TITUS
Svan Chrestomathy
Part No. 24
Previous part

Text: 24 
Page of edition: 22 
Line of edition: 19 
24. ჯვინალდ ლჷფშირ მეზგე̄მი აშხუდ ლირდე,

Line of edition: 20       ლიმშავ, ლიქმე, ლილზიგა̈̄ლ, იშგენ გოშა̈რ ი ლი̄თა̄ლ

Line of edition: 21       ჯვინალდ სოფლარისგ' ა̄რდახ ეჯკა̈ლიბ მეზგა̈̄ლ, ერე უსგვა ი იშგვიდეშდ მა̄რ'
Line of edition: 22    ა̄რდა აშხვ ქორისგა ჩუ უ̄თად ი ეზერდ ხოსყე̄ნახ უშხვა̄რ ხოშა̄მ ლაღა̈ლს. ამკა̈ლიბ
Line of edition: 23    მეზგა̈̄ლ ჲო̄რი ი სემი გარ იზგახ აშხვ სოფელისგა, იშგენ მეზგა̈̄ლ ხომჷრხელდა
Line of edition: 24    ლა̈სხვ. ფიშირ მა̄რე მეზგაისგა ამის ხეფსოლდა: ლჷრა̈̄ქვედ მა̄რა სემი მახეღვა̈ჟ
Line of edition: 25    გეზალ ხორდა. ალჲა̈რე გეზლი̄რი ჩუ იფშირო̄ლდახ. გეზლი̄რე გეზლი̄რსი
Line of edition: 26    ხეთვო̄ლდახ გეზლი̄რ ი ამჟი̄ნ მეზგე ჩუ იფშირო̄ლდა. ხვა̈̄ინ ლჷ̄მა̄რ ეჯ', ე̄რე ქორა̈
Line of edition: 27    მახვშის ჟი ხე ჰო̄ლდა მიჩა ნა̈თსა̈ვა̈შ ი ნა̈თი ნა̈თსა̈ვა̈ ლიფშირ ოხვიშდუსგვა ეშდ
Line of edition: 28    თეჟი̄ნ ი მა̈გ ალ მეზგა ხენტჲა̄ლ. ლახე შვიდბა ხა̄დ მეზგ', ე̄ჩქა ჩუ იფშირო̄ლდა.
Line of edition: 29    ამჟი̄ნ, ერე უთა მეზგაისგა თვით მეხვშდა̄მი ი მე̄სგვ' ა̄მჟი̄ნ არდახ ლინა̄თვხა̈ნ. მა
Line of edition: 30    რე ეში̄ უშხუდ არდახ ი ჭირ ი ხინ ეშხუ ხა̄დდახ.

Line of edition: 31       ქორისგა̈̄ ნაუ̄თა̈̄ლი ქორა̈ მახვშისი ხოხალდა, ეჩი̄ ბედ ლა̈სვ. ლახე ხოჩა̄მ
Line of edition: 32    ჴერჴიანდ ი ბჷგიდ ხოჟოღდა ქორს, ქორს უ̄თად იგჭა: ჲერს ეშ ხონკა, ჲერს ეშ ხე
Line of edition: 33    ცვა̄ლ ი ამჟი̄ნ ჩუ იგჭა ქორს უ̄თად. ხვა̈̄ჲნ ლა̈სვ ქორისგ' ე̄ჯკა̈ლიბ, ერე ი̄მჟი̄ნ დო
Line of edition: 34    ხა̄დხ უშხვა̄რ, ჩუ მა̈მ ხოხა̈ლდახ. აშხვ ჯიჯუნქა ი გვა̈რჷნქა ხიჲა̈̄რი ათხე დვრევჟი̄ნ
Line of edition: 35    მეჲა̄ქა̄ლდ ხეყა̈̄დხ, მარე მუშვა̈ნ მა̄რე ჯიჯვს დე̄მ კვიშა ჯვინალდ. ჯიჯვი ლიკვშეს
Line of edition: 36    შვანა̈რ ხაყლახ გვა̈რიშისგა ლიჲა̄ქა̈̄ლს. ლახე გვა̈რიშისგა ჩუ ჲა̈რ იჲა̄ქა̈̄ლ, ეჯ გვა̈რს
Line of edition: 37    მე̄რმე შვანა̈რ ხეჯღა̈̄ვხ. ათხე და̈̄ს მა ხა̄რ ამკა̈ლიბი სერდე ი გვა̈რიშისგა ფიშირ
Line of edition: 38    იჲა̄ქა̈̄ლ.

Line of edition: 39       ამჟი̄ნ არდა ალამა̈გ ფიშირ მა̄რე აშხვ ქორისგა მა̈ჩვი̄ბისგა ქვინჷმგენა ი მა̈ნ
Line of edition: 40    ცინცახა̈ნ. ზავლა̈დღიშდ ჲერხი ხეხვ-ჭა̈შს კვეტო̄ლ მეგმჷრო̄ლა̈რ ხო̄გა̈ნხ ლალყურად
Page of edition: 23  Line of edition: 1    ი ზავლადა̈ღ ეჩე̄სგ' ა̄ყვრახ, მარე ლინთვისგ' ე̄ჯღა̈̄ჲ მა̈გ აშხვ მა̈ჩვი̄ბისგ' ა̄ყვრახ.
Line of edition: 2    ლალყურა ტახდა̈რ ჩი მუხვირისგა ხო̄გა̈ნხ ი აშხვ ტა̈ხდისგ' ა̄ყვრახ ხეხვ-ჭა̈შ
Line of edition: 3    ი მინე გეზლი̄რ მა̈გ აშხუდ. ტა̈ხდისგა ჩიქე ჩალს ჲჷრშეჲდახ ფა̈ტვა̈შს, ი ჲედ ჭჷ̄მნა̈შს,
Line of edition: 4    ეჯის ჟიქა̄ნქა ნაბა̈დს ჲჷრშეჲდახ. თხურმა̈̄შ ეშხუ სასტა̈ვილ ზჷსდან ი ჟიქან
Line of edition: 5    კვილი̄ შართქვინს იქვა̈მდახ. ჲერხი ნე̄შკა̈̄ლჟი ისყე̄ნახ ლაყვრას, ჲერხი იმე ი ჲერ
Line of edition: 6    ხი იმე. მუშგვრი ლახ ხორდა მეზგა, ეჯას ლა̄ნუ̄ნა̈̄ლჟი ხორშეჲდახ ლაყვრას, მა̄დეი
Line of edition: 7    ლჷრგიმჟი̄ნ, მარე ლანუ̄ნა̈̄ლჟი̄ნ ხო̄ნშგვა ლაყვრა ლა̈სვ, ეჯღ' ე̄რე ჩუქვა̄ნ ჩალ ხერშა̈̄ნ
Line of edition: 8    ი ლჷრგიმჟი̄ნ დემის ჲჷრშეჲდახ. ჲერხის მე̄რმე ქორა̈რი ხო̄გა̈ნდახ. ეჩჲა̈რისგა
Line of edition: 9    მა̈ჟი̄ბჟი̄ნ, დარბა̈ზს, ნე̄ნი ხო̄სდა̈ნხ, მა̈ჩვი̄ბს ქვინლჷმგენა̈ლ ხობდახ, ეჯღ' ე̄რე მეზგა
Line of edition: 10    ოხვიშდ-უსგვა უ̄ღვა ჴან, ეჩი̄შ ფირვ, ნეცინ მანგა̈რ ი მა̈ნცინ ხორდა ი მა̈გ აშხვ
Line of edition: 11    მა̈ჩვიბისგა დეშ ხასკჷდენდა. ზავლადა̈ღ ჲერხი ხეხვ-ჭა̈შ ეჩე̄სგა იყვნა̄ლდა, მარე
Line of edition: 12    ლინთვისგ' ე̄ში მა̈გ აშხვ მაჩვიბისგ' ა̄ყვრახ. სერთხი̄ მეზგე ლჷჲმა̈ხვ ლახე ლა̈სვ,
Line of edition: 13    ეჩქას ლა̈̄თშვ მა̈გ აშხუდ არდახ. ჲერხი მეზგა ლაბა̈̄ვ მეგმჷრა̈̄ლ ხო̄განხ ჯვე̄დჲას.
Line of edition: 14    ეჩე ლინთვ დაჴა̈რ ხეყა̈̄დხ. მეზგ' ე̄ჩი̄ზუმ ჭემს დეშ იმა̄რ" ა̄ვე ქვინლჷმგენა̄ჲ დაჴჷლს
Line of edition: 15    ჩი̄ ქა ხა̄რა̈̄ნ, ამღა ლინთვისგა ბავთ' ა̈̄ჲა̈̄სგდახ ი ეჩე უსგვა̄მ-იშგვიდ დოშდულმახა
Line of edition: 16    ჩუ ხეყა̈̄დხ. ლეზობდ დაჴა̈რს კვა̈ფხ ი ღუმრა̈შ ი გჷგბი აშხლა̈რ გარ ხუღვა̈̄ნხ.
Line of edition: 17    ჩუ̄ჲ ეჩე იზა̄ლხ დაჴა̈რ . დაჴა̈რს ეშხუ მა̄რე ხეჭა̈მ. ალ მა̄რე ხოდრე̄ლ ლა̈სვ მიჩა ქორისგა
Line of edition: 18    ი ეჯღ' ა̄ზიზდახ ლაბა̈̄ვდ. ალ მა̄რე მჷლდეღი ლა̈სვ, დაჴრე მჷზა̄ლვნე, ნეხშტარე
Line of edition: 19    მუჩგუნა̈̄ლი, ზექი მჷმა̄რე, მერბიე̄ლ ი მა̈გ. ფექს ა̈გიხა̈ნ ა̈ჲა̈̄სგდა ი ჩვარდ'
Line of edition: 20    ა̄მჟინ ლინთვ ლეჟა-ლექვა ჯა გარ დაჴა̈რცახა̈ნ, მარე ლჷჯახა̈ნ ეზერ ბედ ხა̄დ,
Line of edition: 21    ლახე დაჴა̈რ ჩუ იზა̄ლდახ, ეჩქანღო . ნეხშტარე ნამსა̈დვ ლჷჯე მა̈გ მიჩა ლა̈სვ ი მელა̄რა̈̄ლ
Line of edition: 22    და̈̄რ ხეყა̈̄დდა. ლუფხვს ა̈გითე ჴიდახ დაჴა̈რს ი ნეხშტა̈რს. ნეხშტა̈რს ქა
Line of edition: 23    ხაყვლუ̄რახ დაჴა̈რს, ეჩქას ნეხშტა̈რს ბოფშა̈რ ხელდა̈ღდახ ი დაჴა̈რს ეჯა̄დ ე, ხედვა̈̄ჲ
Line of edition: 24    ლინთვისგ' ა̄რდა ლაბა̈̄ვს. ჲერხი მეზგა ჲო̄რი ი სემა̄შირ დაჴჷლ ხორდა, ალჲა̈ს
Line of edition: 25    ბოტა̈̄ლი ხეჩჷ̄დხ მუბტვა̈ნიდ. აჯაღ ო̄შთხვ-ოხვიშდ ლჷ̄ზა̈ჲ ფუკვა̈რ ხეჩჷ̄დხ, ეჯ
Line of edition: 26    ჲა̈რ ძღჷდა̈რ ლა̈სვხ. ლუგვა̈რ ლა̈სხვ, ეჩქას ღჷნჲა̈̄რვისგა ჩვა̈ჲსენდახ ი ხვა̈ჲ ლეღვ
Line of edition: 27    ხეფსო̄ლდახ.

