TITUS
Svan Chrestomathy (I: Upper Bal): Part No. 93
Text: 72
Line of edition: 29
72. ეცრიშ ი ფა̈რი ოთარშე̄რრე ბა̈კა̄რობ
Line of edition: 30
ჯა̈ნსუხვი ნაბერწყ ეცერ იზგახ ი ლაზგად ბა̈რშისგა იზგახ. ალჲარე შნჩუქვა̄ნ
Line of edition: 31
არდახ ეცერ-ცხმა̈რ ი ბეჩვი. ფა̈რს იზგა ციოყ ი მიჩა ნა̈თსა̈ვ. ალჲა̈რს ჩიგარ
Line of edition: 32
ხა̈სგნხ უშხვა̄რე თხვიმ ი ჩიგარ ბა̈კა̄რობ ხა̄დხ.
Line of edition: 33
ხა̈ლხცახა̈ნ ი ლუზორ-მაზორჟი̄ნ უშხვა̄რე მა̈სისგს ქა დე̄მ ითნახ ი ხეყხა̄ლხ
Line of edition: 34
უშხვა̄რ, მარე გუისგა ეჯას გარ ხესკო̄რა̄ლხ, ე, უშხვა̄რეშდ მა̄ლე ლედვრე̄ჴი მოშ
Line of edition: 35
ესვდე̄ნხ. მინე ლეფსვნა გლეხა̈რს ი ჟი ლჟა̈ხ ხა̄დხ მინეშდ ქა ლკლპოტე ჟახე:
Line of edition: 36
"ჩინოვშ უმჴა̄და ოთარშა".
Line of edition: 37
ალ ჲო̄რი ოთარშა ჲეს ეშხუ ხა̈წრახ აშხვჟი̄ნ ი ჲეს _ მე̄რმე, შვა̈ლას დე̄მჟი
Line of edition: 38
ხოჴდახ უშხვა̄რ ი გუ ხა̄დხ, ერე ჟი იმჟი მოშ ოხხვი̄ტე̄ნხ ი ღო ეჯჲარე ნამსა̈დვ მინს
Line of edition: 39
ესსედე̄ნხ, ალა ჲექრდა̈შ ჩუ ხოხალდახ ი ჩიგარ ხეფრთხილდახ უშხვა̄რ.
Line of edition: 40
ალჲა̈რს მსმი̄ნეჲ ხვა̈ჲ ხორდახ, ამნოვშ აშ გარ ხოკვი̄ლცხა̄̈ლდახ უშხვა̄რ ნესგა
Line of edition: 41
თე̄ ხოლე̄მი ლიჩვემს. აშხვჟი̄ნ ფა̈რი ოთარშა ლეჟ'ა̄ხშგებახ ეცრი ოთარშე̄რს,
Line of edition: 42
შომვა̄̈ჲ ღვაჟა̈რ ქორს მა̄მ არდახ, ეჩქას ჟ'ოხვბიდნახ ეცრი ოთარშე̄რდ ი ხვა̈ჲ
Page of edition: 67Line of edition: 1
წყა̈ნ ოთჩვემნახ. ქორთე ნაჴა̈დუნღო ლღლატად ესხვიე̄ნახ მა̈გ, მარე ქა მა̄მ ლოხ
Line of edition: 2
თენახ, ახმა̈ღლინახ, ერე მინს ესერი ოხვჴედნიხ იმვა̄ლე დვრევ ი გა̄მს ლახტიხეხ.
Line of edition: 3
ფა̈რი მახვში ციოყ ჩვალდაგა̈რ, ეჩქას ეჯას ხეხვ ი ოხვიშდ ჭყინტ გეზალ ათსედა.
Line of edition: 4
ალ ჭყნტა̈რ ხოხვრა გარ ლმა̄̈რხ ი ეცრი ოთარშე̄რ მაყალშვ ქ'ოთქა̄მვნა
Line of edition: 5
ზა̈ნთე მინე დი დიგორხანს. ქორს ჯაჲ მიჩა ფა̈მლია̈რ გარ ა̈მსედე̄ლიხ.
Line of edition: 6
ათხე აშხვ ლე̄თ ეცრი ოთარშე̄რ ჯანსუხვს ი მიჩა ლახვბას დვრევ ესვთიშახ
Line of edition: 7
ი ჩვათშგებახ ფა̈რთე, ამეჩუ̄ნ ჟ'ოხვმეჴრახ ი დიგორხან ი მიჩა ფა̈მლი დი̄ნა̄̈ლ მურ
Line of edition: 8
ყვამთეჟი̄ნ ა̈მჩედე̄ლიხ ლა̄ტვთე. ეცრა̈რ სგა̄თშგებახ, მა̄̈ჲ ესამა კეთილ ი ბა̈რგ-ნაბა̈
Line of edition: 9
რგ ი გა̈ნზ ჩუ ხარდე̄ნახ მა̈გ ჟ'ოხხუ̄პახ ი ქა̄მენჩუ̄ნ ოხვჴი̄დახ, ეჩქანღო ქორდი
Line of edition: 10
მურყვამდ ჟ'ოხვბიდნახ ი მინ ა̈მჩედე̄ლიხ.
Line of edition: 11
ლემასგვ ჟ'ოთჰა მურყვამთეჟი̄ნ, ეჩქას დიგორხანს ქ'ოთჭო̄ნა ლაყვრა̄̈ ლერქვა̈რ,
Line of edition: 12
ჲერ შიჲა̈რჟი̄ნ ესვყედა̄ნა ი ამჟი̄ნ ქ'ო̄ხვსკინა მურყვამხა̈ნქა. ლერქვა̈რ ქ'ა̄ლბლბა̈ი
Line of edition: 13
ნე̄ლიხ ი ჩუქვა̄ნთე ლსკნანღო მამგვეშ ხა̈ყრა, _ ქა̄ხსედა, მარე მიჩეშუნღო
Line of edition: 14
მიჩა ფა̈მლის ოხვსკინა, ჟიქა̄ნ ხა̈ჲხა ი ჩვალდაგა̈რლიხ.
Line of edition: 15
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
