TITUS
Svan (Lashx) Texts ed. A. Oniani
Part No. 16
Previous part

Text: 3 
Page: 51 
Line: 19 
III. ჯგჷრა̄გი ციგინ.


Line: 20       ჯამზჷრახ ღერთემ-ი̀ ამეჩუ ლჷმარდე̄ლიხ სემი ლახჳბა. ჩჳალჷ̄თე̄ლიხ:
Line: 21    ეშხჳს ჩა̄ჟ ხახჳე̄ნა ნა̄თიდ, მე̄რმა̄მ ძუღჳა̀ ეჩხენ კერძ-მა̄რე ი მესმა̄მ
Line: 22    ლორი̄ლ. მე̄რმა̄ მუხჳბას ლე̄ზი მჷრ ხა̄რა მიჩა ნა̄თი კერძ-მა̄რათე
Line: 23    ძუღჳა̀ ეჩხენთე. ჟენდია̄ნე ხოშა მუხჳბე̄მიშხენ ჩა̄ჟ. ხოშა მუხჳბად
Line: 24    ჩჳადღჳენე ჯგჷრა̄გჳშ ერე ძუღჳაქა დო̄სა ლახსგუ̄რდეს ჩა̄ჟს. აჴად
Line: 25    ძუღჳანუნ ი, ლეხფხანკა̄ნ სგა მეჩი მა̄რე ი ესღრიხ ძუღჳაქა. მეჩი მა̄რე
Line: 26    ჩა̄ჟჟი ხასგურ-ი̀ ალეს ლაჭე̄ნუშ ოსყა ჟი უსგჳრად ძუღჳაქა. მეჩი მა̄რე
Line: 27    ხაყლე ერე ჟიუ ლახსგუ̄რდა ჩა̄ჟს. ჯგჷრა̄გ ლოქ ესცჳო̄ლი მიჩ ჟი
Line: 28    ნასგრუ̄ლ, ლი̄ზა̄ლს ჩუ ლოქ ამღჳენე მუხჳბად ერე მო̄ ლოხსგუ̄რდე
Line: 29    ძუღჳაქა ჩა̄ჟს ი ამღა მაყლუ̄ნი ჯგჷრა̄გი ნაცჳა̄ლდ. ალ მეჩი მა̄რე
Line: 30    ითჲა̄ლ ერე მოშ იმჟი მაღჳრა მოშ ათკჳიშჳნას ი ჩუ მეძგჳბა
Line: 31    კჳარემთე̄ჲსა სგოთჯილკე ი სგა̄დკჳა̄რ ი მე̄რმა აგის ჟანკჳა̄რ, ნოთი ლოქ
Page: 52  Line: 1    ათხე̀ ეში̄ ლახსგუ̄რდეს ჩა̄ჟს ი ათკჳიშჳნას ჯგჷრა̄გი მაღჳრა. ლუწუწკნაჳე
Line: 2    ანტახ ჟი მჷძღირ თელდ, მარა̀ ეში̄ მა̄ ლახსგუ̄რდა ჩა̄ჟს. ა̄მჟი ქა̄ჩადხ
Line: 3    ძუღჳა̀ ეჩხენთე ი სგა̄ჴადხ მიჩა კერძ-მა̄რათე̄ჲსა. მჷძღირ ლას-ი̀
Line: 4    ჟენზჷსკა̄ნ, ლემესჟი̄ ჟენტებდა̄ნ. კერძალ ლეხჭოდდახ ერე იმნარ ლოქ
Line: 5    ალძღირე̄ლი ამჟი, ეჯნარ ლოქ ერე ლუღჳერ ლოქ ლჷმა̄რ ჯგჷრა̄გჳშ
Line: 6    ერე ჩა̄ჟს მო̄ ლახსგურა̄ნ ძუღჳაქა ი ეჯღა ლოქ ალძღირე̄ლი ამჟი,
