TITUS
Svan (Lashx) Texts ed. A. Oniani
Part No. 17
Previous part

Text: 4 
Page: 55 
Line: 5 
IV. ცხეტაკიშ ი დეჳთაკი ციგინ.


Line: 6       ჯამზჷრას ღერთემ-ი̀ ლჷმარდე̄ლიხ ეშხუ დი-გეზალ. ეჯჲარს დე̄სა
Line: 7    ხაღჳე̄ნახ ლარდა. ცხეტაკ მეთხჳჲარ ლჷმა̄რ, ლჷმზელალინხ ი ჟათლაკე̄ნახ
Line: 8    ეშხუ მინდორისა ნამხორს. ქოთჯე̄ლახ ეჯი-ი̀ ჩოთჷ̄ნშგახ. ლაჯე̄ლა̄ლჟი
Line: 9    დი̄ლჷ̄ლს ახხჳჲე̄ნა და̄ჳა ყიმბრჲელაჲ. ლჷჯაჳშ ჩუ ლჷმბარალინ
Line: 10    ი ბამბაჲს სგა ხაჭო̄ნნა. ყიმბრჲელაჲ ალსიპე̄ლი და̄ჳდ. ჭაშდ
Line: 11    ალსყე̄ლი დი̄ლჷლაშ ი თოთღა̄ნჳა ზურა̄ლო̄ლ. ეჩის ახთენენა გეზალ
Line: 12    დეჳთაკ. დი̄ლჷ̄ლს ხაყლუ̄ნე̄ნა მიჩა გეზალ ცხეტაკიშდ ი სგა ლოხჭო̄ნა
Line: 13    ყჳელფთე̄ჲსა დეჳთაკი̄ლ. ცხეტაკ ერ ემჴედ ლათხჳჲარხენ, ლახჭოდნე̄ნა
Line: 14    მიჩა დი̄ლჷ̄ლს, მაჲ ლოქ ხოჭო̄ნა ყჳელფისა. "მაჲ ლოქ ჭკჷ̄რა ხა̄რ,
Line: 15    დედე̄შ, ჳოშაჲ ღენ ჯეჲ ნათხჳჲარე̄მი ჯიჯჳარს ყჳელფთე̄ჲსა ლახჭო̄ნნე?
Line: 16    ქა̄უ ლოქ ღენ ანფხირკე, დედე. მა̄დ ოხფხირკა. ეჩანღო̄ნე მიჩაჳშ
Line: 17    ოხფხირკა ცხეტაკს. სგა ხაჭო̄ნე̄ნა დეჳთაკ. დედე! ეჯის დე̄სა ალმაღლინ
Line: 18    ერე მუხბე ჩუ ხათხე̄ნ, ჯეჲ ლოქ ჩუ ლჷმშიხინა̄? დეჳთაკ ლადეღჳშ
Line: 19    კამჷლს ლჷმცხემინ ი ლე̄თჳშ ირთხინს. ი ქა̄ლგა̄თჳელი ძღჷდ
Line: 20    ყაზა̄ყდ ი ეჩჷნღო დეჳთაკ ხაცხე̄ნა დი̄ლჷ̄ლს ცხეტაკნ. დი̄ლჷ̄ლს
Line: 21    ცხეტაკი ლიდგარი ოხუნდუნა. მიჩა ჭაშ და̄ჳ სგო̄თზჷზა ლეჯჳრანითე̄ჲსა,
Line: 22    ერ ლოქ ანღჷრდეს ცხეტაკ ლათხჳჲარხენ, სგა̄ჳ ლოქ ხაჴიდ ლეჯჳრანი-ი̀
Line: 23    ჩუ ლოქ ედჷდაგრი. ეჩქა̀ ცხეტაკს ქა ლახზაზე̄ნა მიჩა მუხჳბე დეჳთაკ ი
Line: 24    ჟი ლახქო̄ცე̄ნა შიყჟი. და̄ჳს დეშ ოთსერა მიჩა გეზალ ლეჯჳრანი̄ ლეყერდ
Line: 25    ი ქა̄თყეჩა. ეჩანღო და̄ჳს ხო̄ქჳა ერე მაუ ლოქ ჩომინხ? მა̄ჳ ლოქ
Line: 26    ჩომინხ-ი̀ ჟი̄ჳ ლოქ აჩად ლჷყა̄რთეჟი ი დოლობ-ში̄რაუ ესრიღჳ
Line: 27    ჟიქა̄ნჩუ. ქა ლახზაზე̄ნა დეჳთაკ, მიჩა ლირდე ჯჳარა, ჟი̄ჳ ლოქ
Line: 28    ლეჲტო̄ტე, ეჩქა̀ ლოქ მა̄ ხაკჳდე̄ნა ლიტო̄ტე, შომა̄ჲ ლოქ ხოხრო̄ლ
Line: 29    ლჷმა̄რ, ათხე̀ ლოქ იმნარ ხაკუ ლიტო̄ტე, მარა̀ აჯ მა̄დ ოხკი̄და ი ჟი
