TITUS
Svan Chrestomathy
Part No. 22
Previous part

Text: 22 
Page of edition: 16 
Line of edition: 39 
22. ლიმჷრიე


Line of edition: 40       ლიმჷრჲე ეშდოხვიშდ აგუსტჟი̄ნ ნემთქვა̈̄ნ ი ეჯ ლადღიშდ ჩი̄ ხოჩა ლა̈ჲსა ხო̄გა̈ნ.
Line of edition: 41    ალ ლადა̈ღ ქვინი ლადა̈ღ ლა̈სვ ი ლეჯგრიდ ი ლეფა̄ნად დე̄მგვაშ ჲა̈რ აზა̄რა.
Page of edition: 17  Line of edition: 1    მახა ლჷდგა̈რი ფუსდ ჰა̈დურდ ხოშა̄მ იმა̄რა̄ლ ამ ლადღიშდ. ზუურალა̈̄რ ლიმჷრჲე
Line of edition: 2    ლადა̈ღ მახა ლჷდგარვი̄ საფლავა̈რჟი̄ნ გვის ჩუ იჴვახ ლა̈ლჭა̄ლს ი ლაგვა̈ნს. ლიმჷრჲე
Line of edition: 3    სგვებნე ლადა̈ღ ჰამს ჴიცა̈რს ჟი იშგურდენდა მა̈გ ი ნა̈ბზვა̈ დვრევჟი̄ნ, შომვა̈̄ჲ
Line of edition: 4    ჟი ტეხენდახ, ეჩქას ლირბიე̄ლს იბნახ ი ნა̈ბოზდ მე̄რმა ლა̈დღი სა̈ჭირო დია̈რს
Line of edition: 5    ქ'ა̄ნყახ. ალ ლადა̈ღს ლიმჷრჲე̄ ლანყა ხეშხა̈ნ. მე̄რმა ლადა̈ღ მეზგე ლა̈ჲსას ჩვაშდბუნა
Line of edition: 6    ი სგა ხაგა̈მდა ლაჯაბს. ზურალა̈̄რ მა̈̄ნკვი ქუთვა̈რს ანყა̈̄ლდახ ჰამს ი ჩუ ნა̈
Line of edition: 7    დჲარა̄ლვუნღო ჩიქე თა̈შს აჰი̄ჭვდახ, ეჯას ლემზჷრა̈რს ჟი ხაცვმენდახ ქა̄მენქა. ალ
Line of edition: 8    ლუცვემ დია̈რს ცხუნი̄ლ ხაჟხა. ეჩქანღო თა̈შს აჯაბდახ, ღო ლჷგრა̈̄ლს. ლჷგრა̈̄ლს
Line of edition: 9    ცხირა̈რჟი ხოსვა̈მდახ ი ალ ცხირა̈რს ეჩქანღო დი̄რა̈რჟი ხაჴლახ, ქ'ა̄და̄წყახ ტაბგა̈რს,
Line of edition: 10    ჩუქვა̄ნ ლავშა̈რს ი ლემზჷრა̈რს და̈̄სგდახ, ჟიქა̄ნ ცხუნი̄ლა̈რს, ცხუნი̄ლა̈რჟი̄ნ
Line of edition: 11    ლჷგრა̈̄ლ ხოსუდახ ი აჯაღ იშგენ ხილა̈რ. ჯვინელ სიმინდი შდა ესვა̈̄ჲ ხო̄სდა̈ნ
Line of edition: 12    ლეჩხუმხა̈ნ ნა̈ჴიდვ, ეჯასი ჩვადა̈̄სგდახ ტაბა̈გჟი̄ნ, ჟიქა̄ნქა მებჷდ თა̈შს ხა̈თხფახ.
Line of edition: 13    თა̈შ მჷჯა̈ბს ჯა̈რთე და̈̄სგდახ. ღვაჟა̈რ ლეღვა̈რს ლა̈ზრულა̈̄ ტაბგა̈რთე და̈̄სგდახ ი
Line of edition: 14    ამჟი̄ნ ჩი. ლეღვს, ჟი ლჷმა̄რა ტაბგა̈რს, ი̄ნღას ი იშგან ხილა̈რს ჟ'ა̈ჲა̈̄სგდახ ლასფლავათე
Line of edition: 15    ი მიჩა-მიჩა ლჷდგარვი̄ ლასფლავაჟი̄ნ ჩუ ჲჷგა̈მდახ. მა̈გ ჟი იყვბა̄ლ, ეჩქას
Line of edition: 16    ბაპი ჴედენდა, ჩვაჯგირდა საფლავა̈რჟი̄ნ ტაბგა̈რს, ნაჯგრიე̄რ ლეღვს, დია̈რს
Line of edition: 17    ი ჰარა̈ყს ა̈ჲა̈̄სგდა ი ღჷრდა. მეზგა̈̄ლ ტაბგა̈რს ჟი იკა̈დდახ ი მიჩა-მიჩ'ა̈̄გით' ა̈̄ჲა̈̄სგდა
Line of edition: 18    მა̈გ ი ეჩეჩუ იდჲარა̄ლხ.


Line of edition: 19 
მჷლახ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.