TITUS
Svan Chrestomathy (I: Upper Bal): Part No. 72
Text: 55
Line of edition: 25
55. ყერ
Line of edition: 26
დიდა̈ბი ლეჴედ ყერ ლა̄̈თშვ გარ ისგვჯინი ი იმვა̄̈ჲ მაშე̄ნე წყილჲა̈ნ ადგილ ხაბჟა,
Line of edition: 27
ეჩეჩუ̄ნ იგნი. ყერ როქვ ა̈გლეზვრე ნა̈ყვილ ლი ი ეჩი̄ ლიმზირ მა̄რა მაშედ
Line of edition: 28
ხა̄რ. ქა̄ჲ წყილჲა̈ნ მა̈რე ერვა̄̈ჲლი, ეჩის გარ ხეწვე̄ნი. ყერ ლემესგშა̄ლ არჰე ლა̄̈თშვ.
Line of edition: 29
აშხვ ა̈გიხა̈ნქა ჟი პერნი, ეჩქას სერ მბიდ ლამპა̈რშა̄ლ იწვე̄ნი ლაპო̄რთე̄სგა
Line of edition: 30
ეჩხავ ე, იმვა̄̈ჲ ჩუ ისგვჯინი ი ეჩეჩუ̄ნ ჩუ დეგნი. ყერ ერხი̄ მურყვმა̈რსი̄ ხაცხნე ი
Line of edition: 31
ეჯ მეზგა ზავისგა ობა̈შინ ლემზრა̈რ ხა̄რ ლემზრი ეჯ მურყვამისგა ყერდ.
Line of edition: 32
აშხვჟი̄ნ ნიშგვეჲ სოფელ ჟიქა̄ნხა̈ნჩუ ანპა̈რ მირ ეჯკა̈ლიბ, ერე ლამპა̈რშა̄ლ
Line of edition: 33
ხებიდ. გუნ მუბვირ ი ბ̄რნე̄თა ლე̄თ ლა̈სვ. ალა ჩუბა̄ვ ესღრ', ა მუტვა̈რ მირ. გიმს
Line of edition: 34
ობა̈შ მა̄მ ხაღირ ჟიბა̄ვ ი ეჩჟი̄ნ ქა̄'ნრჰ', ე̄რე დაბა̈რ მჟა̄̈რშა̄ლ იწვე̄ნი. ა̈თღვა̈ჭდ
Line of edition: 35
ხოხვრა̄̈ლ ლა̈ჭვმუშ. სგა ლიჰეს ხვამურჯიდ, ამჟი̄ნ სგა ლა̈ნჰელა̄̈ნ. ნა̈ჲ ჟ'ესვჭვე̄ნდ,
Line of edition: 36
ამჟი̄ნ ნიშგვეჲ ჩუხი̄ნ ჟ'ი̄დ ანპა̈რ ლემასგვშა̄ლ ი ლა̈ჲბინე ჩუბა̄ვ ლი̄ზი.
Line of edition: 37
ნა̈ჲ ლიღვეჭ̄დ ლოხვბინედ. დაბრე ჰოკერდ ჩვა̈თღვაჭდ, ეჩელექვა ხოშა ჭალა̈ჲ
Line of edition: 38
ანღრი ი ნა̈ჲ ჩვოთ̄გა̈ნდ. ალა̄, მბიდ მა̄̈ჲ ლა̈სვ, ქ'ა̄ჩა̈დ ლცეჩხა̈ნ შგედთე ი ეჩე
Line of edition: 39
ჩვათვა̈ფ. ნა̈ჲ ა̈გით' ო̄ნჴვა̈დდ ი ქ'ო̄ხუმბავედ იმვა̄̈ჲ ხვეწა̈დდ ი იმჟი̄ნ ა̈თღვა̈ჭდ.
Line of edition: 40
ხოშა̄̈ლდ რა̄̈ქვხ: "ალ' ე̄სერ, დიდა̈ბი ლეჴედ, ყერ ლმა̄̈რ ი ნა̈ჲ ესერ ღალ იმ ა̈ხურმინად
Line of edition: 41
ეჩის". ი ობა̈შ ან̄მბავეხ ალ ყერი ბედჟი̄ნ. ერხი ყლახ: "ნა̈პო̄ლა̈ სა̈ხ ესერ
Line of edition: 42
ხუღვე". ერხიდ რა̄̈ქვხ: "ბეფშვი სა̈ხ ესერ ხუღვე". ჲერ იმჟი̄ნ ყლახ ი ჲერ იმჟი̄ნ.
Line of edition: 43
ლენჯა̄̈რ
Page of edition: 54
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
