TITUS
Svan Chrestomathy
Part No. 26
Previous part

Text: 26 
Page of edition: 29 
Line of edition: 28 
26. სა̈ცქვი ნავჰვედი


Line of edition: 29       ჯვინალდ ჲერხი ლჷმჴერ მა̄რა̈̄ლ ი წოკლა̈ჲ ზურალა̈̄რ ჲერხი ხოშა წინგვილ მჷრე̄ს
Line of edition: 30    ლა̈სვხ. ამღად ოხვსკო̄რახ სა̈ცქვი ნავჰვედი მეზგახა̈ნქა. ამღა ათხე̄ჲ ობა̈შ უმჴერა
Line of edition: 31    ი ძონძღვ მეზგე სა̈ციქვს ქა და̈̄ს ხაჰვდი. ლახე ჟი ინდვნე ი ქა ხაჰვდი, ეჩქას
Line of edition: 32    ფინჩს ეჯღა̈̄ჲ ჩუ ხა̈ცვრუნე. სა̈ცქვი ნავჰოდე̄მიშდ ლადღა̈რ ლიხ ჩუ ლჷნშანე. ეჩჷ̄ნქა
Line of edition: 33    ქორისგა ლახე მა გვეშ სა̈ხმახა̈რ ლიხ, ეჯ ლადა̈ღ ფინჩურდ სა̈ციქვდ ბაც და̈̄ს
Line of edition: 34    ხა̄რ. ეჩჷ̄ნქა ზურალა̈̄რს ხოთრახ ლადღა̈რ ი ეჯ ლადღი ნაყა̈̄ლვ თა̈შს მინ გარ იჴმა̈რიხ.
Line of edition: 35    ჭყა̈ნსი მინ გარ იჩდიხ ქაქთე ი კითხვა̈რსი მინ გარ ინყეხ.

Line of edition: 36       ამკა̈ლიბა̈რ ობა̈შ ლიხ, მარე ჲერხის ეჯღა̈̄ჲ ქა ლიშჷლდა̈ნიდ ი ჩი̄ ხოხალდე̄დს,
Line of edition: 37    იმჟი ლჷმა̈̄რ ალ გვეშ:

Line of edition: 38       1. დო̄შდიშ, ცა̈̄შ ი საფტინს მეზგახა̈ნქა სა̈ციქვ დე̄მჟი̄ნ ღჷ̄რდა, ლახე უმბილდ
Line of edition: 39    ი ნავმა̈ჴროვშ დო ჲა̈რ ხაჰვედდა მე̄რმა მეზგა სა̈ციქვს, ეჩქანღო ლახე ლეგდ ჲა̈რ
Line of edition: 40    ირდნო̄ლდა ეჯ ლა̈ზგაისგა, ამის ჯჷლა̈ჲ ეჩას ხაბრა̈ლდ' ე̄რე "სა̈ციქვ ესერ მჷრე̄ს
Line of edition: 41    ლოჰოდახ ლჷცხა̈ტ ლადა̈ღჟი" .
Page of edition: 30  Line of edition: 1    2.შომვა̈̄ჲ ღვებ ქა ირშგინა, ეჩქას სა̈ციქვი ლიჰვდის ლაღვბა̈ ჟი ლიკედ
Line of edition: 2    ხოხალდა.

Line of edition: 3       3. გზა̈̄ვრთე ლახე ჲა̈რ ღჷრდა მეზგახა̈ნქა, ეჯ ლა̈დღი სა̈ცქვი ლიჰვდის ხოლა
Line of edition: 4    გზა̄ვრობ ხოხალდა.

Line of edition: 5       4. ლა̈თხვჲართე ლახ ღჷრდა მეთხვჲა̈რ, ეჩქა̈̄ სა̈ცქვი ლიჰვდის ნა̈თხვჲარე̄მი
Line of edition: 6    ნავთხე̄ლი ხოხალდა.

Line of edition: 7       5. ლა̈წრექვთე ნა̄ზუნღოჲ მა̄დ შიდდა სა̈ცქვი ლიჰვდი. "ხოლა ლა̈წრექვ ესერ
Line of edition: 8    ხა̄რ მჷწრექვის".

Line of edition: 9       6. შომვა̈̄ჲ მეზგაისგა ჟინღა̈რ, ნეხშტა̈რ, გოჭა̈რ, ღუნვა̈რ ი იშგენ იყვროვო̄ლდახ,
Line of edition: 10    ეჩქა̄ჲ მა̄დ შიდდა სა̈ცქვი ლიჰვდი.

Line of edition: 11       7. ესვა̈̄ჲ ლაღობ ხო̄გ, ეჯ მეზგა წაქა̈შ, წერქვა̈შ ი მუგვლი ლიჰვდი მა̄დ ხოშიდ.
Line of edition: 12    8. დვეშდი ლადა̈ღი ნაყა̈̄ლვ თა̈შს ზურალა̈̄რ ცა̈̄ ლადა̈ღ იჴმა̈რდახ. ამჩიქქა
Line of edition: 13    ღვაჟა̈რ ქა̈̄მ არდახ, ეჩქას ყო̄რა̈რს ქა̄შდენკა̈̄ლდახ. ალ თა̈შხა̈ნქა ქუთვა̈რს ინყახ,
Line of edition: 14    მინ გარ იზობდახ. ყო̄რჟი̄ნ მჷლჩად ეშხუ დი̄ნა ხორდახ, ერე ღვეშგდ ლატა̈ხ მა̄მ
Line of edition: 15    ხა̄რენს.

Line of edition: 16       9. ზურალა̈̄რ საფტინა̈რს ქა̄დ ხოცყანა̈̄ლდახ ყო̄რარს ი ქაქს იჩომდახ ლჷჭყა̈ნს.
Line of edition: 17    ეჯას მინ გარ იზობდახ. ღვაჟა̈რს ეჩი̄ ლაზობთე დე̄მჩიქქა ითლახ სგახი̄ნ.
Line of edition: 18    ხათა̈რდახ ზურალა̈̄რ, ეჩქას მინჷდ გარ ა̄შვახ ლემასგვ ნა̈დჲარობენ. ღვაჟა̈რ ლამშიას
Line of edition: 19    არდახ. ქ'ა̄ნყა̈̄ლდახ ხოშა̄მ ქუთვა̈რს, კიხვა̈რს ი მინ გარჷდ იზობდახ.

Line of edition: 20       ალა ღვაჟა̈რს ჩუ ხოხალდახ, მარე დე̄მის ხოდურვა̈ნდახ, ეჯღ' ე̄რე "ზურა̄ლს
Line of edition: 21    ესერ ხვა̈ჲ ჭირ ხა̄რ" ი სა̈ხ ლახღვა ჩი̄.


Line of edition: 22 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.