TITUS
Svan Chrestomathy
Part No. 23
Previous part

Text: 23 
Page of edition: 17 
Line of edition: 20 
23. მო̄შ-მო̄შ ლა̈მზჷ̄რ ა̈დგილა̈რ ი ეჩე ლიმზჷრ


Line of edition: 21       1. ჰჷლიშ. ჰჷლშიე̄რ ხა̈მთქვახ შვა̈ნს, პა̈რპო̄ლდში ვიჭმ ჟი იბნი, ეჩქას
Line of edition: 22    ი ღჷნ ლი ჲარვ ლადა̈ღ.

Line of edition: 23       მაშე̄ნე ღჷნ ჰჷ̄ლშიე̄რ ხემთქვა̈̄ნხ მესტიას ი ლენჯა̈̄რს. ეჩქა̈̄ში ლიმზჷრეშ ნა̈ღვლა̈ჲ
Line of edition: 24    როქვ ხა̄რ მესტჲას ი ლენჯა̈̄რს ი ალა ლჷმა̈̄რ ამჟი̄ნ: აშხვ ზავ ესნა̈რ მასა̈რდ
Line of edition: 25    გვა̈̄ლიანობ ლჷმა̈̄რ ი ზა̈ჲ დე̄სა ა̈მჴედ. მე̄რმე ზავ ჩვალნა̈ზო̄რე̄ლიხ მესტჲა̄ლა̈რ ი
Line of edition: 26    ლენჯა̄რა̈რ ი ჟ'ოხღულჲახ ჰჷლიშ ი ათჴჷრე̄ნახ ჲელ ლენჯა̈̄რიშს ი ჯგჷრა̈̄გ მესტია̈̄შს
Line of edition: 27    ი ჲორი ლადა̈ღ ჟი ლოხვცხატახ ელჲა̈შ ი ჯგჷრა̈̄გი ლა̈მზჷრდ.

Line of edition: 28       ლენჯა̈̄რ ჰჷლშიე̄რს იჩომდახ ამჟინ ა: ჰჷლიშთე̄'სგა ო̄შთხვ-ოხვიშდ ნაგზი
Line of edition: 29    ხო̄ზ" ე̄ჩქას სოფელ ქა ითში ო̄შთხვ მეზგა. ალ ო̄შთხვ მეზგე ქა ხაჭიმ მეზგან ი
Line of edition: 30    მეზგან ი თვით თა̈ს ჭჷმინს იზრი ლეჰრა̈ყიდ. ეჩჷნქა ჲერვა̈̄ჲ პა̈რპო̄ლდა̈შთე̄სგა ვებიშ
Line of edition: 31    ი საფტინს ხაშდბა ი იგმა̈̄ლ, ეჯას თვით კარა̈ნ ჭჷმინს ხაკედხ. ალ ნაზორ ჭჷმინს
Line of edition: 32    ჩვაჰრა̈ყიხ ი ჟი იშვხნიხ ჰჷლშა̈შდ. ჰჷლშა̈ ვებილადა̈ღ ალ ო̄თშხვ მეზგე̄მი ზურალა̈რ
Line of edition: 33    ქა ხეჭმენიხ სოფელს ი თვით გვეგინა̈ჲ თა̈სს კვეცნა̈ ფექს იზვრიხ ლესკრარე
Line of edition: 34    ნა̈ტფუნდ.

Line of edition: 35       ღვაჟა̈რ ამ ლადა̈ღ ღუნვა̈რს იყდიხ ი ჲელმჷ̄ყ ლიღუნვა̈̄რის იჩოხ. ჰარა̈ყ,
Line of edition: 36    ლეღვ ი დიჲა̈რ მასა̈რდ ხუღვეხ ი ჰამუნღვე̄ ნა̈ბოზდ ხინ, ხიად ი ლიმზჷრ ხა̄რხ.

Line of edition: 37       საფტინ ლადა̈ღ ჰამს ღვაჟა̈რ ქა̄დ ხაჭიმხ სოფელს ი მეზგე მა̈გ თვით ქივს ხოჴდე,
Line of edition: 38    ესვა̈̄ჲ ლა̄შგ ხა̄რ. ალ თა̈შ ამ ლა̈დღი ქუთვარე ნა̈ჩდუნია̄ქ ხა̄რხ.

