TITUS
Svan Chrestomathy
Part No. 42
Previous part

Text: 40b 
Page of edition: 41 
Line of edition: 12 
ბ


Line of edition: 13       ჩჲე̄სგი ქვეყანაისგა ზურა̄ლ უშდად ჴედნი, მარე შვა̈ნისგა მე̄რმა სა̈ხჟი̄ნ ი ნუკვჟი̄ნ
Line of edition: 14    ხა̈მთქვახ ზურალა̈̄რს ლივშედა̈̄ლ ი მე̄რმე ნაურწყული მჷრა̈მჟი̄ნ ხუღვე. ალ
Line of edition: 15    ბეგა̈რ ჩი ზურა̄ლს ხაგა̈დ ი ალა მა̄მ ხოშგურხ, ჰა̄ლ ჭაშვხა̈ნქა ლიღნავ.

Line of edition: 16       შომვა̈̄ჲ ზურა̄ლს ალ ბეგა̈რ ხაწჷხ, ეჩქას აშხვლადა̈ღ სგვებნა̄ვ (ეჯღ' ე̄რე ჩუ
Line of edition: 17    ხოხალ, შომვა̈̄ჲ ხაწხჷნი) ქა იქა̈̄ბდა უკცვირ ქორთე, ჲედ ქახიქა̈̄ სადგვემთე ღჷრდა.
Line of edition: 18    ამნოვშ გუდ ჴედენდა მა̈გ, ერე ალა წყჷლჲან მა̄მ ლი. ალ სადგვემთე ლინთვისგა
Line of edition: 19    ბოფშა̈რ ზექ-მუგვა̈ლს ხოჴდახ ი ქახიქა ჩუ და̈̄სგდახ. ზურა̄ლ სგ' ა̈̄ჲა̈̄სგდა ტ
Line of edition: 20    ლემასგვ ი̄შვა. ეჩჷნქა ზურალა̈̄რ ჩალს (ფა̈ტვა̈შს ი ჲედ ჭჷმნა̈შს), ხოლა̄მ ნამბადვრა̈̄ლს
Line of edition: 21    ი ჟიქა̄ნ ლექვემს ხოჴდახ ი ეჯჲა̈რსი ქახიქა და̈̄სგდახ. ამის უშდა სგ'ა̈̄ჲა̈̄ხსგდა
Line of edition: 22    მიჩა სადგვემთე. ალ მუგვლიშ ი ლაყვრა̈̄ ლერქვარე ქახიქა ლიდე̄სგის ეჯღა იჩომდახ,
Line of edition: 23    ერე უშდახა̈ნქა ნაურწყული დოსა ლახთელე̄ნხ ი ქორ დო̄ს ო̄თურწყვლე̄ნხ.
Line of edition: 24    ამჟი̄ნ არდა უშდა ნაგზა უკცვირ ქორიგსა. ლეზობ-ლეთრა ლახე ხოჴდახ, ქახიქა
Line of edition: 25    ხოგა̈მდახ ი უშდა მიჩოვშ ა̈ჲა̈̄სგდა სგა მიჩა ლალყურათე. ლახე ეჯ სოფელისგა
Line of edition: 26    მე̄რმეჲ ჲა̈რ ლა̈სვ უშდა, ეჩქას ეჯა̄ჲ ეჩხა̄ვ ღჷრდა ი ჩუ იყბა̄ლხ უშდა̈̄ლ.

Line of edition: 27       ტა̈ნიშდ მეჴდანღო, შომვა̈̄ჲ ზისხ ლიჴედს ხობნახ, მე̄სმა ლადა̈ღ აშხვ ლიცს
Line of edition: 28    იბდახ, მეხუშდა ლადა̈ღ -- მე̄რმა ლიცს. ათხე სერ ხოხვრა ურწყულ ლასვ უშდა,
Line of edition: 29    მარე ქორთე ლეხნიდ ეჯღა̄ჲ მა̄მ ხეყა̈̄დ. ნაგზანღო მე̄სმა ლიცს იბდა, ქა ისტღუნა̄ლ
Line of edition: 30    ი ეჩქას სერ ქორთე ღჷრდა. ლჷმა̈̄რ გოშა̈რ, ერე უშდას მე̄რმა ლიცხი ნა̈ბიდუნღო
Line of edition: 31    ლელა̈ტი ხომხა̄ლა მიჩა ლაყვრათე, მარე ამის ლახე ჩუ ჲა̈რ ა̈ცხრა ეჯა
Line of edition: 32    სურუ შგვირდ ხებჟა̈̄ნხ შვანა̈რს ი ამკა̈ლი მახაღვა̈ჟს ლა̈წრა̄ლჟი უშდა̈̄ მელყვირს
Line of edition: 33    ხეწრა̄ლხ. შომვა̈̄ჲ ქორხა̈ნქა უშდა არდა, ეჩქას მეთხვჲა̈რ ეჯ ქორხა̈ნქა ლა̈თხვჲართე
Line of edition: 34    დე̄მ ღჷ̄რდა ეჯღ' ე̄რე ურწყულხა̈ნქა ნა̄ზვს სო̈ვ ხოქვცენდა ი ნა̈თხვჲარე
Line of edition: 35    მა̄მ ხეთხო̄ლდა, ეჩჷნქა, მა̈̄ჲ მეზგა უშდა ჩუ ხერდო̄ლ, ეჯ მეზგაისგა ლიმზირს მა̄მ
Line of edition: 36    ხეყა̈̄დ, ეჯღ' ე̄რე ლიმზირ ჩუ ხეურწყულო̄ლდახ ი ხოლა ლა̈სვ.


Line of edition: 37 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.