TITUS
Svan Chrestomathy
Part No. 25
Previous part

Text: 25 
Page of edition: 28 
Line of edition: 35 
25. იმჟი̄ნ არდახ ჯვინალდ ქორისგა


Line of edition: 36       ჯვინალდ ათხაშა̄ლ ლჷპრი̄ნწვე მა̄დ ლა̈სვ მა̈გ ი ხვა̈ჲ არდა აშხუდ ქორისგა.
Line of edition: 37    ობა̈შინ ეჯამ მა̈გ ჩვარდახ აშხუდ, ერე იმჟი დო ხა̄დხ უშხვა̄რ წა̈მ, ეჩი̄ში მა̄მ ხო ხალდახ.
Line of edition: 38    ქორისგა ეშხუ ხოშა ქა თერი̄ნდა ი ეჩი̄ ნამხოშს ესჭიმდა მა̈გ, იმვა̈̄ჲჟი̄ნ
Line of edition: 39    ლეჩვემ ხა̄დხ ლიშდა̈ბ ღჷნს ი ჰა̈მურს, ლაჴა̈ნჟი, ლა̈ჭმაჟი, ზექ ლაქჩაჟი, ლახვრევჟი,
Line of edition: 40    ლაჰა̈ნწვჟი, ლალდაღ-ლაჯოგჟი, ლათეჲჟი, ლაკლა̈ვჟი, ლილგუჰე̄რიჟი,
Line of edition: 41    ლა̈ქმათე ლა̄ზჟი ი იშგენ გოშა̈რჟი̄ნ, ჩი̄ მახვში ხაჰო̈დდა შუკვს ი ზჷზს, მარე ჯა
Page of edition: 29  Line of edition: 1    გარ დე̄მის ამო̄რვა ამის, ქა ხეჭვდია̄ლ მე̄რმა ხოშა̈̄ლსი̄ ქორისგა ი ეჩქანღო სერ
Line of edition: 2    მახვში ლა̈სვ ჩი̄მი ქა მუთვრი (ქორისგა) მიჩა-მიჩა გოშა̈რ ლასყე̄ნათე.

Line of edition: 3       ლინთვისგა ლინა̈ნ აშხვ ხებრა̈ჲა̈̄ნ, ზექრე ლიმა̄რე -- მე̄რმა, მუგვლარეშ --
Line of edition: 4    მე̄სმა; ლილაღვ აშხვ ხებრა̈ჲა̈̄ნ, ლიწდავ -- მე̄რმა ი ამჟი̄ნ ჩუ ლუყვლუ̄რე ლა̈სვ
Line of edition: 5    მა̈გ. მეგნა̈̄ლ ხოხვრა̈̄ლ ლა̈სვხ ჩიგარ.

Line of edition: 6       ლიჴნჲე̄ლისგა მუღუნწუში ქა თე̄რინდა მჷბერგე ი მუჟვეღ ხოხვრა̈̄ლ ი ხოშა
Line of edition: 7    მეჩჲა̈რ ლა̈სვხ, მჷწსხი ზურალა̈̄რ ი ბოფშა̈რ ლა̈სვხ, მჷლა̈̄ში ქა თერი̄ნდა ი ეჯა ილა̄შა̈̄ლდა
Line of edition: 8    დაბა̈რს.

Line of edition: 9       ლა̈ქმათე ლახე ღჷრდახ მახეღვაჟა̈რ მე̄რმა-მე̄რმა ქვეყნა̈რთე, ლეზიზს აშხუდ
Line of edition: 10    ინყახ ი ეჩჟი̄ნ ღჷრდახ; ლა̈ქმასი აშხუდ არდახ ი შვიდებდ ლახ ჴედენდახ ა̈გითე,
Line of edition: 11    ეჩქას ნა̈ქიმვს კა̄ჟი და̈̄სგდახ ი ნაღვჭარ ლახე მა ხუღვა̈̄ნდახ, ეჯას ხოშა ჩვაყვლუ̄რა,
Line of edition: 12    ვარჩხილს ჟი იშხვინდა ქორა̈შდ. ეჩქას ლითხუ̄მა̈ლ მა̄მ ლა̈სვ. ლეთხუმდ ზურა̄ლს
Line of edition: 13    ღველია̄ქ ლახე ხერდო̄ლ, ადო ეჩჷნქა მა̄მგვეშ ლა̈სვ ლეთხვიმ, მარე ღველია̄ქს
Line of edition: 14    ლახე ლეგცარა̈̄ლი ხეთვო̄ლდა, ეჯაჲ ქორა̈შ ლა̈სვ; ჟინაღ ლუსვს ქა ხეყვლენდა,
Line of edition: 15    ეჩქას დარბა̈ზთ, ა̈̄გნახ ი ეჩე ხორდახ ჲარვ-სამ ზავ ქა უფი̄შვდად ქა̈̄მთე ი ეჩქანღო
Line of edition: 16    ჩვა̈ჲსენდახ ქორა̈შდ. ლეთხვიმ ღველჲა̄ქრე მა̈ტყხა̈ნქა ზურალა̈̄რ კვილჲა̈რს
Line of edition: 17    ა̈ლთახ მინე ლაჭშა̈შ ი გეზლი̄რეშდ, ეჩჷნქა ქანს ა̈ლთახ ი ეჩი̄ სგვირხა̈ნქა სგა̈̄
Line of edition: 18    ლერქვა̈რს იშხებდახ.

Line of edition: 19       ლა̈̄თშვ ლახე ჟი იყვბა̄ლდახ ქორისგა, ეჩქას მახვშჲა̈რ საკარცხვლა̈რჟი̄ნ ისგვრო̄ლხ,
Line of edition: 20    ღვაჟა̈რ აშხვხა̈ნ ისგვრო̄ლხ, ზურალა̈̄რ -- მე̄რმახა̈ნ ი ბოფშა̈რ -- მე̄სმახა̈ნ.
Line of edition: 21    მერბჲე̄ლ ზურა̄ლ ქა თე̄რინდა, აჯაღ მუნყუ̄ნა̈̄ლი ი ნა̈̄ყუნა̈ მჷმა̄რე̄ჲ. ქა თე̄რინდა
Line of edition: 22    ქორისგა.

Line of edition: 23       მერბჲე̄ლ ირბია̄ლდა ი მჷჭა̈̄ლია̈რ აჭა̈̄ლდახ დია̈რს.

Line of edition: 24       ობა̈შინ ეშხუ მა̄რე ჩა̈ნგს იკა̈დდა, მე̄რმე -- ჭუნირს ი ეჯჲა̈რს აშმახ. ჲერხი
Line of edition: 25    ლიღრა̈̄ლს იბნახ ი ხოჩა̄მ ლარდას ასყე̄ნახ. ტე̄ვა ი ფათრა̈კ ძვირდ გარ ხოჩჷ̄დენდახ
Line of edition: 26    ქორისგა.


Line of edition: 27 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.