TITUS
Svan Chrestomathy (I: Upper Bal): Part No. 124

Page of edition: 87 Line of edition: 1    ლა ი̄ცნავ ი ლა̈ნშანა̈რ ესერ ლაჰოდე̄ნა ლა̈დი. მინს ესერ ბა̄ზი ლმა̈რჯვ გზა̄ვრობ
Line of edition: 2    მა̄მ ხა̄რხ ი ჰაჯუ ახკიდხ ბა̄ზ' ე̄ჩხა̄ვ ლი̄ზის".

Line of edition: 3       ალ' ე̄სნა̈რ და̈დავშე̄რ ი სოლთანშე̄რ ღვაჟა̈რდ ეშ ა̈დნბაჟეხ. დემჟ' ა̄ხკიდხ
Line of edition: 4    ესნა̈რ ჯახუს ღალ ჰაჯ ოდედო ლექვ' ა̄̈დჴერნეხ სოლთე. ანჴა̈დხ ესნა̈რ ალჲა̈რ ბა̄ზი
Line of edition: 5    ი მიქლა̈ჲშე̄რ გიერგი ქორისგა ჩვა̈თპა̈ჟხ. ამჟი̄ნ ესნა̈რ ამხა̄ვთე̄'სგა ნუაშა
Line of edition: 6    ფა̈რჯია̄ნ ანღრი. ამი̄ ლირმი ხაკუხ ესნა̈რ ნიშგუ̄რა̄̈ ღვაჟა̈რს ი ჯახუს, მარე ფა̈რჯია̄ნდ
Line of edition: 7    ესნა̈რ ჟ'ო̄ხჩვიშ ი ჯახუ ღალ ამეჩუ̄ნ ჩვადგა̈რ. მე̄რმა̄̈ლ ესნა̈რ ქ'ა̈დი̄ტვხ ამხა̈ნქა.
Line of edition: 8    აჩა̈დ დვრევ, მარე თვეფ დე̄მჟი მოშ ა̈ნტიხხ ესნა̈რ ნიშგვეჲდ. ჯახუ ღალ ესნა̈რ
Line of edition: 9    ჩვა̈დწვერხ ნიშგვეჲდ. აშხვ ლადა̈ღ ესნა̈რ ნუვაშე̄რ შამერთვს ჴანა̈რ ხაყა
Line of edition: 10    ზაქვ. ალა ნიშგვეჲდ ჟ'ა̈ნმეჴრეხ, ოთდარჯეხ ჩუ ი ალა ჩვადგა̈რხ ამეჩუ̄ნ. ეჩქანღო
Line of edition: 11    რიგბა ნა̄რა ი ნა̈ ი ნუაშა ჩ'ოლსყე̄ხვიშდ. ამ დვრევჟი̄ნ ესნა̈რ ჯახვი̄ თვეფ ხუღვეხ,
Line of edition: 12    ალა მეზგე̄მ სოლა თათაშა გუვ' ა̄დირმ, ს'გა̄დჲეხ ქორთე ი ჴულ ათდეხ.
Line of edition: 13    ჩუ ხორიხ ამჟი̄ნ ი საჴსა̈რს ოხღველიხ. ალ მეზგა სიმაქ ხარდე̄ნახ, მა̈რიამ ხაჟხე̄ნა
Line of edition: 14    ი ალ დინ' ე̄სნა̈რ მასა̈რდ ხო̄ზნა̈ნი გუვას. აშხვ ღნ ლე̄თ ესნა̈რ ხეხვ-ჭაშ მაშდმა̈რ
Line of edition: 15    უშხვა̄რ ხოყვრეხ. ანჴა̈დ ესნა̈რ გუა, ა̈ნკიდ ჟი ლქლბნე კა̄და ი ალ ხეხვ-ჭა̈შს
Line of edition: 16    თხუმა̈რ ჩ'ოთხპ̄რე. მა̈რჲამლ ესნა̈რ ლედგა̈რიდ დეშ ა̈დსერ ი ჩუ გარ ადბაჟვრე.
Line of edition: 17    ჟ'ა̈ნკიდ ალა̄, ჯახვი̄ თვეფ, ჴულ ქა დეშ ა̈დკიდ ამჟი̄ნ ლა̈ჲბინე ა̈გითე ლიჴედ.
Line of edition: 18    ცაგდრი ბოგქა ქ'აჩა̈დ ფა̄და̈სი მაყალვშ ი შგედრუშ ლა̈ჲბინე ლიჴედ. ამჟი̄ნ ესნა̈რ
Line of edition: 19    მაშგვლა̈რჩუ̄ნ ჲო̄რი სოლა̈რ ესღრიხ მესტჲათე გუვა̄̈ საჴსრი ლა̈მჴერდ. გუად
Line of edition: 20    ჩვათირ ესნა̈რ ალჲა̈რ ი ლიტუ̄ლი ლოხვბინე, მარე დეშ ღალ ათსიმნე. ალ ჲო̄რი
Line of edition: 21    მა̄რე სგ' ა̄ჩა̈დხ მესტჲათე. მესტჲა̄ლა̈რს ათხი̄დნხ სოლრე ლი̄ზი. ალჲა̈რ ჩვადგა̈რხ
Line of edition: 22    ი მინე ლდგარუ ჩვა̈დწვერხ. ალ ლდგარუ ლექვ' ა̄ნჴიდხ სოლთე ი ლაშდღვა̄ლ
Line of edition: 23    ლადა̈ღ ჯახვი̄ თვეფ გუად ალჲარე კუბვა̈რჟი̄ნ ესდე. ხეწა̈დხ ამის ნიშგვეჲ
Line of edition: 24    ღვაჟა̈რ ი ქა ლიღე̄შგა̄̈ლ ხა̈კვდახ, მარე ალა ნიშგვეჲ ჩი̄ჟა, ანტროშე̄რ მრზას,
Line of edition: 25    ოთსა̈სტკა. "ამის ესერ ლახე მინ ლა̈დი ჩუ იჩომხ, ლენჯა̄̈რ ესერ უშხვა̄რ ხეხვტენი
Line of edition: 26    ი ნომა̄ვ ჩვემინხ ალ გვეშ".