Line: 7    მაღჳრა ლოქ მა̄დ ოთკჳი̄შა. მასძელარდ ხე̄ქჳხ ერე მაღჳრას მინ ჲერჳეშდინ
Line: 8    ლოქ ეში̄ ჩუ კუშეხ ლადეღისა, მარა̀ დეშ ლოქ ხოსგდია̄ იმჟი
Line: 9    ხოჩა̄მდ ლოქ ხა̄რხ მინს ჩინოჳშ ჩი̄ს. ანჩად ალ მეჩი მა̄რე, ჩჳესგეხ
Line: 10    ტაბაგ-ი̀ ჩჳესგუ̄რდახ ტაბაგჟი. ქორს ჟოხბიდნე ალჲარეშ, მარა̀
Line: 11    ლადჲარა̄ლჟი ფერფილ დე̄სა ლეხფედა̄ნხ ცუდდ. ალ მასძელ მეზგე
Line: 12    ჩჳადშიხე მაგ. ამხენისა ანტახხ მინე აგითე მეჩი მა̄რე-ი̀ მიჩა აფხნიკ მიჩა
Line: 13    ლახჳბათე. ამეჩუ ლეხჭოდდა ხოშა მუხჳბას მეჩი მა̄რე: "მაჲ ლოქ ჯაკუჩ
Line: 14    ღე̄რბათხენქა ერ ლოქ ლაჯო̄მას?" მაჲ ლოქ მაკუჩ-ი̀ დიარიშ-ი̀
Line: 15    კეთილი სოჲ ლოქ ერ მუღჳა̄ნს. ხოხრა მუხჳბას ლეხჭოდდა ერე მიჩ
Line: 16    ლოქ მაჲ ხაკუჩ-ი̀ ეჯი ლეჲსგიდდა რიყთე ი ლე̄ქჳ ერე̀ ალ რიყ მაგ
Line: 17    დაჴლაშ-ი̀ ღოლჲა̄ქა ჯოგ ლოქ ერ ლე̄სეს, ეჯი ლოქ ხაკუჩ მიჩ.
Line: 18    ლემჳო̄დე̄ნს ლოქ ისგჳეჳ ჲერქე̄და̄შიშდ, მა̄ჲ ლოქ სგაჲ ესნატჲელედ.
Line: 19    სერ მიჩა აფხნიკს ლეხჭოდდა ერე̀ მიჩ ლოქ მაჲ ხაკუჩ? მიჩ ლოქ
Line: 20    ხაკუჩ ხოჩა ბაჟჲან ზურა̄ლ. ალე ლეგ ლეჳდი ლოქ ოსჳადა მიჩ. ბაჟიან
Line: 21    ზურა̄ლ სემი̄ლ ლოქ გარ ლჷმარდე̄ლი ქჳეყანაჟი̄ ჲერჳუ ლოქ ქა̄ლწჳი̄ლე̄ლი,
Line: 22    მესმე̄მი ქორწილ ბა̄ზი ლოქ ხა̄რხ. ალჩედ ლოქ-ი̀ ემოშ ლოქ
Line: 23    ელცჳირედ ეზარ-ი̀ დო̄რიღო-ი მაჲ ლოქ ლაყრედ. აჩადხ. აჴადხ, ეჩეჲ
Line: 24    ქორწილ ხა̄რხ. ლეჭშჷ̄რი ურიაჲ ლი. მეჩი მა̄რას ათა̄და ერე̀ ჲერჳა̄ჲ
Line: 25    ლოქ ყურძენი მეგემს ანჴდე ამეჩუ ათხე̀, ჩჳესციყე დჷტისა, მუღჳაჲს
Line: 26    ქა̄ხჴიდჳნი, ეჩჷნღო ყურძენს ახჴიდჳნი, ჩჳადმჷჲნე, ამეჩუ მექორწილას
