TITUS
Svan Chrestomathy (I: Upper Bal): Part No. 140
Text: 115
Line of edition: 1
115.მოხელა̄̈ ლითში სოფელისგა
Line of edition: 2
ჯვინალდ სოფლა̈რისგა მოხელა მო̄შ შვიმჟი̄ნ ითშო̄ლდახ ი არდახ ეჩქად-ეჩქად
Line of edition: 3
ე, ოდე სოფელ მახა დო იცა̄̈დდა, ლახე ჯვინელ მოხელა დოშ ხემურჯო̄ლდახ
Line of edition: 4
ლა̈ჲდ ხოჩა.
Line of edition: 5
ლისგვრე̄ ლადა̈ღ სოფელ თვით მეზგახა̈ნქა ჩუ იყვბა̄ლ. ლაყვბად ჲედ სანყვირს
Line of edition: 6
აშვმახ, მა̄დეი ჩვაზნგლა̈გდახ. ლაყვბალა̈ ზანგლა̈გ ქა ხოთრი̄ნდახ ი ეჩი̄
Line of edition: 7
ჰერს მა̈გ გუდ ჴედენდა. ჩუ ლუყვბანღო მა̄̈ნკვი მოხელა̄̈ მთშის ითიშდა სოფელ.
Line of edition: 8
ალჲა̈რ ქახიქა ღრდახ ეჩჟი̄ნ, ერე ჟი დო̄ს ოჰუნრე̄ნს მინე ლი̄მბვა̄̈ლ. ალ მთშა
Line of edition: 9
ქა ითიშდახ მოხელას ჩიქე მამასახლიშს, ღო სუდია̄̈ლს ი ეჩქანღო პოპოშნიკა̈რს,
Line of edition: 10
ამნქა ითიშდახ აჯაღ ხერსტავა̈რს. ამის ლაგას ხა̈გნახ, ეჩქას ქა ჴედენდახ სოფელთექა
Line of edition: 11
ი ქ'ა̄უ̄შხახ, ჲერვა̄̈ჲ ა̈ნთიშა̄̈ნხ. ჲერხი ლთიშს გუნ ხამჭირდახ ამხავთე̄'სგა
Line of edition: 12
ლი̄ზი, მარე სოფელ ჰაჯს დე̄მის ხაკა̈დდა ი ჩუ ლეჩვმე ხა̄დხ.
Line of edition: 13
ობა̈შინ მოხელათე̄'სგა ი ხერსტა̈ვდ ეჯკა̈ლიბა̈რსი ითიშდახ ე, ჲერვა̄̈ჲ სოფელისგა
Line of edition: 14
მაშე̄ნე კერპ ლა̈სვ ი ნა̄ქვა̈ უჩვმინა, "ღვ'ე̄სერ ჟ'ა̄ნკვიჰე, მაგვა̈რუ გა̈მა̈შ
Line of edition: 15
ხა̄̈ც მიჩ ლახე კერპდ ჲა̈რ ხეგნო̄ლნი სოფელისგა".
Line of edition: 16
ლთიშ მა̄რა̄̈ლს სოფელ ლაჴვა̈მთე ა̈ჲა̄̈სგდა. ეჩხა̈ნქა ხა̈ტს ქ'ა̄̈სგვჯინა. მგრცა̈მი
Line of edition: 17
სგვებინხა̈ნ ხეგნოლდა ლთიშს ი ქა ხოგრცა̈მდა. ჩვამბა̈ნდა ამჟი̄ნ, ერე იმვა̄̈ჲჟი
Line of edition: 18
მინე ლირდე̄-სერდე ხა̄რხ, ამჟი̄ნ სოფლი სერდე მო̄დ ხა̄̈ცს, იმჟი̄ნ თხუმთე
Line of edition: 19
ი ქორთე ხოჩა ხაკუხ, ამჟი̄ნ სოფლი ხოჩა̄მ მო̄დ ხესკო̄რა̄ლდე̄დხ. გვაშვ ლასყე̄ნაჟი̄ნ
Line of edition: 20
წა̈მ ი მეჰერ, ამახვ ი მკეთ მუგუდ მო̄დ ესყედა̄ნახ, სოფელს ხოლა მახალ ჰე̄სა
Line of edition: 21
ლახჴმრახ, ღე̄რბათვდ ხოხვრა ხოშგურდე̄დხ ი ხაყვლი̄ნდე̄დხ ი მარად ხოშა,
Line of edition: 22
ალა ჰე̄სა ჩვემინეხ, ჩიგარ მეწვინ სამრთა̈ლს დო̄მ იჟღვა̄ნე̄დხ მა̄რათექა ი სოფელთექა,
Line of edition: 23
კუმა̈შდ ი ჩაფლდ ჰე̄სა ჩ'ოთღორვახ.
Line of edition: 24
ლახე ამჟი̄ნ ქ'ა̄დჲახ ალ გარცა̈მ, ეჩქას ჩვა̈მზირდახ ი ლახე მო̄დე, ეჩქას ხოლა̄მ
Line of edition: 25
გვა̈რიშჟი̄ნ ჩვაჭთუნახ. ქა ნაგრცამუნღო მოხელა გარცა̈მს ხა̈ტხახ, ერე მინს
Line of edition: 26
ჩუ მა̄̈ჲ ხეხლიხ ი ლა̈თჲა̄ლს ი ღვენი ბედს მა̄̈ჲ ხე̄რიხ, თხვიმ ჩვე̄ს' ა̄დზა̄რახ სოფლი
Line of edition: 27
ბედჟი̄ნ, ტკიცჟი̄ნ მო̄დ არდე̄დხ, სოფლი ხოჩა̄მ გარ დო̄მ ხეშდა̈ბხ.
Line of edition: 28
ალ გარცმი ნა̈ტიხუნღო მოხელაჲ ჩვანბა̈ნდახ სოფელს, ერე "მინე ლი̄ქვს ჩუ
Line of edition: 29
დო̄მ იჩომდე̄დხ". სერ ეჩუნღო ჩუ ფხეჟენდახ.
Line of edition: 30
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
