TITUS
Svan (Lashx) Texts ed. A. Oniani
Part No. 18
Previous part

Text: 5 
Page: 58 
Line: 1 
V. ღარიბ ჲეხჳ-ჭაში ციგინ.


Line: 2       ალე ჯამზჷრახ ღერთემ-ი̀ ლჷმარდე̄ლიხ ეშხუ ღარიბ ჲეხჳ-ჭაშ.
Line: 3    
ეჯჲარს დე̄სა ხაყე̄ნახ გეზალ. მინე ადგილ-მამულ მაგ ქო̄თჳოდახ
Line: 4    
ჯჳიდღაჲ ნატუ̄სუნღა, ნოთი ლოქ ღერთემ გეზალ ლახო̄მეხ. ჩოთო̄შჳახ
Line: 5    
ჯჳიდიშ-ი საკმოჳელი ლაკირ, ჟიბე-ბუა̄სდთე ღერთალ ოხწუხაჳახ. ჩოხზჷზახ
Line: 6    
ღერთალს ღომელ, ჟი ლოქ ოხმეჴრე ჩუბე-ბუა̄სდს, მაჲ ლოქ
Line: 7    
ამბაჳ ლი. ჩჳემჴედე̄ლი ღომელ ჟი ერ ემტეხე̄ლი, ხოქჳა ერე ლეჲრაყის
Line: 8    
ლოქ აჯბიხ, ზურა̄ლე̄ლ ლოქ იცხე̄ნიელხ, ფათჳარს ლემესთე შჷდეხ
Line: 9    
ეჩა ქუნ ლოქ ჴან. აჯაღ ჴან ესრენ ქუნ. ეჩქა̀ ჩოხზჷზახ მუგჳ.
Line: 10    
"ა̄ მინე მუგუ̄ლ! ჯეი ლოქ გარ ლი ტკიც ჟი̄ჳ ლოქ ოხმეჴრე
Line: 11    
ჩუბებუა̄სდია̄ ამბაჳ". ჩჳემჩედე̄ლი, ჟოხმეჴრა ამბაჳ. ერ ლახჭოდნე̄ნახ
Line: 12    
ღერთალ, ხო̄ქჳა ერე ღარიბ ჲეხჳ-ჭაში̄ლ ლოქ ლჷმარდე̄ლიხ, გეზალ ლოქ
Line: 13    
მა̄ ხაყე̄ნახ, ადგილ-მამულ ლოქ ოთჳოდახ მინე ლაჴჷ̄რა̄ლს, ნო̄თი ლოქ
Line: 14    
გეზალ ლახო̄მად. ეჩქა̀ ფუსნაბუა̄სდჲას ხო̄ქჳა ერე ქა̄ჳ ლოქ ლახო̄მხ
Line: 15    
ხოჩა გეზალ-ი̀ ისგ-ლიმა̄რჟი კოჯი ბედიშუ ლოქ ჩომინხ. ჯგჷრა̄გს
Line: 16    
ხო̄ქჳა ერე ნიცი ბედიშუ ლოქ ჩომინხ. ლამა̄რჲას ხო̄ქჳა ერე ქა ლო ქე
Line: 17    
ხაჳდიხ, ქა̄ჳ ლახომხ, დო̄რი̄ ქა̄ჳ ეთყაჩხ. ქა ლოხჳოდახ საქებ გეზალ.