Line: 30    ლოხსგურა დეჳთაკ ცხეტაკს ბარჯჟი, სგო̄თჲა ქორთე. და̄ჳს დეშმა
Line: 31    ხოყი̄რა ჟიქა̄ნჩუ დოლობ-ში̄რა. დი̄ლჷ̄ლ ლახჭოდნე̄ნა ცხეტაკს ერე
Line: 32    დე̄სა ლოქ ლიჳჟე ხამთქჳა̄, დედე ჯჳარა? "ა̄დჳ ლოქ, ჯოდ-ნაჯჳდა
Line: 33    მინდორისა ეშხჳს ქა დო̄მ იჳჟე, ეჲჟი ლოქ მა̄ ხაჲმედა ლათხჳჲართე
Page: 56  Line: 1    ლი̄ზი". ეჩქა̀ ოხსა̄ზრახ ერე, ჩუ ლოქ ერ ედუჟას, ჟი̄ჳ ლოქ ესრაღჳ
Line: 2    ჟიქა̄ნ ი ჩუ̄ჳ ლოქ ადცუდჳე. ალე ჟოხუნარა მაგ დეჳთაკს ი სგა̄თჴჷ̄რენა
Line: 3    მიჩა მუხჳბა ცხეტაკს, ედჷნჴერა̄ნეუ ლოქ ლათხჳჲართე. აგის ლოქ მა̄მ
Line: 4    ხაჯრაჳ, ლათხჳჲართე ლოქ ედჷნჴერა̄ნნეა̄. მა̄დ ოხკი̄და აჯ ი ოთჷნჴერა̄ნა
Line: 5    ლათხჳჲართე. ჯოდ-ნაჯჳდჲა მინდორთე ერ ემჴედე̄ლიხ, ეჩქა̀
Line: 6    ცხეტაკს ჩოთუჟა. ალმე̄რე̄ლი ჟიქა̄ნხენჩუ, ჟი ერ ხარღჳენო̄ლნა და̄ჳ,
Line: 7    ეჩქა̀ ოხცხუ̄ტა ცხულა̄ჴემეტ ი სგახოყი̄რა და̄ჳაშდ. ეჩანღო ქე̄მჲეცხე̄ლი
Line: 8    ცხეტაკ ი ხო̄ქჳა დეჳთაკიშდ: ჯეჲ ლოქ თჳეთჳნე კოჯხენუ აჩად,
Line: 9    ხოჩა ლამა̄რ ლი ი ნათხჳჲარე ხოხრა ლოქ არი, ჯეჲ ლოქ წჷრნი
Line: 10    კოჯხენ ადრი, ეჩხენ ნათხჳჲარე ლოქ ხოშა არი ი ლამა̄რული̄ ლოქ
Line: 11    ხოდრა ლი. ხედი̄ ლოქ ლუჳარ ი̄რდიხ, ეჯი ლოქ ძინარს დოსგუ
Line: 12    ანჴადხ წყაროთეჟი ი ტოტუ ლოქ ლოხხელეხ წყაროს. მე̄რმე ე ლჷდგარ
Line: 13    ი̄რიხ, ეჩქა̀ ზისხშჳ ლოქ ესგოშლიხ ტოტ ი ჟი ლოქ ელთხე̄ლნედ უშხჳა̄რ.
Line: 14    ძინარს დეჳთაკ დოსგ ემჴედ, ლოხხელა ტოტ წყაროდ ი ზისხჳშ
Line: 15    ახგოშლე̄ნა, ეჩთა̄ნ ქიმ ახშყედა ერე აყბა ოხშიხა. ემჩედე̄ლი
Line: 16    ლათხე̄ლთე წჷრნი კოჯხენ, ეჩე ხჳაჲ ოსთხჳჲარა, ჯიჯჳარ ბაჯგარდ
Line: 17    ლოხგა, ტუფჳარ ჟოსჷ̄ნშგა, ჩოთგა კარაჳ. ემჴედე̄ლი და̄ჳ ი ხოშგმინა,
Line: 18    ლემესი̄ლუ ლოქ ლახბიშე, ქალოხბიშა ი ჟასსე̄ნე̄ნა. აჯაღ ხოშგმინა ლემესი̄ლ
Line: 19    ი აჯაღ ჟახსე̄ნე̄ნა, აჯაღ ხოშგმინა ი ეჩქა̀ ხო̄ქჳა ერე სგაუ ლოქ
Line: 20    ანთჷ̄რდა კარაჳთე, მიჩა ფა̄რ ხანგარდ ლოქ ხაყლუ̄ნი, ჲაღო ლოქ მაჲ
Line: 21    ხაყრის ფა̄რ-ხანგარს, მიჩა მჷჭიმ-ჭიმო̄ლ ლოქ ლახბე. "ქა̄ჳ ლოქ ლახო̄მ!"
