TITUS
Svan Chrestomathy (I: Upper Bal): Part No. 94
Text: 73
Line of edition: 16
73. მაქსიშა ლიხვტე
Line of edition: 17
ვიბია̄ნშა ლენჯა̄̈რს ჟ'ოხხვიტახ. ეჩქანღო გვიანდქა ქედუშ ალზიგე̄ლიხ ი
Line of edition: 18
ეზერ მეზგე ლმა̄̈რხ. ალჲა̈რს ლერდიდ ოთხვიახ ნიშგვეჲ გიე ი სოლთანშე̄რ სოლთანი
Line of edition: 19
გეზალ. ალ ქორს მეჩი ბაბა ხარდე̄ნახ ჩუ ლუთურე ი ზურალა̄̈რს სურუ ხოლა̄მდ
Line of edition: 20
ხა̈ჩვმუნახ. აშ ღერთია̄̈ნიდ, მეხვრი ახანახა სგვებნე ლე̄თ (ლიგვირკე ლე̄თ)
Line of edition: 21
გიე ნიშგვეჲს ა̈გით'ო̄ხვტი̄ხახ ი მე̄რმა ლადა̈ღ ესნა̈რ ლეღვჟმა̄რე მა̈გ მეხვირთ'ა̄ჩა̈დ
Line of edition: 22
ლა̈ჭმათე. ანჴა̈დ ესნა̈რ ქედუშა ბაბა ი სოლთანი გეზალს ი მინე ბეფშვს ჰაკვნა̈რთ
Line of edition: 23
ე̄'სგა ყია̄̈რ ქ'ო̄ხვხანე ი ჩვადგა̈რ ამეჩუ̄ნ. მა̈ჲ ი̄რო̄ლ მიზეზ, ლა̈კი̄ლჲა̄ლ მო̄დ
Line of edition: 24
ა̈ნსყო̄ლ ალ ქორისგა.
Line of edition: 25
ანჴა̈დ ესნა̄რ გიე̄ დი, ჟ'აჩა̈დ მეხვირთე ი ქედუშა ღვაჟა̈რ ჩვადბა̈ჟნე. ალჲა̈რს,
Line of edition: 26
მა̈ჲ ი̄რო̄ლ მიზეზ, სოლთანიშდ ი ნიშგვეჲ გვა̈რდ ათყალვი̄ნდახ ი აჩა̈დხ ლა̄ტვს
Line of edition: 27
მესტჲა̈ხა̈ნჩუ̄ნ, ჟ'ა̈მჩედხ ჭო̄ლა̈შთე ი ამეჩუ̄ნ ჩვალზიგე̄ლიხ. მასა̈რდ ხა̈დრა̄ლახ
Line of edition: 28
ნიშგვე გვა̈რშია̄̈დუ ქედუშე̄რ ღვაჟა̈რს, მარე დეშ ოხვდარახ. ქედუშე̄რ ნა̈რშავს,
Line of edition: 29
მა̈ჲ საკვრელ ლი, აშ ხათრო̄ნა მა̈გ ნე̄სგუნა გიმ-მეგემ. მასა̈რდ ხატკლებე̄ნა
Line of edition: 30
მიჩა ქორ ი ლიზგე-ლირდე ჩუ ლეცვრად. აშხვ ლადა̈ღ ლოხვჴერდახ ესნა̈რ მინ
Line of edition: 31
ლახვბა უშხვა̄რ ი ანჴა̈დხ ლენჯა̄̈რთე. ლეჟ' ა̄ჩა̈დხ ტვიბნა̈რთე ი ამეჩუ̄ნ ლა̈ქნი̄ლა̈
Line of edition: 32
ცხეკისგა ჩვა̈თპა̈ჟხ. ხაკუხ, ერე ეშხუ გარ ერვა̄̈ჲ ლა̈ხდო̄ლახ ლახვხა̈ნ მნე̄სგვინ,
Line of edition: 33
ალა ჩვადრმახ. ლეჟ'ა̄დიახ მლახთე ი ამი̄ საჴსა̈რ ა̈ნკდეხ. მა̈გ ჩვა̈მჴედე̄ლი ლახვხა̈ნ
Line of edition: 34
ი ლერმიდ და̄̈რმოშ ოხვდარახ. ჟი ლიჭვე̄ნის ხამურჯა̄ლახ, ამჟი̄ნ ესნა̈რ ხეწა̈დხ
Line of edition: 35
ლა̄̈ქვთე̄რი̄ლჩუ̄ნ მეჴედ აშხვ გარ მა̄რა. ალა ღალ ესნა̈რ გაგუ ლი ქაუშა. ქა მირ
Line of edition: 36