Line: 27    ქო̄ხრიგჳი, თჳით ტეჳანს ჩი̄ს ქახახჳი̄ნე, ზურა̄ლი̄ ეჩისუ ხა̄და. ალე
Line: 28    დეშერდ ჩომინ იშგენდ. ადზჷზე მეჩი მა̄რად მიჩა აფხნიკ ლე̄ჲხუ̄რი̄,
Line: 29    ახჴიდჳნე ჳა̄ზ ყურძენიშ, სგე̄სციყჳნე დჷტთე, ქოხჴად მუღჳაჲ, ჩჳედმჷჲა̄ნ
Line: 30    ყურძენ, ქო̄ხრიგჳე ჩი̄ს-ი̀ თჳით ტეჳან ჩი̄ს ქახახჳი̄და. სერ ქა̄ჳ
Line: 31    ლახო̄მხ ჲაღო ზურა̄ლ მინს, მარა̀ ეჯჲარ ჩუ ღო̄თ ედრო̄ცა̄ნდახ, ხემა
Line: 32    ლოქ ლახო̄დიხ მინს ზურა̄ლს. ჲაღო ლოქ აჯაღ ლე̄ქჳ მეჩი მა̄რად,
Line: 33    ჲერჳა̄ჲ ფაუ̄ თხუმჟი ჟენმო̄რთხნე, ლამო̄რთხუშ ფაუჟი წერექჳს
Line: 34    ჟენწა̄ნნე, ამეჩუ მერდა მექორწილას ქო̄ხრიგჳი̄ თჳით ნინჩორს ჩი̄ს ქა
Page: 53  Line: 1    ხახჳი̄ნე, ეჩისუ ხა̄და ალ ზურა̄ლ. ლე̄სს ლოქ ამჟი, ეჯჲარდ ხე̄ქჳხ, მარა̀
Line: 2    ლეხკჳაჲხ-ი̀ დეშერდ ჩომინხ. ადზჷზე ალ მეჩიდ მიჩა აფხნიკ-ი̀
Line: 3    ჟენმო̄რთხე ფაუჟი, ჟენწა̄ნე წერექჳ, ქო̄ხრიგჳე ეჩეჩუ მერდა მექორწილას-ი̀
Line: 4    თჳით ნინჩორ ჩი̄ს ქა̄თხჳჲე. ჲაღო ათხე̀ ლოქ ეში̄ჳ ლას მინეშ
Line: 5    ლიზურა̄ლ. ჩუ̄დ ედროცა̄ნდახ-ი̀ მა̄ ჩომინხ ზურა̄ლა ლიჳდი. ჲაღოა
Line: 6    ლოქ ათხე̀ მესმა̄მდ ელდად ნებულ. ელდად ლოქ, ხე̄ქჳხ ეჩეჩუ მერდე̄ლდ
Line: 7    ჩიემ. მაჲ ლოქ? მაჲ ლოქ-ი̀ ჲერჳა̄ჲდ ხანჯრალე კეცხჟი ჩომნას შუშპარ,
Line: 8    ეჩა̄ჳ ლოქ ლას ალ ზურა̄ლ. ლეხკჳა̄ჲხ მექორწილა, მარა̀ დეშ ჩომინხ
Line: 9    შუშპარ ხანჯრალე კეცხჟი, ხა̄ლ ჟადსკინე კეცხთეჟი ეჩა ლეჭშჷ̄რიდ,
Line: 10    შიშდ ჟესცჷლჷ̄რა̄ნ ხანჯრალჟი. ადსკინე ალ მეჩი̄ აფხნიკდ-ი̀ ჩუ ჩომინ
Line: 11    შუშპარ ხანჯრალე კეცხჟი. ალჲარს ოხქჲო̄ლეხ ნაყირ ჩიემ მექორწლად,
Line: 12    მარა̀ დეშ ხაჴიდხ-ი̀ ზურა̄ლ ეშ ლახქარჳეხ ალჲარდ-ი̀ სგა
