TITUS
Svan Chrestomathy (I: Upper Bal): Part No. 172
Page of edition: 119Line of edition: 1
რა̈რს აშხვ ა̈გითე̄სგ' ა̄ხურჲე̄ლეხ მურგვალდ ი ნე̄სგაისგა ჰა̈რის ხა̈ცვრეხ. ალ ლუნჩვრა̈ხა̈ნქა
Line of edition: 2
მა̄რე ჟი იხვნი მაჭვალჲა̄ქს ი იბნე ლიგემს. ოდე მა̄რე ხეჰა̄ლ', ე̄ჩქად
Line of edition: 3
შიჲარშვ ჲგემ, ეჩქანღო როკვს აჲე̄სგი ი ეჩნოვშ ჲგემ. ამის დეშ ხოჰე̄სგ', ე̄ჩქა
Line of edition: 4
ლამჭვალა̄̈რს ა̈ჲე̄სგი ი ჟი ხონსკრე ჟიბა̄ვ მაჭვალს აშგარ, მარე შდას ქამავ ხა̈ჩო
Line of edition: 5
ლუნჩვერს, ამჟი̄ნ ლასკრუშ ქ'ა̄ზგრ', ე̄ჩქას ჟიქა̄ნ ფაყვს ხაგემ. ამჟი̄ნ ლგე მაჭვალ
Line of edition: 6
ხოჩა ლესგდი ი კ̄ლთხი ლი.
Line of edition: 7
ათხენღო მეზგე მღვი ლიჴდეს იბნე კალვთე. ლალჩა ჩი̄შა̄ლ ხო̄გ ი ეჩხა̄ვთე̄'სგა
Line of edition: 8
დე̄სგიხ.
Line of edition: 9
ამჟი ლიკლა̈ვჲე̄ლი იბნი. ნაბოზს ზურალა̄̈რ ლანგვარშვ კალვს ქ'ა̄ჯე̄ლვეხ.
Line of edition: 10
მე̄რმა ლადა̈ღ, ჰამს, ქა იშდეხ მღა̈ვს კალვისგა ი მიჟ ჟი იჴმა̄შ', ე̄ჩქას ლიკლა̈ვის
Line of edition: 11
იბნეხ. ლაკლავდ კა̈ვირ ხუღვეხ. კა̈ვირს ჩუქვა̄ნ მეგჭა ბაჩრე შდქა̈რ ხოსგურ ი
Line of edition: 12
თხუმხა̈ნ ჩვეჲნრა̄̈ ნაკვშუვარს ი ჲედ ბერჟა̈შს ხაშკა̄̈დიხ მღვი მუჭკვრად. შდქა̈რ
Line of edition: 13
ვეჴს ჩვამურსვი̄ნეხ. კა̈ვირს თა̈კვ ხა̈ბ კა̈ვა̈ ლა̈თხპინად. კა̈ვ ზექიშ ლი ი უღვას
Line of edition: 14
ხალჯა. ჴანა̈რს მა̄̈ნკვიქა ზერდა̈რს ხოდე̄სგიხ პილა̈რქა, ეჯღ' ე̄რე მღვი ლაზობ
Line of edition: 15
მო̄დ ხა̄̈ცხ. ჴანა̈რს ეშხუ სგვებინ ხოჟვეღ, ეშხუ კა̈ვირჟი̄ნ ხასგურ ი ჲედ ჟი ხა̄გ ხოშა̄მ
Line of edition: 16
ლაღა̈ლდ, აშხვ ტოტისგა კვა̈დალ ხუღვე ი მე̄რმახა̈ნ _ ლა̈ხი̄რ. ლა̄̈ხი̄რ ეჯღა
Line of edition: 17
ხუღვ', ე̄რე ჴანრე კოლ მღა̈ვთეჩუ̄ნ ნომ' ა̄ფუშდეს. ჴანა̈რს ლახე ხასე̄ნიხ, ეჩქას
Line of edition: 18
ჩვა̈გნეხ, ეჯღ' ე̄რე ნასა̄̈ნვ აშხვ ადგილჩუ̄ნ გარ ადჟირი მღა̈ვს. ამჟი̄ნ აკლავიხ,
Line of edition: 19
ოდე ლიშდბენი̄ დო ჴედნი. ეჩქას ჴანა̈რს ქა ხოფშგეხ ი ლამნჩა̈ლთე ფიშვდეხ.
