TITUS
Svan Chrestomathy
Part No. 31
Previous part

Text: 31 
Page of edition: 32 
Line of edition: 38 
31. მო̄შ-მო̄შ ლამქჷ̄რა̄ლა̈რ შვა̈ნისგა


Line of edition: 39       შვა̈ნისგა ობა̈შ ლაკჰურა̄ლ ი ლამქჷრა̄ლ ისყი. ეჩქას ითნი ხოჩა ი ხოლა. ამკა̈ლიბ
Line of edition: 40    ლამქჷრა̄ლა̈რ ლიხ.

Line of edition: 41       1. მა̈რკლა̈ნ. ალა ლაბჷრგა̄ლჟი̄ნ ისყი. ოშვა̈̄ჲდ ჲა̈ს ხეცხე̄ნი, ეჩშელდ ქა
Page of edition: 33  Line of edition: 1    ხეთშიხ მახეღვაჟა̈რ ი ჩუ ისგვრიხ ჭა̄რვიდ, მა̄დე̄ჲ ეჩჟი̄ნ, ერე ნე̄სგაისგა გარდს ას ყე̄ნეხ
Line of edition: 2    ი ეჩე̄სგა ლაბჷრგა̄ლ ლი. ეშხუ ჟი იგნა̈̄ლ. ამის ხაჟხა მა̈რკლა̈ნ. ამის ხაკუჩ,
Line of edition: 3    მე̄რმა ა̈ხბჷრგე̄ნს ი ალჲა̈რ ჟი იბნეხ ლიბჷრგჲე̄ლს. ლერსგვან ბარჯა̈რს უშხვა̄რ ხაგემხ,
Line of edition: 4    ლა̄რტყა̈ლს სგა ხეგვდირნიხ ი იბნეხ ამჟი̄ნ: ჩიქე გჷრკიდ ლისიპს, აკვჰუ̄რეხ
Line of edition: 5    უშხვა̄რ. მა̈ჲ ეშხუ ხა̈ჩომ ჴერჴს ი მა̈ჲ -- მე̄რმე. ეშხუ ხედვა̄ლე ჩუ იდო̄ლიხ, ეჩქას
Line of edition: 6    მჷდე̄სგის მე̄რმე ხატიხ ი ამჟი̄ნ იხრესჲე̄ლხ, ჲერვა̈̄ჲ მა̈ფშირა̄მ ა̈ნდე̄სგი ეჯა სედნი
Line of edition: 7    მა̈რკლა̈ნდ.

Line of edition: 8       ლიბჷრგჲე̄ლე ჴერჴა̈რ ობა̈შ ლიხ. ალჲა̈რისგა ჩიდ მაშე̄ნე ხოხახ: ხირკ, დრა̈ჴ,
Line of edition: 9    ქა̄მენისგა̈̄ დრა̈ჴ, სგა̈̄ნქა̈̄ დრა̈ჴ. ფოყთეჟი̄ნ ლიკვა̄ნე, ცერი ლიბკინე ხა̈სილისგა, მუკვრა̈̄ნჩი̄ლ,
Line of edition: 10    გურან, ლისპუნე, ნე̄სგაქა ლიგვდური ი თხუმჟიქა̄ნქა ლიკვა̄ნე, ჭიშხი
Line of edition: 11    ლიხვიე̄სგი გა̈ნხა̈ნ, ეჩხა̄ვ ლიჯვი̄რი ი ეჩჟი̄ნ ლა̈რყინოშ ლიდე̄სგი ლაბჷრგა̄ლჟი̄ნ.
Line of edition: 12    ში̄რე ქა̄მავ ლიცვრე მე̄რმე̄მიშ მა̄დლი რიგ. ჩუქვა̄ნისგა ლიცა̈̄დისი მა̄დ ხაყა. დეჲ
Line of edition: 13    ჭჷშხრე ლიგვდურის ხაყა.

