TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 123

Text: 100

Line of edition: 34

100. ტიტიშე̄რ ჯახვი̄ თვეფ

Line of edition: 35    ჯახუ ნიშგვეჲ ეჯგვა̈რ მეთხვჲა̈რ ლმა^̄̈რ, ერე შვა̈ნისგა ტველ და^̄̈რ ხარდე̄ნა.
Line of edition: 36    მეკვშდე კუთხვ თვეფ გარ ხაღვე̄ნა ჩიგარ ი ეჩნქა იშგან თვეფს დე̄მ ლმჲა^̄̈სგვინ.
Line of edition: 37    ალ თვეფს ლეგვმი ფინდიხ ხასგუვე̄ნა ი ჯახუ ქა დე̄მგვაშვ ხაქდუნა. ობა̈შ ნა̈თხვჲარე
Line of edition: 38    ი მყე̄ლი ი ქათალ ხადგარე̄ნა ალ თოფშვ. აშხვ ზავ ლაღა̈მს ჟა̈მ ალთენე̄ლ
Line of edition: 39    ი ეჩჟი̄ნ ლჴმაშვდ ლმა̈რდ, ერე მე̄სმე ნა^̄̈თი̄ დეშ ოთცვი̄რა. აშხვ ლადა̈ღ ესნა̈რ
Line of edition: 40    ჰა̈ნდრაშა ხოშა ი ჯახუ მლდეღ ლიხ ი ლახვთ' ა̄დჲეხ ლელდეღ. ჟ'აჩა̈დხ კალ-
Page of edition: 86 Line of edition: 1    ვა̈რთ', ე̄ჩქას ჯახუდ ხა̈ქვ ჰა̈ნდრაშე̄რ ხოშა̄მ: "მა̈დილუ ესერ ხე̄რი ი მიჩა ლიჴდა^̄̈ლდ
Line of edition: 2    თე̄ვ ლაჲე ლელდეღთე ! ჯ'ესერ ფოშდელთე ღრი ი ნო̄თავ ესერ ლაჭვდია̄ლს ჲა̈ს
Line of edition: 3    ხეწა̈დ ი მინე ლა̈მბა^̄̈შნა̈შ ა̈ნმეჴრე მა̄ლე გვეშ". ამნე̄მ ესნა̈რ დერვა მა̄მ ხა̈ქვ. ან̄გა̈ნ
Line of edition: 4    ღალ ესნა̈რ ჯახუ, ჟ'აჩა̈დ ფოშდელთე ი ლახე ეჩე დო̄ს ხეწა̈დ მმსტივს, ჩვაჩა̈დ
Line of edition: 5    ცხა̈კვზაგა̈რთეჩუ̄ნ, ამხა̈ნქა ლა̈ჲსგიდდა ირღულდთეჩუ̄ნ ი ამეჩუ̄ნ მა̄რა^̄̈ლ ესწვე̄ნე.
Line of edition: 6    ლოხვბინე ლიტუ̄ლი: "ჲა̈რ ესერ ლიხ ეჩეჩუ̄ნ მერდე!" "ჲა̈რ ესერ ი ჯა ლი
Line of edition: 7    ბა̈დი ბაშვშა". "ჲაღვ' ე̄სერ ლაღა̈მს ალ ი ალ მეზგა ა̈თსედენმა̄ ქვინ ი მა̄დე, მა̈დილუ
Line of edition: 8    ხე̄რა ი ქა̄ვ ხა^̄̈ქვ ჰე̄სამა ხასმა! "

