TITUS
Svan Chrestomathy (I: Upper Bal): Part No. 92
Text: 71
Line of edition: 8
71. კა̄̈რშარეშ ი ლა̈შხა̄ნშა ბა̈კობ
Line of edition: 9
ჯვინალდ ბა̈კარობ ლმა̄̈რ. იმვა̄̈ჲ მოშ ლმსახვთინხ, დე̄მნოვშ ლმზა̄რვინხ
Line of edition: 10
უშხვა̄რ, მა̄̈ მოშ ლა̈თჲა̄ლს ხა̄რახ. ლებეკ ი მებეკ უშხვა̄რი ხოლა̄მ გარ ხაშდბე̄ნახ
Line of edition: 11
ი ხვა̈ჲ ხოლა̄მ ხა̈ჩვმუნახ უშხვა̄რ.
Line of edition: 12
კა̈რშრეშ ი ლა̈შხა̄ნრე უშხვა̄რნე̄სგა̈ ბა̈კობ ბოფშრე ლიკნტა̄̈ლს ახფასა. აშხვ
Line of edition: 13
ლადა̈ღ ესნა̈რ ბოფშა̈რ ლალდა̈ღს არიხ ი ლიშდრა̄̈ლ ლა̈ჲბინეხ. ლაშდრა̄ლჟი̄ნ ლიკ̄ნტა̄̈ლ
Line of edition: 14
ოხჩდხ ესნა̄̈რ ი უშხვა̄რ ჩვახტუფუ̄რეხ მა̈გ ლაკანჭუ̄რას. ლა̄̈შხა̄ნშა ხოშა̄ლე
Line of edition: 15
ბეფშვ ჟი მრეს ახწინდა კე̄რშა̈რშა ხოშა̄ლე ბეფშვს ი ხოშე̄ლ ოხკანჭუ̄რა.
Line of edition: 16
ნა̈ბოზს ა̈გით' ა̄ჩა̈დხ ალ ბოფშა̈რ ამჟი მჟღ̄ლი. კ̄რშა̈რშა ბეფშვი დი ხეწა̈დ მიჩა
Line of edition: 17
ბეფშვს ქა ლკანჭუ̄რა ი ლახჭვედნა: "მა̈ჲ ესერ ხა̈ყრა, ჲა̈ს ესერ ლოხვგენ'ა̄მჟი
Line of edition: 18
ჩქიმ?" ალ ბეფშვს ლოხვტი̄ხა: "ჲა̈ს ესერ ი ლა̄̈შხა̄ნშე̄რ ბეფშვს". "მიჩ ესერ
Line of edition: 19
ოსკანჭუ̄რა მა̄ ღო?" "მიჩ ესერ ა̄დუ".
Line of edition: 20
ალ ზურა̄ლ ესნა̈რ ხოჩა ზურა̄ლ ლმა̄̈რ. ჩვადშა̄რდ' ე̄სნა̈რ გეზალ ი ხა̄ქვ: "ჯ'
Line of edition: 21
ე̄სერ ი̄რო̄ლ ღე̄ვა̈რ, ადო ასცვიდდ ესერ დე̄მის ახკანჭუ̄რი̄ს. ამუნღვ' ე̄სერ ნო̄სუ
Line of edition: 22
ხეკ̄ნტა̄̈ლ ი ღვ' ე̄სერ მა̄მ ხე̄რ' ა̄ლა".
Line of edition: 23
ლა̄̈შხა̄ნშა ბეფშვი დი ქა ხა̈წდა მიჩა გეზალს ამჟი ჩქიმა̈რს, ეჩქა ლა̈ხჭვედდა
Line of edition: 24
"მა̈ჲ ესერ ხა̈ყრა ჭყტრა?" "მა̈ჲ ესერ ი კ̄რშა̈რშე̄რი ბეფშვს ოხკანჭუ̄რა". ალა
Line of edition: 25
ზურა̄ლდ ა̈დვა̈შგდე. კუდა̈ჲ ზურა̄ლ ლმა̄̈რ. ბეფშვი ლიშა̄რდე̄ მქაფდ ოთშგა̈ბ
Line of edition: 26
კ̄რშა̈რშე̄რ ყო̄რთეჟი̄ნ. ლოხვბინე ალ მეზგა ლიწრა̄̈ლ ი შვანე რიჲა̈ლ ჯაჭა̈რჟი̄ნ
Line of edition: 27
ხაჴიდ. ალჲარე ზურა̄ლ ქ'ა̄̈ნსგიდდ' ე̄სნა̈რ ი ლა̈ხჭვედდა: "ჯა ზურა̄ლ, მა̈ჲ ქაჯა̈რ
Line of edition: 28
ესერ ახჭვა̄და? იმნა̈რ ესერ ხა̄რ ამჟი̄ნ მიჰმა̈ნ?" "ხამ'ე̄სერ იმნა̈რ, მინ ბაგრაუ, მინ
Line of edition: 29
ეჯა ი მინ ალა, მინე ხოლა̄მდ ლნში̄ლა წოკლა̈ჲ ბეფშვს მა̈გ ჩვოხტუფუ̄რა მიჩა ბეფ
Line of edition: 30
შვდ. ჲა̈რ ესერ ხოხალხ მინს ეჯა?" "ჯა ზურა̄ლ, მიჩა ბეფშვდ ესერ ჰა̈დურდ ხოდრა
Line of edition: 31
ჩქიმ ლოხვგენა მიჩა გეზალს, მარე ჯ'ე̄სერ აჯაღ ეჩხა̄ვ ათცუვე̄ნა, ბეფშვი თველს
Line of edition: 32
ესერ ჲა̈რ ა̈ნჴდე თველია̈ნ, მა̄მ'ე̄სერ ხოშგურა ბოფშრე ლიწე̄ნა̄̈ლ?"
