TITUS
Svan Chrestomathy
Part No. 21
Previous part

Text: 21 
Page of edition: 16 
Line of edition: 19 
21. ლიჩა̈̄ნი̄ში


Line of edition: 20       ლიჩა̈̄ნი̄ში გვირკისგა ლი ჰა̈დი̄შ. სოფელ ლეჟა̈̄ნჩუ̄ნ ჯვინელ საყდა̈რ ლჷგ ი
Line of edition: 21    ამის ჯგჷრა̈̄გ ჩა̈̄ნი̄შიშ ხაჟხა. ალ ჯგჷრა̈̄გ ჩა̈̄ნი̄ში ლადა̈ღ ეშხვი ლი ზავისგა ი ლიჩა̈̄ნი̄ში
Line of edition: 22    ხაჟხა. ამ ლადა̈ღ ჰა̈დი̄შა̈რ ლეჟა ღჷრიხ ჯგჷრა̈̄გთე ი იმზირხ. დურშა̈ჲა̈რს ქა
Line of edition: 23    ჴიდეხ ქა̈მენჩუ̄ნ ი ქ'ა̄ჭა̄რვეხ საყდა̈რ სგვებინქა. დურშა̈ჲა̈რს ხაყლეხ აბრეშუმი ლაჩქა̈რს.
Line of edition: 24    ალჲა̈რ მო̄შ-მო̄შ ზომა̈̄შ ი ფერიშ ლიხ ი სგა ხალჯახ ჯო̄დი ფავა̈რს. ჲერ ლჷ
Line of edition: 25    ჩიჩხვ ლიხ ი ჲერ უჩჩხვა. მა̈გ ქალა̈ქისგა ნა̈ყიდვ ლიხ ი ეჩქანღო სგა ნაძღონ. ჩუ
Line of edition: 26    სემეშდ ღეთ ლიხ. ამ ლადა̈ღ ობა̈შ მა̄რე ი ზურა̄ლ ჴედნი ჯგჷრა̈̄გ ჩა̈̄ნი̄ში ლა̈მზჷრ
Line of edition: 27    თე. ესვა̈̄ჲ ჭყინტგეზალ მოშ ხორი, ხოშა ლაღა̈ლ მა̈გ ჴედნი ამ ლადა̈ღ ჰა̈დიშთე
Line of edition: 28    ლა̈ჲსოშ ი ნათხუმ ჰარაყვშ. ლა̈ჲსას ი ჰარა̈ყს მჷმზჷრა ჟი ხა̈მზჷრიხ ჯგჷრა̈̄გ ჩა̈̄ნი̄შიშს
Line of edition: 29    ნა̈მზურუნი მჷჴდე̄მი ლიმსგა̈ვხა̈ნ ი ხაბიც ჯგჷრა̈̄გს სგეი ლიჰვდის. ჩუ იშდმიხ.
Line of edition: 30    ეჩქას მჷმზჷრა აშგვრა̄ნეხ ა̄დუ ჯგჷრა̈̄გს: "ეჯგვა̈რ-ამგვა̈რ ესერ მა̈̄ჲ ი̄რა, მა̄მ'
Line of edition: 31    ხოყა, ჯგჷრა̈̄გ, ამი სგეი უჰვდად." ესვა̈̄ჲ ხოჩე̄ლ ნა̈მზურუნ ხუღვე, ეჯას ხოშე̄ლს
Line of edition: 32    ა̈მზჷრიხ ი ეჩი̄ ლიმსგა̈ვნა̈ხ ხოშე̄ლს ხეჴჷრა̈̄ლხ. ერხი ლაქეიფთე ი ხოჩა̄მ ლარდა̈̄
Line of edition: 33    გუ̄ღა გარ ჴედნიხ. ლიმზე̄რ ქა ხეთშხენ' , ე̄ჩქას სერ ლა̈ჲსა̈̄ლ მჷჯა̈ბ ლიხ. ქა იკედხ
Line of edition: 34    ლეღვს. ჩვაზრულეხ ი ეჩის ი დია̈რს ქა ხორგივა̈̄ლიხ ჩი, ერვა̈̄ჲ ეჩე ირდი. ჰარა̈ყს
Line of edition: 35    უშხვა̄რთ' ა̄ყვბეხ ი ეჩჟი̄ნ ათვნა̈̄ლიხ. ეჩანღო ლიხი̄რვილ ი ლაჭშხა̈შ იბნი ი ესვა̈̄ჲ
Line of edition: 36    ლა̈ხი̄რულ ხა̄რ, იხი̄რვილ ი ილხნე. ჰარა̈ყ ესვა̈̄ჲ ხაკუჩ, მასა̈რდ ხუღვე. ამჟი̄ნ ილხნეხ
Line of edition: 37    ნა̈ბოზდ ი ნა̈ბოზს მა̈გ ჩუ ფხეჟნი. ერხი ჰა̈დი̄ში სედნიხ


Line of edition: 38 
მესტია



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.