TITUS
Svan (Lashx) Texts ed. A. Oniani
Part No. 13
Previous part

Text: 13 
Page: 45 
Line: 15 
XIII. ლისყა̄ლეშ-ი̀ ლიმო̄რაჳ-ლისორაჳ გჳეშარ ლა̄შხისა.


Line: 16       ჯჳინელ ლჷხ ლახ ე̄სამა ხეღჳე̄ნიხ უშხჳა̄რისა-ი ხე̄ჲმახჳნიხ უშხჳა̄რ
Line: 17    ი უსყად ი̄რდიხ, იგნიხ, ეჩქა̀ ნე̄სგაჩუ ჩუმსჷყი მა̄რელ "ნე̄სგამე̄ზჲარ"
Line: 18    (მოცქჳლარ) იზელა̄ლხ ეჩხა̄ჳ ამხაჳ-ი̀ ხოჴდეხ ეჩხენ ამხენისა̄
Line: 19    ნამციქულს, მარა̀ ლესდიკა ამბჳარს დე̄მ ხაყლეხ ი ჩუმჷშა̄რდა
Line: 20    ამბაჳს გარ ხოჴდეხ უშხჳა̄რთე მოსყა̄ლას. ეშხუ ლადეღ
Line: 21    ეშხუ ხარჯს ეშხუ მოსყა̄ლ მეზგე ხა̄მნი̄ნე ნე̄სგა მე̄ზჲარს-ი̀ მე̄რმა
Line: 22    ხარჯს მე̄რმე მოსყა̄ლ მეზგე. ამჟი იზელა̄ლნიხ ალჲარ ეჩხა̄ჳ ამხა̄ჳ
Line: 23    მეზგე̄ლთე, ჳოდ სგა დო ანჴდეხ ლასყა̄ლთე̄ჲსა ჲერქდა̄შ ეჩხა̄ჳიშსი̄-ი̀
Line: 24    ამხა̄ჳიშსი̄. ალ მოცქჳლარ ითჲა̄ლხ ერე კაფჷნშჳ მოშ ადსყახ
Line: 25    უმო̄რაჳნად-უსო̄რაჳნად, ეჯღა ერე ეჯის ხჳა̄ჲ ხარჯ-ი ხჳა̄ჲ გჳეშ ხაჭიმ,
Line: 26    მარა̀, ძღჷდ გჳამი გჳეშ ე ლი, ეჩქა̀ კაფჷნშჳ მა̄დ ისყი ეჯი-ი̀ ჩუ სკჷბეხ
Line: 27    ლიმო̄რაჳს.

Line: 28       ჲესიჲეს ლომო̄რაჳი მჷქაფ ლუფხულშჳ ლეღჳნად სკებნი გჳეშ,
Line: 29    მარა̀ ალე მულფხულჲერ ლიღჳნე მა̄რე̄ლეშ ძღჳდ გჳამი გჳეშობჟი
Line: 30    გარ ლი. ჲედ წორობჟი-ი̀ ჲედ ცჳერობჟი, ჲედ ძღჷდ გჳამი ქაჩობ
Line: 31    ერ ი̄რი, ეჩქა̀ს ლი ლუფხულშჳ ლისყა̄ლ. მო̄რაჳ ჩულეღჳერ ლი
Line: 32    მაშე̄ნე უცხჳ ხატჟი ერე მა̄ჲ ლახთჷრის მიჩა აზრშჳ ი სჳინდისშჳ,
Page: 46  Line: 1    ეჯი ადმო̄რჳას-ი̀ აქუცის. ლუფხულ ქამუჟღჳა̄ნე ლი კეთილიშ. ამჟი
Line: 2    ლოქ ერ მი მაყრე̄ნ, ალეს ლოქ ერ ხათჷმ, ამის ლოქ ოსგეჭე̄ნ მი̄, მა̄ჲ
Line: 3    ხეკფი ქალეჟღჳა̄ნად ჩულექჳცად კეთილ ლჷქაჩთე, ჯეჲ, იმი̄
Line: 4    ჟესგეჭნო̄ლ ეჯზუმს ენჟოღჳა̄ნნე მაქჳცას ჩულაღნუშ ხატ ჩუქჳა̄ნ, ხედისი̄ გუ
Line: 5    ხეზგი, ეჩა̄შთე. ამგჳარ მა̄ჲ ხოლა გჳეშ ე̄ს ლეხჩმუ̄ნდნე̄ნს, ლუფხულშჳ
