TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 130

Text: 105

Line of edition: 30

105. ჯგრა^̄̈გ ი უსუსურმა̈ნ

Line of edition: 31       ეშხვი ხეხვ-ჭა̈შ ლმა^̄̈რხ, ჩვალმეჩე̄ლიხ ი გეზალ მა̄მ ხარდე̄ნახ. ღვეშგმე პილს
Line of edition: 32    ესნა̈რ ჯვიდი ლა̈კირ ადგეხ ი ამნოვშ ლა̈ხჴრა^̄̈ნხ ღე̄რბათვ: "მა̈დლია̈ნ ღე̄რბეთ!
Line of edition: 33    მიჩა ლიჴ̄რა^̄̈ლნქ' ე̄სერ მა̄მგვეშ ხოჩვმინანხ მინე ივალადა̈ღ, მა̈დილუ ხე̄რა, ნომა̄ვ
Line of edition: 34    ანხვიტ ი ეშხვი გეზალ ესერ ქა̄ვ იმჟი̄ნ ლახვე̄მ, ალ გვეში ლიჩვემ ესერ მიჩ ჩუ
Line of edition: 35    ხობიც, დიდა̈ბი ლეჴედ! ი ეჯ გეზალ ესერ მიჩა მემზირია̄ქ ხე̄რახ".
Line of edition: 36    ღე̄რთემ ესნა̈რი სგა ლა̈ჲჴ̄რვნე ალ ლიმზირ ი ალ ხეხვ-ჭა̈შს ესნა̈რ ეშხუ ჭყინტ-გეზალ
Line of edition: 37    ქა ლახვე̄მ. ალ ბეფშვ ჟ'ანპრისდეხ ი ჟახად გიორგი ათჟა̈ხხ. ამნე̄მ ჟ'ა̈ნცხე
Line of edition: 38    ი ეზერ მახეღვა̈ჟ ა̈ფხას ესნა̈რ. ეჯკა̈ლიბ მეშჲა^̄̈ლ ქა ლმა^̄̈რ, ერე ჟი და^̄̈რ მოშ
Line of edition: 39    ხა̈წნო̄ლნა, ლაშგა̈რს ჟი ხა̈წნო̄ლნა.
Page of edition: 90 Line of edition: 1    ალ გიორგის ათჟახე̄ნა ჯგრა^̄̈გ. ჯგ̄რა^̄̈გს ესნა̈რ უსურმა̈ნ ი ურჯულ მა̈გ ხა̈სისგ
Line of edition: 2    ალჲა̈რს ხეშჲა^̄̈ლ ი ქრისდია̈ნ მა̄რ'ე̄სნა̈რ ხეწვე̄ნა^̄̈ლ.

Line of edition: 3       აშხვჟი̄ნ ესნა̈რ ა̈დნაზო̄რა^̄̈ნხ ჩუ უსურმანა, ახჭვა̄დხ სგა ჯგრა^̄̈გს ი ჩვადირმხ.
Line of edition: 4    ლა̈ხჭვედდახ ესნა̈რ უშხვა̄რ: მა̈ჲ ესერ ოხვგონვახ ალ მა̄რა ი იმჟი̄ნ ა̈დღრეხ ქა,
Line of edition: 5    ერე მინე ხოლე̄მი მუჩვმად მო̄დ არდე̄დს? "ჲაღვ' ე̄სერ ლა̈კირუ ადიგხ, ეჯა ჩუ̄ვ
Line of edition: 6    ადქნთრინეხ ი ეჩხა̄ვთე̄'სგა̄ვ ადკვა̈რხ, ეჩე̄სგ' ე̄სერ ჩვა̈დშიხი".
Line of edition: 7    ალჲა̈რდ ესნა̈რ ამჟი ჩვემინხ: ჩვადქნთრინეხ ლა̈კირ ი ამხა̄ვთე̄'სგა სგ' ა̄დკვა̈რხ
Line of edition: 8    ჯგრა^̄̈გ, ანჴა̈დ ესნა̈რ დიდა̈ბი ლეჴედ, ქა ლახა̄გა̈ნ მუხვირთე, იმვა̈ჲ ხომბვრა
Line of edition: 9    ლა̈სვ, ეჩხა̄ვ. ჩვა̈რი სერ ამე̄'სგა ი ხეჴ̄რა^̄̈ლ ღე̄რბათვ.

Line of edition: 10       ლა̈კირ ჩვა̈დშიხა̄ნ, ეჩქას ა̈ნწვე̄ნეხ ი ჯგრა^̄̈გ ლჲა̈რ ესხვი̄დხ. მასა̈რდ ა̈დნბაჟეხ
Line of edition: 11    ესნა̈რ, ერე ჩვე̄სერ მა̄დ ალშიხელ ალ მა̄რე ლქნთრინა ლა̈კირისგა. ლა̈ხჭვედდახ
Line of edition: 12    უშხვა̄რ: "სერ ესერ მა̈ჲ ოხგონვახ ალ მა̄რ', ე̄რე ჩუ იმჟი̄ნ მოშ ადგარიხ,
Line of edition: 13    ადო ლირდეს ესერ დე̄მის ხაჩო ალ მა̄რე ამუნღო მინს".

