TITUS
Svan Chrestomathy
Part No. 2
Previous part

Text: 2 
Page of edition: 8 
Line of edition: 19 
2. ლამპრობ


Line of edition: 20       ლამპრობ ლი თებურვა̈ლისგა სვიმნობ ლე̄თ, ეჯ ლე̄თიშდ ქორისგა ეზერ ხა̈ნუნღო
Line of edition: 21    ჟი ლჷმა̄რე ხა̄რ ჩი̄ ლამპრა̈რ. ჩუ იბვრ', ე̄ჩქას აშხვ ხოშა̄მ ლამპა̈რს მეზგახა̈ნქა
Line of edition: 22    მა̈გ ქ'ა̈̄ჲე̄სგი საყდრი ჰა̈ზვთექა ი ეჩეჩუ̄ნ აშხვ ა̈გის ჟი ხატყცი მუსვისგა,
Line of edition: 23    მე̄რმა̈̄ლი ამჟი̄ნ იჩომხ ი ძღჷდ ლემესგ ი̄შვი ალამა̈გ ლამპა̈რხა̈ნქა, ეჩი̄ზუმ ჩუ
Line of edition: 24    ლ'ე̄რე ჟიქა̄ნქა და̈̄რ მოშ ა̈სკნე. ეჩჷნქა ხოხვრა̄მ ლამპრა̈რს თვითო̄ლაჟი̄ნ ლჷდ
Line of edition: 25    გარვი̄ საფლავა̈რჟი̄ნ ხოსვემხ. ეჯ ლე̄თ აშხვ ალა̈გდ ეშ დღამე საყდრი ჰა̈ზვ. მახა
Line of edition: 26    ლჷდგა̈რი ფუსდ ერხი ჰარა̈ყსი ჴიდე ლჷდგა̈რი საფლა̈ვთეჟი̄ნ ლეფა̄ნად ი ეჩეჩუ̄ნ
Line of edition: 27    ქ'ა̄თვნა̈̄ლი. ამჟი̄ნ ლა̈სვ ჩი ზავ ლამპრობ. ლამპა̈რდ ლამპრობჟი̄ნ ი ლამპა̈რის
Line of edition: 28    ჟაჴვა̈რ გარ ხუღვე ჩი̄. იშგან და̈̄რ იჩომ ეჯღ', ე̄რე ჟაჴვა̈რ ესერ ქრისდე̄ ნა̈მზურ ლი.
Line of edition: 29    ალ ჟაჴვრა̈ ლიმზჷრი ამჟი̄ნ ლჷმა̈̄რლი: ქრისდე ღე̄რბათ ესღვიჭნინახ ვირჲა̈ჲა̈რ
Line of edition: 30    ი ჩუ ლირმი ხა̈კვდახ. სგვებინ ქრისდ' ე̄სღრ' ე̄სნა̈რ ლა̈ჭმუშ ი ვეშგიმ ვირჲა̈ჲა̈რ
Line of edition: 31    ესღვიჭხ. ქრისდე სგ'ო̄თჩა̈დ აშხვ ზურა̄ლთე̄სგა ი ჩუ ლიპჟუნე ხაშგვმინ, ანჴა̈დ
Line of edition: 32    ესნა̈რ ალ ზურა̄ლ, ჩვეინ ჩუქვა̄ნთე̄სგა სგ'ა̄დგენე ქრისდე, ჯა ჟიქა̄ნ ლახსგურდა
Line of edition: 33    ი ლილთე ლა̈ჲბინე. ვირჲა̈ჲა̈რ ამჟი̄ნ ქ'ა̈̄თქადხ. ამხა̈ნქა ქ'ა̄ნჴა̈დ ი ვირჲა̈ჲა̈რ ქა̄დ
Line of edition: 34    ხეწა̈დხ. ლა̈ჲბინე̄დ ლი̄ზი ი ლაპა̈ჟდ ერხვ ჩუქვა̄ნთე̄სგ' ა̄ჩა̈დ. ერხვდ აშხლა̈რ მა̈გ
Line of edition: 35    ჟიბავ ა̈დრიწვ. ეჩქას ქრისდედ ალა̄ჲ ჩვადჭათვნე ი ხა̈̄ქვ: "ბიქვღ' ე̄სერ ი ბუქურდ
Line of edition: 36    მიჩა ბალე ჩიგარუ აფჷრღჷ̄ნე!" ღვეშგიმპილს ჟაჴვა̈რ ჩუქვა̄ნთ , ა̄ჩა̈დ. ამნე̄მ აშხ
Line of edition: 37    ალ მა̈გ ჩვა̈ნნიკვ ი ქრისდე ჩვადლაფრე. ეჩქას ქრისდედ ჩვადმა̈ზრე ჟაჴვა̈რ ი
Line of edition: 38    ხა̈̄ქვ: "ნამზურუნდ ესერუ ხაყა ქვინიშდ ი ამსვა̄ლდა̈შდ ლამარგუ ლი ი ღე̄რთა̈შდ
Line of edition: 39    ნა̈მზურუნდუ ხაყა ლიმპა̈რის".


Line of edition: 40 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.