Line: 6    მაქჳცას-მაჟღჳა̄ნას მაგ ჟი ხაგიჭ. გუს ხაზმეხ ხატ ჩუქჳა̄ნ ლუფხჳლარ-ი̀
Line: 7    ალე ჩი̄ს ჩჳაჩრაჳი სერ. ქა ლისყჳედურ და̄ს ხა̄ჲმედა ერე სი ლოქ
Line: 8    ამჟი ჯეყარ, მარა̀ დე̄სამა ლოქ ლეჯტუ̄სეხ ეჯჲარდ ი სგა ლოქ ლეჯსად
Line: 9    შგურ. ლუფხულ ჩიმი მჷჩრაჳი-ი̀ მჷგნე ლი, ემოშ იჴდეხ ლუფხჳლართე̄ჲსა
Line: 10    გჳეშს. ჩუ მო̄რჳალი̄ ჩუ ქუცეხ ლუფხულშჳ მარა̀ ეჩქა̀ ლამორაჳჟი̄ნა
Line: 11    ხარჯ ხაკუხ ხჳა̄ჲ-ი̀ ნამო̄რჳუ̄ლ ეჩჷნქა აჯაღ ი ალეს ხჳა̄ჲ ხაკუჩ
Line: 12    ი ლეგ ლემბეცჳე ლი ალაალა მეზგე̄მიშდ. ემოშ აჴჷრჴეხ ნე̄სგამე̄ზჲარ
Line: 13    უმო̄რაჳად ლისყა̄ლის-ი̀ ეზარ. სგა̄ჲესხ ლეყერს მჷყერიშთე ქორთე-ი̀
Line: 14    ჩჳასყიხ ამჟი. ალეს კაფჷნშჳ ლისყა̄ლ ხა̄ჲშხა. მაჲ (|mა̄ჲ) ხეკფიხ
Line: 15    მინს მოცქჳლარს საჩჳქარი ლიჳდი ლეყერიშდ, ეჯის ქა ლახკაფნიხ
Line: 16    მჷყერს ი ჩუ ე იჩო სერ კაფჷნშჳ, მჷსყე ი̄რიხ. ლეყერ ე ჟესგიჭ მჷყერი
Line: 17    მაღჳრას გარ ხატჟი, ერე ამჟი სი ლოქ ჯიყი̄რე̄ნ მიშგჳაჳ ღო ალეს
Line: 18    მი ლოქ ერ სი ჯა̄ჳდი ლადი, მი̄ ჟაჯგეჭე̄ნ, მარა̀ ლეყერ დე̄მ ხაგიჭ
Line: 19    მჷყერი მაღჳრას გარ, ეჯი ლოქ ხოხრა̄მ ენჟოღჳა̄ნნე კეთილს მიჩა̄შთე-ი̀
Line: 20    შგურ ლოქ მე̄რი ეჩა მაღჳრა გარ. ეჩქა̀ ხეფსი ჲედ ლიმო̄რაჳ ე ჲედ
Line: 21    მულფხულჲერ ლისყა̄ლ. სგა ემოშ* იჴდეხ ნე̄სგა. მე̄ზჲარ ჩიქე
Line: 22    ლასყა̄ლთე̄ჲსა, ეჯი̄ ძღჷდ გჳეშ ხაბჟახ. ჩუ ლისყა̄ლ ეზერ გჳეშ ლი. ქა ხექდიხ
Line: 23    ლი̄ყრა̄ლ მეზგე̄ლს. ნაყირს ჟი დეშერ იზმე. ჲერჳე̄და მხარე̄მიშდ ხოლა̄მდ
Line: 24    ჴედნი ჩუ ნაუსყა̄ლი. ნა̄ქჳი̄ს ლი დო̄სგჷნღო ბრძენიშ ერე ჭირ
Line: 25    ლალა̄რა ლოქ ლი ჩი̄მიშდ. იმჟი ეთმურჟი ჯა̄ჳრი ლიწჳრი, ეჩა მაჲ
Line: 26    თერა, არგებს ხოდრულ უდ ხეყერეს მე̄რმა ლაყა̄რჲელჟი. "მაგ ქა ხასიდ
Line: 27    ლოქ მეზჳბელი ჭირს-ი̀ ხინს" ნა̄ქჳი̄ს ლი იჳანდჷ̄რან ალ არაკი-ი̀