Line: 13    ლოხგჳირგჳნეხ ალ მეჩი̄ აფხნიკს ჲეხჳდ. ჩჳაცჳირ მეჩი მა̄რად მიჩა აფხნიკ
Line: 14    ლჷჲეხჳდ-ი̀ ხე̄ქჳ ამის-ი̀ მიჩა ლახჳბას ერე ღე̄რბეთ ჩიგარუ ლოქ
Line: 15    ჯეშყადხ, მაღჳრა ლოქ ნო̄საჳ აკჳიშდ-ი̀ აჩად იმთე̄ჲღენ. გჳი̄ანდს ანტახ
Line: 16    აჯაღუდ, ლახა̄გა̄ნ ხოშა მუხჳბას ქორდ-ი̀ ხაშგმინ. მადილუ ლოქ ხერი
Line: 17    მიჩ, ჯეჲ გზა̄ჳრ ლოქ ლი-ი̀ ჩუ̄ჳ ადგენე. ხოშა მუხჳბე̄მდ ხე̄ქჳ ერე ჳოშა
Line: 18    მა̄რე ლოქ ამელეჟა იზელა̄ლ, ჩი̄ს ჩუ ლოქ დე̄მ აგნე ჯეჲ. მა̄მა ადგენე
Line: 19    გზაჳრ მეჩი ალ მუხჳბად. ჩჳადჭათჳნე ამნე̄მ, იმჟი̄ნი̄ ლოქ ხოჩდე̄ნს,
Line: 20    ეჩჟი̄ნუ ლოქ არი ამჷნღო. ეჯ ხოშა მუხჳბე ლუჭჳთუნანღო ჩჳედღარბა̄ნ.
Line: 21    აჩად ალ მეჩი მე̄რმა მუხჳბათე, ჯოგი პატრონთე, ი ხაშგმინ. გზაჳრ
Line: 22    ლოქ ლი ჯეჲ, ჩუ ლაგნა ლოქ ხაწჷხ-ი̀ მადილი გუ̄ნღა ჩუ̄ჳ ადგენეხ
Line: 23    მარა̀ ალჲარდ-ი მა̄დ ადგენეხ, ხე̄ქჳხ ერე ჳოშა ლოქ მეთჷ̄რანა̄ლ მა̄რო̄
Line: 24    ლარ ითჷ̄რანა̄ლნიხ, მინს ეჯჲარე ლაგნად მა̄ ლოქ ხოჟიბხ ი დე ლოქ
Line: 25    ჩჳაგნეხ. ჩჳადჭათჳნე ალჲარი̄: იმჟი̄ ლოქ ეჩქად ხა̄რახ; ეჲჟი̄ნუ ლოქ
Line: 26    ხა̄რხ ამჷნღო. ალჲარ ჩჳედღირბა̄ნდახ, იმჟი̄ნი̄ ეჩქა̀დ ლასხ, ეჩჟი̄ნ. აჩად
Line: 27    ათხე̀ ალ მეჩი მიჩა ნა̄ჲფხნიკ მუხჳბათე, ბაჟჲან ჲეხჳ ერ ხაყა, ეჩა̄შთე-ი̀
Line: 28    ხაშგმინ ლაგნა ლელე̄თად მადილი გუ̄ნღა. ალ ზურა̄ლდ სგადჲე
Line: 29    შიშდ ქორთე-ი̀ ჩჳადგენე, ჭაშ ღალ ჩჳათდაგრე̄ნა, მარა̀ ეში̄ მე̄ჳარ
Line: 30    ოხჷლხინე ალ გზაჳრს ეჯ ლე̄თ. ეშხუ ღოლჲა̄ქი̄ლ ხეყე̄და-ი̀ ეჯი ჩოთძიე,
Line: 31    ეშხუ სტამა̄ნ ღჳინელი̄ლ ხაღჳე̄ნა-ი̀ ეჯი ქო̄ხჴიდ-ი̀ ჩუ ლახა̄შ. მუშგჳრიდ
