TITUS
Svan Chrestomathy (I: Upper Bal): Part No. 141
Text: 116
Line of edition: 31
116. მმჟა̄̈ლ ვა̈რგი დაგრობ
Line of edition: 32
გუნ დო̄სგ, ჯვინალდ მლახ-მჟა̄ლს ხაფსვნე̄ნა მჟა̄ლვა̈ ვა̈რგ. ეჯჲარე გვა̈რიშ
Line of edition: 33
ათხე დარ ა̈რი ი მა̄̈დო გვა̈რ ხა̄დხ, ალა̄ჲ და̈ს ხოხალ ათხე.
Line of edition: 34
ალ ვა̈რგს მა̈გ ჩუ ლბგერე ხა̄რა მლახ-მჟა̄ლისგა. სურუ ვიდჲე̄რდ ლმა̈რდე̄ლი.
Line of edition: 35
ტველდ ჟი და̄̈ს ლმკიდვინ ი მასა̈რდ ლმჭი̄რვინ მლახ-მჟა̄ლვა გლეხა̈რს
Line of edition: 36
(\\ ხა̈ლხს). ხოჩა სი̄მაქ მა̈გ მიჩ ხა̈კვდა ლელატდ ი ესვა̄̈იშდ გვი ხა̄რა, ვარს და̄̈რმოშ
Line of edition: 37
ხაყლუნა. ეჩნქა ხოჩა ჴა̈ნ ი ფირვ ესვა̄̈ჲ ხარდე̄ნა, ედ ას ცვიდდ ხა̈ბშო̄ლნა
Line of edition: 38
ი მა̄დეი უყე̄ნა ქვინლმგენა ხაცა̄დუნა. ობა̈შინ ჟი ხასგვრო̄ლნა ჰილვს, ლმბინვინ
Line of edition: 39
ლი̄ზის ლექვა̄̈ სოფლა̈რთე. ჯა ჟა̄ბეშ ლმზიგ ი ეჩხა̈ნ ლექვა ხა̈ჭმა̈ნვნა. მეზგახა̈ნ
Line of edition: 40
ქა ზურალა̈რს ხაკუხ, ერე ბარჯა̈რჟი̄ნ ჯარა̈რშვ თა̈შმჯა̈ბ ხა̈გნე̄ნხ, ალჲა̈რს ქა ხადო̄ლნა
Line of edition: 41
ალ ვა̈რგ, ჰილვხა̈ნჩუ̄ნ ჩუ ლიქეხს დე̄მ ლმშგა̈დვინ, ეჩხა̈ნქა ხა̈ჰწვა̈ნნა ქა
Page of edition: 97Line of edition: 1
ჯა̈რს ი ყო̄შშვ ჟი ლუმწვა̄̈ნვინ. ლახე ხოლა̄მდ მსყე ხაბჟე̄ნა თა̈შმჯა̈ბ, ეჩქას ჯა̈
Line of edition: 2
რს ჩუ ხაკვრუნა ბარჯხა̈ნჩუ̄ნ ი ჩუ ლმცლ̄რვინ. ამჟი̄ნ ლექვა ხაჭმა̈ნვნა ლექვა̄̈ მლახთე.
Line of edition: 3
ეჩხა̈ნ ლექვა-ლექვა ლმჴა̈დვინ კახრ ზაგარვ. მესტიას ჩუ ლმს̄ნჯვინ,
Line of edition: 4
ეჩქანღო ჟი ხაჭო̄ნნა ი ა̈გითე ლმა̄̈ზ. ამის ესნა̈რ მა̈გ ჟ'ახჟანდა, მარე ქა და̄̈რ იმის
Line of edition: 5
მოშ ხობე̄და̈ვი. აშხვ ლადა̈ღ ესნა̈რ ჟორჟლა̄ნა̈რდ უშხვა̄რ ლახვა̈ზრეხ ალ ვა̈რგი
Line of edition: 6
ლიღლა̈ტი. ალ ვა̈რგ აშხვჟი̄ნ აჯაღ ანჴა̈დ ესნა̈რ თა̈შმჯბი ლაწვა̄̈ნუშ ლექვა. ეჩქას
Line of edition: 7
ესხვი̄დხ ჟორჟლა̄ნშა ხოშა̄̈ლ ი ჩვა̈ტსეხ (\\ ჩვა̈წსეხ) არცხე̄ლთე. ამეჩუ̄ნ ესნა̈რ
Line of edition: 8
სგ' ო̄თჟოღხ ნესტანშე̄რ მა̈ჟი̄ბთე̄'სგა ი გუნ ხინ აჩვმინხ. ბა̄ზი ალ ვა̈რგს ესნა̈რ
Line of edition: 9
რა̈ნგს ი ნათხუმ ჰარა̈ყს ხოცა̄დუნეხ ი გუნ ჩვადშდმეხ, ეჩქანღვ' ა̄̈ხჭვა̄დხ სგა ი
Line of edition: 10
ჩვადგა̈რხ. ამჟი̄ნ ა̈დღირხ ქა ალ ვა̈რგ.
Line of edition: 11
მესტია
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
