TITUS
Svan (Lashx) Texts ed. A. Oniani
Part No. 12
Previous part

Text: 12 
Page: 43 
Line: 12 
XII. ლიკერძ-ლიმა̄რ შჳანისა ლა̄შხისა.


Line: 13       ლიკერძ-ლიმა̄რ მე̄ჳარ ხოხალხ ლა̄შახრს კერძ-მა̄რას ხაყლეხ მირჳნობ
Line: 14    ერ ხე̄რიხ უშხჳა̄რისა. მირჳნობს ძღჷდ მეკჳბად ხო̄გხ-ი̀ ძღჷდი̄
Line: 15    ხანწამხ. ნაღლობ ჳო̄შთხჳ-ჳოხუშდთექა გარ ლი-ი̀ მირჳნობ ჲეშდჲერჳთექა
Line: 16    ხეკჳეს ედგი̄ჭე̄ნდეს. მარა̀ მირჳნობჷნქა ხოხალხ მე̄რმე კალიბ
Line: 17    ლიკერძ-ლიმა̄რ შჳანარს. ერ ხესჲამიხ უშხჳა̄რე თხუმ, ანღინე
Line: 18    ეშხუ ხედი̄ დო ი̄რი̄, ლეხმუშგჳრი ქორთე მიჩა ლეკერძჷ̄ლის ი ხაშგმინნე,
Line: 19    ერე მე̄ჳარ ლოქ ხალატ ჯეჲ-ი̀ ჩუ ლოქუ ელკჷრძა̄ნდად. ეჩხე̄
Line: 20    შჳანარს ხოხალხ ერე ლაკჷრძა̄ლთე მეჴედდ ხეკჳეს ეშხუ სტამა̄ნ არაყ
Line: 21    ლეჲყედნას-ი̀ ოთჴჷდის ლეკერძჷ̄ლი მეზგაშე̄რ. ჯჳინელდ ამჟი ლჷმა̄რ
Line: 22    წეს, მარა̀ ათხე̄ დროჲჟი ძჳირდ გარ ე̄რ იჩო, ღჷრი აშ ქორდ
Line: 23    ლეკერძჷ̄ლი̄შე̄რთე-ი̀ ხაშგმინნე ერე მაკუჩ ლოქ ერე სი კერძმა̄რად მეყე̄დეხი-ი̀
Line: 24    მაკახ ლა̄დედ უშხჳა̄რ ჭირისა-ი̀ ხინისა. დო̄სგჷნღო ლოქ ხჳას ისგჳა
Line: 25    ლიკერძ-ლიმა̄რი მოთჲა̄ლ-ი̀ ათხე̀ ლოქ ჩჳელკერძე̄ნდედ.

Line: 26       ჲერხი ეჩა გუ̄ნღა ხაკჳი̄ ქა ლიკერძ-ლიმა̄რს ერე ეჯი ლოქ ხოჩა მა̄რე
Line: 27    ლი ი მაკახ ლოქ მე̄რი ჩი გჳეშისა, მა̄ჲ ლოქ ე̄სამა ემწჷხა. ჳო̄ბაშინ
Line: 28    კერძობ თხუმე მოგები გუ̄ნღა გარ ხოხალხ. ჲედ ლეკერძჷ̄ლის ხეღჳ ე̄ნი
Line: 29    მა̄ლე ხოჩა ჲარაღ, ჲედ დაშნაჲ ჲედ ხოჩა ხანჯარ ჲედ ხოჩა თოფ ჲედ
Line: 30    ტამბაჩაჲ ი ჲედ ლუჳერ. ჲედ ხეყე̄ნი ლეკერძჷ̄ლის ხოჩა ჴან ჲედ ხოჩა
Line: 31    ჩა̄ჟ ი ქა დე̄შ ხელჲო̄ლნი ფასღა. ეჩქა̀ ასა̄ზრეხ ლიკჷრძა̄ლს. კერძ ლოქ
Line: 32    ერ ხჳე̄რი̄ხჳი, ეჩქა̀ დეშ ლოქ მე̄ქჳნე ჳარს-ი̀ გაცხა̄ჲდ (გაცხა̀ჲდ?) შგურდი̄
Page: 44  Line: 1    ბი̄ზ ხე̄რი, კერძობჷნღო ერ ჳარ ე̄მშა ხე̄ქჳას. ეჩქა̀ ჩჲა̄გ კი̄ნჩხ მექჳცე
Line: 2    ი̄რი ჲედურდ ჴეჳისა, მა̄რად ღალ და̄რ იკედ ეჩჷნღო. ალეს ჩი̄ს სგობნა̄ჳ
Line: 3    ამო̄რჳეხ ლეკერძჷ̄ლჲალ-ი̀ ქა ხაკჳი̄`ხ ლიკერძა̄ლს. ლაკჷრძა̄ლჟი
Line: 4    მეხჳბარალ-ი̀ ჟი იხჳრჲელიხ, იმე̄ჲ კერძობ ლი, ეჯ მეზგა̄ჲსა. ჩჳადძი̄ნეხ
Line: 5    ლაძჲას, ანმა̄რნეხ ლეჳახშამს დიარს, არაყს, ლეღჳს ი იშგენ ქუცმაცე̄ლარს-ი̀
Line: 6    ჩჳესგემხ ტაბაგს-ი̀ ჩჳესგურიხ ლალხინდ.

