TITUS
Svan Chrestomathy
Part No. 46
Previous part

Text: 44 
Page of edition: 44 
Line of edition: 4 
44. ლჷდგა̈რი ბედჟი̄ნ ლიღფუ̄რა̈ლ ი ლიურწყვევი


Line of edition: 5       ლჷდგარს ჩვაშდიღვდა მეზგე, ეჩქანღო იურწყვევდახ ი იღფუ̄რა̄ლხ ზურალა̈̄რ
Line of edition: 6    მო̄შ ი ღვაჟა̈რ მო̄შ.

Line of edition: 7       ზურალა̈̄რ კე̄შა̈რს ქა ისპახ ი ეჩჟი̄ნ იქვა̈მდახ, ლაჩქა̈რს ჯვინალდ წჷრნის ლჷმფარვინხ
Line of edition: 8    მეშხე̄მი მჷქაფდ.

Line of edition: 9       ლჷდგა̈რს ლაშრავა̄ლს ხა̈ჩომდახ, ეჩქას მა̈გ ჩვაშრა̈ვდა, მარე ჲერხი ზურალა̈̄რ
Line of edition: 10    ამბა̈ვს ქ'ა̄კვა̄ნახ ი ოხდრისს დე̄მ იკა̈დდახ, ოდე დო მინს ხოცხა̈̄ნხ ეჩქად.

Line of edition: 11       მუურწყვევი ზურა̄ლ ოხდრისი ნაჯაბ შედისგა ნასყა̈̄ნვ ლეზობ დე̄მ იზობდა
Line of edition: 12    ი მო̄შ ხო̄გა̈ნ ნა̈̄ყუნ ლასყე̄ნა შედ.

Line of edition: 13       თა̈ში ნა̈ნჩუდნა̄ლ ჯა̈რისგა ნაშგორდ დია̈რს დე̄მ ხეთლენდა, დე̄ჲ ოხდრისი
Line of edition: 14    ნადა̈̄სგვ ტაბა̈გჟი̄ნ იდა̈̄სგდა დიჲა̈რს "ჩვ ე̄სერ იშრა̈ვი̄ნი ლეზვებ". ამჟი̄ნ წყილჲანდ
Line of edition: 15    იურწყვევდა მიჩეშხა̈ნ მიჩა ლჷდგა̈რს.

Line of edition: 16       ამის ეჯღა იჩომდახ ზურალა̈̄რ, ერე ალ ლიურწყვევ ესერ ლჷდგა̈რს ეჩაბუა̄სდ
Line of edition: 17    ლასჷრგებ ხა̄რ. ეჯა ჩუ ხეჯრავა̈̄ნხ მუვურწყოვას ერე, ლახე ნა̈ბუშ ი̄რო̄ლ ჰა
Line of edition: 18    უმბილდ, საშრაუ̄რა მა̄ლე გვეშ სგა მა ლა̈ხთელენ მინე ლეზობთე̄სგა, მინე ნაურწყოვ
Line of edition: 19    ცვიდთე ღჷრდა ი ლჷდგა̈რს მაშედ დე̄მესგა ხა̄დ ალამა̈გ ოხდრისი ლიზვები
Line of edition: 20    ლიჭკრჷნე, ამღა გუნ კრი̄ნკდ ხო̄გა̈ნხ მუურწყოვა მინე ლიურწყვევის ლიშრავა̈̄ლჩიქდ.
Line of edition: 21    ობა̈შინ სამ ი ო̄შთხვ ზავისგა იურწყვევდახ ზურალა̈̄რ. ჩიგარ კე̄შ ქა
Line of edition: 22    ლჷსპე ხა̄დხ ი ლჷღფუ̄რე ლაჩქა̈რ ი ლერქვა̈რ ხა̈̄ქვდახ.

Line of edition: 23       ეჯკა̈ლიბი ხვა̈ინ ლჷმა̈̄რ, ერე ერხი ზურალა̈̄რ მინე ლირდეისგა ჩიგარ ურწყვ
Line of edition: 24    ლა̈სვხ, ეჯღ'ე̄რე მა̈̄ნკვი̄ ლიუწყვევის ოდე ქ'ა̄დსურლი̄ს, ეჩქად მე̄რმე ნა̈̄თი̄დ
Line of edition: 25    ხედგარო̄ლდა ჲერვა̄ლე ი ეჩქას ეჩი̄ ლიურწყვევი სგა̄დ ხექმენდა, ღვ'ა̄ჯაღ ხედგარო̄ლდა
Line of edition: 26    ნა̈̄თი, ეჯასი ლიურწყვევი ხეკვა̈დ ი ამჟი̄ნ ქა ლჷჭყარდ ურწყვ ი ლუღფუ̄რე
Line of edition: 27    ლა̈სვ ზურა̄ლ მიჩა ლირდეისგა.

Line of edition: 28       ღვაჟა̈რ მე̄რმა ნუკვჟი̄ნ იღფუ̄რა̄ლხ ი იურწყვევდახ.

Line of edition: 29       ლჷდგა̈რი ნაშდუღუნღო̄ნ, მე̄რმა ჲედ მე̄სმახი ლადღა̈რს ღვეჟმა̄რე ქა იწბუ̄რა
Line of edition: 30    თხვიმს ი ვე̄რა. ვე̄რე ესვა̈̄ჲ მო̄მ ხა̄გა̈ნ, ეჯა თხვიმს გარ იწბუ̄რა. ეჩქანღო ქა
Line of edition: 31    იხინდა ფა̈თვს ი ამის ჲარვ ღეთ ი სამ ზავ ქა დე̄მის იწბუ̄რა. ფაყვა̈რს წჷრნია̈რს
Line of edition: 32    იგა̈მდახ თხუმჟი̄ნ.

Line of edition: 33       ლახე სამხუბისგა ი ჲედ ნა̈̄თიისგა ლიმზჷრი ხოჩა ღჷნ ხა̄დხ, ეჩქას ლუღფუ̄რე
Line of edition: 34    ღვაჟა̈რ წჷრნი ფაყვა̈რს შგილთე̄სგა და̈̄სგდახ ი მინ იბნან ლიღრა̈̄ლს, ერე მეზგა
Line of edition: 35    ლიხი̄რვილ ოხბინენს. ჩა̈ჩს ქა იწბუ̄რა, ეჩქა̈̄შიშდ ჰარა̈ყს იყიდდა ი ეჩის ათვნა̈̄ლდა
Line of edition: 36    ლჷდგა̈რი ლაშუნდებდ.


Line of edition: 37 
ლენჯა̈რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.