Line of edition: 20
მღა̈ვს როკა̈რშვ ჟ'აშდბენიხ ი ეჩქანღო ქა ხომჟუნეხ ეზერ ხა̈ნს. ეჩქანღო ჟ'ი̄დ
Line of edition: 21
ხა̈გნეხ ჴანა̈რს ი აკლავიხ. ამჟი̄ნ სუმინ ჟ'ი̄დ ხოშდბენიხ. ღვეშგმეპილს ლშდიქვშ
Line of edition: 22
ხოშდბენიხ ი სერ კალვ ჩუ ლკლავე ლი. ჴანა̈რს ფოყა̈რქა ვეჴს ხა̈შდეხ ი ტვეტს
Line of edition: 23
ხა̈ჭმინეხ. "მაფაშს ესერ ხოშდე" ი ქა ფიშდვეხ ლაჩა̈ხვთე. კა̈ვირს ქა ხა̈ჭდეხ ჭვა̈დ თე
Line of edition: 24
ი ლკლავა მღა̈ვს აშხვ ა̈დგილთე ლაქხი̄რარშვ ჟ'აქხრეხ. მქხრას ზურა
Line of edition: 25
ლა̈რ ესჭიმხ ვეშგიმ ლანგვარშვ ი აჯე̄ლვეხ, ერე ითქ ჩუ ნომ' ა̄სეს კალვისგა ი ნაქხ̄რათე̄სგა
Line of edition: 26
ადჯე̄ლვახ.
Line of edition: 27
ჟი ნამოჭმუნღო იბნეხ ლიბა̄ბეს. ბიქვ ხედვა̄̈ჲხა̈ნ მო̄მ'ა̄ნღრი, ეჯ ფოყხა̈ნ ხოშა̄მ
Line of edition: 28
ჯო̄დი ჭერს დე̄სგიხ ითქიშ ი ვეჴი ლა̈ყვლად. ლაბა̄ბად ფიწლა̈რ ხუღვეხ. ჩუ
Line of edition: 29
იბა̄̈ბი, ეჩქას ითქი მნწირ გარ სედნი ი ფიწალ ეჯას დეშ იკედ, ამღა ლამშვნა̄̈ ლა̄̈
Line of edition: 30
ხი̄რს იკედხ ი ეშხვ'ე̄ჩნოვშ ამშვნე ითქვს, ზურა̄ლ ჟიბა̄ვ ნა̈კიდვ სუგვა̈რს ლანგავშ
Line of edition: 31
ქა ხა̈თში ი ამჟი̄ნ სერ ითქ ჩუ იმშვნი. ეჩქანღო ეშხუ ცხრილს იკედ ი ქახირქა ჩუ
Line of edition: 32
იგნი, მე̄რმე კარვოშ ითქს ხოშდე ეჩხა̄ვთე̄სგა ი ამჟი̄ნ ითქს ჟ'აცხრლიხ. ეჩქანღო
Line of edition: 33
შედარშვ ჩუ ჲგემხ სერ. ამჟი̄ნ ლა̈დი̄ ლიკლა̈ვი ქა ლზგრე ლი.
Line of edition: 34
მე̄რმა ლადა̈ღ ჟ'ი̄შყვდიხ ითქს ი ლა̈ლფრაჟი̄ნ ჩვაფრეხ, ეჩქანღო ჟ'ი̄რსგვეხ
Line of edition: 35
ი კიბდვენთე̄'სგა სგა დე̄სგიხ. ამჟი̄ნ აკლა̈ვიხ მღა̈ვს.
Line of edition: 36
ფა̈ტვარე ლითჲე̄ლ ჴედნ'ე̄ჩქას ფა̈ტვს ჟი ითიხ ი შიშდ ჩვამნთა̈ჟიხ. მანთა̈ჟს
Line of edition: 37
ტოტვშ ხოფხჟეხ კალვისგა, შდა̄რა̈რს კიბა̄ვ ხა̈ჩოხ ეჩჟი̄ნ ი იბნეხ ლიმნთა̈ჟის.
Line of edition: 38
კა̈ვირჟი და̄̈რ ხეგნი, ეჯღ'ე̄რე კა̈ვირ ჟ'ახუ̄პე. ხათერხ ეჩქა ტოტშვ ჟ'ა̈სპეხ ი იბნეხდ
Line of edition: 39
ლიმნთა̈ჟის. ამჟი̄ნ ჩვამნთა̈ჟიხ ი ლახე ჩუ̄დ სიდ ლემნთა̈ჟი, ეჯას ჩ'უ̄დ
Line of edition: 40
ამნთა̈ჟიხ, მა̄დეი ჟ'აქხრეხ ფა̈ტვს, ჟ'აჯე̄ლვეხ ი ლა̄̈ხი̄რშვ ჟ'ამშვნეხ. ღო ჟი იშყვდიხ
Line of edition: 41
ი ჩვაფრეხ. ფა̈ტვს შიშდ ხაკუჩ ლიმნთა̈ჟი ი ლიშყვდ'ა̄დო ჩუ იჲთუნი ი ეჩქას
Line of edition: 42
ჩუ იდშა̈ვი. ამჟი̄ნ ლი ლიკლა̈ვჲე̄ლ. ღვეშგმე პილს სუგვა̈რს აკლა̈ვიხ. ვეჴს ნაკლაუნღო
Line of edition: 43
ჩიგარ დარბაზთ'ა̄იხ მარა̄კარშვ ი ჭემცახა̈ნ გა̈ნხა̈ნჩუ̄ნ აშხვ ა̈დგილჟი̄ნ.
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