Line: 22    ქა ლოხჳოდა ი სგო̄თკჳარა ლემესთე. "სგა̄ჳ ლოქ ანჴად ქორთე!" მიჩა
Line: 23    წეჳარ-მეძბარდ ლოქ ხაყლუ̄ნი". ჲაღო ლოქ მაჲ ხაყრის წეჳარ-მეძბარს?"
Line: 24    მიჩა დოლობ-ში̄რა ლოქ ოსთილ". "ქა̄ჳ ლოქ ლახო̄მ ჲაღო!"
Line: 25    ქა ლოხჳოდა ი ჩოთკჳა̄რა კოჯლექჳა. "სგა̄ჳ ლოქ ანჴად!" სგემჴედე̄ლი.
Line: 26    ლახა̄რა ტჷტს ი შიხს ლაზობს. "იმ ლოქ იჩო ჯეჲ, მართლა და̄ჳ, ლეღჳ
Line: 27    ლოქ ჳოხერდ არი-ი̀ ტჷტს ი შიხს იმნარ იზბი?" "ჩიქ ლოქ ტჷტს ი
Line: 28    შიხს ლეჲზობნე, ლო ლოქ ლეღჳს, ეჩა̄ნღონ ლოქ მიჩ. ჩიქ ტჷტი შიხ
Line: 29    ლოხმამა, ლო ლეღჳ ლოხმამა, მიჩა̄შთე ერ ალმა̄ზნე̄ლი, ეჩქა̀ ლოხტუ̄ლა
Line: 30    წეჳარ მეძბარდ. "არიქა, მიჩა წეჳარ მეძბარ, ხოწა̄დახუ!" ათშჷდე̄ნახ
Line: 31    ი ქო̄თქჳი̄ცახ თხუმ, ჩოთბი̄ჴჳახ ჴადჟი ა აშ ემჴედ მა̄რე̄ჲ მჷჟ-დოშდულ
Line: 32    ერე ლასკჷ̄დ მამ ხა̄რახ". ამი̄ მუხბე̄ჲ ქეემჴედ. აგითე ერ ალმა̄ზნე̄ლიხ,
Line: 33    ეჩქა̀ დეჳა მჷრ ახჩჷ̄დე̄ნახ დეჳთაკს-ი̀ ცხეტაკს. დეჳთაკ ლჷმყლო̄ნინ
Line: 34    ერე მიჩ ლოქ ხოშა ნამშე̄დჳა̄ლ ხუღჳა. ცხეტაკს ხო̄ქჳა ერე მიჩ


Page: 57 
Line: 1       ლოქ ხუღჳა ხოშულ ნამშე̄დჳა̄ლ. ჲაღო ლოქ ჩუ̄ ესჷ̄გა̄ნხ ეჩხენ-ამხენ-ი̀
Line: 2    ახთოფეხუ ლოქ უშხჳა̄რ, ხედისი̄ ლოქ ხოშა ნამშე̄დჳა̄ლ ხუღჳე̄ნიხ, ეჯის
Line: 3    ლოქ ქე̄თქადიხ ი ხედისი̄ ლოქ ხოხრა, ეჯის ლოქ ხო̄ჲხენი. ოხთოფახ
Line: 4    უშხჳა̄რდ ი ცხეტაკს ხა̄ჲხე̄ნა კე̄ნჭას ი ჩჳალდაგრე̄ლი. ეჩქა̀ დეჳთაკი̄
Line: 5    ჟასცჷლჷ̄რე̄ნა მიჩა ფა̄რ-ხანგარს. ეჯჲარე წეჳარ-მეძბარ ხოლა̄მდ
Line: 6    ლჷმშდაბინხ. ჟიბე-ბუა̄სდთე ღერთალ ოხწუხჳახ. ღერთალს ოხზჷზახ
Line: 7    ჟიბე-ბუა̄სდგხენ ჩუბე ბუა̄სდთე ღომელ, მაჲ ლოქ ამბაჳ ლი, ჟი̄ჳ ლოქ
Line: 8    ენმეჴრეხ. ჩჳემჴედე̄ლი ღომელ, თე̄რალ ქო̄ხკჷდჷ̄რა, ჟასბიზე̄ნა ი ჟემტეხ
Line: 9    ჟიბე-ბუა̄სდთე. ჟიბ ლახჭოდნე̄ნახ ღერთალ, მაჲ ლოქ ხოჩმი̄ნა.
