშჳენდბაჲ ლოქ ჯა̄რ, ეჯი ხეკჳეს ლე̄ქჳას ი ჟესშიდე ღჷრჩალთეჟი
Line: 10    ფხა̄ნჭჳა გატს. ამჷნქა დე̄სამა ლი სერ ლა̄შხისა ლჷდგარჟი̄ნა ლეჩომ
Line: 11    ბედიგჳეშარ.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.