Line: 32    ხე̄ქჳ ერე ქა̄ჳ ადზჷზე ბობშარ ღჳინლა ლაჴდათე, ხუღჳა ლოქ
Line: 33    დე̄სა, ხიად-ი̀ იმხენ ლოქ ახჴიდჳნას ამჷნქა, ქა̄ჳ ადზჷზე, აჯაღუდ ხე̄ქჳ
Line: 34    მუშგჳრიდ-ი̀ ეჩქა̀ ქა̄დზჷზე, მარა̀ ბობშარ ქე̄რ აჩადხ, ჩჳედშგუდა̄ლა̄ნხ
Page: 54  Line: 1    ალ ჲერუ ჭყინტო̄ლარ. ალჲარჷნქა დე̄სამა ხეყე̄და მინე დის. ქა̄ჩად ალ
Line: 2    მასძელ ზურა̄ლ, ეჯჲარ ჟენი̄ყა̄ლე-ი̀ (ლუშგუდ ბობშარ), ჩჳადყჳინე
Line: 3    ლაყჳრა̄ჲსა ი ღჳინელ ქა̄დჲე მუშგჳარი̄შთე ი ჩუ ლახა̄შ. ლიბრჲა̄ლი̄
Line: 4    ჟენბინეხ. ალჲარე ლაბრჲა̄ლჟი ლუშგუდ ჭყინტარდი̄ ჟენბინეხ ლიბრჲა̄ლ,
Line: 5    ესრენ ჟოხლუარა ჯგჷრა̄გს. ჭაში̄ ჟოხლუარე ი ჩჳადმეზრე ალჲარ იჳალადღიშდ.
Line: 6    ალ მეჩი მა̄რე გზა̄ჳრიშ-ი̀ მუშგჳრი̄ პირობჟი ერ იზელა̄ლდა,
Line: 7    ესრენიშ ჯგჷრა̄გ ლჷმსგოჯნე̄ლი. ხოჩა ბაჟჲან ზურა̄ლს-ი̀ მიჩა ჭაშს-ი
Line: 8    გეზალს ღალ ეჩქა̀დ მე̄ჳარ ღარიბდ ხა̄რახ, დიარს ხჳაჲდინ ხაშგმინნახ
Line: 9    ხოდდარა მიჩა ლახჳბას, დიდარდ ერ ხა̄რახ, ეჩქა.* ათხე̀ ალჲარ ადდიდრე
Line: 10    ჯგჷრა̄გდ-ი̀ ეჯჲარ ჩჳადღარბე, მადილს-ი̀ ცოდს ერ დო̄მ ათშჷდახ ეჯღა-ი̀
Line: 11    ათხე̀ ეჯჲარ ლჷღრიბე ჴედნო̄ლხ-ი̀ ალ ბაჟჲან ზურა̄ლს ხეშგმჷდახ
Line: 12    დიარს. ენსგიდდა ეშხჳინ დეცხენ ფუსნა ბუა̄სდჲა ი ჩი̄მი დაბარ ხოლა
Line: 13    ლას-ი̀ ალ ჯგჷრა̄გი ნამზჷრ მეზგე̄მიშ ლჷჳზერე ლას ნამშაჳ მაგ დაბარისა.
Line: 14    ათა̄და ფუსნა ბუა̄სდჲას ერე ეშთა̄ნ სკარხალს ლოქ იჩო ერე
Line: 15    გიმდ ლოქ ესტიხე ჩი̄ს ნამშაჳარს. ალე ერ ჟენმეჴრე ჯგჷრა̄გდ, ადზჷზე
Line: 16    შიშდ ბაჟინ ეჯ ნამშაჳი პატრონ მეზგათე, ა̄ საბრა ლე̀ჲწეჳნეუ ნადარ-ი̀
Line: 17    ჟი̄უ ანთია̄ლე დაბარ მაგ ლაკჷლდა̄ლუშ ლოქ ი ჩუ̄ჳ ლოქ ადჲაჴა̄ლე.