Line: 28    მოცქჳლარი̄ ამღა ითჲა̄ლხ ჩულისყა̄ლს ი ეშხუ სგა ლახ მოშ იჴდეხ ნამსყე̄მი
Line: 29    პირობთე̄ჲსა, სერ ხონი̄ ჩუმჷსყე ლე̄სეხ, ეჲჟი ხაბჟახ მოცქჳლარს ი
Line: 30    იშგენსი̄ მეზჳბელ-მესჳფელს ჩი̄ს. სერ თელდ ჩუმჷსყე მა̄ ლიხ, მარა̀
Line: 31    ლეკჳებ ეში̄ დე̄სამა ლი ეჯჲარე ნე̄სგა სერ. დე ლიშჩიჳარიდ ლი ლემყალ
Line: 32    სერ ი დე ლიყა̄რჲელდ, სგა ერ ლახხჳი̄დეხ უშხჳა̄რ ეში̄. ლისყა̄ლს
Line: 33    ლახ ჟი ხანდუნა̄ლჳნეხ ჲერჳე̄დაშ მხარე̄ლს, ჲედ კაფჷნშჳ ი̄რჲა̄
Line: 34    ლამო̄რაჳუშა̄ ლუფხულშჳ, ჩუ სკჷბეხ ეშხუ ლადეღს ერე ამ ლადეღ ი ამ
Page: 47  Line: 1    ლადეღ ლოქ ელხურჲელე̄ნდედ ი ოგჳა̄დეს ლოქ ეჩქა̀ გჳეშობ. ათხე̄
Line: 2    დროჲჟი პირობს ა̄ჲრენიხ ლასყა̄ლჲაშს. ეჯ პირობისა მო̄რჳალე
Line: 3    ლითში ხე̄ჲრი, ერე ჲარ ი ჲარუ ლოქ ლასხ მო̄რჳალ. აში გჳეშჟი
Line: 4    სემი მო̄რაჳ ლი ლეთში. ეშხუ მო̄რაჳ ეშხუ წყება მოშჩიჳარა̄შ ი̄რი
Line: 5    ლჷთიშ, მე̄რმე მო̄რაჳ მე̄რმე წყება̄შ ი̄რი. მესმე მო̄რაჳს ჲერქდა
Line: 6    ადგენნეხ ი ენთიშნეხ, ჲერჳედა̄შხენ ი̄რი ეჯი ი თხუმ მო̄რაჳი̄ ეჯი ი̄რი.
Line: 7    იმთე̄ჲ ეჯი ი̄რი, ნასმართალი̄ ეჩხა̄ჳ ი̄რი ლჷგი̄წე ზედმეტი̄ლ. ეჩთა̄ნ
Line: 8    ხეკჳეს ლე̄სეს ალ თხუმ მო̄რაჳ, ერე ზემჩემობ მო̄ ჩომნას. ჩი̄თე მუგჳიდ
Line: 9    ხეკჳეს ლე̄სს ი ეჩქა̀ ი̄რი ეჯჲარე ნასმართალი̄ ნამო̄რაჳი̄ ხოჩა,
Line: 10    ოდო ზემჩემობ ე̄სა ი̄რი, ეჩქა̀ დეშ ლი წყჷლჲანდ ნამო̄რაჳ გჳეშ.
Line: 11    გჳამი გჳეშჟი სემი მო̄რაჳს და̄რ ხაგიჭ. ჲეშდჲერუ მო̄რაჳ ხეკჳეს
Line: 12    ესგურახ. ალ მო̄რჳალს ენთიშნეხ თემნ ი-თემნ, თჳით ხოჩა ლჷთიშ
Line: 13    მა̄რას თემისა. მჷთში მო̄რჳალეს მომჩიჳან ლი. ჲეშდჲერუ ე ი̄რი
Line: 14    ლეთში მო̄რაჳ, ეჩქა̀ სემეშდეთქა ხეკჳეს ადლჷშნას მომჩიჳანდ მა̄რე̄ლ
Line: 15    თემნი-თემნ, ჲერჳაჲ მიჩ ხეცხე̄ნი ი ხემინდჳო̄ლნი, ეჯკალიბარს ალშანა̄ლი
Line: 16    ი ჩუ ალ სემეშდ მა̄რაჲსა ჲეშდჲერუ ხეკჳეს ითხას მუპსუხიდ.
