TITUS
Svan Chrestomathy
Part No. 41
Previous part

Text: 41a 
Page of edition: 40 
ა


Line of edition: 26       ჯვინალდ ლივშედა̄ლა̈ ბეგა̈რ ღვაჟა̈რს ხაგდე̄ნახ ი ეჯჲა̈რს ზისხ ლაღლჲაშა̈რქ'
Line of edition: 27    ა̄ხა̈̄ზინახ. ეჩი̄ ლა̈ნშა̈ნ როქვ ლი ეჯ' ე̄რე ლახე ლაღლია̈შ ჩუქვა̄ნ ღვაჟა̈რს ფათვა̈რ
Line of edition: 28    სურუ ხოჴდენიხ ი ხახე̄რიხ, ეჩქას ეშ ლეწა̄ნე ხა̄რხ, ადო ღჷჯგა̈რ ხეფშირიხ. ლავშედა̄ლჟი̄ნ
Line of edition: 29    ღვაჟა̈რს ლაღლია̈შ ჩუქვა̄ნ გოგრა̈ჲა̈რ ხალჯე̄ნახ, ეჩხა̄ვთე̄სგ' ე̄ლმა̈̄ზ
Line of edition: 30    ზისხ.

Line of edition: 31       ათხე ზურალა̈̄რს ლავშედა̄ლჟი̄ნ ნაბდი ჴა̈ჩვა̈რ ხა̄რხ ლედე̄სგი ზისხი სგა მუცხვრეწიდ.
Line of edition: 32    ალ გვეშ ამჟი̄ნ ლჷმა̈̄რ, მარე ზურალა̈̄რ ათხეჲ ხოფსიხ ეჯ ზურა̄ლს ე, ხედვა̈̄ჲს
Line of edition: 33    ღვაჟა̈რხა̈ნქა ზურალა̈̄რთ' ო̄ხვტი̄ხა ალ ლივშედა̈̄ლ.

Line of edition: 34       გვეშ ამჟი̄ნ ლჷმა̈̄რ: ჯვინალდ შვა̈ნს ობა̈შ ამახვ ხაყე̄ნა ი ეჩხა̄ვი ლჷჲმახვჲა̈̄ლ
Line of edition: 35    მუშვა̈ნ. ჩიგარ მაყალვ ხა̄რა ამხა̄ვ შვა̈ნს ი ეჩხა̄ვი ჩი̄ ხაყვლი̄ნნა. ხოშალაღა̈ლ სა̈ვჲა̈რს
Line of edition: 36    იშვანა̈რს ხა̄რახ უშხვა̄რ ნე̄სგა ლიჲმახვა̈̄ლ, დაგრობ ი ღა̈̄შგობ. აშხვ დვრევჟი̄ნ
Line of edition: 37    სა̈ვჲა̈რს მათხვმიდ ხაყე̄ნახ ჟახად მჷრზაბეგ. ეჯ' ე̄ჯკა̈ლიბ ხოლე̄მი მუჩვემ ი
Line of edition: 38    ლამარგ ლჷმა̈̄რ, ერე "ლათშვ ესერ შვანე ზურალა̈̄რს ლავჟახა̈ნქა ბოფშა̈რს ჰაკვანშვ
Line of edition: 39    ქა ხა̈ქვთინა ი ეჩჟი ლჷმჲა̈̄სგვინ სა̈ვთე ი ბოფშა̈რს ლაგვა̈ნჟი̄ნ დილა̄რუ მჷრზაბექი
Line of edition: 40    ჟახოშ ლჷმყა̄ლვინხ". ამი̄ ერ ქა ხასმო̄ლნახ მჷჭყჷ̄ლი ბოფშა̈რს, ეჩქას ჩი̄
Line of edition: 41    ჩუ ლჷმკჷჩხნინხ. ალა მჷრზაბექდ ჩვა̈ცხირ, ერე აშხვ სოფელისგა ღვაჟა̈რ მა̈გ უშდად
Page of edition: 41  Line of edition: 1    ლჷმა̈რდხ. დრო̈ვ ესვთიშ ი სგ' ო̄თშგა̈ბ მიჩა ჯა̈რშვ ალ სოფელს. ღვაჟა̈რ უშდად
Line of edition: 2    ლჷმა̈რდხ ი ქამავ ლიჴედ მა̄მ ხა̈შდე̄ნახ. ამხვა̈რდ ესნა̈რ ჟ'ა̈ნუნჭუ̄რეხ ალ სოფლი
Line of edition: 3    ქვილჷმგენე, კეთილ, ბეფშვ ი ზურა̄ლ ი ადჲეხ მა̈გ. ამის ეშხუ ზურა̄ლ ქ'ა̄ხსედა.
Line of edition: 4    ალა ქა ხა̈სგდინა, იმჟი̄ნ ესყე̄ნახ სა̈ვჲა̈რს ბოფშა̈რ ი ზურალა̈̄რ.

Line of edition: 5       ჩვესჩოქვ' ე̄სნა̈რ ი ლა̈ხჴჷრა̈̄ნ ლამა̈̄რჲას: "ლამა̈̄რჲა მალდჲა̈ნ, ლოხვჟინდა̄ვ
Line of edition: 6    ესერ ქრისდია̈ნ ამსვა̄ლდ, უშდობ ღვაჟა̈რს ქა̄ვ ათჟა̈გ ი მიჩუ ახზიგვნე! "

Line of edition: 7       ლამა̈̄რჲას სგა ლოხვსიმნა ამი̄ ლიჴჷ̄რა̈̄ლ ი ღვაჟა̈რ ჟ'ალჰა̈დვრე̄ლიხ ი ალ ზურა̄ლ
Line of edition: 8    უშდად ა̈მჴედ. უშდად ა̈მჴედხ ტყვე ზურალა̈̄რი. ამის ქა ხეწადხ სა̈ვჲა̈რ, ეჩქას
Line of edition: 9    ლახურწყულუნხ ზურალა̈რ ი ჩვაცვირხ. ამჩიქდ ჟი ლუხჩოვე ღვაჟა̈რ ესჭვა̄დხ
Line of edition: 10    მინე ნახა ი თვეფ-ხანგა̈რს. ა̈თღვაჭხ ღვეშგიმ სა̈ვჲა̈რს, ჟ'ანხვიტხ ი მა̈̄ჲ ესღვა̈̄ნხ,
Line of edition: 11    მა̈გ ჩვათცვირნეხ. ეჩქანღო როქვ ხაგა̈დ ზურა̄ლს ლივშედა̈̄ლ ი უშდობ.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.