Line of edition: 39       ზურალა̈̄რ ჴიცს ჟი იშგურდენიხ ი ხოშა̄მ ლესკრა̈რს ანყეხ თა̈ში ლჷჩი̄დს. ალჲა̈̄რ
Line of edition: 40    ხაკუჩ, ერე ქა მჷჭანღო ჩვა̈დქუცუ̄რე̄ნხ ი ეჩჟი̄ნ ა̈თრიგვენხ მესვფელს, ჲერვა̈̄ჲ
Line of edition: 41    ჰარყი მჷთრე ჩუ ი̄რი. ისგლადა̈ღუნღო სოფელ ჩუ იზვრი ჲელმჷყ. ხოხვრა̈̄ლ
Line of edition: 42    ლიხი̄რვილს იბნე́ხ: ჲერხი ბა̈̄ჩს აკვა̄ნეხ, ხოშა მახეღვაჟა̈რ ლჷგრათე ითვე̄ფ. ლჷგრე
Page of edition: 18  Line of edition: 1    ბიკს ხა̄რ ჟი ლჷჭი̄რხ ი ეჩე̄სგა ა̈̄რი. ხოჩა მეთვეფ ქა ხატყცი ლჷგრა. ბიკს ფინდხა̈რ
Line of edition: 2    სგა ხესდენიხ. ნა̈ბოზს ლჷგრა̄ლე მჷგემ ჩვაცლჷრე ბიკს. ფინდხა̈რს ქა ითში
Line of edition: 3    ბიკხა̈ნქა. ფინდხა̈რ ჩუ ლჷლტჷნე ლიხ, მარე ალჲა̈რს ჩი̄ მახად ა̈ჰნე ი აშხვ ლუტვს
Line of edition: 4    ხაფსე. სოფელ ერ მა̈გ ჩუ იტყვბი, ეჩქას დორჲარშვ ჰარა̈ყს ჴიდეხ ელთექა, ფიჩქარშვ
Line of edition: 5    -- ლესკრა̈რს ი ჟი ხა̈მზჷრიხ ელს ი ხეჴჷ̄რა̈̄ლხ და̈რიშ ი ჰავდრი მასგვობს. ამ
Line of edition: 6    დვრევს მესტჲახა̈ნ ჴედნიხ ლჷწსე მარა̈̄ლ ეშდოხვიშდ ღეთ. ალჲა̈რს სგვებნავ
Line of edition: 7    ჟი იხურჲე̄ლეხ, ეჩქანღო ლაჭშხა̈შს რიღვეხ. ლჷგრათე ხეთვეფხ ი იხი̄რვილხ, ეჩქანღო
Line of edition: 8    ალჲა̈რს მეზგათე ინჴრინეხ. ეჩე მუშგვრარეშდ მო̄შ ტაბა̈გ ხარხ ლჷმა̄რე,
Line of edition: 9    ლაჲსალი ხა̄რხ ლჷზიჰ, ხოჩა ხა̈რჯ -- მჷსყე. მუშგვრა̈რცახა̈ნ ლენჯა̈̄რი ლჷთიშ
Line of edition: 10    მა̄რა̈̄ლი ა̈რიხ, ჩუ ისგვრიხ ი ისგლა̄თვ ხინ ი ხიად ი ლა̈ხი̄რულ ხა̄რხ.

Line of edition: 11       ჟი̄ბ, ელმჷყ, სოფელ ჩუ ისგვრი. თვით ლესკრი ნა̈კვიშს ჩი ქა ხაჰვდიხ, ჲერვა̈̄ჲ
Line of edition: 12    ჰარყი მჷთრე ლი, ვარჩხლი თასარშვ ჰარა̈ყს ათვნა̈̄ლიხ ნაბოზდ. იმჟი ჲა̈ს ხაკუ,
Line of edition: 13    ეჯჟი ჲჷთრე მა̈გ ი ნა̈ბოზს მაშდმა̈̄რ ჟი იგნა̈̄ლხ. ჟი ნა̈გნა̄ლუნღო დაბა̈რთე ჩი̄რხუვა̈რს
Line of edition: 14    ხეთვეფხ ი ამჟი̄ნ ლაღრა̄ლუშ ჩუ ფხეჟნიხ მა̈გ.

Line of edition: 15       მიშლადა̈ღ მესტჲას ხა̈მთქვახ ჰჷ̄ლიშ. ამ ლადა̈ღ ხა̈ლხ ჩუ ინზვე̄რი, მე̄რმა სოფელხა̈ნი
Line of edition: 16    ხვა̈ჲ ჴედნი მესტჲა̈̄ ჰჷლიშთე, ეჯღ' ე̄რე ამ ლადა̈ღ ჩა̄ჟრე ლიმქჷრა̄ლვნე
Line of edition: 17    ხა̈მთქვახ. ამღა მერმე მესფელა ხოჩა̄მ ჩა̄ჟა̈რს ჴიდეხ. იგსლადაღვ ლა̈ხირუ̄ლ, ბა̈ჩა̈
Line of edition: 18    ლიკვა̄ნე ი ლითოფ ხა̄რხ ლჷგრათე, ნა̈ბზა̈ დვრევჟი̄ნ ჯგჷრა̈̄გი საყდა̈რხა̈ნქა ქა
Line of edition: 19    ჴიდეხ ლემს. ლჷჩა̄ჟუ, ოშვა̈̄ჲდ დო ი̄რიხ, ჟი ლუყვბე ლიხ. ამ ლადა̈ღ მჷჩა̈̄ჟი მჷმსტივ
Line of edition: 20    გარ ლი, მე̄რმა მესვფელს დე̄მ ხასგვრეხ ჩა̄ჟვ, მარე ჟი იდჲა̈̄ნიხ ჩა̄ჟა̈რს.

