TITUS
Svan Chrestomathy
Part No. 47
Previous part

Text: 45 
Page of edition: 44 
Line of edition: 38 
45. ლიდრა̈̄ლ შვა̈ნისგა ი შგვირი ლიტხჲე̄ლი


Line of edition: 39       მუშვა̈ნ მა̄რა ლახე მე̄რმა მა̄რახა̈ნქა შგვირ ხეყრენდ ჲედ დაგროვშ, ჲედ ცვა̈როვშ,
Line of edition: 40    ჲედ ლიშხივშ, ჲედ ნა̈ყირშვ, ჲედ ლიბჭა̄ნშვ ი ამკალიბ ლესდიკ გოშარშვ,
Line of edition: 41    ეჯა მუშვა̈ნ მა̄რა გუნ ხოშგურდა.
Page of edition: 45  Line of edition: 1    ამკა̈ლიბ შგურა̈რ მა̄რა მე̄რმაცახა̈ნ ლა̄ცვდ ი ლატე̄ვა მა̄მ ხა̄დ, ეჯღ' ე̄რე მეცვა̈̄ლ
Line of edition: 2    შიშდ ქა ხესყვა̈დვირდა: "მიჩ ესერ ალა-ჲ ალ შგვირ ხათჷმ მე̄რმახა̈ნქა, ეჯ
Line of edition: 3    ესერ ქა დეშ ხოტხიე̄ლა, ი შგვირ ქა დეშ ხოკცა̄ნა ი მიჩ ესერ ხამა ხე̄მბვა̈̄ლ ი ხე
Line of edition: 4    ცვა̈̄ლ ჯა" ი ლა̈წრა̄ლჟი ხაყლა: "უწვრას, ნამცვირს, ნა̈შიხვ-ნა̈გტურა-ნაცხულს"
Line of edition: 5    ი ჩი̄ ამკა̈ლიბს, მა̈̄ჲ შგვირ ხათმჷნდა მა̄რა. მა̄რა ლახ გუისგა მო̄მ ხედოლ შგვირი
Line of edition: 6    ლიტხჲე̄ლი, ე̄ში უმბილდ ხა̄დ ალა ლეჩვმე, ადო ეჩნურ ობა̈შინ შგურშვ ჰა̈დურდ
Line of edition: 7    ყო̄რქა ლაჴა̈დ მა̄მ ხა̄დ. ამღა ჩი ნუკვი ჴერჴს იჴმა̈რდა, ერე შგვირ ქა იმჟი̄ნ (მოშ)
Line of edition: 8    ლოხვტიხჲე̄ლე̄ნს, უფგოშ ი̄რო̄ლ, ა ჟღაირდ, ეჯა მა̄მ ნა̈ხუმსა̈რ ლა̈სვ.

Line of edition: 9       ზურა̄ლხა̈ნქა ლახ ხათჷმდა მა̄რა შგვირ, ეჩქას ზურალს და̈̄რ ხა̈ჩომდა ი დე̄ჲ
Line of edition: 10    იშგდა ჲა̈რ ეჩი̄ ლიტხჲე̄ლს, ეჩჷ̄ნქა ჰარა̈კდ არდა: "ზურა̄ლს ჲორი თხვიმ ხა̄რ: ლამ ვარ
Line of edition: 11    ი ლა̈მთილ ი ეჯას ესერ ჲორი ხაყა მჷთხე̄ლი ი მეწე̄ნა̈̄ლ".

Line of edition: 12       დე̄ჲ მეჩის ი ბეფშვს ხა̈ჩომდა მა̄რე. ეჩჷნქა მიჩა ხოლე̄მი მუჩვემს, ეჩი̄ ლახვბას
Line of edition: 13    ი გუნ სგახიქა̈̄ ნა̈̄თის და̈̄ს აზა̄რა ხოლე̄მი ლეჩომდ, ეჯღ' ე̄რე ეჯჲა̈რცახა̈ნ შგვირი
Line of edition: 14    ლიტხჲე̄ლი მიჩა შგვირს სგა ხეგო̄ლდა.

Line of edition: 15       მუშვა̈ნს ლიდრა̈̄ლი შგვირი ლიტხჲე̄ლი უფგო̄ვში̄ ხემთქვა̈̄ნ, მარ'ე̄ჯჟი̄ნ ერე
Line of edition: 16    ჩი̄ ჟ'ოხვმეჴრე̄ნს.

Line of edition: 17       ლუზორისგა ლახე ირდო̄ლ ლედრა̈̄ლ მა̄რე ი თხუმთე თე მა̄მ ხეღვა̈̄ნო̈̄ლ,
Line of edition: 18    ეჩქას მედრა̈̄ლ მა̄რე სგა ხექა̄ლო̄ლდა ღვეშგიმხა̈ნ ი უფგოვშ ხატყა̈ცდა ხანჯა̈რ
Line of edition: 19    ი̄რო̄ლ, მიჯვრა ჲა ფაუ ი ეჩქას შიშდ ლა̄ტვთე ღჷრდა.

Line of edition: 20       ქორ ლახე მო̄მ ხა̄დ ფე̄დიას, ეჩქას ნა̈̄თითე̄სგა ღჷრდა, ყო̄რა̈რს ქა ხოდა̈̄ლდახ
Line of edition: 21    ი ეჩეჩუ̄ნ არდა, ოდე ჩუ დო იშა̄რდო̄ლხ ლეყერი ი მიჩა მეწე.

Line of edition: 22       დაგრა ლახე ხეკვა̈̄დ, ეჩქას მჷ̄დგა̈რი ლედგა̈რის ჩუ ხოდრა̈ჯდა ჲედ შუკვე ფე̄დიას
Line of edition: 23    ცხეკისგა, ჲედ მეზგე̄მი უკცვირ ქორისგა ი̄რო̄ლ ა მურყვამისგა, მა̄დეი იშგნა̈̄გ,
Line of edition: 24    ლედრა̈̄ლს მა̄მ ხოხალდა ამი̄შ ი ესღჷრდა მიჩა შუკვს, მედრა̈̄ლ ლადრა̈ჯხა̈ნქა
Line of edition: 25    თვეფს ხა̈ჴდა ი ჩვადგა̈რდა მა̄რა, ეჩქანღო ღჷ̄რდა ლაჭმუშ ლეწვრი̄ საფლა̈ვთეჟი̄ნ
Line of edition: 26    ი ეჩეჩუნ თვეფს აკვა̄ნა, ამნუვშ ლჷდგა̈რს ჟი ხა̈მჴა̈̄რვნა ი ეჯ'ე̄სერ ლუწვერ
Line of edition: 27    ლი.

Line of edition: 28       ამჟი̄ნ იშგან შგვირი ლა̈ტხჲა̄ლჟი̄ნი ხედრა̄ლ მედრა̈̄ლ მიჩა ლეჲმა̈ხვს, ოდე
Line of edition: 29    შგვირს ქა დო იტხია̄ლდა მა̄რე, ეჩქად ჩი ნუკვჟი̄ნ ხედრა̄ლდა მედრა̈̄ლ ი კუმა̈შსი
Line of edition: 30    დე̄მ აზა̄რა.


Line of edition: 31 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.