Line: 7       ლეჳახშამდ ხოხალხ ლელე̄თად ლიკერძ-ლიმა̄რ, ეჯღა ერე თეჲაყბა
Line: 8    ლოქ დო̄სა ახა̄გე̄ნდეხ იშგნაშ ი ჩუ ლოქ დო̄სა ეთგა̄წბულე̄ნდეხ კერძობა
Line: 9    ლისკეთე. გჳეშ მაგ მა̄ჲმა ი̄რი, ლაბნა ლელე̄თად ხოხალხ შჳანისა,
Line: 10    ლიმო̄რაჳ-ლისო̄რაჳ ი̄რჲა̄ იშგენ მაგ თე̄მიშ-ი̀ აყბა̄ ნაქა̄ბუნა̄ლ.

Line: 11       ტაბაგჟი ენმეზრი ქორა მახჳში არყი ჭიქს, ანურშონნე ღერთალს
Line: 12    ერე ბა̄ზი̄ ლე̄თ ჩჳეთმურჯე̄ნდეხ მინე გუ̄მიშდ, იმჟი̄ მაჩე̄ნა̄მდ
Line: 13    ე̄ს ხამურჯე̄ნდეს ამკალიბ გჳეშ-ი̀ ჩუ ლეჲთრე არაყს, ჩოსჴჳა̄მნე
Line: 14    არყი ჭიქს ლეკერძჷ̄ლის ქორდ მეჴედს იშგნა̄გხენ. მანკჳი̄
Line: 15    არყი ჭიქი ლითრე ჩჲა̄გ შჳანისა წეს ლი მასძელხენ, ჳოდ მიჩა
Line: 16    ნაჴიდ არაყს ჯეჲ დო ლეჲთრე, ეჩქად* მე̄რმას ხეკჳეს მო̄ ლახჭარჟას.
Line: 17    ერ ლახჭარჟას, დე̄მ ლეჲთრე ეში̄ მანკჳი მუშგჳრი, ეჯღა
Line: 18    ერე არგებს ლჷჟაგ არაყ ხუღჳა̄ნდეს მასძელს ი ეჯი ხეკჳეს ლალჷ̄შისა̄?
Line: 19    ამღა ლი წესდ ერე ლეთრე ხეკჳეს მანკჳი მასძელდ ენმეზრას-ი̀
Line: 20    ლალჷ̄შის-ი̀ ღო მუშგჳრალდ. ალე იჳანდჷ̄რან აშ ლჷმა̄რ ლემშჳანჲერა̄ჲსა
Line: 21    წესდ ი აშ ი̄რი იჳალადეღ. ჩუნაჴჳა̄მ არაყს ჟენკედ ლეკერძჷ̄ლი-ი̀
Line: 22    ქადინე მიჩა მე̄რმა ლეკერძჷ̄ლი მა̄რათე, ჟენჩოქჳი ეჩა სგობინ, ენმეზრი
Line: 23    ღე̄რბათს ერე ქა̄თჲესა̄ლჳნას მინს ალ გჳეშ პილთექა, ჩჳედგჷჭიხ
Line: 24    იმჟი̄ რიგ ი წეს ლი ლიკერძ-ლიმა̄რეშ, ეჩჟი-ი̀ ჩუ ლეჲთრე არაყს. მიჩა
Line: 25    სგობინ მეგნე ლეკერძჷ̄ლი შიშდიქს ჟი ლეჲფიშგე, ფატანს ჟი ლოხბჷდნი
Line: 26    ჟიბა̀ჳ-ი̀ ალ ნაჴედ ლეკერძჷ̄ლი ჟესგემ ლუსჟი შდიქს-ი̀ ხე̄ქჳნე:
Line: 27    "სი მუ̄ჲ მი გეზალ", სუმინ ესგემ შდიქს ლუსჟი-ი̀ სუმინ ლე̄ქჳნე
Line: 28    ამჟი. სერ ჩუ ლჷკჷრძე ლიხ. კერძალ ლიხ უშხჳა̄რეშ ამჷნღო. ენგენიხ
Line: 29    ეჩხენ ამხენ ტაბაგისა მესგჳრა̄ლა მაგ-ი̀ ადმეზრიხ არყი ჭიქარშჳ
Line: 30    ალჲარე ლიკერძლიმა̄რს ერე დო̄სა ლოქ ეხჟომე̄ნდეხ ალჲარს უშხჳა̄რე
Line: 31    თხუმ მინე იმედდ-ი̀ მაკახდ. მაჩენა̄მდ ლოქ ე̄ს ხამურჯენს კერძობ,
Line: 32    ეჲჟი სგაჲუ ლოქ აჯმურჯე̄ნახ ხოშა ღე̄რბათხენქა. ეჯ ლე̄თ ხე̄რიხ
Line: 33    ძღჷდ ხინ ი ძღჷდ ლითრე ლიბრჲა̄ლ-ლიღრა̄ლშჳ-ი̀ შუშპარშჳ.