Line of edition: 14       ალჲა̈რდ კირ ჩვაფიშგხ ი ამე̄სგ' ა̄შდიღვხ. ა̈ნწვე̄ნეხ სამ ლადა̈ღუნღო ი ესნა̈რ
Line of edition: 15    ამხა̈ნქაი ლჲა̈რ ანჴა̈დ ჯგრა^̄̈გ ქა. ეჩქას ესნა̈რ ანჴა̈დ უსურმანა̈რ ი ჯგერა^̄̈გ ხოშა̄მ
Line of edition: 16    ზაგა̈რთეჟი̄ნ ჟ'ადჲეხ. ამეჟი̄ნ ხოშა̄მ ბარბელდს ჟ'ათლა̈ჯხ ბგიდ ი ქ'ა̄ნგურნეხ
Line of edition: 17    ზაგა̈რხა̈ნჩუ̄ნ. მინ ღვეშგიმ ა̈ხჭა̈მხ ი ჯგრა^̄̈გი ძვერი ნა̈ქცუვა̈რს იხურჲე̄ლეხ. ანჴა̈დხ
Line of edition: 18    ჩუ. ამეჩუ̄ნ ძვერი ნა̈ქცუვა̈რ მა̈გ სგა ლა̈ხტა̈ხ ჯგრა^̄̈გს, ჯა ჩუ ლგ ი ღე̄რბათ
Line of edition: 19    ხეჴ̄რა^̄̈ლ. სერ დიდა̈ბი ლეჴედ ხოშა̄მ ღე̄რბათ ოთჟინდა მრე̄ს ი უსურმანა̈რ ქ'ა̄თყიჩ,
Line of edition: 20    ჯა ა̈ნგლეზდ ესსიპე.

Line of edition: 21       ამჟი̄ნ ესნა̈რ რა^̄̈ქვ ხოშა̄მ ღე̄რთემ: "ამის ესერ, ა, ჯგრა^̄̈გს, ხვა̈ჲ ლიზვებ ხაკუჩ
Line of edition: 22    ი სგა̄ში̄რ ქა̄ვ ოსკიდხ". ალჲა̈რდ ესნა̈რ ჩვადბნგავეხ აშხვ ლადა̈ღ ჯგრა^̄̈გ, სგა̄ში̄რ
Line of edition: 23    (სგა̄შვი̄რ) ქ'ო̄ხკიდხ ი ჯი̄ჰრა^̄̈ ნამქაჩვჟი̄ნ ჩვესდეხ. ამი̄შ ჯგრა^̄̈გდ მა̄მგვეშ ა̈ნმეჴრ'
Line of edition: 24    ე̄სნა̈რ. აშხვ ლადა̈ღ ანღრიხ ესნა̈რ ამელქვა ჯგრა^̄̈გ, ივა̈ნ ნა̈თმცემელ ი მიქა̈მ
Line of edition: 25    თა̄რინგზელ ხოლა ქვინ ლახჴანდა ი რა^̄̈ქვ: "ფუჰჰუ! მა̈ჲ ესერ ხოლა ქვინ მირ
Line of edition: 26    ჴან ამელექვა". მიჩ' ა̄ფხნეგა̈რს ათჩო̄ნხ ი ხა^̄̈ქვხ: "ალ' ე̄სერ მიჩა სგა̄შვრი
Line of edition: 27    ქვინ ლი. მინს ესერ მიჩეშდ სგა̄ში̄რ ქ'ო̄ხკი̄დახ ი ამეჟ' ე̄სვდახ". სერ ესნა̈რ დიდა̈ბი
Line of edition: 28    ლეჴედ ხოშა̄მ ღე̄რთემ საკუთარ ა̈ნგლეზდ ესსიპე მა̈ლდია̈ნ ჯგრა̄გ ი ჩი̄მი სევ
Line of edition: 29    ლახვე̄მ. ეჩქას ხა̄ქვ ჯგრა^̄̈გდ ხოშა̄მ ღე̄რბათ: ჲაღვ' ე̄სერ აშხვ გვაშვ ხაბიც ი ალ
Line of edition: 30    გვეში სევ ესერ ქა̄ვ ლახვე̄მ". "მა̈ჲ ესერ ლი, ქა̄ვ ხა̈ქვ. "მა̈ჲ ესერ ი შომვა^̄̈ჲ ესერ
Line of edition: 31    მიჩ ამსვა̄ლდ გვიწყილჲა̈ნჟი̄ნ მიჩ ქა ლა̈ხჴ̄რი ი ლიმშედა^̄̈ლს ხაშგვმინნე, ეჩქას
Line of edition: 32    ესერ ეჩი̄ ლიმშედა̄ლე ჰაჯუ ლახვე̄მ".

Line of edition: 33       ამი̄ ჰაჯ ესნა̈რ ქა ლახვე̄მ ხოშა̄მ ღე̄რთემ. სერ ეჩქანღო როქვ ხუღვე ჯგრა^̄̈გს
Line of edition: 34    ამსვა̄ლდა̈ ლიმშედა̄ლე ჴამშა ხოშა̄მ ღე̄რბათვხა̈ნქა.

Line of edition: 35          ლენჯა^̄̈რ

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.