Line of edition: 28       მახეღვაჟა̈რ ლინთვისგა ლა̈ქმათე ღჷრდახ ზა̈ნთე, გვირჲათე ი იმრეთთე, იმვა̈̄ჲ
Line of edition: 29    ხოჩა ლემშავ ი ლა̈ქმა ხეთხო̄დახ, ეჩხა̄ვ. ქა ირა̄გახ ჲარვ ი სამ დოშდულმახა.
Line of edition: 30    ნა̈ქიმსვ ქა უბი̄რად ჩი̄ ქორთე ჴიდახ ი კა̄ჟი და̈̄სგდახ. ეჩქანღვ' ა̄მის ქორა̈ მახვში
Line of edition: 31    სგა იბრა̈ჲა ი ჟი იშხვინდა, შომვა̈̄ჲ ქორს ხაწხჷნ, ეჩქას ჩუ იჴმა̈რდა, იმვა̈̄ჲ ნა̈რდ
Line of edition: 32    ხეკვა̈დ, ჲედ ლა̈მგებდ ი ჲედ იშგან გვაშვჟი̄ნ.

Line of edition: 33       ზავლადა̈ღ სა̈ვთე ღჷრდახ, ეჩე ჲარვ დოშდულმახა ირა̄გახ ი ეჩხა̈ნ ხაბნა̈რს
Line of edition: 34    ი გიცრა̈რს ჴიდახ, ალა̈̄ჲ ქორა̈შ ლა̈სვ. ამჟი̄ნ, ერე სგა იმვა̈̄ჲ ჲა̈რ იქმა ი ჲედ ჩუ
Line of edition: 35    იმის ჲა̈რ ითხა̈̄ლდა, ეჯა მა̈გ ქორა̈შ ლა̈სვ. ლეთხვიმ ეჯა გარ ლა̈სვ ე, ლახე ქორისგა̈̄
Line of edition: 36    მა̄რე მო̄რევდ ლა̈სვ ლჷთიშ ი ჲედ მოხელდ. ეჩქას იმვა̈̄ჲ ითხა̈̄ლდა: ჲედ ნამბა̈ნჲე̄რს
Line of edition: 37    ი ჲედ ა̈თისთავს, ალას ქორშა̈რ დე̄მის იშგომდახ ი მიჩ გარ ხა̈მბახ ლეთხუმდ,
Line of edition: 38    და̈̄რ ხეცლა̈ვჲა̄ლ. ლახე ხოხვრა̄მ ლუმღვე̄ნა მეზგა გიმ ხა̄დ ლეჰვდი ლჷდგა̈რი ქუნე
Line of edition: 39    გვაშჟი̄ნ, ეჩქას ალ ლჷფშირ მეზგა ხაჭრა̈ჟდა. მეზგა ლახე მაბა̈ც ხუღვა̈̄ნდა, ჟი
Line of edition: 40    იყიდდა ალ გიმს ლექორდ ი ფა̈სი ქორა̈̄შ ლა̈სვ. მეზგე ლახე ზურა̄ლა̈ ნაჭვლაშ-ნა̈ყდანვი̄რს
Line of edition: 41    იკა̈დდა, ალა̄ჲ ქორა̈შ ლა̈სვ. ზურა̄ლა̈ მა̄ყაი ქორა̈შ ლა̈სვ ი ქორს ხა̄დ
Line of edition: 42    ლემა̄რე. ლახე მეზგე თელღჷ̄რას ჴიდა ქორთე, ამი̄ ნაჭვლაშ-ნა̈ყდანვი̄რი ი ქვერწლი
Line of edition: 43    ხა̈რჯ ი მაჴმარა ქორს ხა̄დ ლეჴდე. ქორისგა̈̄შს ლახე მა̄რე ხედგარო̄ლდა, ნა̈ბშვ
Page of edition: 24  Line of edition: 1    ი̄რო̄ლა უმბილდ, ლასყა̄ლჟი̄ნ წორა̈შ ი იშგენ მა̈̄ღვრალე მჷჴდე ქორ ლა̈სვ,
Line of edition: 2    ჩიისგა̈ ქორა̈ კეთილ იჴმარო̄ლდა ქორა გვეში გუ̄ღა.

