TITUS
Svan Chrestomathy
Part No. 37
Previous part

Text: 37 
Page of edition: 38 
Line of edition: 32 
37. ლიღვჟა̄ლვნე ნაღვაჟი ლიმშედა̈̄ლ


Line of edition: 33       ზურა̄ლ ლაღვჟა̈შ ' ე̄ჩქას მეზგა ლახე მე̄რმე ქორ ხო̄გ, ეჩხა̄ვ აჲე̄სგი მეღვჟა̈̄ლს,
Line of edition: 34    
მა̄დეჲ უკცვირ ქორისგა ხოსყე̄ნე ლარდას.

Line of edition: 35       
ლიმზირი დვროვა̈რ ლახე ლიხ ღჷნჲა̈̄რუ იბნიხ, ეჩქას ჰა̈დურდ ხუ̄ნკვიდ ა̈ჲიხ
Line of edition: 36    
ზურა̄ლს ლაღვჟა̄ლვნად უკცვირ ქორთე, ეჯღ' ე̄რე ლიმზირ დო̄ს ა̄თურწყვლე̄ნს
Line of edition: 37    
მეზგა. ზურა̄ლს ლიღვჟა̄ლე დვრევ ხოჴდენ" ე̄ჩქას მუმურჯვაჲ ხაყა.

Line of edition: 38       
ესვა̈̄ჲ ფიშირ ზურა̄ლ ხოღვჟა̄ლვნა სოფელისგა, ეჯა̄ჲ ჴედნი. მეღვჟა̄ლა̈̄ ლაყვრა
Line of edition: 39    
ჟიქა̄ნ თა̈კვს ხოწბინეხ ეჯას ხეწე̄ბა̈̄ლ მეღვჟა̈̄ლ, ლახე თჷმი ხოჴდენი. ეჩჷნქა
Line of edition: 40    
ზურალა̈̄რ სგა ხოგვდურიხ ეჩხა̈ნ-ამხა̈ნ ყველფ გჷრკიდ ჩოქუ̄ლარშვ ხაზელა̄ლვნეხ,
Line of edition: 41    
ალ' ე̄სერ შეღავა̈თილდ ხოჴდენი მეღვჟა̈̄ლს. ზურა̄ლს მა̈̄ნკვი̄შჟი̄ნა̈შ ხა̄რ ლიღვჟა̈̄ლ,
Page of edition: 39  Line of edition: 1    
ეჩქას ხოშა გარჯ ხოჴდენი. ამჟი̄ნ იცვდილა̈̄ლ ღალ ზურა̄ლ, ოდე ჩუ დო
Line of edition: 2    
იფცხჷ̄რიხ დიგეზალ. ჩუ ნაფცხჷ̄რუნღო ნა̈გღა̈ბ ზურალა̈̄რ შდიხვს ქა ხა̈̄ქვცეხ ბეფშვს
Line of edition: 3    
ჩუ ხოჭვე̄ნიხ პინტარშვ. ნაღვაჟვს ჩა̈ვისგა ფა̈ტვა̈ ჩალ ხორშა ეჩე̄სგა აყვრე.
Line of edition: 4    
ჟიქა̄ნ ხოდრა ნაშურთქულა ხა̈̄ქვ. ზურალა̈̄რ ჭყა̈ნს ა̈ჰნეხ ეჩის ხათრეხ ნაღვჟა̄ლვს,
Line of edition: 5    
"ხოჩ' ე̄სერ ხა̄რ 'ა̈̄წყჷლჲა̈ნი."

Line of edition: 6       
ლახე ჭყინტს ათვე ზურა̄ლ, ეჩქას ეჯ მეზგე მიჩა ქორისგა ლა̈ხჲადა̄ლს იჩო
Line of edition: 7    
'ა̈̄წსი მიჩა მეხვბარა̈რს ნა̈̄თი მა̄რა.

Line of edition: 8       
ალჲა̈რი ჴიდეხ ობა̈შინ ლეთრა ნა̈წვერდ ლა̈ხჲადა̄ლდ. დი̄ნაჟი̄ნ და̈̄რ მა მეფშე̄ლი
Line of edition: 9    
ხვა̈ჲ დე̄ჲ ფეშნი ჲა̈რ ლა̈ხჲადა̄ლსი და̈̄რ იჩომ. ქა ლჷთა̈̄ვ ბეფშვს მა̈̄ნკვი
Line of edition: 10    
მაშრი ყა̈̄რჟი̄ნ ა̈ყვნეხ. მელისვ მე̄რმე ზურა̄ლ მა̈̄ნკვი მიჩა ლუსვშ ჴარჴს ჩუ ხოფტე
Line of edition: 11    
ბეფშვს ეჩქანღო სერ მიჩა დი ხაჩგუნა̈̄ვნე მიჩა ლუსვა̈რს. სამ ო̄შთხვ ფა̄ნუნღო
Line of edition: 12    
ბეფშვს ჰაკვა̈ნთე იტხეხ ეჩე̄სგ' ა̈̄ყვნეხ. ოდე ო̄შთხვეშდ ლადა̈ღ დო ხერა̈̄გი
Line of edition: 13    
ზურა̄ლს ჩუ ნაღვაჟუნღო, ეჩქად ქორთე დე̄მ იხნიხ ეჩქანღო სერ ქა ლჷწყჷლჲანე
Line of edition: 14    
ლი ზურა̄ლ. ლიმზირ მა̄მ ხედვა̈შიხ ქორისგა ჩუ ხოშიდ ქორთე ლი̄ზი.

Line of edition: 15       
ბა̄ზი მეზგა ხოჩა ლე̄თ ხა̄რ ლესყე̄ნე. ლახე ჭყინტ ლი ქორთე ლეჴდე, ეჯა გუნ
Line of edition: 16    
ლეხჲა̈დ ლი მუშვა̈ნიშდ ხა̈ხჲა̈დხ, დი̄ნაღა და̈̄რ მა ფეშნი დე̄მგვაშვ იჩოხ.


Line of edition: 17 
ლენჯა̈̄რ



Next part



This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.