Line of edition: 9       ლოხვბინეხ ესნა̈რ ამჟი̄ნ უშხვა̄რ ლიჭვდიე̄ლ. ალ მა̄რ' ე̄სნა̈რ ბა̈დიშა ბადი
Line of edition: 10    ლი ი ბაშვშა მა̄დე, მარე თხუმ ხავჰმი. ბა̈დიდ ხა^̄̈ქვ ესნა̈რ მიჩ' ა̄ფხნეგა̈რს: ალ'
Line of edition: 11    ე̄სერ ჯახუ ლი ტიტიშა. ამგვა̈რ მეთხვჲა̈რ ესერ შვა̈ნისგა ჩუ და̈რ ა̈რი ი ამი̄ თვეფ
Line of edition: 12    ესერ ეზერ მა̄დ ი̄რა! ჩუვ ესერ ადგა̈რხ ი ღო თვეფი მინს ხე̄რიხ ი ჟახე ქამასად ხეღვე̄ნიხ".
Line of edition: 13    ეჩქა̄ დვრევჟი̄ნ მა̄რე̄მი დაგრა ჩი̄ ჟახად ხაბჟე̄ნა ი ჩუ და^̄̈რ ლუმჰომინ.
Line of edition: 14    ანჴა̈დ ესნა̈რ, ჟაჴვრა̈ აშხალ ა̈ნნიკვ ი ამექა უფგოშვ (\\ უფგოვშ) ქ'ა̄ფვიშდ ჲო̄რი
Line of edition: 15    მა̄რე ჯახვი̄ ღვეშგიმხა̈ნ ლაცხა̈პდ ი ღო ჩუ მდგა̈რიდ. ბა̈დ' ე̄სნა̈რ ლა̄მბვა̄ლს
Line of edition: 16    ისდუნე ჯახუს ი მდგარა ესჴვისგხ. ჯახუს ხოჩა ჟეღ მირ ხარდე̄ნა ი ჩიჲა^̄̈გ სგა ხა̈ნჴრინა.
Line of edition: 17    ა̈დბა̈ჟ ესნა̈რ ალ ჟაღვემ ი ლიჰევ ლა̈ჲბინე. ამჟი̄ნ ჲარვ მა̄რე̄მ სგა^̄̈ნსკინეხ
Line of edition: 18    ჯახვი̄შთე̄სგა მკა̈ჩ თოფარშვ. ჯახუს ესნა̈რ ათხა̄დ: "დედეს მინეშ, მა̈ჲ ესერ ხაგა̈დ
Line of edition: 19    ა დაგრას, ადო მიჩ ესერ ხოჩა ლახვბა ხოსდენი ი უწვრად დე̄მის ცვირეხ". ალ
Line of edition: 20    მა̄რა^̄̈ლ ესნა̈რ თოფა̈რს აჩხა^̄̈ნკვინეხ, მარე ქა დეხდა^̄̈შ ხოშყდენიხ. ლა̈ჲკაჩ' ე̄სნა̈რ
Line of edition: 21    თვეფ ჯახუდ ი ეშხუ მმსტივ ჩვადგა̈რ. ლახა̄დ თვეფს ენასდ ლასყე̄ნას, მარე ალ
Line of edition: 22    თვეფს ლეგვმი ფინდიხ ხასგუვე̄ნა ი ისგთეჩუ̄ნ ჩუ ლზზე ხა̄რა ფინდიხ, ეჩქას
Line of edition: 23    ჩხირ სგა ლახკვეშა. თვეფ მა̄მ ხა̄დ სერ ლამარგ. ეჩქას ლა̈ჲბინე ლი̄ზი. ღვეშგიმ
Line of edition: 24    მმსტივ ახჭიმ ი თვეფს აჩხა^̄̈ნკვინე. აშხუნღო ქ'ო̄თშყა̈დ ესნა̈რ ი ფოყისგა ღალ
Line of edition: 25    ხაჴიდ ჯახუს. ამნემ მა̄მ ადჩარვ' ე̄სნა̈რ ლი̄ზი. თვეფ ლაბეჯგიდ ლა̄ჲე ი ზაგა̈რს ამხა̈ნჩუ̄ნ
Line of edition: 26    ანღრი. მმსტივ ღვეშგიმ ახჭიმ. ლახვემ ღალ ესნა̈რ გვი: "თვეფი გუღ'
