TITUS
Svan Chrestomathy (I: Upper Bal): Part No. 131

Text: 106 

Line of edition: 36

106. ჯგრა̄̈გი ჟეღა̈რ


Line of edition: 37       ჯვინალდ თხე̄რა̄̈ლ მა̄მ ლმა̈რდხ. თხე̄რა̄̈ლ ჯგრა̄̈გი ჟეღა̈რხა̈ნქა ალფიშრე̄ლიხ.
Line of edition: 38    ალ' ა̄მჟი̄ნ ლმა̄̈რ (მ' ა̄მჟი̄ნ მასმა ხოშა̄ლე ნა̄მბავ ი მა̈ჲ მიხალ, ტკიც ლია
Line of edition: 39    ბა̈ქ. ხოშა̄̈ლს ხოშა̄ლე ნა̄მბვა̄ლ ხასმახ ი მი̄ჲ ხოშა̄ლე ნა̄̈მბვა̄ლს გარ ჯი̄მბვ', ა̄დო
Line of edition: 40    მი დე̄მგვაშ მოშ ხვა̈ქმე. ლიქმე მა̄დეჲ ალაჲ ვედნილდ გარ მაშყიდ).
Line of edition: 41    სემი ლახვბა ლმა̄̈რხ. მაჰვრე̄ნე მუხვბე ჯგრა̄̈გ ლმა̄̈რ. ეჯა მა̄̈ნკვი ამსვა̄ლდ
Line of edition: 42    ლმა̄̈რ ი ძღდ ლჴმა̈შ ი ლამარგ ამსვა̄ლდ ლმა̄̈რნე̄ლი. ალ ლახვბა ჩვალ̄თე̄ლიხ
Page of edition: 91 Line of edition: 1    ი ჯგრა̄̈გს მა̄მგვეშ ხოკვდუნა ნამხუბი. ძღდ ლჴმა̈შ ერ ლმა̄̈რ, ამღა დიდა̈ბი
Line of edition: 2    ლეჴედ ხოშა̄მ ღე̄რბათ ი ქრისდე მაცხვა̄̈რს გუნ ხალტე̄ნახ ი ვეშგიმპილს მინეშთ'
Line of edition: 3    ო̄თჴერნახ მინე გა̈ნხა̈ნ მეგნად ი ამსვა̄ლდა̈ მემშედა̄ლდ ი გა̈ნხა̈ნ მეგნად თმი ლად
Line of edition: 4    ა̈ღ, შომვა̄̈ჲ მიჩ ჲა̈რ ლახსე̄მწა̄̈ლი.

Line of edition: 5       ჯგრა̄̈გ ერ ქ'ა̄ხე̄თე̄ნა მიჩა ლახვბას ი ღერთა̄რთ' ე̄ლმა̄̈ზ, ეჩქას მიჩა ჟეღ ვეშგიმ
Line of edition: 6    ათჭემა. ქა დე̄მ ღალ მრე̄ს ხეყვლენდა მიჩა ფუსდს. ეჩქას ჯგრა̄̈გს ხო̄ქვა,
Line of edition: 7    დიდა̈ბი ლეჴედს: "ჰე̄, საბრალ ყურშა̈ჲ! მიჩ ესერ დალ მა̄მ ხაყა მიჩა მენჴრინდ ი
Line of edition: 8    ჩუ ლესედ ესერ ღალ ხა̄რ, მარე ამუნღო̄ნ ესერ მიჩა მა̄რე̄მი ქვინლმგენე̄მი მლჩე̄ვ
Line of edition: 9    ლიხ ჯა-ჲ მიჩა ნაბერწყ". ეჩქანღო ჟეღ თხე̄რად ელსიპე̄ლი ი ჩვალფიშრელი.
Line of edition: 10    ჯვინალდ მოლჯგრა̄̈გი ქვილმგენა დე̄მ ხა̈ჩვმინა თხე̄რე დე̄ჲ ლემყა̈ლვ ლმა̄̈რლი,
Line of edition: 11    ჰა̄ვე თხე̄რა მავინ მა ხოყრა̄̈ნ მოლჯგრა̄̈გი კუმა̈შდ ი მა̈ნცინდ.
Line of edition: 12    მოლჯგრა̄̈გი ჭათად ეჯზუმ ხაყვლი̄ნნა ჩი̄, ერე ლახე ქვითრა̈რ მოლჯგრა̄̈გი
Line of edition: 13    კუმა̈შს ლმქვითინხ უმბილდ, ჩუ ლმცხირვინხ, ერე ალ ქვილმგენ' ე̄სერ მოლჯგ
Line of edition: 14    რა̄̈გიშ ლი, შიშდ ჩუ ლუმფიშვდინხ ი უფგოვშ ეჩავ ლმტიხვინხ, ე, იმვა̄̈ჲხა̈ნ
Line of edition: 15    ქა ლმჴიდვინხ. მარ' ა̄თხე დე̄ჲ ჯგრა̄̈გ ჲა̈ს ხა̄რ ი დე̄ჲ იშგენ ღერთა̈რ ჲა̈ს მა ხანწა̈მ.
Line of edition: 16    ეჯღა დე̄მის აზა̄რეხ ათხე თხე̄რა̄̈ლ მოლჯგრა̄̈გი კუმა̈შს ი მა̈ნცინს, ადო ჯვინალდ
Line of edition: 17    ჰა̈დურდ დე̄მგვაშ ხა̈ჩვმინახ.

Line of edition: 18          ლენჯა̄̈რ




Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.