Line of edition: 21       ეშხუ მელჯგრა̈̄გ ჟი ილჯენი ლემს ი ამჟი̄ნ ლაჴვმი̄ლდხა̈ნქა ი ლეჟა̈̄ ბოგდ
Line of edition: 22    უსგვა̄მინ ლეჟა-ლექვა იტხეს ლაჭმუშ ჩა̄ჟა̈რს ლემ ერვა̈̄ჲს ხოლჯა, ეჯას გუნ გარჯ
Line of edition: 23    ხოჴდენი, ეჯღ' ე̄რე ბიქვ ლემს ქ'ა̄ბე̄ლე ი ეჩქას მასა̈რდ გვა̈მი ლი. ხვა̈̄ინ ლჷ̄მა̈̄რ,
Line of edition: 24    ერე ჩა̄ჟრე ლამქჷრა̄ლჟი̄ნ ობაშ მეშყდე̄ლი ჩა̄ჟვხა̈ნჩუ̄ნ, ჲედე ჩა̈̄ჟ ლუჟო̄რე̄ლი ჩუ,
Line of edition: 25    ეჩქას ჩუ ლჷჴა̈̄ფ ლი ი მა̄რე̄ჲ ჩუ მეშყდე̄ლი. ამ ლადა̈ღ ლენჯა̈̄რხა̈ნი ჴედნიხ მესტჲათე
Line of edition: 26    მუშგვრა̈რ ეშდ-ეშდოხვიშდთეჟი̄ნ. ალჲა̈რს ეშხუ ლერქვა̈შ ჰარა̈ყ ხუღვეხ.
Line of edition: 27    სგვებნა̄ვ ჯგჷრა̈̄გი ჰა̈ზვისგა ჟი იკურჲე̄ლიხ, ეჩქანღო ლაჭშხაშს ფხიჟეხ. ალჲა̈რს
Line of edition: 28    მესტჲა̈̄ ლჷთიშ ხეხო̄ლიხ, ჩუ ისგრიხ ჯგჷრა̈̄გი ჰა̈ზვისგა ი ალ ჰარა̈ყს ჩუ ჲჷთრეხ.
Line of edition: 29    ეჩქანღო მესტჲა̄ლა̈რ ქ'ა̈̄წჰიხ ლენჯა̄რა̈რს, სგ'ა̈̄ჲე̄სგიხ მეზგათე̄სგა ი გუნ ხოჩა̄მ
Line of edition: 30    ხინს ხოსყე̄ნეხ. ისგლა̄თვ ხინ ხა̈რხ ი ეჩქანღო ჩუ ფხეჟნიხ. ლენჯარა̈რ მინე ქორთე
Line of edition: 31    ღჷრიხ ი მესტჲა̄ლა̈რ ქორს სედნიხ. ჰჷლშიე̄რ იშგნა̈̄გი ხა̈მთქვახ. ჩუბეჴევს თეკერისგა
Line of edition: 32    ჩა̄ჟრე ლიმქჷრა̄ლვნე ხა̈მთქვახ, მარე ლემ ი დურშა̈ჲ ეჩე მა̄მ ხუღვეხ, მარე
Line of edition: 33    ხინ მო̄შ ხა̈მთქვახ. ეჩე ლასკა̈რნ ი ლასკა̈რნ ისგვრა̈̄ლ მა̈გ. მიჩა-მიჩა მუშგვრი
Line of edition: 34    ჩი ხაყა, ეჯღ'ე̄რე ამ ლადა̈ღ ბა̈̄ლჷნჩუ̄ნ მა̄რე ფიშირ ღჷრი ჩუბეჴევთე ი ჟი ხელა̈კ
Line of edition: 35    ეჩეჩუ̄ნა̈ ღჷნს ი ხოჩა̄მ ლარდას ი ხინს.

Line of edition: 36       ჰჷლშიე̄რისგა ღალ ფიშრა̄მინ ლჷჩი̄დლი ტე̄ვა. ამის ლიყა̈̄რჲე̄ლ ხაჭმა ი ფიშირ
Line of edition: 37    მეჩდე̄ ლი ქორთე და̈თქლიფა̈̄რ, თხვიმ მეკვშე.

Line of edition: 38       2. უღვლა̈შობ. უღვლა̈შობ ალა ჩუბეჴევს ხა̈მთქვახ ყვილჲე̄რისგა.
Line of edition: 39    მა̈̄ნკვი ჟი იყვბა̈̄ლხ მახეღვაჟა̈რ ი ქა ითშიხ ყაენია̄ქს(\\ დოლფანა̄ჲს ), ეჩქანღო მიჩა
Line of edition: 40    აფხნეგა̈რს ი მოსმართლას. ამ ლე̄თ ჟი იყვბა̈̄ლხ დოლფანა̈ჲ ი მიჩა აფხნეგა̈რ. ყაენ
Line of edition: 41    ქ'ა̄ზზი აფხნეგა̈რს ჩი მეზგათე. ალჲა̈რდ ხაკუჩ ერე ა̈დქვითეხ მეზგახა̈ნქა მა̄ლე
Line of edition: 42    ბა̈რგ ი სგ' ო̄ხჴჷ̄დეხ დოლფანა̈ჲს. ალ ბა̈რგს მოსმართლა ჟ'ალგვენიხ ი ხაკუჩ ერე
Line of edition: 43    ამი̄ ნაფა̈ს, ჰი̄ბა̄რ ქ'ა̈̄დჴჷდეს მეზგე̄მ ჰარაყვშ. მე̄რმა ლადა̈ღ ჟი ინზო̄რა̈̄ლხ. დოლფანა̈ჲს
Page of edition: 19  Line of edition: 1    ჟი ხაგემხ თხუმჟი მურგვალდ დაჴლა̈ ტუფს ფაყვა̈ მჷქაფდ, ჟი ხოწჷნკრინეხ
Line of edition: 2    ზექი დაშნა̈ჲს, ჟი ხაქვემხ წელჟი ი ამჟი̄ნ ახჭიმხ ეჯ მეზგა̈̄ლს ე, ხედვა̈̄ჲხა̈ნქა
Line of edition: 3    ნაქვთა̈რ ბა̈რგ ხუღვეხ. სგა ხეგნიხ მეზგა ი ხეშგვემხ ჰი̄ბა̄რს.

Line of edition: 4       ალ მეზგახა̈ნქა ქა ჴედნიხ ღვაჟა̈რ, ზურალა̈̄რ, ბოფშა̈რ ი ჰესა̄მა ჭვენჭკიშჭვენჭკ
Line of edition: 5    ჩვა̈რი ეჯ ლა̈ზგაისგა. ხობნეხ ლიმსხარა̈̄ლს დოლფანა̈ჲს ი ჩი̄ხა̈ნ ხოცხუნეხ
Line of edition: 6    ეჩი̄ წელს. დოლფანა̈ჲ დაშნაჲშვ აყა̄ლვე ალჲა̈რს ი ლახე ხათერ ეჩქას თხუმ ჩვაკვა̄ნე
Line of edition: 7    წელხა̈ნჩუ̄ნ. ამნია̈̄ნიდ ალ მეზგა აჯაღჷდ ხაკუჩ ჰი̄ბა̈̄რ.

