TITUS
Svan Chrestomathy
Part No. 50
Previous part

Text: 48 
Page of edition: 47 
Line of edition: 6 
48. პანშვირ


Line of edition: 7       პანშვირს ხოჩა მეზგე ი ჲედ ხოჩა ბედიშ ხეხვ-ჭა̈შ ლუხორშა̄ლ ჟახაღა ი ლიმ
Line of edition: 8    ზჷრღა იჩომდახ. შომვა̈̄იშდ პანშვირს ხემურჯა̄ლხ, ეჩქა̈̄შიშდ ჴანა̈რს ა̈ჲსენდახ,
Line of edition: 9    ოშვა̈̄ჲ ხეკფო̄ლხ, ეჩშელდს, ლეჰრა̈ყის ჩვაჰრა̈ყდახ. ლაღობ ლახ ხო̄გა̈ნხ. თვის
Line of edition: 10    ამა̄რახ რა̈ნგია̄ქდ, ფექს ლენყად ჟ'ამა̄რახ ი თა̈შს ჟ'ანზო̄რახ ამ ლა̈დღიშდ. ქორ
Line of edition: 11    ლახე იჩომდა, ქორა̈შ ლა̈სვ ალა მა̈გ, ლახე ეშხვი ბა̈რგ გარ იჩომდა, ეჩქას ქორ
Line of edition: 12    ზექ-მუგვა̈ლჷ̄ნქა დე̄მგვაშ ხა̈წვა̈ნდა ი მა̈გ ლეთხუმდ ხა̄დხ ლემა̄რე მუჩვემ ხეხვ
Line of edition: 13    ჭა̈შს. პანშვირ ლადა̈ღ სგვებნა̄ვ ჴანრეშ ი ხამრე მჷჲსენის ა̈წიჰდახ. ალჲა̈რს ჰარა̈ყს
Line of edition: 14    ხათრახ, ეჩქანღო ჟი ხა̈მზჷრდახ ჴანა̈რს პანშვრი (\\ პანშური) მუჩვემი ნა̈შდობა
Line of edition: 15    ხან ი ეჩქანღო ჩვა̈ჲსენდახ, ჩვაშდბუნახ, ჩვაკა̈̄დდახ ი სგა ხაგა̈მდახ კარდლა̈რთე̄
Line of edition: 16    სგა. კარდლა̈რ ქა̄მენჩუ̄ნ ლჷ̄გა̈ნხ კალვისგა, ადო ქორისგა დეშ სკჷ̄დენხ. ზურალა̈̄რს
Line of edition: 17    ხოშა ქაბბა̈რ ქა მჷნა̈ყ ხა̄დხ სგვებნა̄ვ ი ნეცინ დიჲა̈რს გარ ანყახ ი ნეცვნი̄რს
Line of edition: 18    ამა̄რახ ტაბგა̈რჟი̄ნა̈შდ. ეჩჷნქა მა̈̄ნკვი̄ ლენცლობჟი̄ნა̈შდ კუბდჷ̄რა̈რს ანყახ ი ქა
Line of edition: 19    მჷ̄ჭანღო ქორშა̈რ, ზა̈რვლა̈რ ი წჷდჲა̈რ ჩუ იდჲარა̄ლხ. ნა̈დჲარობენ მჷტსჷნჷ̄რას
Line of edition: 20    ხოთო̄ნახ სოფელთე ი ეშვა̈̄ჲ ლიწსი ხაკფჷნხ მეზგა, ეჯჲა̈რს ქ'ა̈̄წიჰდა. ნა̈ბზა̈ დვრ
Line of edition: 21    ევთე მა̈გ ჴედენდა ლჷწსე. ლემა̄რთიე ჟი ლჷმა̄რე ლა̈სვ მა̈გ, ტაბგა̈რს ქ'ა̄და̄წყაუშ
Line of edition: 22    ლეღვა̈რს ქორთ'ა̈̄ჲა̈̄სგდახ, ლა̈ჲსა̄ლე თხუმა̈რს სპა̈ნქ'ა̄ჭარვახ ი ლეტვრა̈̄ლს ხალწ
Line of edition: 23    ენდახ მუჭვა̈რჟი̄ნ. ამ დვრევჟი̄ნ ჯვინელ ლუშნუ ბაპა̈რი ჴედენდახ, პანშვრი მუჩვემ
Line of edition: 24    სგა ხესგვრო̄ლდახ ტაბა̈გს. ბაპა̈რ ეშდჲო̄რი ღეთ ლა̈სვხ აშხვჟი̄ნ. იჭა̄რვო̄ლდახ
Line of edition: 25    ქა, იბნახ ქვინი უხვა̄ნტად ზეპრი ლიყლეს. იმ დო ყჷლახ, მა̄მ ხოხალდახ მინსი̄.
Line of edition: 26    ეჩქანღო ხა̈ლხ ჩუ ისგვრო̄ლდა ქა̈̄მ, თვით ხოშა̄მ დიჲა̈რს ი ლემზჷრა̈რს ხოდა̈̄სგ
Line of edition: 27    დახ ი ეჩეჟი̄ნ ლაგფა̈რს ლეღვიშ. ჰარა̈ყ ი რა̈ნგ იმვა̈̄ჲჟი ჲა̈ს ხეკვა̈დ, ეჩჟი̄ნ ხუღ
Line of edition: 28    ვა̈̄ნდა ჩი. ნა̈ბოზს ნამსა̈დვს მა̈გ კალთა̈ჲს იჭვე̄ნდა ი ა̈გითე ღჷრდახ.


Line of edition: 29 
მესტია



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.