Line of edition: 3       ლახე ქორისგა̈̄შს ჲა̈რ ადგა̈რდა, ეჩქას ეჩი̄ ლიწვრი ქორა̈ გვეშ ლა̈სვ. ნამსყა
Line of edition: 4    ძვირდ გარ ჴა̈დდა მეზგე, მარე ლახე ჩუ ჲა̈რს ხესყა̄ლ ი წორს ი ჲედ გვაშვ ქა იკა̈დდა,
Line of edition: 5    ეჩქას ალა̄ჲ ქორა̈შ ლა̈სვ. ლიშდა̈ბ ჩუ ლჷ̄თა̄ლე ხა̄დხ. ხოშა̄მ, ხოხვრა̄მ, ზურალა̄რს
Line of edition: 6    ი ღვეჟმა̄რა ჩი̄ მიჩა-მიჩა ლეშდა̈ბ ხოთრო̄ნდა ი ეჯას ხეშდაბდა. ქორისგა
Line of edition: 7    მამჭირა̈ჲ ლახე ჲა̈რ ხეჩჷ̄დ, ეჯას ლაშგვრა̄ნოშ ი ლაყა̄ლვოშ ჩვა̈ვზურახ, ადო ლა̈ნ
Line of edition: 8    ტრა̄ლს ი ლა̄ცვს გვის ხოხპახ ქორშა̈რ. მახვშის ხოწვჷნდა ქორა̈ ლითხვმი ი ლი̄ქვი̄სგ
Line of edition: 9    მა̈̄ჲ ჲა̈ს ხა̄დ ლეჩვმე ი ჲედ იმე ლეშდა̈ბ. ხოშა̄მ მახეღვაჟა̈რს ზექ ხა̄დხ ლექჩე
Line of edition: 10    ლელუნთად ი ლიჴნჲე̄ლისგა მუღუნწუში ლა̈სვხ. ხოხვრა̄მ მახაღვაჟა̈რს ხოწვუნდახ
Line of edition: 11    ლიჭმე, ლიჴდე, მჷღვი ლინჭლი, დაბრე ლიჰუნწვი, ლუფხვს ლიდცვე, ლათეჲჟი̄ნ
Line of edition: 12    ლინჩვრი, ლიჲჴეჲ, ლიმჭვა̈ლი ი ლა̈ქმათე ლი̄ზი. ზურალა̄რე გვეშ ლა̈სვ ლიფცხი.
Line of edition: 13    ლითი, ლიბა̄ბე, ლივჴი, ლიშყვდი, ლიგვეჰ, ლიფექ, ლირბჲე̄ლ ი ეჩჷნქა იშგენ ლიჴჷლტა̈რი.
Line of edition: 14    ჭყჷნტრე გვეშ ლილდეღ ლა̈სვ ი ლახვხა̈ნ ლეცი̄რი̄შ, ბუ̄რღვი̄შ, ღეჰიშ,
Line of edition: 15    კჷციგ ი იშგენ ლეზვებ ლეცი̄რარე ლიჴდე. ღველჲა̄ქრე მჷლდეღ დი̄ნა̈̄ლ ლა̈სვხ
Line of edition: 16    ზავლადა̈ღ . ხამრეშ ი გოჭრე მჷლდეღ ხოხვრა ბოფშა̈რ ლა̈სვხ. ლა̄ნშყა ჴანრე ლი̄ნშყე
Line of edition: 17    მენენი გვეშ ლა̈სვ. ლა̄ნშყას გუნ ხო̄ზნა̈ნდახ. ლა̄ნშყა ხამრე მჷ̄ზნა̈ნი ხოშა̄მ
Line of edition: 18    ლაღა̈ლს ზურალა̈̄რ ლა̈სვხ. ობა̈შინ ღვაჟა̈რი ლა̈სვხ. ლირბჲე̄ლ ლა̈ხრესჲა̄ლუშ
Line of edition: 19    ხა̄დხ, აშხვ ზავ ეშხუ ლა̈სვ მერბჲე̄ლ, მე̄რმა ზავ -- მე̄რმე ი ამჟი̄ნ იხრესჲა̄ლხ. მჷ შგა̄ლი,
Line of edition: 20    მჷყე̄ლი ი თა̈ში ოხდრისი მეფდა̈̄ლი ხერასვშ ხა̄დხ ჟი მეკდე ზურალა̈̄რს.
Line of edition: 21    მუნყუ̄ნა̈̄ლი ი მუნჩუდნა̈̄ლიი ხერასშვ ლა̈სვ, იშგენ ზურალა̈̄რ აჭა̈̄ლდახ ლა̈ხრესშვ.
Line of edition: 22    ამჟი̄ნ ხა̄დ მეზგა ჩუ ლუყვლურე მიჩა-მიჩა ლეშდა̈ბ ი ცვიდდ და̈̄რ არდა გუნ მე
Line of edition: 23    ჩიჲა̈რჷ̄ნქა. ალჲა̈რ ჩუ გარ სგურდახ, ხო̄ზნა̈ნდახ ქორშა̈რ, მა̈̄ჲ ლა̈თჲა̄ლს ლა̈სვ. ქორა̈
Line of edition: 24    ბედჟი̄ნ გოშრეშ, ამახვ-მჷკთი პასხვი ლიტხე̄შ, ნა̈ქიმი ლიშხვნი̄შ ი ლიხჷ̄რჯა̈ვიშ,
Line of edition: 25    ქორა მჷქაფდ პასხვი ლიტხე̄შ ი ჩი ნუკი ლიმხოშა̈ გვეშ მა̈გ ქორა̈ მახვში̄ გვეშ
Line of edition: 26    ლა̈სვ ი ეჯა, მა̈̄ჲ ლა̈თჲალს ხა̄დ, ხოჟოღდა ქორს ი ლაშდაბისგა̄ჲ და̈̄ს ხეყვლენდა ქა.
Line of edition: 27    ჰამა̈შ ი ნა̈ბზა̈ ლა̈დჲარა̄ლჟი̄ნი მიჩა-მიჩა ზჷნე ლა̈სვ ჟი მეკდე. ხოშა̈̄ლ საკარცხვილჟი̄ნ
Line of edition: 28    ისგვრო̄ლდახ. აშხვ ფოყხა̈ნ ღვაჟა̈რ სგურდახ, მე̄რმახა̈ნ -- ზურალა̈̄რ ი მე̄სმახა̈ნ
Line of edition: 29    -- ბოფშა̈რ. ხოშა̄მ ფიჩქს ხოგა̈მდახ ი მე̄რმა̈̄ლს -- ჯო̄დი ტაბგა̈რს. ამჟი̄ნ თვით დიჲა̈რს
Line of edition: 30    ჩუ ხოდა̈̄სგდახ ჩი̄ თვითო̄ლაჟი̄ნ. ეჩქანღო ლახე ნაყუნ ხუღვა̈̄ნდახ, ფაკნარშვ
Line of edition: 31    თვითო̄ლაჟი̄ნ ჩი̄ ჩუ ხოგა̈მდახ სგვებინჩუ, ფაკა̈ნ ჩი̄ მიჩა-მიჩა ქა ხოთრო̄ნ. ლეღვ
Line of edition: 32    ლახე ხუღვა̈̄ნხ, ამის მელეღვ ჩვალგა̈ფდა ი თვით ლაგა̈ფს ჩი̄ ჩუ ხოდა̈̄სგდა. მელეღვი
Line of edition: 33    ქა ლჷთიშ ლა̈სვ მეზგაჲსგა ი წჷ̄და̈ი̄. ლახე ჰარა̈ყ ხო̄გა̈ნ მეზგ" ე̄ჩქა წჷდა̈ჲ ქა
Line of edition: 34    ხოგვშა̈̄ლდა კათხა̈რთე ი ეჩნოვშ ჲჷთრახ. ლალა̈ღვჟი̄ნ ი ლა̈წდა̈ჲაჟი̄ნ მეგნე ხეყა̄დხ.
Line of edition: 35    მეაგნდ ხოხვრა ბოფშა̈რ იგნო̄ლდახ ი ეჩქანღო გარ იდჲარა̄ლხ, შომვა̈̄ ლიზრულ
Line of edition: 36    ი ჰარყი ლითვნა̈̄ლი ქა იზგჷრო̄ლდა. მა̈̄ნკვი ლაგა̈ფ ი კათხ ხოშე̄მიშ ლა̈სვ.
Line of edition: 37    მეზგე ლამშიად სამ ი ო̄შთხვ უ̄ღვა ჴა̈ნს გარ იყდა̈̄ნდა ი იშგვიდ-არა̄მ ფირვს,
Line of edition: 38    სერ დე̄მის, ეჯღ, ე̄რე ლინთვ იშგვიდ-არა დოშდულმახა ლი ი ალჲარე ლა̈ჩფა̄ნქა
Line of edition: 39    დეშ ჴიდა ჭემს, ლა̄რა̄ლე ნავღვა̈̄ნოვშ. ამჷნქა ღველჲა̄ქა̈რსი ჩიფახ ლინთვისგა ეშდ-ეშდოხვიშდთეჟი̄ნ.
Line of edition: 40    ზურალა̈რს ლეთხუმდ ღველჲა̄ქა̈რ გარ ხორიხ, სერ მა̈მგვეშ.