Line of edition: 8       ამჟი̄ნ ქა ხეჭმენიხ სოფელს, ჟი იზვრიხ ნა̈ქვთა̈̄რ ბა̈რგი სა̈ყსა̈რს, დოლფანა̈ი
Line of edition: 9    წელხა̈ნჩუ ნაკვრჲე̄რს ი ნა̈ბოზს აშხვ მეზგაისგა ჟი იყვბა̈̄ლხ. ჟი ლიყვბა̈̄ლჩიქდ
Line of edition: 10    აფხნეგა̈რ სგა ხეჭვა̈̄დიხ დოლფანა̈ჲს, ჩვაკვა̄ნეხ წელხა̈ნჩუ̄ნ ი ფიკვიდ ეჯჟი̄ნ ქა
Line of edition: 11    ჴიდეხ, ერე ჩი̄სგა ხაჩხვტენიხ (\\ ხა̈ყვჩეხ). ეჩქანღო სგა ღჷრიხ მეზგათე, ნაზორ ჰარა̈ყს,
Line of edition: 12    ლეღვს, თა̈შს ი ჩიგვაშ -- ჩუ იჴმა̈რიხ ამ ლე̄თ ი ხა̄რხ რიჰდ ხინ.

Line of edition: 13       3. ყვილჲე̄რე აღაბ. ყვილჲე̄რე აღაბლადა̈ღ ეშხუ ხოშა მა̄რე ქეზგახა̈ნქა
Line of edition: 14    ქა ღჷრი ცხეკთე ი იქჩე ლეთნაფდ ნა̈პო̄ლრე ჟი ლა̈რკინა სა̈ნჭლა̈̄ლია̄ქს. ალ'
Line of edition: 15    ე̄ჯღა ლ, ე̄რე ლილჩა̈̄ლისგა ნა̈პო̄ლს იმვა̈̄ჲ ჲა̈რ ადდაგრიხ ხოხვრა̈̄ლ ცჴემადშვ,
Line of edition: 16    ეჯჲა̈რ ხაკუჩ ერე ალ სა̈ნჭლაჟი̄ნ ქ'ო̄თრეკიხ ი ეჩჟი̄ნ ლა̈ჲშხუნახ თანაფლა̈დღი ლენ
Line of edition: 17    ცალდ, ეჯღ' ე̄რე თანაფდ ლიშრა̈ვი მა̄დ შიდდა ჯვინალდ.

Line of edition: 18       ყვილჲე̄რე აღაბლე̄თ ჩუ იხჷრჯა̈̄ლ მა̈გ, ეჩქას ზურალა̈̄რ ლჷჯე̄მი ქაქს იჩოხ.
Line of edition: 19    ალ ქაქს ფაკნარშვ ქა ხოგემხ ჩი̄, ეჩქას ჴედნიხ ბოფშა̈რ ი ჟი იგნა̈̄ლხ.   აშხვ ტოტშვ
Line of edition: 20    ფაკა̈ნ ხუღვეხ, მე̄რმა ფხულოვშ ჟი ილა̈̄ხიხ ქაქს, სგა იდე̄სგიხ უშკვთე, ყლიტს
Line of edition: 21    ხაღნეხ, კელიკაჩხუშ ხაცხიპხ გირგითო̄ლას ქორს ი იტვი̄ლჲე̄ლხ:"შიშა, ფაფა
Line of edition: 22    გა̈მჷრკელა̈ჲ, ელჲა̈, ხაბარ, ხაჭარჟინა ჰამ, ჰამ ი ჰამს თა̈შ! "

Line of edition: 23       4. ლა̈ჲსუშა̈̄ ლიწსი. ჰასვშა̈რს ობა̈შ ლიზნა̈ნი ხაკუჩ მეზგახა̈ნქა,
Line of edition: 24    ეჯღ' ე̄რე მინსი ოხვგა̈დხ ლამვარე ქორთე. ამღა ზავისგა ფიშრა̄მინ ხა̄რ ლეწსი ჰასვიშ
Line of edition: 25    ი ეჩის ქა̈̄მჩუ̄ნ ღჷნ-მაღჷნჟი̄ნ ი ჲედ ლახე ხინ მა ხა̄რ მეზგა, ეჩქასი ქა ლეწსი
Line of edition: 26    ლი. ლა̈ჲსუშა̈̄ ლადა̈ღ უფლიშჲე̄რისგა̈̄ თახა̈შ ლი ი ეჩქას ლიხ ქა ლეწსი ოშვა̈̄ჲდ
Line of edition: 27    ჰასვიშ ჩუ ხერდი მეზგა, ეჩჷნქა ყვილჲე̄რისგა ნაკმარუნ ლი ლეჴდე მიჩა ქორთე
Line of edition: 28    ჲედ ეშხუ ხოშა კარა̈ნ ფექ, მა̄დეჲ ეშხუ ლერქვა̈შ ჰარა̈ყ. ხოჩა̄მ ნაკმარუნს ლახ
Line of edition: 29    ხოზზი მეზგე მიჩა ჰასვიშს, ეჯა გუნ ხაჟა̈ხ ზურა̄ლს ი ამი̄ მჷჴდა საჩქვა̈რს ხაჰვდი.
Line of edition: 30    მეზგაისგა ლახე ჩუ ჲა̈რ იდგა̈რი, ეჩქას ჰასვიშს ხვა̈ჲ ლიგვნი ი ლილჭა̈̄ლ ხა̄რ ბაც.
Line of edition: 31    ლახე ლამვარ ჟ'ა̈ხრინე ჰასვიშს, ეჩქას ეჯა ობა̈შინ ხა̈მდუნეჲ ა̄დუ მიჩა ნა̈ლჭა̄ლვ
Line of edition: 32    ი ნაგვა̈̄ნს. მა̄დხვა̈ჲ ღჷნჷლდ ჰე̄სამა ჩუ ხე̄რი ლუშგვირ მეზგა, ლა̈ჲსუშას ჩიგარ
Line of edition: 33    ქ'ა̈̄წჰი. მა̈̄ჲ ლა̈თჲა̄ლს ხა̄რ მეზგა, ხოჩა̄მ ტაბა̈გს ხოგემ ჰასვიშს შდა̄შვ ი ხაყლ, ე̄რე
Line of edition: 34    "მუნდრევ ღალ დამ მა̄მ ხი. ხიად! სი სა̈ხს ლაჯღვ' ე̄ჯკა̈ლიბ ტაბა̈გ ღალ დეშ ჯი̄გ,
Line of edition: 35    მარე მა̈ჲ ხოჩა. ლამვარ ჩვა̈ჯსაბრალა̈̄ნხ ი სერ დეშ მა ხობიც, ადო სი მე̄რმად ლიხვჲე
Line of edition: 36    ჯეკუთვნი ი ჯესგუვ ღალ! ეჩქას ჰასვიშ ხა̈ტხე: "ამკალიბ კათხ ი ტაბა̈გ უჟომუ
Line of edition: 37    ლი გუშგვეჲ ქორისგა, მა̈გ მასა̈რდ ა̈რი ღერთა̈ (ნაჰოდ ) ნალჟჷ̄რვ, ამჟი̄ნ ჩუ̄ვ
Line of edition: 38    ამღუ̄ზე̄ნა ისგვეჲ თხვიმ ი ჰასვშე̄მი ლა̈მზჷრ ლერსგვანთე̄ვ მისპუნე ისგვეჲ თხუმ!"
Line of edition: 39    ჰასვიშს ზავისგა აშხვ ლადა̈ღ ქანს ხატმჷრნე ი ხაჯდუნე ჲარვ ღეთ წყა̈დს. ალ ქანს
Line of edition: 40    ა̈გით' ა̄ი ჰასვიშ ი ეჩხა̈ნქა სგურა̈რს იჯიშ. ლიწსი ჰასვიშჷნქა ნიბა̈̄შინსი ხაკუჩ.

