TITUS
Svan Chrestomathy
Part No. 58
Previous part

Text: 54 
Page of edition: 52 
Line of edition: 35 
54. ჭათა ი თე-ჲ ჰა̈ყბა


Line of edition: 36       შვანა̈რს ჭათად ი თე̄-ჲ ჰა̈ყბად ხატა̈რდ ხო̄შა̄ჲ ხაყვლვი̄ნდახ ჯვინალდ.
Line of edition: 37    ჲერხი თემა̈რს და̈̄ვა̈ ნაჭათვ ხაჟხახ ი ლა̈დი̄ჲ ეჩას ხატუ̄ლიხ მე̄რმე მესვფელა.
Line of edition: 38    და̈̄ვა̈ ლიჭთუნედ სურუ ხაყვლი̄ნდახ შვანა̈რს. ეჩჷნქა მაშე̄ნე სოფლი ამჷნიდ ხაყ
Line of edition: 39    ლუ̄ნიხ. ჲერვა̈̄ჲ სოფელს თხუმ ჟი ხა̈სსგე, ეჯას სოფელ ღჷნლადა̈ღ ლა̈მზჷრჟი̄ნ ა
Line of edition: 40    შხვ ჰერჟი̄ნ ჩვაჭვთუნე ი ეჩქანღო ეჯ მეზგე სგვებდ დე̄მის ღჷრი.
Page of edition: 53  Line of edition: 1    ჲერხი ქა მეკვჰე ლა̈სვხ, ერე ხოლა ნაჭათვ ხა̄დხ. მა̈გ ხექა̄ბუნა̄ლ ეჩი̄ ჭათას ი
Line of edition: 2    გუ̄შ ხა̄დ, ერე ლიჭთუნე̄ მჷქაფდ ჩუ იმჟი̄ნ ოთმა̈ზრე̄ნს. ჲერვა̈̄ჲ სოფლი ნა̈სკიბსვ
Line of edition: 3    დე̄მ ხესკბენდა ი ჲედ ლიჭმეს იბნა ხუ̄ნკვი, ჲედ ლელდაღვ დე̄მ აკვა̄ნა ქა ლა̄რა̈̄ლხა̈ნქა,
Line of edition: 4    ეჯასი ჩვაჭთუნა სოფელ. ლიჭთუნე ეჩქად ხემთქვჷ̄ნხ ე, ოდე ლეჭთუნე მეზგე
Line of edition: 5    ჟი დო იჰდჷრა მიჩა ნაჩომს ი სოფელს სგა დო ხეჴჷრა̄ლ ჰარაყშვ. ეჩქას სოფელ
Line of edition: 6    ჟი ხოკა̈დდა ჭათას. ჲერვა̈̄ჲ ლაჴვა̈მს ა̈კვშა ი ხატა̈რს ატდუფუ̄რი̄ს, ჲედ იშგან გა̈ნზს
Line of edition: 7    ა̈დქვითა̈რდა, ეჩი̄ მუჩვემი ლაჭთუნა ლადა̈ღს ჟი იცხა̈ტდახ, ხეჴჷ̄რა̄ლხ ლაჴვა̈მს
Line of edition: 8    ლა̈ჲსოვშ ი ჰარაყვშ, ერე მიჩა მუკვშად ივალადა̈ღ შვალა ნო̄მჟი̄ნ ოხვჴი̄დე̄ნს
Line of edition: 9    ი ლერთანთე გარ ოხვსიპვნე̄ნს.

Line of edition: 10       ბა̈̄ლჷნჩვი̄შს ლახმჷლდრე ჭათად ხაყვლუ̄ნიხ მაშე̄ნე. ლახე ალ სოფელ ჩუ
Line of edition: 11    ჲა̈ს აჭთუნეხ, ეჩქას ზურალა̈̄რ ი ღვაჟა̈რ ჰანწა̈̄რ მარდა̈რს ა̈ჲე̄სგიხ, სგა ხეგნიხ
Line of edition: 12    ჯგჷრა̈̄გი ლაჴვა̈მს ი ხატუ̄ლიხ კჷლთხიდ: "შიშდ ესერ ჟი̄ვ ესთენე მინე ჭათა მინე
Line of edition: 13    ლეჭთუნა, ადო ალ მარდარშვ ესერ რიღვეხ ლუხუნდ". ჭათანქა თე̄-ჲ ჰა̈ყბადი მე̄
Line of edition: 14    ვარ ხაყლუ̄ნიხ შვანა̈რს.

Line of edition: 15       ხოჩა̄მ ლესგდი ქვინლჷმგენა ი ბეფშვს ქიზუმბურა̈ჲს ხაბემხ, "ღვ' ე̄სერ თე
Line of edition: 16    მა̄დ ლა̈ხგენი".

Line of edition: 17       ხოჩა̄მ დაბა̈რისგა ჩი̄რხუვარ ზიხ, თ'ე̄სერ მა̄დ ლა̈ხგენი ამე̄სგა̈̄ მაჴა̈დს. ჲერხი
Line of edition: 18    ხოლა̄მ თე̄მიშდი ხოთრახ ი "ალ მა̄რე̄მიშ იჲედ ზურა̄ლა̈ ნა̈სგიდშვ შიშდ ესერ ხო
Line of edition: 19    ლა̄მ გუჟი̄ნ არდვნე მა̄რა".

Line of edition: 20       ეჩის ქა̄მენჩუ̄ნ ხოლა ნალხვიჲჲ ესვა̈̄ჲ ხა̄რ, ეჩი̄ ლიხვჲესი გუნ ხექა̄ბუნა̄ლ მა̈̄ნვი
Line of edition: 21    მუშვა̈ნ მა̄რე. ამკა̈ლიბდ ქა მეკვჰე ჲერვა̈̄ჲ ლი, ეჯა ლახე ხეხო̄ლა გზა̈̄ვრთე მე̄ზის,
Line of edition: 22    ეჯა ჟი ხოჭვე̄ნი ეჯ ლადა̈ღ ქორთე ი გზა̈̄ვრთე მა̄მ ღჷ̄რი. ჲერვა̈̄ჲ ზურა̄ლ
Line of edition: 23    სუტდ ა̈რი ი სერთხი̄ ლახე მეჩი ლი, ეჩი̄ ჭათასი გუნ ხექა̄ბუნა̈̄ლ მა̈გ.


Line of edition: 24 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.