Line of edition: 41       ნაჩფი̄რვ ქორს, ღველჲა̄ქ ლახე გიცა̈რს ათვე, ეჯა ხა̄რ. ჟინაღ დის ქა ხეყვლენი,
Line of edition: 42    ეჩქას დარბა̈ზთ' ა̈გნეხ ი სამ ზავ ეჩე̄'სგა ხორიხ ი ეჩქანღო გარ ა̈ჲსენიხ გუნ ლუგვა̈რს.
Line of edition: 43    ტკიცდ ლ' ე̄რე ალამა̈გ ფიშირ მეზგა ო̄შთხვ უ̄ღვა̈ ნაჴანვ დეშ ხა̄დ, მარე
Page of edition: 25  Line of edition: 1    გიმი ლა̈ქმა დე̄მხა̈̄ნ ხა̄დხ ი იმ იჩომდახ. ლასა̈დს ხოშა̄მ ლაღა̈ლდ ლეჩხუმხა̈ნ ჴიდახ
Line of edition: 2    სიმინდს ჩა̄ჟარშვ, მარე ეჯკა̈ლიბ ხოლა შუკვა̈რ ლა̈სვხ, ერე ფიშრა̄მინ ჩა̄ჟა̈რ ქა
Line of edition: 3    ხოშჷდენდახ, ეჯჲა̈რი ჩუ იდგარო̄ლხ ი სიმინდი ჩუ შჷ̄დენდა. ქორისგა ლახე მეხვტე
Line of edition: 4    (\\ უგზელა ) ხეხვ-ჭა̈შ არდახ, ეჯჲა̈რს შუნ ხუღვა̈̄ნხ ლითხუ̄მა̄ლე ნა̈ბ ი დე̄ჲ მეზგე
Line of edition: 5    ხოდურვა̈ნდა. ზავლადა̈ღ ქორს ხეყა̈̄დხ ი ლინთვისგა იშგნა̈̄გ ჩიფახ. ჯვინალდ ხემთქვა̈̄ნხ,
Line of edition: 6    ერე მეხვტე ხეხვ-ჭა̈შ ქუნე გვაშვ ლჷჲარობჟი̄ნ იჩომდახ. ამ დვრევჟი̄ნ
Line of edition: 7    ფექ, ლა̈ჲსა ი ჰარა̈ყ მა̈გ ალ მეხვტა ხეხვ-ჭა̈შმიშ ლა̈სვ, ქორაშ ზექ გარ იჴმარო̄ლდა
Line of edition: 8    ი სერ მა̄მგვეშ. ლჷწსა მა̄რა̄ლცახა̈ნ ი მესფელაცახა̈ნ ქორშა̈რი ხაფსახ ლიზვებ-ლითრეს.
Line of edition: 9    მეხვტა ხეხვ-ჭა̈შს მეზგე ლიშდა̈ბს დე̄მის ხაკფუნახ, მა̈̄ჲ დო ხეცხა̈̄ნო̄ლხ
Line of edition: 10    ეჩჷნქა, ეჯღ' ე̄რე ალჲა̈რს გეზალ მა̄მ ხოსდენდახ ი ალჲარე ნამხუბი მეზგა
Line of edition: 11    ხესდენდა. ალ მეხვტა ხეხვ-ჭა̈შს ლახე ჟი ჲა̈რ ანხირნის ი ჲედ ხა̈ჴდა ი მა̄დეჲ ადდაგრი̄ს,
Line of edition: 12    ეჩქას მეზგე სურუს ივშგედა ი ჩუ დე̄მჟი ხესყა̄ლ ოდე მა̈გიერს ქა დო ლახტიხა
Line of edition: 13    ალჲარე ხოლემი მუჩვემს.

Line of edition: 14       მასარდ ხახჷრბჷნხ მერხა̈ლდ მეზგა̈̄ლს ლჷფშირ მეზგად, მარ' ე̄ჩი̄შ მა̄მ ხოხალდახ,
Line of edition: 15    ერე ფიშირ მაღვე̄ნას ფიშირ მუზვები ხეყა̈̄დ, მარე ლეზვებ-ლეთრე ეჯა
Line of edition: 16    გარ ხუღვა̈̄ნ ე, მა̈̄ჲ მერხა̈ლდ მეზგა ხუღვა̈̄ნდა ქორისგა.

Line of edition: 17       სოფელთე̄სგა ლახე ხოშა ვარგა̈რ ჲა̈რ ჴედენდახ, ეჯჲა̈რ ალ ლჷფშირ მეზგა
Line of edition: 18    ხემშგვარო̄ლდახ. ჩი̄ გუ ხა̄დ ალ მეზგემი ლიჲა̄ქა̈̄ლდ, ლახე და̈̄ვ ხერდოლხ ქა უწვილად,
Line of edition: 19    ეჯასი ჩუ იყდა̈̄ნდახ მა̈ხჲადა̈̄რ, ხოჩა̄მ დი̄ნას მა̈გ ქა ხაჰვედდა ალ მეზგა, და̈̄ვ
Line of edition: 20    ლახე ხერდო̄ლხ უჩი̄ჟად, ეჯღ' ე̄რე ხოჩა̄მ მეზგე̄მიშ ესერ გურო̄ლი ეზერ ლი
Line of edition: 21    ლეჲე̄სგიდ.