Line of edition: 41       ჰარაკდ ანღრ, ე̄რე "ნიბა̈̄შინს ესერ ქორთე̄სგა ლა̄ზჟი̄ნ ლა̈დჲარე ლაგა̈̄გიჲა̈რი
Line of edition: 42    ჟიხიჲჩუხი ხოქხენიხ" .
Page of edition: 20  Line of edition: 1    ნიბა̈̄შინს მა̈გ ოხვგა̈დ ლა̈დიჲარე ქორისგა: ლიმშავ, ლილხნე ი იშგენ გოშა̈რ
Line of edition: 2    მა̈გ.

Line of edition: 3       ჩი̄ჟე̄მი პა̈ტივი ხოხახ შვანა̈რს. მართა̈ლ ლ'ე̄რე ჩი̄ჟა ხოშა̄მ ლაღა̈ლს ლაშდაბთე
Line of edition: 4    ი იშგან ლამა̈რჯვთე ხეშმი ლა̈მთილ, მარე ხინ ლახე მა ხა̄რ, ეჩქას ჩი̄ჟა ჩუ დე̄მ
Line of edition: 5    ხოთვფე ი ჲედ ლაღვრეშ ი მა̄დეი ჰარყი მახვშიდ ა̈გნე ქორისგა. ჰასვიში, ჩი̄ჟა ი
Line of edition: 6    ნიბა̈̄შნა̈ ლიწსი შვა̈ნისგა მა̈̄ნკვინღო ლჷმა̈̄რ ი ათხე̄ჲ ჲერხის ეზერდ ხოგიჭხ. ლახე
Line of edition: 7    ლამვარ შომვა̄ლე ქა დო̄მ ა̈წსი ჰასვიშს, ეჩქას ეჯ ჰასვიშ ჩვაჭთუნე მიჩა ლამვარს
Line of edition: 8    ხოლა̄მდ.

Line of edition: 9       5. თანღი̄ლ. ალ თანღი̄ლა̈ ლიმზირ ხოხალხ ლატლის სოფელ ლახოშდ
Line of edition: 10    ჟიქა̄ნ ზაგა̈რჟი, თანღი თა̄რინგზელი ლაჴვა̈მმჷყ, ნამპარვ დვეშდი ლადა̈ღ. ალ
Line of edition: 11    ლადა̈ღს ხაჟხა ლიმხე̄რი. ალ ლადღიშდ ლახვშდა̈ ლჷთიშ ჩუ იყვლუ̄რა̄ლხ ეჩჟი̄ნ,
Line of edition: 12    ერე თვით სოფელს ლატლიისგა თვით ჲო̄რი მა̄რ' ა̄თხვიე̄ნს ბეგრი მუხვრიდ. ლატლის
Line of edition: 13    ჩხარა სოფელ ლი.

Line of edition: 14       ალ ჲო̄რი ლჷთიშ მიჩა მა̈ხვაჲ სოფელს ქა ხეჭმენდა ი ჟი იზვერდა ლეღეი ნა̈ქვცუვა̈რს
Line of edition: 15    ლე̄ღა̈ბ ხა̈მხა̈ნქა ი თვიო ხოხვრა კარვა ფექს.

Line of edition: 16       ნა̈ბოზს ალ მუზვრა ალ ნაზორს (ლეღვს ი ფექს) აშხვ მეზგაისგა ჟ'აყვბახ.
Line of edition: 17    ლეღვს ჟ'აკვბა̈დდახ, ფექს ჟი იბურდენდახ ი ანყახ კუბდა̄რა̈რს, ოდე ჴიც ი ლეღვ
Line of edition: 18    დო ხა̄დხ, ეჩქად.

Line of edition: 19       ეჩჷნქა აჯაღ ანყახ ლემზჷრა̈რს მასა̈რდ. ალ კუბდა̄რა̈რს ი ლემზჷრა̈რს
Line of edition: 20    ღვაჟა̈რ ჟ'ა̈ჲა̄სგდახ თანღი̄ლთე.