ლახქეხა̄̈ნ ლახვს ი ჯა გარ ალმა̄̈ზ. ესხვი̄დხ ესნა̈რ სგვებინჩუ̄ნ ალჲა̈რ ი ჩუ ლირმი
Line of edition: 37
ხაკუხ, მარე გაგუდ ესნა̈რ თხვიმ ლერმიდ მა̄დ ათნებე. ლა̈ჲშგვინ ხანჯა̈რ ი ნა̈რშავს
Line of edition: 38
ხაძგერ, მარ' ე̄ჩქად კვეტო̄ლ ლუვრე ხანჯრი̄ლა̈რ გარ ლმწვე̄ნხ ი მა̄მ გვეშ
Line of edition: 39
მოშ ხაყერ ღალ ესნა̈რ. ახჭვა̄დხ ამის ლახვბა, ჩვადბა̈რხ ი მინ ჩვა̈დი̄ტვხ. ეჩქანღო
Line of edition: 40
ჩიგარ ლმა̄̈ზხ ნიშგვეჲ ღვაჟა̈რ, ქაუშა ი სოლთანშა, მარე და̄̈ს მოშ იდრენდახ
Line of edition: 41
ესნა̈რ. აშხვჟი̄ნ ოხვლოთმა̄̈ნხ ლექვა̄̈ მლახს მაქსიშა ლეღლა̈ტიდ. ლოხვჴერდახ
Line of edition: 42
ესნა̈რ უშხვა̄რ სოლთან, გიო ქაუშა, ბაბში ი კვეტო ნიშგვეჲ, გურმაჩშა გურმაჩ,
Page of edition: 68Line of edition: 1
ჲო̄რი ღეთ აჯაღ ი აჩა̈დხ ბა̄ზი მლახთე. სგ' ე̄სჭვა̄დხ მაქსიშე̄რ ლაყვრა̄̈ლთე̄'სგა
Line of edition: 2
ი მა̈გ ჟ'ანხვიტხ ხოშა ი ხოხვრა. ეჩქანღო ქ'ა̈ნსკინა̄ლეხ ი შგედრუშ ა̈გითე ლიჴედ
Line of edition: 3
ლა̈ჲბინეხ. ლა̈ჲსგიდახ ი გიო დე̄სა ხონჴრიხ. ვა̄̈ჲ ღალ ა̈დშიდხ. ჟი დეშ ხოჭვე̄ნიხ
Line of edition: 4
ფა̄და̄̈სი მაყალშვ ი სოლთანს ლოხვბინეხ ლიმჯა̄̈ლ: "დო̄ვ ესერ გიო ლახცილვა̄̈ნ
Line of edition: 5
მიჩ ლეცლ̄რად". ალა ხა̈ტხ' ე̄სნა̈რ: "მინ მა̄რა̄̈ლ, მიჩ ესერ ლაყვრათე̄'სგა
Line of edition: 6
ოთცლრა მა̄რა̄̈ლ ი გიოს ესერ დეშ ათა̈რდაჲა?" ესნა̈რ გიოს ქორისგა ფოყ ესსიპდა,
Line of edition: 7
იმ დო̄მ იჩო, მარე ყო̄რა̈რს დე̄მჟი მოშ ხეხოლი ი სგა ხასიდ ქორთე. ა̈დკვიჰ
Line of edition: 8
ესნა̈რ ალა ბა̄ზი მლახდ ი ქ'ა̄̈დფადას. სგა̄ჩა̈დხ ესნა̈რ მა̄̈ნკვი მაქსიშე̄რ ქორთე̄'სგა,
Line of edition: 9
ლდგარუ ჟ'ა̈ნწვე̄ნეხ ესნა̈რ ი ეჩქანღო აჩა̈დხ ფა̄და̄̈სდ. გივ' ე̄სნა̈რ ნე̄სგაქა ლოხვჴერდა
Line of edition: 10
მუბვირისგა ფა̄და̄̈სს ი ქ'ა̄ნჴა̈დხ ქა̄̈მთე. ესვთიშ ფოყ, ფა̄და̄̈სს ქა̄̈ხყვა̈ლ ი
Line of edition: 11
მიჩა შუკვს აჩა̈დ. ლა̈ჲბინ' ე̄სნა̈რ შგედრუშ ლი̄ზი ი მიჩ' ა̄ფხნეგა̈რს ბოგლდჟინ
Line of edition: 12
სგვებინ ესხვი̄დ. ალჲა̈რდ მასა̈რდ ა̈დხი̄დეხ ი ლა̈ხჲადა̄ლა̈ თოფა̈რ ეჩქანღო გარ
Line of edition: 13
ოთკვარახ.
Line of edition: 14
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