Line: 18       
ალე ჟოხუნარა დი̄კონს. ქა ერ ახთენე̄ნა ჲეხჳ-ჭაშს გეზალ, ქო̄თქჳითა
Line: 19    
დი̄კონს გეზალ გეზლა მჷქაფ სგა ლოხჭემა ჟინაღ. ეჯჲარს
Line: 20    
ხახლე̄ნახ ერე ეჯი ლჷმა̄რე̄ლას მინე გეზალ ეჩის ხაფრება̄ლნახ.
Line: 21    
დი̄კონს ნაქჳთერ ბობშ აგითე ოთჲა. ბობშ ლე̄თჳშ ირთხინს ლჷმცხემინ-ი̀
Line: 22    
ლადეღჳშ კამჷლს. ქა̄ლგა̄თჳე̄ლი ყაზა̄ყდ: დი̄კონს ხაჭჳდიელნა
Line: 23    
მიჩა ჲეხჳ ერუ იმხენ ოხჴი̄და ამთა̄ნ ბობშ? დი̄კონს მა̄ ხო̄ქჳა, ეში̄
Line: 24    
სგა̄თკჳი̄შე̄ნა, ქა̄ჳ ლოქ ხე̄ქჳ, ათხე̀ ბობშს ლოქ ხაგდი-ი̀ მა̄მა ლოქ ხესმი.
Line: 25    
ჲაღო ჩუ̄ჳ ლოქ ადშჷნთე ასტამ ჩოთშჷნთა ასტამ, ქო̄თია ბობში
Line: 26    
აყბა̄ ნაფდიათე, მე̄ჲცხე ლოქ ი̄რი, ჟენმეჴრი, დო̄რიღო-ი̀ დეჲამ. ქე̄რ
Line: 27    
ოთჲა აყბა̄ ფე̄დჲათე, ეჩქა̀ ოსშურჲელა ბობშს, ღე̄რბეთ, ჩუ̄ჳ ადქჳე̄ლე
Line: 28    
ასტამ ჩჳალქჳე̄ლე̄ლი. ალჲარს ხო̄ქჳახ ეჩქა, ხაგდი ლოქ. ეჩქა̀
Line: 29    
ქო̄ხო̄მბჳა დი̄კონს მიჩა ჲეხჳეშდ, ალ ბობშ ჲესჳა̄ჲ ღენ ოთქჳითე
Line: 30    
იმჟი̄ ლას ეჯ ბობში ამბაჳ. ალე ჟოხუჳნარა მაგ ბობში̄ლს. ალგენე̄ლი-ი̀
Line: 31    
ემჩედ მიჩა დიეშთე̄ჲ მუეშთე. ალ ბობში̄ლს ხა̀ჳდო̄ლნა ჳად, იმჳაჲ
Line: 32    
ესჳადნა ერ ემჩედე̄ლი მიჩა დიეშთე̄ჲ მუეშთე, ეჩქა̀ მიჩა დის მუს
Line: 33    
ხო̄ქჳახ ერე მიჩაშთა̄ნ ხოჩა მა̄რას ლოქ მაჲ ხაკუჩ მინე ლჷბინძურა
Page: 59  Line: 1    
ქორთე̄ჲსა. ბობშს ხო̄ქჳა ერე დიარდ ლოქ ხა̄რ გუ. დიარ ლოქ მინეშდ
Line: 2    
დე̄სა ხუღჳახ, მინე კიდბონარისა ჳობობუა̄ჲ ფა̄ნთხარსერ ლოქ
Line: 3    
დე̄სამა არი. მო̄მაჳ ლოქ ხო̄ზა. ლაფექო̄ლ ლოქ ღენ ადიე. ჟოთჲა
Line: 4    
ჟახხჳე̄ნა ფექ კიდბონისა ჩოხჴი̄და. ლოხო̄ზინა ბობშიშდ ნაფდიაქა
Line: 5    
ჟინაღუ̄ლს ლაკუნტრუშა̄ლუშ. ბობშს ქო̄სწა̄ნა დაშნაჲ, ხოყი̄რა კი̄ნჩხქა
Line: 6    
ჟინაღუ̄ლაშდ ქო̄თკჳარჳნა თხუმ. ჲეხჳ-ჭაში̄ლს ლიბღა̄ჳე ოთბინახ.
Line: 7    
ღერთალს ლოქ ალე ლოხჳოდახ მინეშჳდ გეზალდ-ი იმნარ ლოქ
Line: 8    
ოთდაგრა მიჩ. ჳა̄ჲ მინ და̄ჳარ, ალე ლოქ მა̄ ლი ისგჳე გეზალ, მი ლოქ
Line: 9    
ხჳი, მარა̀ ისგჳი ნალდა̄ჳოშ ჩუ ლოქ ეჯქარჳახ მიშგჳი თხჳუმ. ეჩქა̀
Line: 10    
ღალ სურუ ათხი̄დე̄ნახ ეჯჲარს. მიჩა დი̄ლჷ̄ლაშდ ხო̄ქჳა ერე ღჳინელუ
Line: 11    
ანჴიდ. მინე კეცარისა ჳობობუა̄ჲ ფანთხარსერ დე̄სამა ლოქ არი. მო̄მ
Line: 12    
ლოქ ხო̄ზა, ქა̄ჳ ლოქ ღენ აჩად. ქე̄მჩედე̄ლი-ი̀ გოში ლჷმა̄რ კეც.
Line: 13    
ჟოხკი̄და ღჳინელ-ი სგო̄ხჴი̄და ხინობ ხოჩმი̄ნახ. ეჯჲარს ხოჩა ლირდე
Line: 14    
ოთჴი̄დახ-ი̀ ჯამზჷრახ ღერთემ.

Line: 15       
ალე̄ჲ შამშე ჳო̄ნჲა̄ნდ ლე̄ქჳ. მიჩ ხასმა ლოქ გიგა ეუკიშხენქა.



Next part



This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.