Line of edition: 21       ამ ლა̈დღიშდ ლიჰრა̈ყი მამ ხემთქვა̈̄ნხ, მარე მეზგახა̈ნქა მა̈გ ა̈ჲა̈̄სგდა ზედა̈შს.
Line of edition: 22    ჰამხა̈ნ ამხა̄ვ ა, თანღი̄ლთე ზურალა̈̄რი ღჷრდახ ი იდბა̈შდახ. შჷნ ხუღვა̈̄ნდახ თვით
Line of edition: 23    შუშა ნათხუმ ჰარა̈ყ. ისგ ლა̈დღი ონაქა მეზგახა̈ნქა თვით მა̄რე ჟი იყვბა̄ლ ამხა̄ვ
Line of edition: 24    ი შჷნ ხუღვა̈̄ნხ თვით კარნიშ ნათხუმ. ალ ჰარა̈ყს ჟი ხა̈მზჷრდახ თანღი თა̄ რინგზელს
Line of edition: 25    ი სგ'ა̈̄გვშახ აშხვ კეცთე. ალ კეც ჩიგარ ჩუ ლჷგ ეჩე.

Line of edition: 26       ზურალა̈̄რ ნადბაშუნღო, ესვა̈̄ჲ ილკენდახ მინე ლეწსის, ჰარაყს ხათრახ. ლიმზირს
Line of edition: 27    ქ'ა̄გათვახ, ეჩქა ჩუ ისგვრო̄ლდახ მა̈გ ი ლახვშდა̈რ ქა ხორგივახ ჩი̄ თვით
Line of edition: 28    კუბდა̈̄რს ი თვით სამ ლემზირს. ნათხუმ, ცხა̈ჲ, ეშ ხეჰრა̈̄ნ.

Line of edition: 29       მა̈̄ნკვი ჯგჷრა̈̄გი კათხს ჷთრახ, ეჩქანღო სა̈̄ყა̈ნს ი ამჟი̄ნ იბნო̄ლდა ლითრე-ჲ
Line of edition: 30    ლილხნე. ჯვინალდ ხოხალდახ, ერე ჲერვა̈̄ჲ მაშე̄ნე ლუწხვავად ი ლჷმშერად ირდო̄ლ
Line of edition: 31    ლჷდგა̈რი ბედჟი̄ნ, მა̈̄ნკვი ეჯა იბნა სოფელცახა̈ნ ლიხი̄რვილს ი ლიღრა̈̄ლს.,
Line of edition: 32    ჟი იბნო̄ლდა ლა̈ხი̄რულ, ლიშვშპა̈რ ი ლაჭშხა̈შ. ხა̈ლხ ჩუ იშდმო̄ლდა, ეჩქას იბნახ
Line of edition: 33    ჩუ ლიჴედს ლაღრა̄ლუშ. თანღი̄ლა̈ ძირისგა ლახვშდა̈რს სგვებნავ ჩუ ლჷგე
Line of edition: 34    ხა̄დხ მუსი მურყვამ. ეჯას სგა სონხა̈̄ნ ჭე̄რ. ეჯის ჟიქა̄ნ ჟი̄შხე ხა̄დ. ალ მურყვამს
Line of edition: 35    ლე̄თშვ ლიცს ხა̈ბდახ ი ეჩჟი̄ნ მეგჭე ხეფსო̄ლდა ლუკვრემანღვ"ე̄რე ეჩხა̄ვთეჟი
Line of edition: 36    ლი̄ზი სურუ გარჯ ლა̈სვ ი ალ მურყვამთე̄ჟი̄ნ ი ჟშხათეჟი̄ნ მე̄ზის სგვებნავ სოფელ
Line of edition: 37    ქა ითიშდა ი მა̈̄ნკვი ეჯჲა̈რ ანღჷრდახ სგვებინ ჩიდ მა̈̄ნკვი. ამხა̄ვთეჩუ̄ნ ჩუ ჴედენდახ,
Line of edition: 38    ეჩქას ჩუ ისგვრო̄ლდახ ი ლითრეს ი ლიხი̄რულს იბნახ. ჟიქა̄ნჩუ̄ნ ახღვა̈̄ნხ
Line of edition: 39    ნამსა̈დვ ჰარა̈ყ ი დიჲა̈რ. ეჩქანღო ჟი იგნალდახ, მა̄დხვა̈ჲს ქა იზელა̄ლდახ, ეჩქანღო
Line of edition: 40    ჩუ̄დ ისგვრო̄ლდახ ი ილხნახ ი იხი̄რვილდახ. მე̄სმა̄მდ აჯაღჷდ ჟი̄დ იგნა̄ლხ, ქა̄დ
Line of edition: 41    იზელა̄ლხ მა̄დხვა̈ჲს ი ღო ჩუ̄დ ისგვრო̄ლდახ. ათხ, ა̄ჯაღჷდ იბნახ ლიხი̄რვილს ი ლითრეს
Line of edition: 42    ათხენღო სერ ქა ლჷთიშ ხოხვრა̈̄ლ იბნახ მურყვამთეჟი̄ნ ლი̄ზის. ჲერვა̈̄ჲ
Page of edition: 21  Line of edition: 1    ჟი მოშ ღჷრდახ, ჟი̄შხე̄მი აშხალს ჩუ ხა̈ყვჩახ ი ეჩჟი̄ნ ჩუ ტეხენდახ. ეჯა ეჯ სოფლი
Line of edition: 2    ხოჩა̄მ ზავობს ა̈ნშა̈ნდა. სერ ეჩუნღო ფხეჟენდა მა̈გ ი მიჩა-მიჩა ქორთე ღჷრდა.

Line of edition: 3       6.ლა̈მზჷრ ღერთა̈ მაჯო̄ნვა̈რ. ქრისდიანრე ლანწამ ღერთა̈რჷნქა
Line of edition: 4    ჯვინალდ შვანა̈რს მო̄შ-მო̄შ ღერთა̈რ ხამწმე̄ნახ, ჲერხის ეჩზუმ პა̈ტივს ხა̈ჩო
Line of edition: 5    მდახ ი ხაყვლი̄ნდახ, ერე ღე̄რბათდ ხოშა. შვანა̈რს ჲერხი მა̄რა̈̄ლი წყილჲა̈ნ მა̄
Line of edition: 6    რა̈̄ლ ხოხალდახ. ობა̈შინ ვირჲა̈ჲრე ღერთა̈რი ხამწმჷნხ.