Line of edition: 14       ჲერხი უშხვა̄რ ხოჭხჷნა̈̄ლიხ ი ეჩჟი̄ნ იბჷრგჲე̄ლხ.

Line of edition: 15       მა̈̄ წესდ ჩუზი ლაბჷრგჲა̄ლჟი̄ნა̈შდ, ეჩი̄ ქა ლიქა̈̄ბის მა̄დ ხაყა ი დე ფა̈რშივიშ
Line of edition: 16    ი ციღვრიტი ლიჩვემს მა̄დ ხაყა ი დეჲ ხა̈მბე ჲა̈რ ამის. ლიბჷრგჲე̄ლ მო̄შ-მო̄შ მესვფელასი
Line of edition: 17    ხა̈მთქვახ. აშხვ სოფლიშს ლახე ქა̄მე სოფლიშ ჩუ ჲა̈რ ა̈ნდე̄სგი, ეჯა გუნ
Line of edition: 18    შგვირ ხაბჟახ შვა̈ნისგა, მარე ჟი დე̄მის იგვხოლეხ.

Line of edition: 19       2. ბა̈ჩა̈ ლიკვა̄ნე. ბა̈ჩს ითშიხ ლეკვა̄ნად: ჲერ -- მეგრა ი ჲერ -- ნეცინს.
Line of edition: 20    აშხვ ა̈გის ჩვა̈ნშა̈ნიხ. ეჯ ლჷნშა̈ნთე̄სგა ბა̈ჩა̈ მუკვა̄ნე ლაჭმუშ სგა ჴედნი ი ეჩხა̈ნქა
Line of edition: 21    ქ'ა̄კვა̄ნე ბა̈ჩს. იმვა̈̄ჲ ხოჲხენი, ეჩეჩუ̄ნ ლა̈ნშანს დე̄სგიხ მე̄რმა̈̄ლ. ეჩქანღო̄ნ მე̄რმე
Line of edition: 22    იშდუ̄რმინე ი ეჯ'ა̄კვა̄ნე. ეჩი̄ ნაკვარ ა̈დგილსი ჩვა̈ნშა̈ნიხ. აშ მა̈გ იხრესჲე̄ლხ. ნიშან
Line of edition: 23    ეჩეჟი̄ნ გარ ლჷ̄გ, ღვეშგმა̄ვ ჲეშვა̈̄ი ნაკვარვ მაშე̄ნე ლი.

Line of edition: 24       ბა̈ჩა̈ ლიკვა̄ნე ჲერს ლერთან შჷნშვ ხამა̈რჯვ ი ჲერხის ლერსგვანშვ, ალა მა̄მ
Line of edition: 25    სერდელი.

Line of edition: 26       3. ლა̈კვჰა̄ლვნა ბა̈ჩა̈ ლიკედ. ლა̈კვჰა̄ლვნა ბაჩა̈რ ჩიჲა̈̄გი სოფელისგა
Line of edition: 27    შა̄ლ ლჷ̄გა̈ნხ ათხად. ალ ბაჩა̈რ ძღჷდა̈რ ლიხ. ჯვინალდ ალ ბაჩა̈რ ლუშნუ
Line of edition: 28    ჟა̈გი ლაყალ ბაჩა̈რ ლა̈სვხ. ალ ბაჩრე ლიკედ ძღჷდ გარჯ ლა̈სვ ი ძღჷდ ჴერჴ ი ჴამშა
Line of edition: 29    ხეკვა̈დ ალჲარე ლიკედს. ჲერხი ეჩი̄ ზუმ ჩუ ლიხ, ერე მახეღვა̈ჟ მეჴრა̈̄რს ქა დეშ
Line of edition: 30    ხოჰე̄სგი ი ეჩქას ფაყვს აჲე̄სგი ი ეჩნოვშ ხობიდ ჟი ჟილაკა̈დთე.