Line: 18    ენსგიდდა მე̄რმა ლადეღ ფუსნა ბუა̄სდჲა ი ჩი̄მი დაბარ ლჷდა̄ჳშე ლიხ,
Line: 19    ეჯ მეზგე̄მიშ ლჷჲჴე ლჷგხ, კაკალე̄ლ დე̄სა ხაკალიხ სკარხალხენქა. ეჩქა̀
Line: 20    სგოჯ ფუსნა ბუა̄სდჲად ერე ეშთა̄ნ ბუქს ლოქ ანკაჩნე, ერე აჴარ
Line: 21    მა̄დეჲ ქორალი̄ მოდ აცურის უ̄ნხჳად. ჯგჷრა̄გდ ადზჷზე შიშდ ბაჟინ
Line: 22    მიჩა კერძმა̄რათე: ა̄ საბრა ხოწა̄დაუ-ი̀ ნადუ ლეჲწეჳნე ი სგა̄ჳუ ედმა̄ჯე
Line: 23    აჴარ მაგ აგითე. ლეჲწეჳნე ამნე̄მ ნადარი̀ მაგ აგითე ენმა̄ჯე. ენსგიდდა
Line: 24    ქა ფუსნ-აბუა̄სდჲა ი ჩი̄მი დაბარისა ლჷპი̄ნტე ლიხ აჴარ ი ლჷბურდლაჳე
Line: 25    ი ეჯ მეზგე̄მიშ სგა ლჷჲე ლიხ ქორთე. ეჩქა̀ ესცუ̄და ფუსნაბუა̄სდჲა
Line: 26    მიჩაცახან მერდა̄ლას ჯგჷრა̄გს-ი̀ თა̄რიძელარს ერე სგაჲ
Line: 27    ლოქ მჷრე̄ს ე̄ს ჯაყახ კერძმა̄რე ი ქა ლოქ მჷრე̄ს ხაბჟი̄ნედ მიშგჳი
Line: 28    მანდა, მა̄ჲ ლოქ ლას. ეჩქა̀ ჯგჷრა̄გს ათა̄რე̄ნა ერე მიჩ ლოქ ხაყა
Line: 29    კერძმა̄რე ჲაღო ჩუ̄ჳ აწჲე ჯეჲ მიჩა კერძ-მა̄რათე. ეზარ ლოქ ი ოთზჷზე
Line: 30    ბაჟინ მიჩა კერძალს ერე ფუსნა-ბუა̄სდჲა ლოქ ოხყა მინეშთე მუშგჳრიდ
Line: 31    ი ხოჩა ლჷმა̄რე ლოქ ოგხჳი̄დად. ლეხმუშგჳრა̄ნდახ სგა ი ძღჷდ
Line: 32    ხინობ ხაყერხ, ღოშგინ პილს ლი̄ზა̄ლს ფუსნა-ბუა̄სდჲად ხაჩქჳარ
Line: 33    ხაშგმინ მასძელს, ეშხუ უ̄ღჳა ლჷშკა̄დ ჴანარ-ი̀ ბობშარ. ქა ხაშჩუქრეხ
Line: 34    შიშდ, მარა̀ კოჭო̄ლუ̄ლჟი ერ ქა̄დჲეხ, ღოშდ ლახტიხ ი ჩჳადმეზრე
Page: 55  Line: 1    იჳალადღიშდ, მინ-ი̀ მინე ნათსაჳ ლჷმზჷრე̄`უ ლოქ ლიხ ი ჯამზჷრახ
Line: 2    ღერთემ მაგ ხოჩა სგაჲ.

Line: 3       ალ ციგინ ნესტორი ნა̄მბაჳ ლი ჯაბაშა. მაღჳრაჟი ახჭემე ამშა
Line: 4    ლი̄მბჳი.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.