Line of edition: 27       ალ' ა̄̈დკვიჰ ესნა̈რ გუად, ეშხუ მანთიშ ჰარა̈ყ ესყედა̄ნე, ალ თვეფი შუნ ლა̄ჲე
Line of edition: 28    ი სგ' ო̄ხჴიდ ესნა̈რ ნიშგვეჲს. ნიშგვეჲს მასა̈რდ ათბაჟნხ ალა. მაჩენე ჴა̈ნ ჟი
Line of edition: 29    ლა̈ჲფიშვდხ ესნა̈რ ი გუას ქა ხასჩუქვრეხ ამნია̄̈ნიდ. ამ დვრევჟი̄ნ მესტჲას ლმა̈რდ
Line of edition: 30    ეზერ ვა̈რგ, გელა ყანსავშა. ამის ესნა̈რ ალ მა̈რიამლა̈შდ გუ ხა̄რ ლელატვდ ი გუნ
Line of edition: 31    ხემციქვილ. მა̈რიამლდ ოხვჭირე: "მიჩა თხვიმ ესერ ჰე გუ ხა̄რ, თათაშა გუვა სგა̄ვ
Line of edition: 32    ოხჴიდ მიჩეშთე̄'სგა ლედგა̈რიდ ი ეჩქას ესერ მა̄̈ჲ ხეცხე̄ნი, ჩი̄მი ნა̈ბ ესერ ხეღვე̄ნი
Line of edition: 33    მიჩაცახა̈ნ". ა̈დდ'ე̄სნა̈რ ალა გუთე გელად ი ლენჯა̄̈რთე ლითი̄ლა̄̈ლ ლა̈ჲბინე. ხაკუჩ
Line of edition: 34    ერე გუა იმვა̄ლაჟი̄ნ ჩვადრმის ი ს'გა̄დჲას მესტჲათე.

Line of edition: 35       აშხვ ლადა̈ღ უშხვა̄რ ლა̈ხნა̈ზო̄რა̄̈ნხ ესნა̈რ ლემსჲა ლექვა̄̈ნჩუ̄ნ, ლა̈ჲბინეხ უშხუდ
Line of edition: 36    ლი̄ზი, ლჴა̈ნთე̄'სგა სგ'ა̄ჩა̈დხ, ეჩქას ხაფხეჭ გელად ი გუა შიშდ ჩუქვა̄ნ ა̈ნნა̈ხ.
Line of edition: 37    გუად ხანჯა̈რ ლა̈ჲშგვინ, ხაძგერ ჩუქვა̄ნჟი̄ნ ჴადვისგა გელას ი ფაშა̈რ ქამენჩუ
Line of edition: 38    ე̄სდე. გელად ლიყუ̄ლი ლა̈ჲბინე. ა̈დბინ'ე̄სნა̈რ ჩუქვა̄ნისგა ლი̄ზი ი სგა ლა̈ხჴა̈დ̄ნ
Line of edition: 39    ფა̈ფიშე̄რთე̄'სგა ი ამეჩუ ჩვადგან. ანჴა̈დხ ესნა̈რ ფა̈ფიშა, ჟ'ანკიდხ ლდგა̈რ
Line of edition: 40    ი მინე ლექვა̄̈ნ ქუ̄რე̄ლ ჰუყვჟი̄ნ ჩვესდეხ. ა̈დკვიჰხ ესნა̈რ ალა ყანსავშე̄რემ, ლდგა̈რ
Line of edition: 41    ლეჟ' ა̄დჲეხ ი ჩვაშდიღვხ. ლოხვბინეხ ესნა̈რ გუას ლიდრა̄̈ლ, მარე დეშ ა̈ნდარეხ
Line of edition: 42    ლედგა̈რიდ. ეჩქა ხა̄̈ქვხ ფა̈ფიშე̄რს: "ედ ესერ ერვა̄ლე მუსველუ ლახდარეხ
Line of edition: 43    ლედგა̈რიდ, მა̄დ' ე̄სერი მინს ადგა̈რიხ". ფა̈ფიშერემ ესნა̈რ მინე ნიბა̈შინ შაგუშა


Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.