Line of edition: 33
ოხჩ̄დხ ალ ზურალა̄̈რს ტე̄ვა ი უშხვა̄რ ლა̈ხწერა̄ლა̄̈ნხ ხოლა̄მდ, კ̄რშარშე̄რ
Line of edition: 34
ზურა̄ლდ ხა̄̈ქვ: "ჯ' ე̄სერ ჰერვია ლი. ლა̄̈თშვ ესერ ციცვდ ისპი ი ხოჩა̄მ სიმქა̈რს
Line of edition: 35
ესე გვის ი ყვიჟა ქა ხამა̈მ". "უ̄ჲ, ჯ'ე̄სერ ყა̈ხბა, ჩუ̄ვ ღენ ესერ ესგენე, ამნია̄̈ნდ
Line of edition: 36
ესერ მა̄̈ვ ხა̈ყრის მიჩ მიჩა ჭაშვემ. ჲედ ესერ ესცხირნე ჟი ალ ლიჰურჲალსვ ი მა̄დ'
Line of edition: 37
ე̄სერი იმთ' ო̄თჩედნი?"
Line of edition: 38
ამჟი̄ნ ლა̈წრა̄ლუშ ა̈გით'ა̄ჩა̈დ ლა̄̈შხა̄ნშა ზურა̄ლ. ნა̈ბოზს მიჩა ჭა̈შ ლაშდაბხა̈ნ
Line of edition: 39
ა̈გით'ა̄ნჴა̈დ, ეჩქას ალ ზურალდ ჩვესხვიჲე ა̈გის ალ ამბა̈ვ ი ხა̄̈ქვ: "ჲედ ესერ
Line of edition: 40
ქა̄ვ ამმაწვდე ჯა ამხა̈ნქა, ალ შგვირ ესერ ჟი̄ვ ახღირ ი მა̄დ'ე̄სერ ი ჯა მიჩა ლამვართე
Line of edition: 41
ღრი ი ეჯჲა̈რს ესერ ახთხა̄̈ლვნი მიჩა შგურ". ჭაშვემ ესნა̈რ ლახტიხ:"ჯა ზურა̄ლ,
Line of edition: 42
ჟი̄ვ ლახშვა̈მნე კვეტო̄ლ ხა̈ნს ი ღვ'ე̄სერ ეჩქანღო ი̄რ'ა̄ლ გვეშ. მა̄მ' ე̄სერ
Page of edition: 66Line of edition: 1
ხოსგდია, ვედნილდ გარ ა̈რი, ეჩჟი̄ნ ლახმეშრე̄ნა ლა̈დი ლამშიას". მე̄რმა მეყულფა
Line of edition: 2
დი ათსა̈სტკვნეხ ბა̄ზი ალ ზურა̄ლს ი ჩვადშა̄რდეხ. მე̄რმა ლადა̈ღ შიშდ ლიმცი
Line of edition: 3
ქვილ ლოხვბინეხ ალ ხეხევ-ჭა̈შდ კ̄რშა̈რს: "ჲედ ესერ იმვა̄ლეჟი̄ნ ქა̄ვ ანმაწვდეხ
Line of edition: 4
ალ ზურა̄ლ ლიჰურჲალვხა̈ნქა, მა̄დე̄ჲ მა̄̈ღვრა̄ვ ხაყერხ, ადო ამჟი̄ნ ესერ დეშ აჭკრ
Line of edition: 5
ნეხ ი ფათრა̈კს ხაფსეხ. ივალადა̈ღ ესერ მინე გვა̈რიში ლიჰურჲალვ და̄̈ს ხასმა".