Line: 10    მა̄მადედბერალ ლოქ იკჳლიზა̄ლხ, ხა̄რხ მი̄მან. წეჳარ-მეძბარს აჯაღ მა̄მა
Line: 11    ოთქჳი̄ცახ ლიყუ̄ლი. ეჩქა̀ ოხზჷზა ჩუ მუგუ̄ლ. "ა̄ მიჩი მიგუ̄ლ, ჯეჲ
Line: 12    ლოქ გარ გარგლი ტკიცს-ი̀ ჟიჳ ლოქ ოხმეჴრე, მაჲ ღენ ამბაჳ ლი
Line: 13    ჩუბე-ბუა̄სდ". ჩჳემჴედე̄ლი მუგუ̄ლ, ჟალსურაჳე̄ლი ზისხისა ი ეჲჟი
Line: 14    ემჩედ ჟიბე-ბუა̄სდთე. ღერთალ ერ ლახჭოდნე̄ნახ "მაჲ ლოქ ამბაჳ ლი
Line: 15    ჩუბე ბუა̄სდ?" მუგუ̄ლს ხო̄ქჳა ერე ხოჩა ცხეტაკ ი დეჳთაკ ერ ლჷმარდხ,
Line: 16    ეჯჲარ ლოქ ლახდაგრახ უშხჳა̄რ". "ეში̄ ლოქ ეზარ ლი, აჯაღ ლოქ ჩუ̄
Line: 17    ატახ ჩუბე-ბუა̄სდთე, მაჲ ლოქ გარჯ ი̄რი? ქა ლოხჳოდახ ჲაგუნდი ქიპ,
Line: 18    ქა̄ჳ ლოხცჳჲე ლოქ ნიქჭა̄რდ, ჳერცხლი წყაროჟი ლოქ ჩუ̄ ადბარა̄ლუ,
Line: 19    ჳოქრე პლატუკშ ლოქ ჩუ̄ ადკჳეცნა̄ლე ი ჟი ლოქ ენლჷჳარიხ.
Line: 20    ჩჳემხჴედე̄ლი-ი̀ ეჩჟი ხოყრა, იმჟი̄ ღერთალს ხოთო̄ნახ. დეჳთაკ ი ცხეტაკ
Line: 21    ჟალჳარე̄ლიხ ი ემჩედხ აგითე. აგითე ერ ემჴედე̄ლიხ, მინე დი̄ლჷ̄ს დიარალ
Line: 22    მჷნაყ ოსხჳია. ცხეტაკიშდ ხაღჳე̄ნა მჷნაყ დიარ და̄ჳა ფოჩლიკარეშ სგა
Line: 23    ლუკჳან. მიჩაშდ ი დეჳთაკიშდ აშ ლუკნე̄ლ. დეჳთაკს ხო̄ქჳა ერე ჴადარ
Line: 24    ლოქ ხეზგი, ნიჳრო̄ლ ლოქ ოხჴიდ. ქე̄მჩედე̄ლი დი̄ლჷ̄ლ ნიჳრა̄ ლაჴდათე,
Line: 25    ეჩქა̀ ცხეტაკი დიარ, იმე̄ჲ ლჷმარდ, ეჩეჩუ მიჩა დი̄ლჷ̄ლა დიარ
Line: 26    ოსდა ი იმეჩუ̄ჲ მიჩა დი̄ლჷ̄ლა დიარ ლჷმარდ, ეჩეჩუ ცხეტაკიშ.
Line: 27    ჟოხკი̄დახ ცხეტაკს ი დეჳთაკს ი ჩუ ლოხმამახ დიარალ. დე̄სამა ხაყრე̄ნახ.
Line: 28    მინე დილჷ̄ლს ერ ოხკი̄და, ხა̄ლ ლოხმამა, შიშდ ჩჳალშგირე̄ლი, და̄ჳა
Line: 29    ფლოქი ლჷ̄ჩი̄დ ერ ლას, ეჯღა. სგა ლოხბახ წირხ ი სგო̄თკჳა̄რახ
Line: 30    ღელათე̄ჲსა. ეჩჷნღო მინს ხოჩა ლირდე ოთჴი̄დახ ი ამჟი ლოქ ხეყრენი ჩი̄ს
Line: 31    დის გეზლა მჷღლატის-ი̀ ჯამზჷრახ ღერთემ.

Line: 32       ალ ციგინ ანა̄მბჳე შამშე ჳონჲა̄ნდ მიჩა დიე ნა̄მბაჳ.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.