Line of edition: 22       ლიჲმახვსი და̈̄რ მოშ ხობდავდ' ა̄ლ მეზგა, ეჯღ' ე̄რე შიშდ ქა ხეტხე̄ნდა ნაცა̈̄დ
Line of edition: 23    ლჷფშირ მეზგაისგა, მა̈ჲ საკვრელ ლი, დაგრა̄ჲ ხოფშირა ი̄რო̄ლ, მარე ლერვენიი
Line of edition: 24    ფიშირ ლა̈სვხ ი მეზგე ჟი დე̄მის იმჷრხდო̄ლდა, ეჯა მა̄დეი აშგარ იფშირო̄ლდა. ალ
Line of edition: 25    დაგრაჟი̄ნ მასა̈რდ ხა̈რჯ ხეკვა̈დ მეზგა. მაკვა̈დ ხეკვა̈დ მეზგა ლა̈ხჲადა̄ლჟი̄ნი, ლა ხე
Line of edition: 26    ჭყჷნტა̈რ ხეთვო̄ლდახ, მარე ამ ჩიქქა ხოხრა იჴმარო̄ლდა ი ლჷდგა̈რჟი̄ნ ღალ -- ხოშა.
Line of edition: 27    ობა̈შ მაკვა̈დ ღჷრდა ქვერწლა̈რჟი̄ნ ი ზურა̄ლა̈ ნაჭვლაშვდ, მარე მეზგე დემის
Line of edition: 28    ითნ' ა̄მის ეჯღ, ე̄რე ფიშირ მა̄რე̄მი ნამშავ აშხუდ ჟი ლუყვბე ხოშა ბა̈რქიჲა̈ნ
Line of edition: 29    (\\ ბა̈რქია̈ნ ) ლი ი ხოშა სევჲა̈ნ. ღჷნჲა̈რუჟი̄ნ ლა̈ჲსა, ჰარა̈ყ, ი ფექ ხეკვა̈დ მეზგა ი
Line of edition: 30    ღჷნჲა̈̄რუ სურუ ფიშირ ლა̈სვხ ი ამჩიქქა გარ ხა̄დ მეზგა ხოჩა ბედ, ადო ჰა̈მურჟი̄ნ
Line of edition: 31    დეშ ხა̄დხ ამგვა̈რ ბედ ი ხოშა ლაღა̈ლ დი̄რი ჰამა̈რჟი გარ არდახ. ხოშა ლაღა̈ლდ
Line of edition: 32    ნა̈̄ყუ̄ნდ როგვ, ქირს, ღედა̈რ ი იშგენ საუჭმ გარ ხუღვა̈̄ნხ. ამკა̈ლიბდ იზგა ლჷფშირ
Line of edition: 33    მეზგე, ოდე ჩუ დო ი̄თა̄ლ ი ჩუ დო იყლუ̄რა̄ლ ღვეშგმე პილს. ფიშრა̄მინ ქო
Line of edition: 34    რისგა ტე̄ვა ხე̄ფსო̄ლდა ზურალა̄რე, ამის ღვაჟა̈რ ხენჩჷდა̄ლხ ი ჟი იტა̈̄ვინო̄ლხ.
Line of edition: 35    ქორისგა̈̄ თელღჷრა̈̄ ლამვარა̈ ნა̈თია̈რცახა̈ნ ლახე ტე̄ვა ი ლიცვა̈̄ლ ხოჩჷ̄დენდა ალ
Line of edition: 36    მეზგე̄მი მა̄რა, ეჩქას ქორისგა თელღჷრა ჩილე̄თ ფათრა̈კს ასყენა, ეჯღ' ე̄რე მიჩა
Line of edition: 37    ლამვარა̈რს ხეწე̄ნა̄ლ. ქორისგა ლახე მაშდმა̄რობ ხა̄დხ, ეჩქასი ხოჩჷ̄დენდახ ტე̄ვა
Line of edition: 38    ი ფათრა̈კ ი ობა̈შინ ლიყა̈̄რჲე̄ლ ი ქაჩა̄რობ.

Line of edition: 39       მეზგე თვით დია̈რს გარ ანყა მა̄რე̄მი ქუნჟი̄ნ, ხოშა̈̄ლ ალ დია̈რს შიშდ ჩუ იზობდახ,
Line of edition: 40    ბოფშა̈რს ნამსა̈დვ ხოსდენდახ ი ამის დილა̄რუ ლამტვარა̈̄ლჟი̄ნ და̈̄სგდახ.
Line of edition: 41    ჲერხი ხო̄ლა ქვინიშ ხოშა̈̄ლ უფგოვშ ჟი ხოკა̈დდახ ბოფშა̈რს ალ ნამსა̈დვს. ბოფშა̈რ
Line of edition: 42    მა̈იდჟი̄ნ გარ ხეთხა̈̄ლდახ ნამსა̈დვს ი ლახე მომ ხეგვბენდახ, ეჩქას ლიჟღი̄ლჲე̄ლს
Page of edition: 26  Line of edition: 1    იბნახ. ბოფშრე დილა̄რუ ჭათას ხობნახ ნამსა̈დვარე მჷკედს ი ტე̄ვახ, მარე
Line of edition: 2    ამღა და̈̄რ ფეშენდა, ეჯღ'ე̄რე ამკა̈ლიბ ჩილადა̈ღ შა̄ლ ლა̈სვ ი სგა ლუმთქვე ხა̄დხ ამის.