Line: 17    ჲერჳა̄ჲს მოშ ითხე̄ლნე ალ სემეშდ ლჷლშანე მა̄რე̄ლისა, ეჯის ოსხჳი̄ნე
Line: 18    მუპსუხი მო̄რაჳდ. ნამო̄რჳუ̄ლ ლა̄შხისა წორობჟი თუმან ლი ეშხუ მო̄რაჳი
Line: 19    ლეჳდი. იშგენ ხოშა აში გჳეჟი ჩუ უღჳნად ჳოხუშდ მანათს
Line: 20    იკედხ მო̄რჳალ. ნაჳდუნს ჳოდ სგობნა̄ჳ დო ლახო̄დნეხ, ეჩქა̀დ დე
Line: 21    ნასმართალს აჳშხიხ-ი̀ დე ჩუ იღჳნიხ საყდარისა. ნამო̄რჳუ̄ლ სგობდ
Line: 22    ხეკჳეს ლეხჳოდე̄ნდეს მო̄რჳა̄ლს. მო̄რაჳს, ჲერჳაჲს მაღჳრა ხა̄რ ჟი ლჷკაბ
Line: 23    ხატჟი, ეჯ კალიბს დე̄მ აგნეხ. ჩუ უღჳნად დე̄მ ხაგიჭხ-ი̀ ჩუ ლახ დო̄მ
Line: 24    ედღჳენი, სერ ეშ მაჲ მაკახ ლი ეჩა ნამო̄რაჳ? ლასყა̄ლჟი̄ნ პირობს ერ
Line: 25    ასყიხ, ეჩე̄ჲსა ხეკჳეს ხე̄ჲრე̄ნს ერე ალ-ი-ალ მა̄რე̄ლ ლოქ გჳაყა ლჷთიშ
Line: 26    მო̄რჳალდ ნაჲ ჲერქე̄და მხარეს-ი̀ ალ მო̄რჳალე ნამო̄რაჳს-ი̀ ნასმართალს
Line: 27    ხედნი̄ ლოქ მო̄დ ელგეჭედ-ი̀ ყაბულ მო̄ ლესედ ალჲარე ნასმართალჟი,
Line: 28    ეჯნე̄მუ ლოქ ედჴჷდის შტრაფ ამშელდ ი ამშელდ მანათ
Line: 29    ლოქ, ხედი ყაბულს ლე̄სეს, ეჩა̄შთე ლოქ. ალ პირობს ხაყლეხ ჟახად
Line: 30    "ზაპის"ს. ალ ზაპისობ ათხე̄ხი გარ ედბინა̄ნ ლურუსუ კალონუნღო.
Line: 31    ეჩქა̀დ ჩუ ლუმღჳენინხ მო̄რჳალ, ამჟი ერე მინე ნასამართალს-ი̀
Line: 32    ნამორაჳს მინ ჟესსყე̄ნდეხ-ი̀ ყაბულ ხა̄დეხ, ეჩქა̀ მაშედუ ლოქ ხა̄რხ ალ
Line: 33    ხატიჯჳარ. მო̄ ლე̄სეხ ყაბულს მინე ნასმართალიშ-ი̀ ეჩქა̀ მეცჳა̄ლუ ლოქ
Line: 34    ჯა̄რხ ალ ხატიჯჳარ-ი̀ ჩჳაჭთუნეხ. ქუნს დეშერ ლჷმბე̄ლინ ალ მაღჳრე̄ლჷნღო.