Line of edition: 31       ლა̈კვჰა̄ლვნა ბა̈ჩ შა̈ლჲა̈̄ნი̄ ჰა̈ზვისგაჲ ზი. ეჯა ტანდ მა̄მ ლი ძღჷდ, მარე ლჷგრაშა̄ლ
Line of edition: 32    კუ̄რპი ლი ი მურგვა̈ლ ი სგა ლაგვდირ დე̄მხა̈ნ ხა̄რ, ცხა̄რა̈რს დო ლა̈ჲმა̈რგნე
Line of edition: 33    მა̄რე.

Line of edition: 34       ჲერხი მახეღვაჟა̈რ ეჩი̄ზუმ გავას ჴიდახ, ერე ბა̈ჩლაკა̈დჟი̄ნ ნეფხვნაჩუ̄ნ ზისხ
Line of edition: 35    ეშ ხოჩხფუნახ ი ჲერხი ჰა̈დურდ სგა ხემზიგა̄რო̄ლდახ ამი̄ ლაკა̈დს.

Line of edition: 36       4. ლა̈ჯშა̈რ. ამის ხოშა ლაღა̈ლ ქორს იჩომდახ ლა̈̄თშვ ლეგმერდე̄მი
Line of edition: 37    ლალგენჟი̄ნ. ლა̈ჯშა̈რს ასყე̄ნახ ამჟი̄ნ ა: შგილა̈ დი̄რს თა̈კვს ხაბემხ, ალ თა̈კვს სგა
Line of edition: 38    ხალჯენიხ ფავი̄ თხვიმს ეჩჟი̄ნ, ერე თხვიმ ხაკუჩ ერე აშხვ ალა̈ბს გარ ხოსა̈რდე̄დს
Line of edition: 39    გიმს, ფავი̄ კა̈ცხ გიმჟი̄ნ ზი. თა̈კვს ლჷბე ფაუ, მა̈ჲ საკვრელ ლ"ე̄რე იგი̄წა̈̄ლ ი ჩუ
Line of edition: 40    მა̄მ სკებნი მეწვინდ. ამეჟი̄ნ ჟი ხესგვრი მა̄რე, ლერსგვან ტოტხა̈ნ ფაუ ხოყდა̄ნა ი
Line of edition: 41    ლერთან ტოტშვ თა̈კვს ხოგვდური. ალ ლერთენ ტვეტ ჟიქა̄ნქა ექჷ̄რდა ჭჷ̄შხა̈რს
Line of edition: 42    ჟი ხადე̄სგი ლჷცხვე̄რპინად, ფაუშ გარ ხოგიჭ თხვიმ ფაუჟი მესგვრა. ხათერ, ეჩქას
Line of edition: 43    ლერსგვან ტოტვშ ფაუს სგვებნა̄ვ თა̈კვს ხატყცი ი ვეშგმა̄ვ -- ჟი ლასგვრა ფაუს.
Page of edition: 34  Line of edition: 1    ამის ხაჟხა ლიჯიშ. ჲერვა̈̄ჲ სუმინ თა̈კვს ი ფაუს ქა მოშ ხატყცი, ეჯა ეზერ მჷჯიშ
Line of edition: 2    ხაბჟახ, ჲერვა̈̄ჲ დოშ, ეჯა ჩუ შყედნი ი ამის ხვა̈ჲ ლი̄ცვ ხეფსი. ლა̈ჯშა̈რს ფოყა̈
Line of edition: 3    გრიხსი ხაყლეხ, ეჯღ' ე̄რე ჩუ მეშყდანღო ფოყს ხატყცი მა̄რე.

Line of edition: 4       5. ლიყჷრჲე̄ლ. ამის ხოხვრა̈̄ლს ხაჩვმა̈̄ვნეხ ხოშა̈̄ლ. მა̈̄ნკვი ჲორი ბეფშვ
Line of edition: 5    ფაყვა̈რს ჟი იგემხ, ეჩჟი̄ნ თა̄მა̈შდ იყჷრჲე̄ლხ, ეჩქანღო თხუმა̈რ ლახე ჩუ ხექჷნთრინიხ,
Line of edition: 6    ეჩქას ლჷჴმაშდ ხოშბყჷნეხ უშხვა̄რ ი ლუჟო̄რა̄ლე იკა̈̄ფიხ ეჩხა̄ვ-ამხა̄ვ.

