TITUS
Svan Chrestomathy (I: Upper Bal): Part No. 177
Text: 143
Line of edition: 4
143. ლიკლა̈ვი
Line of edition: 5
შომვა̄̈ჲ მეზგ' ა̄კლა̈ვი, ეჩქას ზურალა̄̈რ ჰამს დო̄სგ კალვს ქ'ა̄ჯე̄ლვა̄̈ლიხ გუნ
Line of edition: 6
წყილჲანდ. მიჟ ჟი ხეწდენი, ეჩქას ქა იშდეხ კალვისგა ლეკლა̈ვი მღა̈ვს. მიჟ ქა
Line of edition: 7
ხა̈ტბიდე ი მღა̈ვ ჩუ იქნთრინი, ეჩქას ჴანა̈რს ხაბემხ კა̈ვირს. ალ კა̈ვირს ჩუქვა̄ნ
Line of edition: 8
სუნწუფ ბაჩა̈რ (კა̈ჭი ჩი̄რხუვა̈რ) ხოსგურხ, ეჯღ'ე̄რე ალ ბაჩა̈რ ხონგჭვა ლიხ ი
Line of edition: 9
ხოშა̄მ კვიშეხ მღა̈ვს. ლაკლა̈ვჟი ჴანა̈რს ზერდა̈რ ხო̄ზხ უშკვჟი̄ნ, ეჯღ'ე̄რე მღვი
Line of edition: 10
ლაზობ მა̄მა ხა̄რხ. ლაკლა̈ვჟი̄ნ ეშხუ ჴანა̈რს ხოჟვეღ ი მე̄რმე კა̈ვირჟი̄ნ ხა̄გ.
Line of edition: 11
კა̈ვირჟი̄ნ მეგნა შნისგა ლა̈ხი̄რ ხუღვე, მე̄რმახა̈ნ კვა̈დალ ლაზხა̈ლდ. ლახე
Line of edition: 12
ჴა̈ნ სგე̄რ, ეჩქას კა̈ვირჟი მეგნე ლა̄̈ხი̄რს ხოხლი̄ნე, ჴა̈ნ ქა სგე̄რ, ეჩქას ჰა̈ნწს ქ'ა̄ კვა̄ნე
Line of edition: 13
მე̄რმა ა̈დგილთე. ალას ეჯღა იჩვ', ე̄რე ჰა̈ნწ ნომ' ა̄̈თნა̈ჩდე̄ნს მღა̈ვს, ადო სგა
Line of edition: 14
ლახ ხენჩდი, ეჩქას ლეკლა̈ვი ლიხუ̄პა̄̈ლის იბნე ი მეტ ჭირ ხეფსი.
Line of edition: 15
ამჟი̄ნ აკლა̈ვიხ. ლახე ხათერხ, ეჩქას ჴანა̈რს ქა ხოფშგეხ ი მანჩალთ' ა̄̈იხ. სგა
Line of edition: 16
ხეგნიხ ფიწლარშვ ი ორთითარშვ მღა̈ვს ი ჟ'აშდბენიხ, ჟიბავიშს ჩუბავ ხა̈ჩოხ.
Line of edition: 17
ამის ქ'ა̄სრულეხ, ეჩქას აშხვ დვრევდ ქა ხომჟუნეხ მღა̈ვს ი ეჩქანღო ჟი̄დ ხეგნიხ
Line of edition: 18
ლაკლა̈ვს. ამჟი̄ნ ო̄შთხვინ ი ოხვიშდინ აშდბენიხ კალვს. ღვეშგმეპილს ლშდიქშვ
Line of edition: 19
აშდბენიხ ი სერ კალვ ჩუ ლკლავე ლი. ქა ხოფშგეხ ჴანა̈რს. ფოყა̈რჟი̄ნ ვეჴს
Line of edition: 20
ხა̈შდეხ, ტოტა̈რს ხა̈ჭმინეხ, ერე მაფა̈შ ოთში̄დხ ი ქა ფიშვდეხ ლაჩა̈ხვთე. ეჩქანღო
Line of edition: 21
ხეგნიხ ლაქხი̄რარშვ ი აშხვ ა̈დგილთე სგ'ა̄ქხ̄რეხ. ზურალა̄̈რ ვეშგიმ ლანგავშვ
Line of edition: 22
ესჭიმხ ი ამჟი̄ნ ჟ'ახურჲე̄ლეხ. ბიქვ იმვა̄̈ჲხა̈ნ მო̄მ ლი, ეჩხა̈ნ ლაყვლას დე̄სგიხ ი
Line of edition: 23
ლიბა̄ბეს იბნეხ. ჩუ იბა̄̈ბი ნაკლავ, ეჩქას ითქს აჯაღდ ამშვნეხ ლა̄̈ხი̄რშვ, ზურალა̄̈რ
Line of edition: 24
ლამშვნაჟი̄ნ სუგვა̈რს ხა̈თშიხ ითქს ლანგვარშვ. ითქ ჩუ იმშვნ' ე̄ჩქას ჟი იცხრლიხ
Line of edition: 25
აშხვ ა̈დგილჟინ. ეჩქანღო ჟ'ა̈რსგვეხ, ჟი იკედხ კვიდო̄ლარშვ ი ესღვახ
Line of edition: 26
შედა̈რთე. მე̄რმა ლადა̈ღ, ლახე ხოჩა და̈რ ლი, ეჩქას ითქს ჟი იშყვდიხ ი ჟ'აფრეხ.
Line of edition: 27
მა̄̈ნკვი ლაკლა̈ვჟი̄ნ ზურალა̄̈რ ქა̈მ კასგვილას გემხ ი ხოჩა̄მ მაჴა̈დხა̈ნ ჟი იდბა̈შიხ.
Line of edition: 28
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