Page: 48  Line: 1    ჲერხი აგის ათხე̄ჲ დე̄მამ ა̄ჲრენიხ ზაპისს, ჩჳაღნეხ ბჷგიდ ი
Line: 2    ჩჳამო̄რჳეხ ეჲჟი. ჩუ დეშერ კუშე ხატს ი ჯჳარს, ამგჳარ მა̄ჲ ხელო̄ნი
Line: 3    ნამო̄რაჳ, ეში̄ ჟი ლესკებ ხა̄რ. ლამო̄რაჳჟი ძღჷდ სარჩელობ ლი,
Line: 4    მო̄რჳალ იჳნარიხ, ხეჭჳდჲელხ მოწმარს, ხარჯს ჲეს ეშხჳმიშმჷყ იზბიხ ი
Line: 5    ჲეს მე̄რმე̄მიშმჷყ. ქა̄ჯო̄დჳნეხ ლისმართალს ჲერუ სემი ლადეღ. სარჩელი
Line: 6    მუ̄ქჳი̄ს ჩუ იჩრაჳი მათსჳარა̄შ, ფაუს ჩუ იბა̄ჯგე ი ეჲჟი ხაჭიმ თხუმნეშ
Line: 7    სარჩელი ლი̄მბჳის. მო̄რჳალ ქა უცხრად დე̄სამ ცურეხ, ჩი̄ს ფესოთე̄ჲსა
Line: 8    ხაჭიმხ სგა, ქა უჭჳდჲელად დე̄სამა ხოსდენიხ. ჩი̄ს ერ ჟენმეჴრიხ,
Line: 9    გჳეშ იმჟი̄ ი̄რო̄ლ კეცხანდჷ̄რან, ეჩქა̀ ქა ღჷრიხ მო̄შ ჯო̄დჲათე-ი̀
Line: 10    ამო̄რჳეხ ეჩე ჳო̄ბა ხანს, ჳოდ ჩუ დო ადმო̄რჳიხ ჩი̄ს, მაჲ
Line: 11    ხაჭკჷ̄რახ ლემო̄რჳე. ჳო̄ბაშინ ლი ეჩჟი, ერე დეშ ხოსყიხ სგა უშხჳა̄რ
Line: 12    მო̄რჳალ-ი̀ ეჩქა̀ ჩუ ფხეჟნიხ გჳეში უგა̄თჳად. ლამო̄რაჳჟი მაღჳრე̄ლს
Line: 13    ხოქჳცეხ ეჩხა̄ჳ-ამხა̄ჳ ჲედ ნამწოდაჟი-ი̀ ედ ნაღე̄ჳარაჟი. თხუმშჳ მინ ე
Line: 14    მაღჳრას გარ დე̄მ ხაგჭეხ, სგა ხეკჳეს ედყეჳნახ მაღჳრათე̄ჲსა ნაქა̄მ
Line: 15    მა̄რე̄ლ, ლუფხჳლარ. ლუფხჳლარს, მაღჳრათეჲსა მეჭემ ნაქა̄მ მა̄რელს,
Line: 16    მო̄რჳალ ხოლშანიხ, ჲერჳა̄ჲ ღენ ი̄რიხ ლეთხე̄ლი ლუფხულდ.
Line: 17    ლუფხჳლარს ჩიქ მჷთხე̄ლი მა̄რა ხეკჳეს ლახღჳერას-ი̀ ღო ეჩა გარცემჟი
Line: 18    ეჯჲარი̄ ჩჳედღჳენიხ. ლეჟღჳა̄ნე ყმა ხეკფიხ, ქე̄ნჟოღჳა̄ნნეხ-ი̀ ემო̄მა
Line: 19    ხეკფიხ-ი̀ დე̄მამ ენჟოღჳა̄ნნეხ. ხონ ოთქუციხ მო̄რჳალდ-ი̀ ხონ მო̄მა, ეჯი
Line: 20    მა̄მა სერდე-მერდე ლი. ნამსყი ეში̄ ქა ხეფსი, მო̄რჳალ-ი̀ ლუფხჳლარ
Line: 21    ალახ ჩუ ლუღჳერ ლიხ-ი̀ გუ ქა ლჷზმე ხა̄რხ, საყდურდ მა̄მა ხა̄რხ
Line: 22    ლემყალ სოფელ-ქჳეყნიშ. ე ი̄რი მაქჳცად კეთილ ჩუ, ჩუ ხოცხახ, მარა̀
Line: 23    იმთე̄ჲ ხაკაფხ მო̄რჳალს მაქჳცა, მინე გჳეშ ლი, კეთილი უქჳიცად დე̄სამა