Line of edition: 7       6. ჭვეკს ლი̄ზი. ალა̄, ჭვეკს ლი̄ზი, გუნ გარჯ ლი ი მასა̈რდ ლიმა̈რგ ხაკუჩ.
Line of edition: 8    ამის იჩოხ ამჟი̄ნ ა: ჭალა̈ჲქა ქა ხადე̄სგიხ ნეცინ ჭერს ეჩხა̈ნ-ამხა̈ნ ბაჩა̈რჩუ გარ
Line of edition: 9    ხაცხტენიხ. მა̄რე ლახე ჟი ხეგნი, ეჩქას ალ ჭვეკ ჭჷ̄შხა̈რ ჩუქვა̄ნ ისი̄პანა̈̄ლ, იღვე̄
Line of edition: 10    ნსტუნა̈̄ლ. გუნ ლიბგე ხაკუჩ ტა̈ნს ი ჭჷშხა̈რს, ადო მა̄რე ლჷცთე̄სგა შყედნი.

Line of edition: 11       ალ ჭვეკქა ლი̄ზი ლა̈თურჲა̄ლი ლი, ეჯღ' ე̄რე მუშვა̈ნ მა̄რა ჩიგარ ხაწხჷნ ლა̈ქმათე
Line of edition: 12    ლი̄ზი ი ფიშრა̄მინ ღალ ხა̄დ ლე̄ზი ჭოკა̈რქა ი ლახე ხოჩა̄მდ მო̄დ ხა̄დ სგა
Line of edition: 13    ლუმთქვე, ეჩქას ჩუ შყედენდა ჭკვეკჩუ̄ნ ი ლიც ა̈ჲა̈̄სგდა.

Line of edition: 14       7. მეჴარშვ მა̄რე̄მი ლიკედ. ეშხუ მა̄რე ჩუ იყვნა̈̄ლ ი ჩი̄ ქ'ა̄ქვჭუ̄რე,
Line of edition: 15    მე̄რმე მა̄რე ლერსგვანხა̈ნ გა̈ნხა̈ნ ხექქვი ი შიჲა̈რს ნაბრა̈̄ჴიჲა̈რ ქა̄მენქა უშხვა̄რ
Line of edition: 16    ხაცხო̄რპე. ჩუ მეყვნა̈̄ლ მა̄რე მეჴა̈რს ა̈ქვჭე ამი̄ მეჴრა̈̄რქა, აშხვ მეჴა̈რს სგა
Line of edition: 17    ხეგვდირნი, ჟი იკედ ი ქა რიწვე. ეჩქანღო ჟი ლახ მოშ იგნა̈̄ლ ი ალ მა̄რა ამჟი̄ნ
Line of edition: 18    ჟი მეკდა ი მეჴა̈რ მერწვად ჟი მოშ იკედ, ეჯა ეზერ ჴამშიშ ლი.

Line of edition: 19       8. თხუმჟიქა̄ნქა ბა̈ჩა̈ ლიკვა̄ნე. თხუმჟიქა̄ნქა ბა̈ჩა̈ ლიკვა̄ნე
Line of edition: 20    ხემურჯა̈̄ლხ, ეჩქას აშხვ ა̈დგილს ჩვა̈ნშა̈ნიხ. ეშხუ მა̄რე ჲედ ხოშალაღა̈ლს მახე
Line of edition: 21    ღვა̈ჟ, ჟი იკედ ბა̈ჩს ი ჲარვ ტოტშვ თხუმჟიქა̄ნქა ქ'ა̄კვა̄ნე. იმვა̈̄ჲ ა̈დგილჟი̄ნ ჟი ხატყცი,
Line of edition: 22    ეჯ ა̈დგილს ჩვა̈ნშა̈ნიხ, ამ'უნღო მე̄რმ' ა̄კვა̄ნე ი ამჟი̄ნ იმქჷრა̈̄ლხ.

