TITUS
Svan Chrestomathy
Part No. 38
Previous part

Text: 38 
Page of edition: 39 
Line of edition: 18 
38. ზურა̄ლა̄რე ლიმზჷრ ჰჷლიშ ლადა̈ღ ი ბოფშრე ლიჩჷ̄და̈̄ლ


Line of edition: 19       ჰჷლიშ ლადა̈ღ ზურა̄ლა̈̄რ ღჷრიხ ლადბა̈შთე ჴვიდი თა̄რინგზელთე. ამეჩუ̄ნ
Line of edition: 20    ჟი იდბა̈შიხ ი ეჩქას ქა ნა̈რბია̄ლუნღო ბოფშა̈რ ჴვიდი ლა̄რე̄მი ჰოკერ ფუშყვრი
Line of edition: 21    ლჷ̄ლჰა̈ნდისგა ბოგო̄ლს ასყე̄ნეხ. ეჩქანღო ჟი ღჷრიხ მჷდბაშათე ი აშხვ ზურა̄ლს
Line of edition: 22    ქა ითშიხ მემზირდ. ალ ზურა̄ლ სამ ლემზირს შუნ ა̈ჲე̄სგი. ჴედნიხ ბოფშა̈რ, სგა
Line of edition: 23    ხეგვდირნიხ ალ ზურა̄ლს ი ღვეშგდ ლა̈ტხუშ ჩვა̈ჲე̄სგიხ ბოგო̄ლთეჩუ̄ნ. ამეჩუ̄ნ
Line of edition: 24    ალ ზურა̄ლ ჟი ხა̈მზჷრი ალ სამ ლემზირს ეჩი̄ ნაჟხახა̈ნ, ერე "ქა ლჷღე̄ზანღო ფუშყვერდ
Line of edition: 25    წყა̈ნ ნომ ა̄თდას ლექო̄რა̈რს ლჷლჰანდრე ლიდვა̈შივშ." ალ ნამზურუნღო
Line of edition: 26    ლემზჷრა̈რს თხუმჟიქა̄ნქა სგა შიდე ფუშყვერთე̄სგა ი ჟი ისპუნი ლერსგვანთე.
Line of edition: 27    ეჩქანღო ბოფშა̈რ აჯაღ ღვეშგდ ლა̈ტხვშჷდ ა̈ჲე̄სგიხ ალ ზურა̄ლს ი ჟ'ა̈ჲიხ მიჩა ნარდვმუყვ.
Line of edition: 28    ამეჩუ̄ნ მე̄რმა ნადბაშუნს ჟი̄დ ხა̈მზჷ̄რიხ ლამა̈̄რჲას, ხეჴჷრა̈̄ლხ ზურალა̈̄რ
Line of edition: 29    მინეშ ი მინე ქორშარე ნა̈შდობახა̈ნ ი ეჩქანღო ჩუ იდჲარა̈̄ლხ. ხო̄შამ ქუთვა̈რს მინ
Line of edition: 30    იზბიხ ი ნამსა̈დვს ი ლემზჷრა̈რს ა̈გით ა̈̄ჲე̄სგიხ. ჩუ მესედ ბოფშა̈რს თვით ლემზირს
Line of edition: 31    ხაჰვდიხ ი ჩუ ცვირეხ ამჟი̄ნ ეჩეჩუ̄ნ. შუკვს სგა ჲერვა̈̄ჲ ხეხო̄ლიხ, ეჯჲა̈რს ლემზჷრა̈რს
Line of edition: 32    ხაჰვდიხ ი ამჟი̄ნ ა̈გითე ღჷრიხ.

Line of edition: 33       შვიდმა̈ჲშიე̄რ შვანა̈რ ცაგე̄რთე ღჷრდახ ლაღვჭარდ. ცაგე̄რთე ლა̄ზ ჯვინალდ
Line of edition: 34    მუშვრა̈ თანა̈ღქა გარ ლა̈სვ. ზა̈ნხა̈ნ ეჩქად ხოხვრა̄მ ხეთი̄ლა̄ლ მა̈გ ი ეჩხა̈ნ ალ
Line of edition: 35    დვრევჟი̄ნ და̈̄რ ღჷრდა. შვიდმა̈ჲშიე̄რ ნა̈ჲ ჩაფლა̈ შოლტა̈რ ენღვა̈̄ნ ლეჰვდიდ ცაგე̄რთე.
Line of edition: 36    ეჩჷნქა ძა̈გვი ესღვა̈̄ნხ ლეჰვდიდ. ეჩეჩუ̄ნ ალჲა̈რს ქა ჰო̈დვდახ ი ეჯჲარე ნაღვჭარ
Line of edition: 37    ა̈გით' ა̄ხღვა̈̄ნხ ქაფარშვ. ეჩხა̈ნ ახღვა̈̄ნ ბარდან, ნე̄სყე ი ჯიმ.


Line of edition: 38 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.