Line of edition: 7       ა. აშხვ ღე̄რბათ ვეჩხტა̈რს ხაყლახ ი ეჩას ვებშა̈რს ხემზჷრდახ ლემზირჟი̄ნ ე̄ჩი ნახა̈ზს ხა̈გნახ. საფტინა̈რს ვირჲა̈ჲა̈რ დიჲა̈რშა̄ლ ლჷჭჷრდიგა ზექი ბეჭედს
Line of edition: 8    ხატყა̈ცდახ ლემზირჟი̄ნ. მაშე̄ნე პა̈ტივისგ სოლომნ ხეყა̈̄დხ, ეჯა ლა̈სვ ლა̈კ
Line of edition: 9    რიშ, ლა̈შკდაშიშ, ლითხვჲარა̈შ, ლილგიმა̄ლეშ, ლიჴჷლვანა̈შ ი ჩი̄მი ხელობა̈ ღე̄რ
Line of edition: 10    ბეთ. ამღა ობა̈შს ხემზირდახ ეჯას.

Line of edition: 11       ბ. თე̄რლე მემშედა̈̄ლ ხებჟა̈̄ნხ ჲა̈ნლატლი̄შ. ეჩხა̄ვ ზურალა̈̄რ ლადბა̈შთე
Line of edition: 12    ღჷრდახ, ქ, ა̄ნყახ ფეტვრა̈̄ ჭკჷტა̈რს. ეჯჲა̈რს ჟი ხა̈მზჷრდახ ი ხეჴჷ̄რა̄ლხ თე̄რლე
Line of edition: 13    მასტუ̄ნა̈̄ ლიჟგენის.

Line of edition: 14       გ. ცხჷმრი "ტეხიშ" ი ლენჯა̈̄რა "ჴვიდ" ასვარე მა̈ზიგს ხემშედა̄ლხ
Line of edition: 15    ი ეჩხა̄ვ ღჷრდახ ლადბა̈შდ. ასვარე მა̈ზგუვა̄რა ხეჴჷ̄რა̄ლხ ეჯჲა̈რს, ერე ქა̈რ ი მა
Line of edition: 16    ზიგ ი ასვარე მა̈კვშა ქ'ა̄თჟაგე̄ნხ.

Line of edition: 17       ლისგვრე̄შ ხა̄დხ შვანა̈რს ი ეჯ ლა̈დღი ლადა̈ღ ჟი ლჷყა̈ჯ ხა̄დხ თხე̄რა̈̄ლხა̈ნ
Line of edition: 18    მჷტა̈̄რხა̈ნ, ჯა̈̄ვრხა̈ნ ხოლა ჭა̈ხხა̈ნ. ამ ღე̄რთა̈რს ხემზირდახ აჯაღ შვანა̈რ.

Line of edition: 19       დ. ლითხვჲა̈რ აფსა̄თს ხებრა̈ჲა̈̄ნ ი მეთხვჲა̈რ მა̄რე აფსა̄თს ხემზირდ" ე̄რე
Line of edition: 20    ე̄რენა̈თხვჲარე ლოჰოდე̄ნს მიჩა ჟჷრშვ ი წყალობშვ.

Line of edition: 21       აფსა̈თს ი ტეხიშს ღვაჟა̈რ ხემზირდახ ი ჴვიდს -- ზურალა̈̄რ. ჴვიდს აჯაღ ხემთქ
Line of edition: 22    ვა̈̄ნხ ეშხვი გვეშ: ჰჷ̄ლშიე̄რ ზურალა̈̄რ ლადბა̈შს არდახ, ეჩქას ბოფშა̈რ ეჩელექვა
Line of edition: 23    მე̄ზი ლიცხა̈ნქა კვეტო̄ლ ლჷ̄ლჰანდილს იკვა̄ნახ. ეჩექა ცხირი ბოგს ხადა̈̄სგდახ ჟიქა̄ნ ჟ, ატო̄მბახ, ეჩქანღო ბოფშა̈რ ჟი ღჷრდახ ზურალა̈̄რთე, ქა ითიშდახ აშხვ,
Line of edition: 24    შჷნისგა ლემზჷრა̈რს ხა̈ყდა̄ნნვახ, თე̄რა̈რს ჩუ ხოჭვე̄ნდახ ი ვეშგდ ლა̈ტხუშ ჩვა̈ჲა̈̄სგდახ,
Line of edition: 25    ბოგო̄ლთეჩუნ ეჩეჩუ ლემზჷრა̈რს ჟი ხა̈მზჷრა̈̄ვნახ, ლუტო̄მბა ლიცს ქა
Line of edition: 26    თხირახ ი ბოგო̄ლს ქ, ა̈̄ჲა̄სგდა ლიც. ალა ეჩი̄ ლა̈ნშა̈ნ ლა̈სვ, ერე ლიცს ლაღე̄ზა̄ლჟი̄ნ
Line of edition: 27    უმარჯვ ნომ' ო̄თყერე̄ნს ლექო̄რა̈ლდ.

Line of edition: 28       ე. სუნდუქ (\\ სუნდუქვ) დეცეშ ძღჷდ ლჷჴმა̈შ ღე̄რბეთ ხებჟა̈ნხ
Line of edition: 29    შვანა̈რს.