Line: 24    გჳეშ სედნი. ლუფხჳლარს აშ ხაყლეხ მომჩიჳნა ერე ფათუ̄ლ ლოქ ეხკიჩდ,
Line: 25    ე ლოქ ჯეკჳეხ, გუ ქა ლოქ ლამზჷმედ ხატ ჩუქჳა̄ნ-ი̀ სგაჲ ლოქ ე
Line: 26    ჯეკჳეხ, ფათუ̄ლ ლოქ გარ ეხკიჩდ. მი ლოქ მაჲ სერდე მა̄რ? ხატარჟი
Line: 27    ჟი ლოქ ეჯბუჭკუ̄რნე̄ჲ იმჟი ლოქ ჯი̄ნდეხ, ეჲჟი ლოქ ჩომინდ სგაჲ,
Line: 28    ისგჳე მანდა ლოქ ლე̄სეს. ნასმართალს ჲესიჲეს ჩჳა̄ჲრენიხ ქაღალდჟი,
Line: 29    ეჯის განჩინებას ხაყლეხ. ლიმო̄რაჳს ქა ხოჳშხიხ ლჷმო̄რჳანღო. ქა იგნი
Line: 30    მო̄რჳალე სგობინთე ეშხუ ხოჩა̄მდ მჷგჷრგალი მო̄რაჳ ი ქა ხო̄მბჳი,
Line: 31    იმჟი̄ ღენ ადმო̄რჳეხ, ჩი̄ს. ჲესიჲესინ ძღჷდ ლირჲალა̄ლ ხა̄რხ მო̄რჳალს-ი̀
Line: 32    მინე მჷთშა̄ლას. დეშ ლოქ ოთმო̄რჳახ ხოჩა̄მდ-ი̀ ეჯღა ხერჲალა̄ლხ,
Line: 33    მარა̀ ლოშგინ პილს ეში̄ ჟი ხესკბენიხ ეჯჲარე ნამო̄რაჳს. ლიმო̄რჳა̄ლ
Line: 34    ერ ქა იგა̄თჳი, ნასმართალ იმჟი̄ ღენ ი̄რი, ეჯის ნე̄სგამეზჲარ
Page: 49  Line: 1    ქა ხაგა̄თჳალჳნეხ ჲერქე̄და̄შ. ეჩანღო ჟახჳრჲელეხ ეშხუდ.
Line: 2    ჟაჲესხ საყდართე-ი̀ ჩჳაღჳნა̄ლიხ ბჷგიდ ხატარჟი უშხჳა̄რე ნაჲერთგულაჟი
Line: 3    იჳალადეღ. დო მინდ, დო მინე ნა̄თი-მჷნა̄თიდ, დო გეზალდ ი
Line: 4    გეზლა გეზალდ მინეშ ალ გჳეშ უშხჳა̄რ დო̄სა ოხურშონახ იჳალადეღ.
Line: 5    ერ ე̄სა ოხურშონახ, მა̄ შიდ, ეჩქა̀ ხატ ხოკჳშენიხ. ლიღჳერჷნღო სგა
Line: 6    ხოჟოღჳხ ქორთე მომჩიჳანს მუპსუხ ი მო̄რჳალ ი ნე̄სგამე̄ზჲარი̄ ეშჩუ
Line: 7    ი̄რდის მაგ ლასყა̄ლჟი. ქა ლახყა̄ლჳნიხ უშხჳარ ტაბაგჟი-ი̀ ხექჳნეხ
Line: 8    ეჩხენ-ამხენ მაგ, ერე ამჷნღო̄ჳუ ლოქ ოთქა̄ბჳნა ისგჳეჳ ღერთალს
Line: 9    ქაჯიჲეშმაჲ, უშხჳა̄რუ ლოქ ლახმუჭხჳე̄ნად. ეჯ ლე̄თ ხე̄რიხ ძღჷდ ლირთე
Line: 10    არყიშ ი ძღჷდ ხინობ. ეჩანღო ნე̄სგამე̄ზჲარ ენთიშნეხ კუმში მჷლგონი
Line: 11    მა̄რე̄ლს ი ჟალგონიხ კუმაშს, მა̄ჲ ქა ლეჳდი ი̄რიხ-ი̀ ქა ხა̄ჳდიხ შიშდ.
Line: 12    სერ მჷსყე ლიხ.

Line: 13       ალე ლი ლისყალეშ-ი̀ ლიმო̄რაჳჲა წესარ ლა̄შხისა.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.