Line of edition: 27    ე̄სერ ნო̄ს' ა̄ხჭიმდე̄დს ალ მმსტივ". ანჴა̈დ ესნა̈რ ი ლეშგო̄რას ლახჩიხნე ჩუქვა̄ნჟი̄ნ
Line of edition: 28    ი მიჩნე̄მ ლი̄ზი ლა̈ჲბინე კალვა̈რთეჩუ̄ნ. ალ თვეფი ლიშხვნის ქა ხეწა̈დ მმსტივ.
Line of edition: 29    ჯახუს ჰაჯ ახკიდ, თვეფ ჟ'ა̈ნკიდ ლეშგო̄რაისგა ი ა̈გით' ა̄დჲე. ჯახუ სგ' ა̄ნჴა̈დ
Line of edition: 30    ესნა̈რ ჰა̈ნდრიაშე̄რ ხოშა̄მთეჩუ̄ნ. ამეჩუ̄ნ ლქა̈ჩ ჩვადჯალშე ი ა̈გით'ა̄ნჴა̈დ ნა̈ბოზს,
Line of edition: 31    მარე თვეფი მატკლაბშვ გვი ხა̈ხპა̈ნვნა. ეჩქანღო ჩიგარ ლმა^̄̈ზ ლა̈თხვჲარე ი ობა̈ შსდ
Line of edition: 32    ლმდაგრვინ, მარე ეჯ თვეფი ნამსმიდვინ მე̄რმე ხოჩა თოფა̈რ დე̄მნა̈რ ხაბჟენა.
Line of edition: 33    ჩიგარ ლუმშგურა̄ნვინ მიჩა ხოხვრა^̄̈ლს: "შომვა^̄̈ჲ ესერ მიჩა თვეფ ცხას ა̈ნკვა̈რიხ
Line of edition: 34    ი ჯა მო̄მ არდე̄დს, ეჩქას ესერ საფლა̈ვი თხურმა^̄̈შ წამუ ათჴალეხ ი ეჩელექვა
Line of edition: 35    ჩუ̄ვ ლახტვი̄ლხ მიჩა თვეფი სგა ლიტხე". აშხვ ლადა̈ღ ესნა̈რ აჩა̈დ ჴაშერთე ლა̈თხვიართე
Line of edition: 36    ი ამე თვეთნე ნა̈თხვჲარე ხათხე̄ნა. ალა ჩ'ოთშდაბვნა ი ყვიჟე-პე̄რშვდა
Line of edition: 37    ი გვი ჟ'ოხტყაბა, ჟი ლოხვმა̈ზრა ი ჩუ ლოხვმამა, ეჩქას ჩუ ლახუ̄ჟნე̄ნა. მა^̄̈ჲ ესამა
Line of edition: 38    მიჩ ნა̈თხვჲარე ი მემპვე̄რ ჩუ ხადგარე̄ნა, მა̈გ გრკიდ ლანგენე̄ნახ ი ჩ' ოთგვანიხ.
Line of edition: 39    ნა̈ბოზს ესნა̈რ ა̈გით' ა̄ნჴიდ ნა̈თხვჲარე ი მიჩა მეყულფას ქ'ო̄ხუმბავე მიჩა ლა̈დი̄
Line of edition: 40    ი̄ცნავ. ბა̄ზ' ე̄სნა̈რ ნა̈თხვჲარე̄მი კუბდა̄რა̈რ ანნაყა̄ლეხ. მა̈გ ი მა̈გ ხოჩვმინახ ი ქა
Line of edition: 41    დე̄მჟი̄ნ მოშ ოხვჭა̄ლახ. ამ ლე̄თ ესნა̈რ და̈დავშა ხოშა^̄̈ლ ანჴა̈დხ ი ხა^̄̈ქვხ: "ოთარშ'
Line of edition: 42    ე̄სერ ხემცოქვილხ სოლა̈რს. ლექვა̄ვ აჩა̈დხ ი ეშხუ მინე აფხნეგ ჩუ̄ვ ადირმხ ი ა̈გითე̄ვ
Line of edition: 43    ანჴიდხ". ალ' ე̄სნა̈რ ზურალა^̄̈რდ ა̈დსა̈სტკეხ მასა̈რდ. ჯახუს ღალ ათხა̄რა: "ხო-

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.