TITUS
Svan Chrestomathy (I: Upper Bal): Part No. 51

Text: 38 

Line of edition: 18

38. ზურა̄ლა̄რე ლიმზრ ჰლიშ ლადა̈ღ ი ბოფშრე ლიჩ̄და̄̈ლ


Line of edition: 19       ჰლიშ ლადა̈ღ ზურა̄ლა̄̈რ ღრიხ ლადბა̈შთე ჴვიდი თა̄რინგზელთე. ამეჩუ̄ნ
Line of edition: 20    ჟი იდბა̈შიხ ი ეჩქას ქა ნა̈რბია̄ლუნღო ბოფშა̈რ ჴვიდი ლა̄რე̄მი ჰოკერ ფუშყვრი
Line of edition: 21    ლ̄ლჰა̈ნდისგა ბოგო̄ლს ასყე̄ნეხ. ეჩქანღო ჟი ღრიხ მდბაშათე ი აშხვ ზურა̄ლს
Line of edition: 22    ქა ითშიხ მემზირდ. ალ ზურა̄ლ სამ ლემზირს შუნ ა̈ჲე̄სგი. ჴედნიხ ბოფშა̈რ, სგა
Line of edition: 23    ხეგვდირნიხ ალ ზურა̄ლს ი ღვეშგდ ლა̈ტხუშ ჩვა̈ჲე̄სგიხ ბოგო̄ლთეჩუ̄ნ. ამეჩუ̄ნ
Line of edition: 24    ალ ზურა̄ლ ჟი ხა̈მზრი ალ სამ ლემზირს ეჩი̄ ნაჟხახა̈ნ, ერე "ქა ლღე̄ზანღო ფუშყვერდ
Line of edition: 25    წყა̈ნ ნომ ა̄თდას ლექო̄რა̈რს ლლჰანდრე ლიდვა̈შივშ." ალ ნამზურუნღო
Line of edition: 26    ლემზრა̈რს თხუმჟიქა̄ნქა სგა შიდე ფუშყვერთე̄სგა ი ჟი ისპუნი ლერსგვანთე.
Line of edition: 27    ეჩქანღო ბოფშა̈რ აჯაღ ღვეშგდ ლა̈ტხვშდ ა̈ჲე̄სგიხ ალ ზურა̄ლს ი ჟ'ა̈ჲიხ მიჩა ნარდვმუყვ.
Line of edition: 28    ამეჩუ̄ნ მე̄რმა ნადბაშუნს ჟი̄დ ხა̈მზ̄რიხ ლამა̄̈რჲას, ხეჴრა̄̈ლხ ზურალა̄̈რ
Line of edition: 29    მინეშ ი მინე ქორშარე ნა̈შდობახა̈ნ ი ეჩქანღო ჩუ იდჲარა̄̈ლხ. ხო̄შამ ქუთვა̈რს მინ
Line of edition: 30    იზბიხ ი ნამსა̈დვს ი ლემზრა̈რს ა̈გით ა̄̈ჲე̄სგიხ. ჩუ მესედ ბოფშა̈რს თვით ლემზირს
Line of edition: 31    ხაჰვდიხ ი ჩუ ცვირეხ ამჟი̄ნ ეჩეჩუ̄ნ. შუკვს სგა ჲერვა̄̈ჲ ხეხო̄ლიხ, ეჯჲა̈რს ლემზრა̈რს
Line of edition: 32    ხაჰვდიხ ი ამჟი̄ნ ა̈გითე ღრიხ.

Line of edition: 33       შვიდმა̈ჲშიე̄რ შვანა̈რ ცაგე̄რთე ღრდახ ლაღვჭარდ. ცაგე̄რთე ლა̄ზ ჯვინალდ
Line of edition: 34    მუშვრა̈ თანა̈ღქა გარ ლა̈სვ. ზა̈ნხა̈ნ ეჩქად ხოხვრა̄მ ხეთი̄ლა̄ლ მა̈გ ი ეჩხა̈ნ ალ
Line of edition: 35    დვრევჟი̄ნ და̄̈რ ღრდა. შვიდმა̈ჲშიე̄რ ნა̈ჲ ჩაფლა̈ შოლტა̈რ ენღვა̄̈ნ ლეჰვდიდ ცაგე̄რთე.
Line of edition: 36    ეჩნქა ძა̈გვი ესღვა̄̈ნხ ლეჰვდიდ. ეჩეჩუ̄ნ ალჲა̈რს ქა ჰო̈დვდახ ი ეჯჲარე ნაღვჭარ
Line of edition: 37    ა̈გით' ა̄ხღვა̄̈ნხ ქაფარშვ. ეჩხა̈ნ ახღვა̄̈ნ ბარდან, ნე̄სყე ი ჯიმ.

Line of edition: 38          ლენჯა̄̈რ




Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.