Line: 34       ჲერხი ღჳაჟრე ლიკჷრძა̄ლე მჷქაფ ზურალე̄ლს იკჷრძეხ. ლუსჟი
Page: 45  Line: 1    შდიქს ესგემხ ზურა̄ლს-ი̀ ხე̄ქჳნეხ: "სი დი̄ მი გეზალ" სუმინ ხე̄ქჳნეხ
Line: 2    ამჟი-ი̀ ლჷკჷრძე ი̄რიხ. სერ ზურა̄ლ დიდლჷგნე ლი, ღჳაჟმა̄რე გეზალდლჷგნე
Line: 3    ლი. უშხჳა̄რ სერ ჟახას დე̄მ ხაყლეხ. ზურა̄ლს დიდლჷგნას ხაყლეხ-ი̀
Line: 4    მიჩა კერძს გეზალდ ლჷგნას. ე ღჳაჟმა̄რას ხაგემხ ლუსჟი შდიქს,
Line: 5    ეჯის მუდლჷგნას ხაყლეხ. ჲესჳა̄ჲ ლოქ მაჩე̄ნამდ ხამურჯე̄ნს დი-გეზალს
Line: 6    ლიდი̄-ჲ ლიგზელ, ჲედ მუ-გეზალს ლიმუ̄ჲლიგზელ, ეჲჟი̄უ
Line: 7    ლოქ ნაჲ ოგმურჯე̄ნა ბა̄ზი̄ ამჷნღო ჩიგარ ლოქ. მე̄რმა ლადეღ ჳოდ
Line: 8    ნებოზნუნ ხინ უდ ხე̄რიხ-ი̀ ეჩჷნღო ადინე კერძ-მა̄რე მიჩა აგითე
Line: 9    დიდლჷგნას ჲედ მუდლეგნას გეზალდლჷგნად ხეკჳეს საჩჳქარ ლახო̄მას,
Line: 10    მაჲ ზუმი̄ ხე̄ჲმედი, ეჯზუმ ლუსჟი შდიქი ნაგმუ̄რ. მა̄ჲ ქორისა̄ჲ კერძობ
Line: 11    ედჩომნა̄ნ, ჲერუ სემი ლადეღჷნღო ეჯჲარს ოთჟოღჳნი მინე
Line: 12    კერძმა̄რე მიჩა ქორთე-ი̀ ეჩე ხე̄რიხ ამჟი მი̄მან, იმჟი̄ ამეჩუ ლას.
Line: 13    ლი̄ზალთე ჩჳადსაჩქჳრი, იმჟი̄ თხუმ ხეჟხი-ი̀ ალგონნი საჩჳქარს-ი̀ ეჯ
Line: 14    კალიბს ხაშჩუქრი.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.