TITUS
Svan Chrestomathy
Part No. 45
Previous part

Text: 43 
Page of edition: 43 
Line of edition: 10 
43. ლეჲდუნი ლჷდგა̈რჟი̄ნ


Line of edition: 11       მა̄რე ი ჲედ ზურა̄ლ ლახე ჩუ იდგარო̄ლდა შვა̈ნისგა, ეჩის ლაშდღვა̄ლს ი ქუნე
Line of edition: 12    სა̈ხს ხა̈ყრინახ მო̄შ-მო̄შს.

Line of edition: 13       ლჷდგა̈რს ხაკუჩ ერე ეჯკა̈ლიბდ ესჭემე̄ნს ესჷმსედე, ერე ამსვა̄ლდ მა̄რე სოფელისგა
Line of edition: 14    ნო̄ს ა̄თსედე̄ნს მუნდვრევ. ჰარა̈კ ჟეღა̈რი ქა ლემშგვა̄ნე ლა̈სვხ. ალჲა̈რს
Line of edition: 15    ქა̄მენჩუ̄ნ ხაკუჩ ერე მულგუჰე̄რას, მჷლდღას ი გზა̈̄ვრთე მეჩდა მა̄რა̄ჲ ნომ' ა̄თთვეფე̄ნს
Line of edition: 16    მიჩა ნა̈̄თი, ადო ეჯა ხოლა̄მდ ხებჟა̈̄ნხ სოფელისგა, ლახე ნა̈̄თი მო̄მ ხოჴდენდახ
Line of edition: 17    ჲერხის ქორთე, ეჩქას ჲერხი ხოლა ი მეკვშდე მა̄რე ი ჲედ ზურა̄ლ ლჷდგა̈რი
Line of edition: 18    ფუსდს ჩვაჭთუნა ი ამის ყჷლა̄: "ალ ლჷდგა̈რს ხოლა̄ვ ჭიშხ ოთცვი̄რა, მიჩა ქორის
Line of edition: 19    გა̈̄ ესჷმსედად, მა̈გუ ეჩის ათჭემახ ი მიჩ ქა ლუჟხვი̄ნე მა̈გ ფისე̄მი ტო̄მბდუ
Line of edition: 20    ლახზაზა! "

Line of edition: 21       ალ' ე̄რ მო̄დ ჲა̈ს ხო̄ქვე̄ნს, ლჷდგა̈რი ფუსდ, მა̈̄ჲ ლა̈თჲა̄ლს ხა̄დ, ჩი̄ ჰაშმა̈̄რ
Line of edition: 22    ცვირა.

Line of edition: 23       მაჴვმა̈̄რ მეზგე ყჷლა: "ო̄, ხიადუ̄ლ, მა̈ჲ ეზერდ ათჭემხ მა̈გ მინე ლჷდგა̈რს,
Line of edition: 24    ჟახ'ა̄ლა ლი, ეჯა მა̄მ ე̄, ჟი ლჷმა̄რა̄ ჩვა̈დშხვინნე ქორისგა ი ეჩქანღო უფგოვშ ჩუ
Line of edition: 25    ლა̈ჲზვებნე ჯა გარ ".

Line of edition: 26       ლჷდგა̈რი ლიშდღვა̄ლა̈̄ლდ ლაშდღვა̄ლა̈ დიჲა̈რს თვით ოშთხვდ ჩვაკვშურახ,
Line of edition: 27    აშხვ მა̄რა ქა ითიშდახ, წჷრნი ბაშლჷყს ხაგა̈მდახ ეჯკა̈ლიბდ, ერე თხუმჟი ი ბარჯა̈რჟი̄ჲ
Line of edition: 28    ჟი ხელფარა̈̄ნ ბაშლჷყ. კალთა̈ჲა̈რს ლაშდღვა̄ლა̈ დი̄რი ნა̈კვშუვარშვ ჟი
Line of edition: 29    ხოგვშილახ. ალ დი̄რი ნა̈კვშუვა̈რს ლეჲდუ̄ნი ხეჟხა̈̄ნ.

Line of edition: 30       ლჷდგა̈რს ქა ისგვჯი̄ნახ ქორხა̈ნქა, ეჩქას ლეჲდუ̄ნი̄ მჷჲე̄სგი სგვებინ ესღჷრდა
Line of edition: 31    მეზგე (\\ მეზგა), ესვა̈̄ჲ ჟეღ ჩუ ხორდა, მა̈გ ქა იჭმი̄ნა ლაშდღვა̄ლთე ი ალ ჟეღა̈რ
Line of edition: 32    ლეჲდუ̄ნი̄ მჷჲე̄სგის ხაჭიმდახ ვეშგიმხა̈ნ, ლეჲდუ̄ნი̄ მჷ̄ჲი დი̄რი ნა̈კვშუვა̈რს ხოშდა
Line of edition: 33    ჟეღა̈რს ეჩხა̄ვ-ამხა̄ვ, ამის ჟეღა̈რ ლიღე̄შგა̈̄ლს ხაფსახ ი ჩუ ხო̄გა̈ნხ ყალა-ჩხუბა.

Line of edition: 34       ამჟი̄ნ ლეჲდუ̄ნი ლა̈შდოშ ღჷრდა ეჩი̄ მჷჲე̄სგი საფლა̈ვთექა ი ეჩეჩუ სერ კალთა̈̄რი
Line of edition: 35    ქა ლჷჰრე ხა̄დ.

Line of edition: 36       ათხეჲ ჭათე მა̈გ შვა̈ნისგა, ლახე ჟეღს ჲა̈რ ხატყცი: "მიჩა ლეჲდუ̄ნისუ ესერ
Line of edition: 37    იზბი ალ ჟეღ, მა̈ჲ ესერ ხაგდე̄ნა ამჟი̄ნ გუნ ლიყერ".

Line of edition: 38       დი̄რი ლაჰვდა̈̄ლჟი̄ნ მულგუჰე̄რი ი მჷლდღა̈̄ ეშხუ აფხნეგ ფე̄დიას ლჷ̄გა̈ნდახ
Line of edition: 39    ი ალჲა̈რს ქა ხაჰო̈დდახ მჷლდღა̈̄შ ი მულგუჰე̄რა̈̄ დი̄რა̈რს, ეჩქანღო წჷდჲა̈რთე
Line of edition: 40    ღჷრდახ, ჰარყი შედა̈რ ხუღვა̈ნხ, ალჲა̈რს წჷდჲა̈რ ქა ხებშო̄ლდახ ი ჰარა̈ყს ხოგვშახ
Line of edition: 41    ამხა̄ვთე̄სგა.
Page of edition: 44  Line of edition: 1    მჷლდღა̈̄ მუზვრა ქ'ა̈̄ჲა̈̄სგდახ ნაზორ დიჲა̈რს ი ჰარა̈ყს ი ეჩე აშხვ ა̈დგილს აშხუდ
Line of edition: 2    ჩუ ისგვრო̄ლხ ი ჩუ იხჷრჯა̄ლდახ.


Line of edition: 3 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.