Line of edition: 3       მუნყუ̄ნა̈̄ლ' ე̄რვა̈̄ჲ ლა̈სვ, ეჯას მიჩა ჭა̈შმიშდ ი გეზლი̄რდ ხოშე̄ლ ხა̈ლსა̈რჷნ
Line of edition: 4    ნა̈̄ყუ̄ნ ი ზჷ̄მშვ ხოშე̄ლს ხოგვშა. ამის მე̄რმა̈̄ლ გუდ ჴედენდახ ი ლიღი̄ლჲე̄ლს ხაფსახ.
Line of edition: 5    ჲერვა̈̄ჲ ზა̈რვილ-მელეღვ ლა̈სვ, ეჯა ხოჩე̄ლ ლაგფა̈რს ხოთიშდა მიჩა ბარგა̈რს
Line of edition: 6    ი ამისი ლიღი̄ლიჲე̄ლ ხეფსო̄ლდა. ლეთხვიმ ხა̈მ ესვა̈̄ჲ ხორდა, ეჯას მჷზნა̈ნი ლა̈̄ზნა̈ნჟი̄ნ
Line of edition: 7    ხოშე̄ლს ხო̄ზნა̈ნდა. ალასი გუნ ისდიკა̄ლხ ჲერხი ზურალა̈̄რ ი ღვაჟა̈რ, მარე
Line of edition: 8    ქორა მახვში ლახე ხოჩა ბჷგი ლა̈სვ ი ხოჩა თველჲა̈ნ, ეჩქას ქამავ ლეჲე̄სგიდ დე̄მის
Line of edition: 9    ჴიდა ტე̄ვას ი სგა̈̄ჩუ̄ნ ადა̄წყა გვეშს. ქორშა̈რს ხაყლა: "ხოლამ მა̈ნკიშს ესერ
Line of edition: 10    ხოჩა მა̈ნკიშ ქა დო̄მ ხოსგნუნი, ხოდრა̈მ მჷშა̈ჲს ესერ ხოჩა მჷშა̈ჲ ქა დო̄მ ადჲე̄სგი,
Line of edition: 11    ხოშა̄ჲ ხოხვრ' ე̄სერ ქა მა̄მ ითრი̄ნი ქორისგა, ეჩქას ესერ ლიყოლფ იმჟი ი̄რი"
Line of edition: 12    ი ამჟი̄ნ ლაშგვრა̄ნუშ ჩვაშა̄რდა, ლჷხრინე ერვა̈̄ჲ ლა̈სვ ქორისგ' ე̄ჯას. ამის მე̄რმე
Line of edition: 13    მეყულფა̄ჲ ხომა̈რჯვდახ, ქორ ჩუ იშა̄რდო̄ლდა ი ამჟი̄ნ ლუნყურად ლირდესჷდ
Line of edition: 14    იბნახ. ლჷფშირ მეზგახა̈ნქა ნა̄თა̄ლვა̈რ ათხე̄ჲ ჩვა̈რიხ ლენჯა̈რ ნატრო ი ტარა̈სი
Line of edition: 15    ნატროშა. ალჲა̈რ გუნ მეჩი ლიხ ი ჩუ ხაშყიდხ მინე ლი̄თა̄ლ. ალა̈რ გა̈რგლიხ:
Line of edition: 16    "ჰმ, ხიჲად, ფისევ ხაბა ნიშგვეჲ ლი̄თა̈̄ლს, ნიშგვეჲ ქორისგა ლირდეს მა̄მგვეშ ხოჩა̈̄ნ
Line of edition: 17    უთა ხვასვდ, ეჩქა, ნა̈ჲ ხოხვრა ბოფშა̈რ გარ ხვა̈სვდ, ლა̄თა̄ლჟი̄ნ. ლა̈̄თშვ ჟი ხვიყბა̄ლდ
Line of edition: 18    მა̈გ, ლაჴვრა̈̄ლს ქა ხოდა̈ლდახ ნიშგვეჲ, მუგვა̈ლს ჟი ხადა̈̄სგდახ ლამტვა̈̄რალჟი̄ნ,
Line of edition: 19    ზურალა̈̄რ ლირბჲე̄ლს იბნახ, ღვაჟა̈რ აშხვხა̈ნ სგურდახ ი ზურალა̈̄რ
Line of edition: 20    მე̄რმახა̈ნ, ბოფშა̈რ აშხვ პილხა̈ნ ხვისგვრა̄ლდ ი კჷკჷს და̈̄რმოშ ხვიკა̈დდად. აშხვხა̈ნ
Line of edition: 21    ლაჭვნი̄რს ასყე̄ნახ ხოშა̈̄ლ ი მე̄რმახა̈ნ ლაჩა̈ნგს, ეჩი̄ ლიჰვნა̈რის მა̄მგვეშ ხოჩა̈̄ნდა.
Line of edition: 22    ბოფშა̈რ ერვა̈̄ჲ ქვინს ჟ'ა̈ნკა̈დნახ, ეჯას შიშდ ქა̈̄მთ' ა̈̄გნახ. ამჟი ხვეყა̈̄დდ
Line of edition: 23    ლჷგა̈̄ზდილე ნიშგვეჲ ხოშა̈̄ლს ი ნა̈ი იშგნა̈̄გ ი ქორს ჩიჲა̈̄გ ლუნყუ̄რად ი ხოჩა̄მდ
Line of edition: 24    ხვარდად. ნიშგვეჲ ლი̄თა̄ლე მიზეზ მაშე̄ნე ლასვ ლითხუ̄მა̈̄ლ. ეჩქა̈̄ ნიშგვეჲ ლირდე
Line of edition: 25    ნიშგვეჲ გვა̈რიშს ი იშგან მა̄რა̄ჲ ი̄ცნავდი მა̄მ ლა̈ხი̄ცნა̈ვ' ა̄დო ქა ცხა̈̄ჲ და̈̄რ ხეწდენი,
Line of edition: 26    ეჯგვა̈̄ჲ ლირდე ნა̄დ სური̄". ნატროშე̄რ ა̄თხე აშხვ მეზგახა̈ნქა ნა̄თა̄ლვ ეშდოხვიშდ
Line of edition: 27    მეზგე ლიხ ი ჩუ ლჷფშირე ლიხ. ალ ლჷფშირ მეზგად გუნ ხახჷრბჷნ ჩი̄ ი
Line of edition: 28    ამღა ჲერხი ითჲა̄ლხ, ერე იმვა̄ლაჟი̄ნ ჩუმოშ ოთჷ̄თენხ ალ მეზგე. ლესმინა̈̄ლიდ
Line of edition: 29    ზურა̄ლ ხოჩა ლი ი ზურალა̈̄რ ალ ქორა̈ ზურალა̈რს ხოსმინა̈̄ლდახ. ზურალა̈̄რ ამჟი̄ნ
Line of edition: 30    ხოსმინა̈̄ლდახ: "ჰმ, ხიჲად, სურუ ლეჟრი ღალ ხი სი. ისგვა ლა̈მყა̈̄რვა̈რს თვით
Line of edition: 31    ოხვიშდ ი უსგვა გეზალ ხორიხ ი ს' ე̄შხვი̄ლ გარ. ჭირ მაშე̄ნე სი ჯა̄რ. ისგვა გეზლა̈
Line of edition: 32    აშხვ კოკორა̈̄ლს იმე დოშ ხა̈სყუნი". ამკა̈ლიბ მჷსმინა̄ლა ღვაჟა̈რსი ხეყა̈̄დხ, ჲერვა̈̄ჲ
Line of edition: 33    ხოშა მე̄ნშგვე ლა̈სვხ, ეჯჲა̈რს, ერვა̈̄ჲ ბჷგი გვი̄მიშ ლა̈სვხ, ეჯჲა̈რს დეშ ხოპი̄რახ
Line of edition: 34    ლისმინა̈̄ლის. ალა მა̈გ ლისმინა̈̄ლი, უსკუ̄დუ ლარდა ი იშგენ მა̈გ ჟი იყვბო̄ლდა ი
Line of edition: 35    ქორისგა ჩი ლე̄თ ტევა ი ფათრა̈კ ლა̈სვ. ანღელდახ, ერე შდა̄შვ ესერ ხოჩე̄ლ ლიზგეს
Line of edition: 36    ა̈ჰე̄სგიხ. ამის უმჴერალ გარ ანღელდახ. ქორა̈ მახვში გვის ხაჰვედდ" ე̄რე ამჟი̄ნ
Line of edition: 37    ლირდეს მა̄მ ხეყა̈̄დ, ნა̈̄ქვ მერხა̈ლდს გარ ხესმო̄ლდა, ჲერხი ზურალა̈̄რს ლაჭშა
Line of edition: 38    მინეშხა̈ნჩუ̄ნ ხა̄დხ ლჷგნე ი ეჩი̄ მაყალშვ, ერე ქორისგა უშხვა̄რ დორ ლახდაგრე̄ნს,
Line of edition: 39    ნა̈ბს ხაჰვედდა ლი̄თა̄ლეშ ი მეზგე ჩუ ი̄თა̄ლდა სერ ამჟი̄ნ ა: ჯვინალდ გიმ ლეჴმარი
Line of edition: 40    ი ქორა̈რ ათხე̄შშა̄ლ მა̄რე̄მი ქუნჟი̄ნ მა̄დ იყვლურო̄ლდა, მუმხუბე̄მი შელდჟი̄ნ ყვილახ
Line of edition: 41    ჩი̄. ლა̈სვ, ერე ეშხუ მუმხუბი ერვეშდ ღეთ მა̄რე ლა̈სვ, მე̄რმე -- ხოშა, მე̄სმე