Line of edition: 30       ამნა̈რ ეჩზუმ ხაყვლუ̄ნიხ, ერე ლახე ჯჷლა̈ჲ ხაყლე, ეჩქას ჴანა̈რს ი უსხვა̈რს ხოლგენდახ ამის. შომვა̈̄ჲ ჩვა̈ჲსენიხ, ეჩქას ხეჴჷ̄რა̈̄ლხ, ერე დიდა̈ბი ლეჴედ
Line of edition: 31    სუნდუქვ დეცეშდ მიჩა მეფშვდე მა̈ზიგ ქ, ა̄თქა̄ბვნას მემზირი ქორა̈ მერდა მა̄რა".
Line of edition: 32    სუნდუქვ დეცეში ლალგენა ჴა̈ნს სუნდუქვა̈ჲს ხაჟხენდახ ი ჟი ნა̈ლგა̈ნუნღო, ოდე ჩუ დო იჲსო̄ლდა, ეჩქად ეჩი̄ ლივღვი და̈̄ს ხოშიდდა.

Line of edition: 33       ვ. ნათხა̈̄რვ. თხე̄რა̈̄ლხა̈ნ ლჷცხა̈ტ ლადა̈ღს ნათხა̈̄რვს ხაყლახ ი ეჯ ლადა̈ღ
Line of edition: 34    ლემზჷრარშვ ხე̄ჴჷრა̄ლხ ჯგჷრა̈̄გს, ერე "მიჩა ჟეღა̈რ ნომ' ო̄თფი̄შვდე̄ნს მინე ქვინლჷმგენა̈̄ლთე". თხე̄რა შვანა̈რ ჯგჷრა̈̄გი ჟეღს ხაყლახ. მჷლჯგჷრა̈̄გ მა̄რა მა̄დ
Line of edition: 35    ხოშდჷნ თხე̄რე̄მი დაგრა, ადო შომვა̈̄ჲ ამკა̈ლიბს ჩუ იჩომდა, ეჩქას ეჩი̄ ქვინლჷ̄
Line of edition: 36    მგენა̈̄ლს თხე̄რა̈̄ლ აშხვ დე̄მ როქვ ცვირახ.

Line of edition: 37       ჯვინალდ თხერ' ა̄დგა̈რდახ, ეჩქას ეჩი̄ ტუფს ჯო̄დი ხვატჟი̄ნ ჟი ხალჯენდახ,
Line of edition: 38    ჟი ინზო̄რა̄ლხ ეშდ ლეთ მახეღვა̈ჟ. ჩიქე მინე სოფელს ხეჭმენდახ ი ყო̄რჟი̄ნ იღრა̄ლხ
Page of edition: 22  Line of edition: 1    "აშანგელოს". მეზგე ჲედ აშხვ კარვა ნამშა̈ჲს ხოჴდა ი მა̄დეჲ იშგან. ამჟი̄ნ
Line of edition: 2    მერმა სოფლა̄რთე̄ჲ ღჷრდახ ი ქა ხა̈ჭმინახ "აშანგელოს".

Line of edition: 3       ხვა̈ჲ ნამშა̈ჲს ინზო̄რახ, მარე ქორთე ლეჲე̄სგიდ მა̄დხვა̈ჲ გარ ხეხო̄ლდახ, ეჯღ ,
Line of edition: 4    ე̄რე მა̈̄ჲ სოფელისგა ჩუ სედენდახ "აშანგელვე̄" მჷჭმინა̄ლა, ეჯ მეზგაისგა მინ იჴ
Line of edition: 5    მა̈რდახ ჟი ნაზორ ნამშა̈ჲს ლეზობ-ლეთრად ი რიჰდ ლიქეიფ ხა̄დხ.

Line of edition: 6       ზ. მჷტა̈რხა̈ნ ლიმზირ. მჷტა̈რხა̈ნ ლა̈მზირჟი̄ნ ზურალა̈̄რ გიმს
Line of edition: 7    ხემზირდახ ლემზჷრარშვ ჩუბა̄ვ ი ხეჴჷ̄რა̄ლხ ლამა̈რჲას, ერე მინე დაბა̈რდ ი ნალ
Line of edition: 8    ა̄შვდ მჷტ, მჷრშკ ი მუღულ ოთქა̄ბვნე̄ნს.

Line of edition: 9       თ. ჯა̈̄ვრხა̈ნ. ლისგვრე̄ ლადა̈ღ ღვაჟა̈რ ხეჴჷრა̄ლხ ბიქვი მუფშვდა ღე̄რბათ,
Line of edition: 10    ერე მინე ნა̈ლგიმა̄ლვრე ყა̄რა̈რ ჟი ლა̈ჲდერყას ბიქვხა̈ნ ი ყა̄რა̈რ ნომ, ო̄ხჟომას.
Line of edition: 11    ანღლა̈ბ ლადა̈ღ ღვეჟმა̄რე ყა̈̄რჟი̄ნ ჴაბ იყვნა̄ლ, ქუთს შიჲა̈რჟი იყდა̄ნდა, ჟი
Line of edition: 12    ხა̈მზჷრდა ი ეჩქანღო ჩუ იზობდა.

Line of edition: 13       ამის ჩუ იჩომდა, ეჩქანღო ქა იცხპა მიჩა დაბა̈რს ი ნე̄სგა დაბისგა ჩი̄რხუვა̈რ
Line of edition: 14    ცახა̈ნ ჩჷჩჷნი̄ლა̈რს ხოსვა̈̄ლდა. ამნოშ ხოხალდ', ე̄რე მიჩა და̈ბს თე̄-ჲ ხა̈ყბა
Line of edition: 15    ქ'ა̄თქა̄ბვნენ.

Line of edition: 16       ამჟი̄ნ ხემზჷრდა მუშვა̈ნ ჯვინალდ მო̄შ-მო̄შ ღერთა̈რს, ერე ჟი დო̄რ ოხუნდვ
Line of edition: 17    რევი̄ნე̄ნს ი მა̈გ მაშედ ი მაჴვმა̈̄რ ხაყე̄ნე̄ნს,


Line of edition: 18 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.