TITUS
Svan Chrestomathy
Part No. 48
Previous part

Text: 46 
Page of edition: 45 
Line of edition: 32 
46. ლიწვრი


Line of edition: 33       მა̄რა ლახე მა̄რე ხოლა̄მდ ჩვაქჩენი ლადგა̈რჲაშვ თოფშვ ი მა̄დეი იშგან
Line of edition: 34    ნახოშ, ლჷქა̈ჩს ჩვაყვნეხ ქორს. მა̈̄ნკვი ზურალა̈̄რ ლიკი̄ლჲე̄ლს ასყე̄ნეხ ი ლიწრა̈̄ლს
Line of edition: 35    ი ლიზჷრზეს ხობნეხ მჷქჩენის ი მიჩა ქორს ი სამხუბს. ღვაჟა̈რ თხვიმნა̈კუშ
Line of edition: 36    ჩუ სგურხ. ამჟი̄ნ მესვფელა̄ჲ ჴედნიხ კილ ლა̈კვჰათე. სგა ხაქორქოცახ მა̈გ ლეგ
Line of edition: 37    მერდა ლჷქა̈ჩს. აშხუნღო ჩუ იდა̈̄წყი მა̈გ ი ჩუ ისგვრიხ. ლჷქა̈ჩცახა̈ნ ერხი გარ
Line of edition: 38    სგურხ. ჯვინალდ შიშდ ა̈ქიმს ჴიდა მა̈გ. ეჯა ჟი იწვე̄ნა ლჷქა̈ჩს, ჩუ ხოლჯა̈შდა, ეჩქანღო
Line of edition: 39    ლიღვჭარა̈̄ლს ხობნა მეზგა. მა̈̄ნკვი ხეჭიჭდ აშხვ ქვილჷმგენ'ა̈̄ჲა̈̄სგი, ლახე
Line of edition: 40    ჟ'ანხოჩვი, ეჩქას იშგენ ფა̈ს ხა̄რ ლეჰვდი. ჩი ლე̄თ მჷლგენიდ გვეში ლი ქორ. ერ
Line of edition: 41    იცგჷ̄ნა̈̄ლ, ერ ჭუ̄ნირს აშმე, ერ ჩა̈ნგს აშმე, ერ იმჟი̄ნ ისდუნე ლეგდ მერდა ი ერ
Line of edition: 42    იმჟი̄ნ. ღვეშგმეპილი დვრევ ხოჴდენი ლჷქა̈ჩს, ეჩქას ჩვაშგვრა̄ნე მიჩა ლეშგვრა̄ნა,
Page of edition: 46  Line of edition: 1    ერე: "ჯ' ე̄სერ უწვრად ნომა̄ვ აცვირხ". ეჩქანღო იბნე ლიქუ̄ნავა̈̄ლს ი ჩუ ღალ
Line of edition: 2    იდგა̈რი. ლჷდგა̈რს ვიშკ-პილს ჩუ ხონჭუ̄რეხ, ეჩქას ზურალა̈̄რ ლიკი̄ლჲე̄ლს ი ლიტფუ̄რა̈̄ლს
Line of edition: 3    იბნეხ ი ღვაჟა̈რ -- ლიგვა̈ნეს. ერხი გუნ სგახი̄შ ზურა̄ლ ყაბა̈ ნა̈თსა̈ვს დე̄მის
Line of edition: 4    იცვრე, ეჩჟი̄ნ იტფუ̄რე ჩი̄ ჩუ. მე̄რმა ლადა̈ღ ჴედნი მა̈გ მესვფელ ლაგვა̈̄ნათე.
Line of edition: 5    სოფელისგა ზურა̄ლ ი ღვეჟმა̄რე და̈̄რ სედნი ლჷდგა̈რი ჩუ უგვა̈̄ნად. ქორა̈ ღვაჟა̈რ
Line of edition: 6    ფაყვა̈რს დე̄მის იკედხ ლაგვა̈̄ნაჟი̄ნ ი ლაშდიღვჟი̄ნ. ალ' ე̄ჩი̄ ლა̈ნშა̈ნ ლ', ე̄რე
Line of edition: 7    ღვაჟა̈რ შგურა̈̄ლ ლიხ ი ოდე დო ჩვა̈დწორეხ მინე ლჷ̄დგა̈რს, ეჩქად ფაყვა̈რს
Line of edition: 8    დე̄მის იკედხ ი დე̄ჲ ხა̄რხ ჩუ ლაკა̈დ, ადო ეჩქას აჯაღ ხოშა̄მ ხენტრა̈̄ლხ მა̈გ. ქალაცვა̄ლი
Line of edition: 9    დე̄შა ხა̄რხ, ადო ლაცვა̄ლჟი შიშდ უწვრა-უთხე̄ლას ხეწრა̈̄ლხ მა̈გ. ქა იმვა̈̄თე
Line of edition: 10    ღჷრიხ, ჩიჲა̈̄გ ნახე ხა̈̄ბხ: "ნო̄თავ ესერ ა̈ნდარეხ ჲა̈რ ლედგა̈რიდ მინე მჷდგა̈რი
Line of edition: 11    ნა̈̄თჲა̈რ ".

