TITUS
Svan Chrestomathy (I: Upper Bal): Part No. 50

Text: 37 

Line of edition: 32

37. ლიღვჟა̄ლვნე ი ნაღვაჟი ლიმშედა̄̈ლ


Line of edition: 33       ზურა̄ლ ლაღვჟა̈შ ლ' ე̄ჩქას მეზგა ლახე მე̄რმე ქორ ხო̄გ, ეჩხა̄ვ აჲე̄სგი მეღვჟა̄̈ლს,
Line of edition: 34    მა̄დეჲ უკცვირ ქორისგა ხოსყე̄ნე ლარდას.

Line of edition: 35       ლიმზირი დვროვა̈რ ლახე ლიხ ი ღნჲა̄̈რუ იბნიხ, ეჩქას ჰა̈დურდ ხუ̄ნკვიდ ა̈ჲიხ
Line of edition: 36    ზურა̄ლს ლაღვჟა̄ლვნად უკცვირ ქორთე, ეჯღ' ე̄რე ლიმზირ დო̄ს ა̄თურწყვლე̄ნს
Line of edition: 37    მეზგა. ზურა̄ლს ლიღვჟა̄ლე დვრევ ხოჴდენ" ე̄ჩქას მუმურჯვაჲ ხაყა.

Line of edition: 38       ესვა̄̈ჲ ფიშირ ზურა̄ლ ხოღვჟა̄ლვნა სოფელისგა, ეჯა̄ჲ ჴედნი. მეღვჟა̄ლა̄̈ ლაყვრა
Line of edition: 39    ჟიქა̄ნ თა̈კვს ხოწბინეხ ი ეჯას ხეწე̄ბა̄̈ლ მეღვჟა̄̈ლ, ლახე თმი ხოჴდენი. ეჩნქა
Line of edition: 40    ზურალა̄̈რ სგა ხოგვდურიხ ეჩხა̈ნ-ამხა̈ნ ი ყველფ გრკიდ ჩოქუ̄ლარშვ ხაზელა̄ლვნეხ,
Line of edition: 41    ალ' ე̄სერ შეღავა̈თილდ ხოჴდენი მეღვჟა̄̈ლს. ზურა̄ლს მა̄̈ნკვი̄შჟი̄ნა̈შ ხა̄რ ლი-
Page of edition: 39 Line of edition: 1    ღვჟა̄̈ლ, ეჩქას ხოშა გარჯ ხოჴდენი. ამჟი̄ნ იცვდილა̄̈ლ ღალ ზურა̄ლ, ოდე ჩუ დო
Line of edition: 2    იფცხ̄რიხ დიგეზალ. ჩუ ნაფცხ̄რუნღო ნა̈გღა̈ბ ზურალა̄̈რ შდიხვს ქა ხა̄̈ქვცეხ ბეფშვს
Line of edition: 3    ი ჩუ ხოჭვე̄ნიხ პინტარშვ. ნაღვაჟვს ჩა̈ვისგა ფა̈ტვა̈ ჩალ ხორშა ი ეჩე̄სგა აყვრე.
Line of edition: 4    ჟიქა̄ნ ხოდრა ნაშურთქულა ხა̄̈ქვ. ზურალა̄̈რ ჭყა̈ნს ა̈ჰნეხ ი ეჩის ხათრეხ ნაღვჟა̄ლვს,
Line of edition: 5    "ხოჩ' ე̄სერ ხა̄რ ი ქ'ა̄̈წყლჲა̈ნი."

Line of edition: 6       ლახე ჭყინტს ათვე ზურა̄ლ, ეჩქას ეჯ მეზგე მიჩა ქორისგა ლა̈ხჲადა̄ლს იჩო ი
Line of edition: 7    ქ'ა̄̈წსი მიჩა მეხვბარა̈რს ი ნა̄̈თი მა̄რა.

Line of edition: 8       ალჲა̈რი ჴიდეხ ობა̈შინ ლეთრა ნა̈წვერდ ი ლა̈ხჲადა̄ლდ. დი̄ნაჟი̄ნ და̄̈რ მა მეფშე̄ლი
Line of edition: 9    ხვა̈ჲ ი დე̄ჲ ფეშნი ჲა̈რ ი ლა̈ხჲადა̄ლსი და̄̈რ იჩომ. ქა ლთა̄̈ვ ბეფშვს მა̄̈ნკვი
Line of edition: 10    მაშრი ყა̄̈რჟი̄ნ ა̈ყვნეხ. მელისვ მე̄რმე ზურა̄ლ მა̄̈ნკვი მიჩა ლუსვშ ჴარჴს ჩუ ხოფტე
Line of edition: 11    ბეფშვს ი ეჩქანღო სერ მიჩა დი ხაჩგუნა̄̈ვნე მიჩა ლუსვა̈რს. სამ ი ო̄შთხვ ფა̄ნუნღო
Line of edition: 12    ბეფშვს ჰაკვა̈ნთე იტხეხ ი ეჩე̄სგ' ა̄̈ყვნეხ. ოდე ო̄შთხვეშდ ლადა̈ღ დო ხერა̄̈გი
Line of edition: 13    ზურა̄ლს ჩუ ნაღვაჟუნღო, ეჩქად ქორთე დე̄მ იხნიხ ი ეჩქანღო სერ ქა ლწყლჲანე
Line of edition: 14    ლი ზურა̄ლ. ლიმზირ მა̄მ ხედვა̈შიხ ქორისგა ი ჩუ ხოშიდ ქორთე ლი̄ზი.

Line of edition: 15       ბა̄ზი მეზგა ხოჩა ლე̄თ ხა̄რ ლესყე̄ნე. ლახე ჭყინტ ლი ქორთე ლეჴდე, ეჯა გუნ
Line of edition: 16    ლეხჲა̈დ ლი მუშვა̈ნიშდ ი ხა̈ხჲა̈დხ, დი̄ნაღა და̄̈რ მა ფეშნი ი დე̄მგვაშვ იჩოხ.

Line of edition: 17          ლენჯა̄̈რ




Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.