Line of edition: 42    ეშდ გარ, ჲერ -- ხოფშირა ი ჲერ -- ხომჷრხელდა, მარე ნა̈ფშირაღა ხოშა ნა̈̄თი მა̄მ
Line of edition: 43    ხეჰვდოლდა ნა̈ხუმსა̈რ ი, ამჟი̄ნ ლჷრე̄ქვდ, ნამხუბაჟი̄ნ ყველენდა მა̈გ. ჩი̄დ მა̈̄ნკვი
Page of edition: 27  Line of edition: 1    ოშვა̈̄ჲდ ქორა̈რ ხო̄გა̈ნხ, ეჯჲა̈რს აყვლუ̄რახ, ხოდრა̄მ ქორა̈რს ნა̈დვა̈რს ხადა̈̄სგდახ.
Line of edition: 2    ნამხუბე̄მი შელდჟი̄ნ დეშ ხეხო̄ლდახ ქორა̈რ, მარე ეჯჲარე მჷქაფდ გიმს და̈̄სგდახ
Line of edition: 3    მასა̈რდ. ამჟი̄ნ მუმხუბი̄ შელდჟი̄ნ ჩვა̈მგუვახ ჩი̄ ი ღვეშგემპილს ჯჷლა̈ჲს აკვა̄ნახ
Line of edition: 4    ი მა̈̄ჲ ჲა̈ს ხეხოლდ' ე̄ჯას ჟი ხესკბენდა. ეჩქანღო ითშჷდახ მორვა̈რს. ალჲა̈რს
Line of edition: 5    ღვაჟა̈რ თვითო̄ლაჟი̄ნ მა̈გ ქა ხომბა̈ვდახ მინე-მინე ნა̈ჭირვს ი ნა̈ქიმვს ქორთე̄სგა
Line of edition: 6    მე̄რმა̄ლე ნამსგიდვინ. მორვა̈რ ჩუ ისგვრო̄ლდახ, სგვებნა̄ვ ქორა̈ ხოშა̄მ ხოქვცახ
Line of edition: 7    ნამხოშჲე̄რს დაბშვ ი ჲედ ლა̄როშ ნამხუბა ჟიქა̄ნქა. ეჩქანღო ხოშე̄ლ ნა̈ჭირვ ჲერვა̈̄ჲ
Line of edition: 8    ხებჟა̈̄ნხ ქორისგ" ე̄ჯას ხოქვცახ, მა̈̄ სახს ლახღვა̄ნხ ეჯას, ლჷლღედად. ეჩქანღო
Line of edition: 9    და̈ბ-ლა̄რას ი ცხეკა̈რს აყვლუ̄რახ ჩი̄ მუგუდ ი ეჩქანღო ჯჷლა̈ჲს აკვა̄ნახ. მა̄ჲ
Line of edition: 10    ჲა̈ს ხეხოლდ, ე̄ჯას ხესკბენდახ მა̈გ. ამის ჩი̄ ქ'ა̄სრულახ, ეჩქას ნა̈ბოზს მა̈გ ჟი იყვბა̄ლხ,
Line of edition: 11    მო̄რვა̈რი ეჩეჩუ̄ნ ხეყა̄დხ, ჰარა̈ყს ჲჷთრახ ი ხემზჷრდახ უშხვა̄რ, ერე ლი̄
Line of edition: 12    თა̈̄ლ ხოჩა̄მდ ათმარჯუნდე̄დხ, ლეჰდჷრად ნო̄ს ოხჴეხ ჩი̄ ხოჩა̄მ გარ ხოვა̄დდახ უშხვა̄რ
Line of edition: 13    ი ამჟი̄ნ ჩუ იყვლუ̄რა̄ლხ ლაყხა̄ლუშ ი ლაგვნუშ. ჲესვა̈̄ჲ ქორ მო̄მ ხეხო̄ლდა,
Line of edition: 14    ეჯა მე̄რმა მეზგე̄მი ქორთე ღჷრდა ი ეჩ' ა̄შვა ლემასგვ. ჰა̈რი ქორს უშხვა̄რ და̈̄რ
Line of edition: 15    ხა̈მდუნა ი დე̄ჲ ნა̈დჲა̄ნვი̄რს ჲა̈რ ხეშგომდა უშხვა̄რ, ეჯღ'ე̄რე ქორს ლიკვა̄მე ხოჩა
Line of edition: 16    ხა̄რ ი ქორა̈ ფუსდს ხა̈ხჲა̈დჷნი ა̄დუ მე̄რმე̄მი ლიჴედ მიჩა ქორთე. უ̄თა ქორ ესვა̈̄ჲ
Line of edition: 17    ხეხო̄ლდ', ე̄ჯას გიმ ხოხვრა ხეხო̄ლდა, მარე ეში̄ ხაჩო̄ნდა ამი̄ ლიხვჲე, ეჯღ' ე̄რე
Line of edition: 18    მახან ლილგიმა̈̄ლს ეში̄ ალა ხოცხა̈̄ნ. ქორისგა ბა̈რგსი̄ ნამხუბე̄მი შელდჟი̄ნ იყვლუ̄რახ
Line of edition: 19    ი უ̄თა ქორა ფუსდ მიჩა მა̈ხვია ბა̈რგ-ნაბა̈რგს ჩი̄ მიჩა მიჩ' ა̄დგილჟი̄ნ
Line of edition: 20    ადა̄წყა. ესვა̈̄ჲ ქორ მო̄მ ხეხო̄ლდ' ე̄ჯა შიშდ იბნა ქორა̈ ლაგამ ბა̈ჩა̈შ, ქვიშე̄მიშ, კირიშ,
Line of edition: 21    ჭე̄რიშ ი დი̄რი ლიმა̄რეს, ჟი იგნა ჴელვანა̈რს ი ნა̈ჴჷლვანი̄რს სგვებნა̄ვ ხაჰვედდა:
Line of edition: 22    ჲერხის გჷმშვ ი ჲერხის კუმაშშვ. ჴელვანა̈რ ბა̈რგი ლამა̄რასი ხომა̈რჯვდახ მეზგა.
Line of edition: 23    ჩუ ნა̄თა̄ლუნღო მესვფელა ლახე ხეხო̄ლდახ ალ ნა̄თა̄ლვ მეზგე̄მი მა̄რა̈̄ლს მანგვამშა̄ლ
Line of edition: 24    ხაყლახ: "მასა̈რდ მასდიკ ისგვეჲ ლი̄თა̈̄ლ, მარე მა̄დ ჯასმაჲა: ხაბნა უნჭყ
Line of edition: 25    ი ლახვბა უ̄თ'ე̄სერ და̈̄ს ხოწვა. ცოდ ხა̈სვდ მე̄თა̄ლდ, მარე ხოჩა̄მდუ აჯმარჯვახ ი
Line of edition: 26    ლეჲდჷრე ნო̄სავ ჯა̄რხ. თვითო̄ლაჟი̄ნ ეჯგვა̈რუ აჯფასახ, უ̄თად ერ ხა̈სვდ". ამკა̈ლიბ
Line of edition: 27    ამბვა̈რს ეჯჲა̈რი ხაყლახ, ჲერვა̈̄ჲ მჷსმინა̈̄ლი ლა̈სვხ ი ჩი ხოლა̄მ გარ ხოსმინა̈̄ლდახ,
Line of edition: 28    ერე იმვალეჟი̄ნ ჩუ მომ ოთჷ̄თე̄ნხ. ალ მეზგე̄მი მა̄რა̈̄ლ ი ზურალა̈̄რ ხა̈ტხახ: "ჰე̄
Line of edition: 29    ხიჲად, ივასუ ხა̈რი, ცოდდუ ახხვიჲე̄ნა ეჯას, ჲერვა̈̄ჲ ლი̄თა̄ლე თხვიმ ლჷ̄მა̈̄რლეს
Line of edition: 30    ი ჲეშვა̈̄ჲ ბედ ალა ნა̈ჲ ნა̈̄ც". ამკა̈ლიბ ლჷფშირ მეზგე̄მი ლი̄თა̈̄ლ სოფლიშდი მა̄მ
Line of edition: 31    ლა̈სვ ლეცხე̄ნე, ეჯღ' ე̄რე ჩუ ლჷპრი̄ნწკა ეშდიჲარვ-ეშდოხვიშდ მეზგე̄მი ლიმშედა̈̄ლ
Line of edition: 32    გალდამჟი̄ნ ი ლა̈ლგიმა̄ლჟი̄ნ სურუ გარჯს ხოჴდა ეჩურდი̄ ჩუ ლჷსა̄ბრალა სოფელს.
Line of edition: 33    ეჩჷნქა ფხულე̄მი ლადა̈̄სგ გიმი გუ̄ღა ფიშრა̄მინ ტე̄ვა ი ლიყა̈̄რჲე̄ლ ხოჩჷ̄დენდახ
Line of edition: 34    მახა ნა̄თა̄ლვ მეზგა̈ლს, ხოშა ლაღა̈ლ ჰა̈̄ღვრალე ბედჟი̄ნ ტე̄ვახ, ამღა სოფლი
Line of edition: 35    ხოჩ-ხოჩა̄მ მა̄რა სგა ლენჩჷდა̈̄ლ ხა̄დ ი გვეშ ჟი ლესყე̄ნე, ეჩხა̈ნ-ამხა̈ნ ჩუ ლესყე̄ნე
Line of edition: 36    მეზგა̈̄ლ, ერე დაგრობ ნომ' ა̄ხჩჷ̄დენხ. ამის ლადღარე თვა̈ფ' ა̄ხჭიმდა ი ალა
Line of edition: 37    მასა̈̄რდ კვა̈დ ლა̈სვ მოჭირ გლეხიშდ.