Line of edition: 12       ლჷდგა̈რს ჩვაშდღვიხ, ეჩქას ლჷდგა̈რი მაშე̄ნე ძირიშ (გეზალ ი ჲედ მუხვბე)
Line of edition: 13    საფლა̈ვჟი̄ნ ლაწვრია̈ თვეფს აკვა̄ნე, ეჩქანღო ლაშდღვა̈ლს იჩომ ი სოფელს ეჩჟი̄ნ
Line of edition: 14    ფიშვდე.

Line of edition: 15       მა̄როშ ნადგარვ მა̈გ ჩუ მა̄მა იწვრი. ერხის ხოჩა მა̄რა̈̄ლ ხეზელა̈̄ლხ უშხვა̄რ
Line of edition: 16    ნე̄სგა ი ჩვასყე̄ნეხ ლედგა̈რი̄შ ი მჷდგა̈რი̄ ქორშა̈რს ი ნა̈̄თჲა̈რს. ლაწვერთე ლახე
Line of edition: 17    ჲა̈რ ღჷრიხ, ეჩქას ქორშა̈რს მეხვბარა̈რ ი ლა̈დჲა̈რხანი სგახი̄ ნა̈̄თჲარი̄ ხონჴრიხ მო
Line of edition: 18    შიყდ. ლახე ლედგა̈რიდ ჲა̈ს მოშ იკვა̄ნეხ ჲედ მჷდგა̈რის, მა̄დეჲ ეჩი̄ ქორშა̈რს, ეჩ
Line of edition: 19    ქას თვეფ ხაკუჩ ერე ქორა̈ სგახი̄შდ ხაჴჷდეს ლედგა̈რის. სგახი̄შ ლიხ ჲედ გეზალ
Line of edition: 20    ი ჲედ მუხვბე, მე̄რმა̈̄ლ მოშიყდ ხონჴრიხ, ლახე ნაწორუნღო ლედგა̈რი̄ ქორშა̈რ ი
Line of edition: 21    ნა̈̄თჲა̈რ ფა̄და̈სშვ ა̈ხღვეჭნიხ, ეჩქას ეჯჲა̈რე მუვჩენი ლიხ ი ღვეშგდ მჷტხე. ლაწ
Line of edition: 22    ვერჟი̄ნ სგა უფგოვშ ხეჴვსგენიხ ლედგა̈რის ი თვეფს ხატყციხ, ეჩქანღო ლა̄ტვთე
Line of edition: 23    ყერხ. ლაყა̈̄რჲა̄ლისგა̄ჲ ამჟი̄ნ იჩოხ. ერვა̈̄ჲ ლეყერ ხა̄რხ, ეჯას სგა ხეჴვსგენიხ, ჟი
Line of edition: 24    ხატყციხ ღვეშგიმხა̈ნ ჲედ ფაუს, ჲედ მიჯვრას ი ჲედ ხანჯა̈რს ი ეჩქანღო ლა̄ტვთე
Line of edition: 25    ყერხ. ლეყერს მუზვი ჩვაზვენი ი მჷყერ ხოშა ლაღა̈ლ ჰა̈დვირდ ღჷრი ქორთე, მარე
Line of edition: 26    ეჩეჩუ̄ნ ლუზრობ ლახე ლი, ნა̈̄თია̈რ ხეტხენიხ უშხვა̄რ მჷყერიშ ი ლეყერიშ
Line of edition: 27    ი ძღჷდ ქაჩა̄რობ ხეფსი. ფიშრა̄მინ თვით ეშდ, მა̄დეი ხოშა იჩქო̄ლდა ეჩხა̄ვ-ამხა̄ვ
Line of edition: 28    ი ეჩქანღო დაგრობ ხეფსო̄ლდა.

Line of edition: 29       მუწვრა ა̈გითე შვიდებდ ჴედნიხ, ეჩქას მინე ლეწვრი̄ საფლა̈ვჟი̄ნ თოფა̈რს აკ
Line of edition: 30    ვა̄ნეხ. ჯვინალდ ხეჯრავა̈̄ნხ, ერე ალ თოფრე ჰერ ესერ საფლა̈ვთე̄სგა სგა ხესმი ლეწვრის
Line of edition: 31    ი ეჩქანღვ' ე̄სერ გარ ოხგა̈დ რჷჰიისგა ლირდე, ადო ექად ესერ მუბვირისგა
Line of edition: 32    გარ ა̈რი შდა̄შვ. ეჩქანღო სგა ჴედნიხ ქორთე, სგახიქა̈̄ ნა̈̄თია̈რს ქ'ა̈̄წსიხ ი
Line of edition: 33    ლა̈ხჲადა̄ლს იჩოხ.


Line of edition: 34 
მესტია



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.