TITUS
Svan Chrestomathy
Part No. 39
Previous part

Text: 39 
Page of edition: 39 
Line of edition: 39 
39. ლაჴვამ ი მიჩა ჰა̈ზვ


Line of edition: 40       ლაჴვმი̄ ჰა̈ზვისგა ლჷჯჷირ ვერ ხა̈̄ზ ი ეჩეჩუ̄ნ ლიხ ლაშდღვია̈რ ი ხოშა̄მ ლაღა̈ლდ
Line of edition: 41    ჯვინალდ გუნ კრი̄ნკდ ხო̄გა̈ნდა მა̈გ ლაჴვა̈მს ი მაყალვი̄ გუნ ხა̄დ ჩი̄. ლაჴვა̈მთე̄სგა
Page of edition: 40  Line of edition: 1    ურწყულ და̈̄რ მოშ ღჷ̄რდა სგა, ეჩის ქა̄მენჩუ̄ნ, ხოლა ბჷნა̈ბ ესვა̈̄ჲ ხემთქვა̈̄ნდა
Line of edition: 2    ი ეჩნოვშ იდგარო̄ლდა, ეჯას ლჷჯგირ ვერჟი̄ნ და̈̄რ აშდიღვდა ი იშგნა̈̄გ აშდიღვდა
Line of edition: 3    მაგ. ეჯკა̈̄ლიბდ ნადგარვ ჲარვ მა̄რე̄მი ლასფლავა ათხე̄ჲ ქა თერახ.

Line of edition: 4       ლელა̈ტცახა̈ნ ნა̈ყვნა̄ლ ღვაჟმა̄რე ლამბანა̄ლთე ლაჴვა̈მთე̄სგა დეშ ღჷ̄რდა
Line of edition: 5    მე̄რმა ლადა̈დ, ეჩზუმ ხაყვლი̄ნდა ლაჴვა̈მისგა̈̄ ხატრე ლიჴციდ ი ნაცვა̄ლდ.

Line of edition: 6       უშდა ზურა̄ლს ლაჴვა̈მთე̄სგა ლი̄ზი გარ მადე ი ლაჴვმი ჰა̈ზვთე̄სგა ლი̄ზი̄ მა̄დ
Line of edition: 7    ხოშდჷნ. უშდა ლახე ჲა̈რ ლა̈სვ, ჯვე̄დიათე ხექა̄ბუნა̄ლ ლაჴვა̈მს.

Line of edition: 8       მახე ნაღვაჟ ზურა̄ლს, ოდე ჟი დო ინწილა̄ლდა, ლაჴვმი ფე̄დიათე ლი̄ზი მა̄დ
Line of edition: 9    ხოშიდდა. ბაპრე ლიჴდა̄ლა̈̄ლდ ო̄შთხვეშდ ლადა̈ღ დე̄მ ხეთლენდა.

Line of edition: 10       ლიხტა̄ლ ლახე ჲა̈ს ხა̄დ ი ლუფხვილდ მემწოდა̈̄ლს მა̄რა̈̄ლს ხოფხვილდახ, ხეხვ
Line of edition: 11    ესვა̈̄ჲ ღანავ ხა̄დ, ეჯა ლამბანა̄ლთე დე̄მ ღჷ̄რდა ხეხვმი ლიღვჟა̈̄ლდ.

Line of edition: 12       ჯვე̄დია̈̄ უნთვი̄რია მა̄რა ი ედ ფა̈მლის ლჷჯგირ ვერჟი̄ნ და̈̄რ აშდიღვდა, ეჯღ'
Line of edition: 13    ე̄რე ქუნა̈რ, ერვა̈̄ჲ ლჷჯგირ ვერჟი̄ნ ხეშდღვა̈̄ნხ, დე̄მ ესერ იხნიხ იშგნა̈ ქვინს.

Line of edition: 14       ტანიშდ (\\ უშდად ) ლიჴედდ ესვა̈ჲ ხაყვლი̄ნდა, აშხვ მი̄შვისგა ეჯ ზურა̄ლი დეშ
Line of edition: 15    ღჷრდა ლაჴვმი ჰა̈ზვთე̄სგ', ა̄დო ლაჴვა̈მთე̄სგა ჰა̈დურდი̄ დეშ ა̈ბდა̈ვდა.

Line of edition: 16       უშდა ი ედ უნწირნა ზურა̄ლ გუნ სგახიქა̈̄ ლჷდგა̈რს ლა̈კი̄ლუშ ესჭიმდა, ლასფლავა̈̄
Line of edition: 17    ჰა̈ზვ ქა̄მენჩუ̄ნ იგნო̄ლდა ი სგა̈̄ნჩუ საფლა̈ვთექა დეშ ღჷრდა.

Line of edition: 18       ერვა̈̄ჲ მა̄რე̄მი ნადგარვ (=მჷდგა̈რი ) ლა̈სვ ი ამსვა̄ლდა̈ ზისხ ხეცვმა̈̄ნ, ეჯ მა̄რე
Line of edition: 19    აშხვ ზავ დეშ ა̈ბდა̈ვდა ლაჴვა̈მთე ლი̄ზის: "ხა̈ტს ესერ ხასდიკ ნაცვდილევი ლი̄ზი
Line of edition: 20    სგა".

Line of edition: 21       ლაგურგუნა̄ლთე ლახე ესღჷრდა წვილ ლაჴვმი ფე̄დიას ხეწხო̄და უშდად ლიჴედ,
Line of edition: 22    შიშდ ჟი ხოჭვე̄ნდა შუკვჟი̄ნ ი აშხვ ნაგზანღო გარ ღჷრდა.


Line of edition: 23 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.