Line of edition: 38       ლისგვრე̄შღა მუშვა̈ნ მა̄რე დე̄მის ივჟა̈̄შნა̈̄ლ, ხაშდბა დე̄მგვაშ ი ეჩქას დე̄მის
Line of edition: 39    ჲა̈ს ხა̈მდუნე თხუმ გვაშ ლასყე̄ნაჟი̄ნ, მარე ლიჩვმი̄ში ლიკვა̄ნე მუშვა̈ნ მა̄რა სურუ
Line of edition: 40    ხამჭირ.

Line of edition: 41       ხოჩე̄ლ მა̈ნკიშ ჲერვა̈̄ჲ ლა̈სვხ, ეჯჲა̈რ ხომა̈რჯვდახ ეჯ მეხვიბს, ესვა̈̄ჲ ქორ მო̄მ
Line of edition: 42    ხო̄გა̈ნ, ქორა̈ ბა̈რგ ლა̈ჴდაჟი̄ნ, ლა̈ლგიმა̄ლჟი̄ნ ი იშგან გოშა̈რჟი̄ნ. ჲერვა̈̄ჲ ლი̄თა̄ლა̈̄ლდ
Line of edition: 43    უშხვა̄რ ხოჩა̄მდ ხოსყე̄ნა, ეჯჲა̈რ ნა̄თა̄ლუნღო̄ჲ ხოჩა̄მდ ხოსყე̄ნახ უშხვა̄რ.
Page of edition: 28  Line of edition: 1    ჲერვა̈̄ჲ ლი̄თა̄ლა̈̄ლდ ხოდრა̄მდ ხეჩჷ̄დხ უშხვა̄რ, ეჯჲა̈რ ნა̄თა̄ლუნღო ჰა̈დურდ ხოდრა̄მდ
Line of edition: 2    ხეჩჷ̄დხ უშხვა̄რ ი ფიშრა̄მინ გვი̄მიზიგ ხა̄დხ. ჩუ ნა̄თა̄ლუნღო ლახე ლეჭვდიე̄ლ
Line of edition: 3    გვეშ-მაგვეშ ლა̈სვ, ეჩქას ჯვინელ ქორა̈ მახვშითე̄დ ღჷრდახ ლა̈ჭვდიჲა̄ლთე,
Line of edition: 4    ოდ' ე̄ჯა ლჷჲა̈რ ლა̈სვ, ეჯა მა̄მ ხა̈მდუნა თხუმ ი ლაგას ხა̈გნა ჩი̄გვაშისგა, მა̈̄ჲ ჩუ
Line of edition: 5    ხოხალდა.

Line of edition: 6       მა̈̄ნკვი̄ ზავჲა̈რისგა ნა̄თა̄ლუნღო სამხუბ ჩუ დე̄მგვაშ ხოთვფახ უშვხა̄რ დე̄ჲ
Line of edition: 7    ჭირჟი̄ნ ი დე̄ჲ ხინჟი̄ნ, ეჯა მა̄დეი, ჲერვა̈ჲ უშხვა̄რ ხოჩა̄მდ ხოსყე̄ნახ, ეჯჲა̈რ ხოჩა̄მ
Line of edition: 8    ნა̄პუს ჩუ დე̄მ ისრახ უშხვა̄რურდ, ეჩჟი̄ნ ხა̈ლსა̈რჷნხ მა̈გ უშხვა̄რ. მა̈ჲ საკვრელ ლ',
Line of edition: 9    ე̄რე ჩუ ნა̄თა̄ლუნღო უშხვა̈რ ხე̄წე̄ნალდახ ლაყა̈̄რჲა̄ლჟი̄ნ ირო̄ლ ა ლაცვა̄ლჟი̄ნ.
Line of edition: 10    სოფელისგა ლახე ლაშდღვა̄ლ ლა̈სვ, ეჩქას ღვაჟა̈რ მა̈გ აშხუდ ღჷრდახ ი მა̈გ აშხუდ
Line of edition: 11    ისგვრო̄ლდახ, ეჯღ' ე̄რე ლახე ლიცვა̈̄ლ ი ლიყა̈̄რჲე̄ლ ანჩჷდენ, ეჩქას მა̈გ გა̈ნხა̈ნ
Line of edition: 12    ხა̈გნე̄ნ უშხვა̄რ ი ლეთხე̄ლი დო̄რ ლჷმა̄რლესვხ. ქა̄მენისგა მჷსგდი აჯაღჷდ ხენტჲა̄ლ
Line of edition: 13    მა̈გ ალჲა̈რს ი ხოხალდ, ე̄რე უშხვა̄რნე̄სგა ჩი ლე̄თი-ლადა̈ღ ხოჩა გვი ხედო̄ლხ,
Line of edition: 14    მარე ეჩი̄შ მა̄მ ხოხალდახ, ერე სგვებნე ლადღა̈რს გარ ლა̈სვხ ნასყა̄ლვ დაბრე
Line of edition: 15    ჰა̈̄ღვრა̄ლე ბედჟი̄ნ ლიცვა̈̄ლხა̈ნქა.

Line of edition: 16       ამჟი̄ნ იზგა ხვა̈̄ჲ ხა̈ნს ჯვინელ უ̄თა მეზგე ი ღვეშგმე პილს სერ ნა̈ფშიროშ ი
Line of edition: 17    უშხვა̄რა̈ ნავყია̄ნუშ ჩუ ი̄თა̄ლ. უ̄თად ჩიჲა̈ ლახჷრბა̄ლ ლა̈სვ, მარე ჩუ ნა̄თა̄ლუნღო
Line of edition: 18    ღალ ფიშირ მეზგე ხეფსო̄ლდა ი ჩი̄ ხოლა̄მდ ი საბრალდ ხა̄დხ. ალა̄ჲ ლე̄ქვი̄სგ
Line of edition: 19    ლ' ე̄რე ლახე მერხა̈ლდ მეზგე̄მი მა̄რე მერხა̈ლდ მეზგაისგ' ა̄რდა ი ჰარაყს ხათრახ,
Line of edition: 20    ეჩქას ამზჷრა̈̄ლდა: "მინე ქორს ესერ ეჭკა̈ლიბ კვა̈მუ ესო̄ზიხ ლეზგჷრჟი̄ნ, იმვა̈̄ჲჟი
Line of edition: 21    ალ ი ალ ლჷფშირ მეზგ' ე̄სო̄ზი".

Line of edition: 22       შვა̈̄ნისგა ჯვინალდ ფიშირ უ̄თა მეზგა̈̄ლ ლა̈სხვ: ლენჯა̈̄რ: ნატროშა (უდე̄სია̄ნა̈რ),
Line of edition: 23    გუვა̈̄ლშა (გულდა̄ნა̈რ). ლატლის: ნუაშე̄რა (ფა̈რჯია̄ნა̈რ), გირგვლია̄ნა̈რ.
Line of edition: 24    მესტიას: გეგა̄ნშა (გვა̈რლია̄ნა̈რ), მჷლახს: კახია̄ნშა (კახია̄ნა̈რ), ციოყჷ̄ლა̈რ (ქურდია̄ნა̈რ).
Line of edition: 25    წვირმის: ფუთაშა (თამლია̄ნა̈რ). ელის: გუაშა (სამსია̄ნა̈რ). ფა̈რს: ძეგია̈რ
Line of edition: 26    (ჩხვიმია̄ნა̈რ). ჩუბეჴევს: ბურნაყა̈რ (ქალდა̄ნა̈რ). ამჟი̄ნ სოფელისგა ეშხუ-ჲო̄რი
Line of edition: 27    მეზგე ჩიჲა̈̄გ ხეჩჷდ ლჷფშირ ი ჯვინელ. ხოშა̄მ ლჷფშირ მეზგახა̈ნქა̈̄ ნა̄თა̄ლვხა̈ნქა
Line of edition: 28    ჲერვა̈̄ჲ ჩუ სიდხ ხოშა̄ლ, ეჯჲა̈რს მა̈გ ხეჭვდჲე̄ლხ ლილზიგა̄ლე გვაშვ, ეჯღ"
Line of edition: 29    ე̄რე ხოჩა̄მ მეზგაისგ' ე̄სერ ლიხ ნარდა̈ვ ი ჩუ ხეხლიხ, იმვა̈̄ჲჟი̄ნ ი მა̈̄ჲ ჩიქქა ხეკვდენი
Line of edition: 30    ლიმშავ, ლილზიგა̈̄ლ ი იშგან გოშრე ლისყე̄ნე. ალჲა̈რი̄ მა̈ჲ ლა̈თჲა̄ლს ხა̄რხ ლაგას
Line of edition: 31    ხა̈გნეხ მინე მეჭვდჲე̄ლას ი ლახე ჲა̈რ ხოჰვნა̈რიხ, ეჩქას ქა ხო̄მბვიხ, იმვა̈ჲ,
Line of edition: 32    ჟი ლირდე ხა̄დხ ჩუ ლი̄თა̄ლა̄ლვ მინე ხოშა̈̄ლს ი ყჷლეხ: "ჰე̄, ხიჲად, ეჩქა̈̄ დვრევს
Line of edition: 33    ივალადა̈ღ და̈რმოშ ლა̈ხტეხნი ნიშგვეჲ გვა̈რიშისგა, ნა̈ჲ ერ ლიზგე ი ლირდე ნა̄დ".


Line of edition: 34 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.