Line of edition: 23       9. დი̄რი ლიბიდ. მეზგე ქორს ადჷ̄რი ი აჭრა̈ვი, ეჩქას ფიშირ მა̄რე
Line of edition: 24    ხა̄რ ლემურჯი̄ნე, ეჯღ' ე̄რე დჷ̄რა̈რ სურუ მეგრე ი სურუ გვა̈მი ლიხ. აშხვ დი̄რს
Line of edition: 25    ო̄შთხვ-ოხვიშდ მა̄ხეღვა̈ჟ ხაკუჩ ლაკა̈დდ ი ჲერვა̈̄ჲ დი̄რს აშვხა̈ნ ჟი მოშ იკედ ი ეჯჟი̄ნ
Line of edition: 26    ბარჯჟი ჟი მოშ იდე̄სგი, ეჯა ძღჷდ ნალჴა̈მში ლი, მარე ალას ძვირდ გარ მოშ
Line of edition: 27    ა̈რ იჩო.

Line of edition: 28       10. ლისკნე. ლჷნშა̈ნ ა̈დგილხა̈ნქა ეშხუ მახეღვა̈ჟ ქა ნალჭომუნუშ
Line of edition: 29    ქ'ა̈̄სკნე ი იმვა̈̄ჲ ჟი ხა̈ბთქინე, ეჩეჟი̄ნ ნიშა̈ნს დე̄სგიხ. ეჩქანღო მე̄რმე იჟურჟა̈ნჲე̄ლე
Line of edition: 30    ი ეჯ' ა̈̄სკნე, ეჯას მე̄სმე ხაჭიმ ი ამჟი̄ნ იხრესჲე̄ლხ. ჲერვა̈̄ჲ მოშ ხა̈სრე ლა̈სკნას.

Line of edition: 31       11. ლიფა̄უნა̈̄ლ. ლაფა̄უნა̄ლჟი̄ნ ჲარვდ ყველნიხ მეფა̄უნა̄ლა. ჩიქე ჩუ
Line of edition: 32    ილთობა̈̄ლხ ი ღო ჩუ იჯლა̈ჲეხ მა̈̄ნკვი̄ ლიბნეს. მეშდრა̄ლას ჲო̄რი ფაუ ხუღვეხ: ეშ
Line of edition: 33    ხუ -- ხოჯვდა ი მე̄რმე -- წეს ფაუ. ხოჯვდა̄მ ჩუ დე̄სგიხ გიმჟი̄ნ. მჷბნე წეს ფაუს აშხვ
Line of edition: 34    პილხა̈ნ ხეგვდირნი, მე̄რმახა̈ნ გიმს ხა̈ბჯგინე , ჟი ხოსპე ჩუბე ფაუს ი ჟი ხატყცი.
Line of edition: 35    ალ ფაუ ქა იგლისტი ი იმვა̈̄ჲმუყვ აჰე̄სგი, ეჩავ იტხეხ ჩუბე ფაუს. ეჩქანღო მეშ
Line of edition: 36    დრა̈̄ლ ლა̈სპუნუშ ხა̈ფშვდე ჩუ ლჷდა ფაუს შჷნისგა ლეყდა̈̄ნი ფაუს ი ქა ლახ ხატყცი,
Line of edition: 37    იმვა̈̄ჲდ იგსა̈რი, ეჩეჩუ ჩუ̄დ დე̄სგიხ ჩუბე ფაუს.

