TITUS
Svan Chrestomathy
Part No. 30
Previous part

Text: 30 
Page of edition: 32 
Line of edition: 12 
30. გვა̈̄ლი̄ ლინწირ ი ჰა̄ვდრი ლიჴდე


Line of edition: 13       შვა̈ნისგა გვა̈̄ლჲა̈ნ ზა̈ჲ ლახე ლი, ეჯა მა̄დ ხოსგუვ შვანე გიმს. გჷჰლობჟი̄ნ გიმ
Line of edition: 14    ჩუ იფრი, დაბისგა ნაჴაწვ-ნალა̄შვ ჩუ იშხი ი ლა̄რაისგა მელვ მა̈̄გ ჟი იცხვლი.

Line of edition: 15       ოდ ი ოდ ოხღელი სოფელ ლიჰა̄ვდა̈რს ი ლახე დო̄მის ჴიდე პილს, ეჩქას ქა
Line of edition: 16    ითშიხ აშხვ მა̄რა და̈რი მჷჰა̄ვდრად. ამის თვით კარვა ნამშა̈ჲს ჩუ ხობციხ სოფელ
Line of edition: 17    თვით მეზგახა̈ნქა.

Line of edition: 18       სოფლა̈რს ჲერხის ქა ხოთრახ ხოშა ტო̄მბვა̈რ. ეჩხა̄ვთე̄სგა ლახე ნაურწყულა
Line of edition: 19    ჲა̈რ იმის შიდე, ეჩქას შიშდ ჩუ იჰა̄ვდა̈რ ი ხოლა ჭა̈ხ ჴედნი. ეჩჷნქა და̈რი მჷჰა̄ვდრა
Line of edition: 20    როქვ ცოდდ ხეხო̄ლი ეჩაბუა̄სდ. ამღა ხამჭირ სოფელს და̈რი ლიჰა̄ვდრე, მარე ლახე
Line of edition: 21    შვა̈ლას დო̄მის ჴიდე გვა̈̄ლი, ეჩქას ჩუ ლეჩვმე ხა̄რხ.

Line of edition: 22       და̈რი მჷჰა̄ვდრე ქა ღჷრი ტო̄მბთე. ტო̄მბა̈რმჷყვ სოფლა̈რხა̈ნქა ხვრვ მაშე̄ნ
Line of edition: 23    შჷნ იყდა̈̄ნი ციცვს, სგა ხა̈ჲსენი ტო̄მბთე̄სგა ი სგა̄კვა̄ნე. ეჩქანღო კა̄რზა̈რს, ძაგვს
Line of edition: 24    ი იშგენ ვიდრობა̈̄ლსი სგა შიდე. ეჩჷნქა იშგან ხოლა̄მი იჩო ტო̄მბთე̄სგა. ამი̄ ნაჩომუნღო
Line of edition: 25    ჯა ღვეშგდ ტეხნი.

Line of edition: 26       ტო̄მბ შიშდ როქ ლიფა̄მფუნა̈̄ლს იბნე, ჟი იფვი̄ნი ი კვა̈მს ეშ აჴვშდენი ჟი̄ბა̄ვ.
Line of edition: 27    ჩიჲა̈̄გ ჰე მო̄დე, ტო̄მბა̈ ნა̈ფდია ეში̄ მასა̈რდ იჰა̄ვდა̈̄რ. ლახე სოფელთე̄ჲ ქა ხოჭყრე
Line of edition: 28    ნი, ეჩქას მასა̈რდ ხა̈ხჲა̈დ ალა სოფელს ი მუჟღვერ და̈რი მუჰა̄ვდრა მახა მაჴა̈დხა̈ნ
Line of edition: 29    ქა მა̈გ ჟი ხოზვრი თვით კარვა ნამშა̈ჲს.

Line of edition: 30       აშხვ ლახვისგა ლჷგ ეშხუ ტო̄მბ. ამის მჷზა̈̄ ტო̄მბ ხაჟხა. ეჯ ლახვთე მჷლდღას
Line of edition: 31    ჩიგარ ესყახ ლელდეღ ი ლახე ლალდა̈ღჟი̄ნ ალ ტო̄მბთე̄სგა სგა იმის შიდეხ,
Line of edition: 32    ეჩქას შიშდ ხოლა ჭა̈ხ ჴედნი ი ამღა და̈̄რ მოშ ა̈ბდა̈ვი ეჩხა̄ვთე̄სგა ხოლე̄მი ლიშდეს.
Line of edition: 33    ეჩჷნქა, ლახე გვა̈̄ლჲანობ ლი, ლაჴვა̈მხა̈ნქა ჯვა̈რს ჴიდეხ. ეჯას ტვიბრაისგა ჩვაბ
Line of edition: 34    ქვეხ ხვა̈̄ჲ ხა̈ნს. შვანა̈რს ხაჯრავახ, ერე ალ ჯვა̈რი ნაბუქვ ი ნაშყოდ ლიც ლახე ძუღვათე̄სგა
Line of edition: 35    სგა̄დჰე̄სგი, ეჩქას ესერ შიშდ ჩუ იჰა̄ვდა̈რ.

Line of edition: 36       გვა̈̄ლჲანობჟი̄ნ სოფელ ჲელსი ხემზირ.


Line of edition: 37 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.