Line of edition: 6
კ̄რშა̈რშე̄რ ღვაჟა̈რს მა̄მაგვეშ ხოხალდახ ამი̄შ ი ეშ ა̈დმბაჟეხ. ლა̈ხჭვედდახ
Line of edition: 7
მინე ზურა̄ლს ი ამნე̄მ მა̈გ ქ'ო̄ხუნბავე ღვაჟა̈რს, იმ ახფასეხ მინე ზურალა̄̈რდ ტე̄ვა.
Line of edition: 8
მეცქულა̈რს ლახტიხხ ღვაჟა̈რდ, ერე "მინს ესერ მა̄მგვეშ ხოხახ ხიად, ზურალა̄̈რ
Line of edition: 9
ესერ იმვა̄̈ჲ ღენ ლახწერა̄̈ლი̄სხ უშხვა̄რ. ლა̄̈შხა̄ნშე̄რ ზურა̄ლა̈ ნალფე̄თ' ე̄სერ გიმ
Line of edition: 10
სი გვა̈მი ხა̄რ. მინს ესერ მა̄მა ხოჟიბხ ეჩი̄ ლა̈ჭმინა̄ლდ ი მა̈დილუ ხე̄რახ ი მინს ჰაჯუ
Line of edition: 11
ახკიდხ". მეცქულა̈რდ ქ'ე̄სვტიხხ პასუხვ ი ალ ხეხვ-ჭა̈შ ლა̈ზრხოვშ აჩა̈დხ
Line of edition: 12
ქორთე. აშხვ ლადა̈ღ ლახევი̄დ ლა̄̈შხა̄ნშა ზურა̄ლა̈ ჭა̈შ კ̄რშა̈რე ზურა̄ლს, ახფხი
Line of edition: 13
ჭე ლუსდიგვს ი ხანჯარშვ ჩვახჭკვერ. ჯვინალდ შვა̈ნისგა მა̄რე̄მი დაგრად ხოშა
Line of edition: 14
ხ̄რ ხეყა̄̈დ, ათხე̄ჲ მასა̈რდ შგვირ ლი ლახე ზურა̄ლს ლუსდიგვს ჲა̈რ ახჭკორე. ალა,
Line of edition: 15
მა̈ჲ საკვრელ ლი, ჭაშვემ ი მიჩა მეყულფად მასა̈რდ ა̈დხ̄რეხ. "ეჯღა̄ჲ ესერ ოთხი̄
Line of edition: 16
პახ გვი ხოლა̄მ ყა̈ხბა ზურა̄ლა ბა̈დშვ, ყორქა ლაჴა̈დ ესერ ოხვშდი̄ნახ ი სერ ესერ
Line of edition: 17
მინე ლირდე ამუნღო დე̄მნა̈რდ ხაჯეშ".
Line of edition: 18
ალ ზურა̄ლა̈ ჭა̈შდ ლიმშავს ჰაჯ ახკიდ, ყო̄რქა ლიჴედსი დე̄მ იჩომ ი ოხღელი
Line of edition: 19
ტარესვს. აშხვ ლადა̈ღ ოთდარჯე ჩუ ლახვს ლიჭმა̄̈ლისგა ლა̄̈შხა̄ნშე̄რ მა̄რა. ალ მა̄რა
Line of edition: 20
მერჩილ ბარჯს ხა̄̈ზ, თვეფ ჟი ხორიკ ი ესღრი ლა̈ჭმათე. ახფიშვდ კ̄რშა̈რშე̄რ მა̄რე̄მ
Line of edition: 21
თვეფ ი შუკვისგა ჟ'ესცვირ ალა. ანჴა̈დ ა̈გითე, ჟ'ა̈ნნა̈ზო̄რე ნა̈თჲა̈რ ი ბა̄ზი ხოჩა
Line of edition: 22
ლა̈ხჲადა̄ლ აჩვმინ, ერე შგვირ ქა ლა̈ჲტიხჲე̄ლე ი ყო̄რქა ლაჴა̈დ ჟ'ა̈ხსყა̄̈ნ.
Line of edition: 23
ეჩქანღო სერ უშხვა̄რ ახბეკე̄ნახ ალ ჲო̄რი თემ ი მასა̈რდ დაგრა̄რობ ხა̄რახ.
Line of edition: 24
თვით ოხვიშდ ღეთ ოთდაგრახ ეჩხა̄ვ-ამხა̄ვ ი ეჩქანღო ვედნილდ გარ ოთსყახ მინე
Line of edition: 25
მესვფელას, მარე ა̈მჩედელი დვრევ ი ალ ჲო̄რი მეზგე ჟ'ა̈მხვეტე̄ლიხ, ეჯჲარე
Line of edition: 26
ნაქურვა̄ლე ნამჴიჩვა̈რ წვირმი̄შ ი ჲელი̄ უშხვა̄რ ნე̄სგა ათხე̄ჲ ზმშვ ჩუ სიდხ. ეჯ
Line of edition: 27
ჲარე გვარიში და̄̈რ სიდ ლა̈დი.
Line of edition: 28
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