Line of edition: 38       მა̈̄ნკვი̄ მჷბნე ლახ ქა ხაქდენი, ეჩქას მიჩა აფხნეგ ხეცა̈̄დი, ეჯას -- მე̄რმე ი ამჟი̄ნ
Line of edition: 39    ეშხუ ფა ქა იხრესი. იმვა̈̄ჲდ ალ ფა̈̄ ნა̄ზვ ი̄რა. ეჯას ჩვა̈ნშა̈ნიხ. ათხე მე̄რმე ნა
Line of edition: 40    ღა̈ლ იბნე ლიშდრა̈̄ლს, იმჟი̄ნ მა̈̄ნკვი̄შდ ა̈ნბინე, ეჩჟი̄ნ ი იმვა̈̄ჲდ მოშ აჰე̄სგიხ, ეჩასი
Line of edition: 41    ჩვა̈ნშანიხ. ქა ხედვა̈̄ჲ ხა̈სრე, ეჯა ჟი ლესგვრე ხა̄რ ბარჯა̈რჟი̄ნ ქა ლესრა ფას ი
Line of edition: 42    სუმინ ქა ლეცხპე ხა̄რ ლიშდრა̄ლე ლა̈ბნახა̈ნქა, იმვა̈̄ჲდ მოშ ლი მეჩდე ქა მჷსრე
Line of edition: 43    ნაღა̈ლ -- ეჩავ.
Page of edition: 35  Line of edition: 1    12. ფაუ ჩუქვა̄ნქა ჟი ლისიპი თხვიმი ლი̄ყი. ამი̄
Line of edition: 2    ლიჩვემ ძღჷდ გარჯ ლი ი მასა̄რდ ჭირ ი ჴერჴ ხაკუჩ. ჲერვა̈̄ჲ ამის ხაკვიჰ, ეჯა ფაუს
Line of edition: 3    ჩუ იბჯგინე სგვებინჩუ̄ნ, მირხა̈ნჟი̄ნ აშხვ კამინვს ქა იზმი. ფაუს ი ეჩექა აშხვ ტოტშვ
Line of edition: 4    სგა ხეგვდირნი, მე̄რმა ტოტშვ ჟიხიქა ხოგვდური. ხაკუჩ, ერე ჩუბე ტვეტშვ
Line of edition: 5    იმვა̈̄ჲ ხოგვდური ფაუს, ეჩი̄ ჩუქვა̄ნქა თხვიმ ქ'ა̄დყიჰას, ჟ, ა̈ ნხჷრზნე̄ნს, ეჩჟი
Line of edition: 6    ჟ'ე̄სსიპე̄ნს ი ჩუ უკა̄ფად ჟ, ანჷ̄გენს.

Line of edition: 7       ამი̄ ლიჩვემს მასა̈რდ ჴერჴ, გავა ი მახალ ხაკუჩ.

Line of edition: 8       13. ლიღა̄ჭუნა̈̄ლ. კალვ ნე̄სგაისგა აშხვ საჯნია̈ნ ჭე̄რს ხაჴლეხ, ეჯას ჟიბა̄ვ
Line of edition: 9    თხვიმ ქა ლჷსკრე ხა̄რ, მე̄რმა ჯო̄დი ჭე̄რს ნე̄სგაისგა სიფრითვშ ი ჲედ ასალშვ
Line of edition: 10    ჩუ ხოფტეხ ი ჟი ხოსვემხ ჩუ ლჷჴლა ჭე̄რს. ალ ჭე̄რა, ჟიბეშ, ქა ლოხვჯვი̄რნე მა̄რე,
Line of edition: 11    ეჩქას ლისიპს იბნე. მახეღვაჟა̈რ ჟი ხესგვრიხ ეჩხე̄ში ამხე̄ კაცხა̈რჟი̄ნ ი ლაფლიჴოვშ
Line of edition: 12    სიპხ.

Line of edition: 13       ამნოვშ კალვი ჩუ ისკრიბი ი იშდრა̈̄ლხი ა̄დვ.


Line of edition: 14 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.