TITUS
Svan (Lashx) Texts ed. A. Oniani
Part No. 14
Previous part

Section: 2 
Text: 1 
Page: 50 
Line: 1 
II. არკალ ციგინარ
Line: 2 
I. არაკ სტა̄რჳნიში თანაღჟი დიასახლი ლაჭთუნო̄ლაშ.

Line: 3 
(ჯჳინელ არაკ ლა̄შხისა).



Line: 4       სტა̄რჳნიში თანღი ზაგარჟი ლჷგა̄ნ ესრენ ჯჳინელდ ძღჷდ ძალუმ
Line: 5    
საყდარ. ეჩა ნამხჳირ ათხე̄ჲ ჟი ხეთრა. ეჩხა̄`ჳ ელმა̄ზინ ლამზჷრდ
Line: 6    
მჷლა̄შხ დიასახლ. ჳოდ ჟადინა სტა̄რჳნიში ზაგრი საყდართეჟი̀, ეჩქა̀დ
Line: 7    
ჩუხი ჩჳალჩერჳე̄ლი. დეშ ოთბედჳა მე̄ჳარ ფე̄დჲად ლიჴედ საყდრი
Line: 8    
მიარეთე. ესრენ ურწყჳულ ლჷმა̄`რ ეჯღა დეშ ლჷმბედჳინ. ჳოშელდი̄ნ-ი
Line: 9    
ლჷმა̄ზინხ ეჯ დიასახლ იშგენ ზურა̄ლე̄ლ, ჩიგარ ეჯ ეშხუ აგის
Line: 10    
ლჷმჩერჳო̄ლინხ ეჩხენქა ხამზჷრნახ სტა̄რჳნი̄ში ჯგჷრა̄გს. ეშხჳინ
Line: 11    
ემჴედე̄ლი ამხა̄`ჳ ლამზჷრდ თამარ დედჳფალ. ეჯი დიასახლი ლაჩრაჳმჷყ
Line: 12    
მა̄მა ალჩერჳე̄ლი ჟემჩედ მეწჳინდ სტა̄რჳნიში ჯგჷრა̄გთეჟი ლამზჷრდ.
Line: 13    
დიასახლი ლაჩრაჳ გიმ ჩო̀თჭათჳნა მიჩ მიჩა მჷნჴრი ჯარს
Line: 14    
თჳით ბეჩ ჩი̄ს ოსდა ეჩეჩუ მა̄რე̄მი შელდჟი. ალე მაგ მა̄რე̄მი ნადე̄ს
Line: 15    
ბეჩს ძღჷდ კჷ̄ლთხი ზუგჳ ახფასე̄ნა. ეჯ ზუგჳ ათხე̄ჲ ხოჩა̄`მდ ხეთრა.
Line: 16    
ეჯის ხა̄ჲშხა დიასახლი ლაჭთუნო̄ლ ლადი̄ ამჟი ხაყლეხ ლა̄შხარ. ათხე̀
Line: 17    
სტა̄რჳნიში ზაგარჟი ჯგჷრა̄გი საყდრიშ ნამხჳირ გარ ხეთრა. ჯგჷრა̄გი
Line: 18    
ხატარ ლჷმსგოჯნე̄ლიხ ჲერუ. ათხე̀ ეშხუ ჯგჷრა̄გი ხატ ჴე̄რის სგო̄ჯი,
Line: 19    
მე̄რმე ოთსგოჯნახ ჩო̄`ლურთე ბებჳშა ხოშე̄`ლს ლადი̄ ეჩე სგოჯი,
Line: 20    
ბებჳშე̄რალ-ი̀ ეჩაცახან იზგეხ მიჩა მომზჷრ-მჷჴერა̄`ლ ლიხ. ყჷლეხ
Line: 21    
ამბაჳდ ერე ბებჳშე̄რალი̄ ლოქ სტა̄რჳნი̄ში ზაგარჟი ლჷმზიგე̄ლიხ. მინს
Line: 22    
ერ ლეხჭოდდე, ამჟი ყჷლეხ მინი̄`. ათხე̀ სტა̄რჳნი̄ში თანაღს ლეჩხჳმარ
Line: 23    
ჯჳარი თანაღს ხაყლეხ. ჯგჷრა̄გი საყდრი ნაგემჟი ათხე̀ უთინ ლჷგ.
Line: 24    
ეჩეჩუ ქამელაკ მეშუკ მჷლა̄შხ მა̄რე მაგ უსტა̄რუნს ი̄`რენი ჯგჷრა̄გი
Line: 25    
ლაჴჷ̄რა̄ლუშ.



Next part



This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.