TITUS
Svan Chrestomathy (I: Upper Bal): Part No. 191
Text: 155
Line of edition: 24
155. სა̈ვა̈ ლიწრხე
Line of edition: 25
სა̈ვი (\\ სა̈ვა̈) ლისყე̄ნე ლახე ჲა̈ს ხაკუჩ, ეჩქას მა̄რე ქა ღრი ცხეკთე ი ეჩე
Line of edition: 26
ჟი იჭი̄რხი ოშვა̄̈ჲდ ხაკუჩ, ეჩშელდ სა̈ვა̈ ჭიშხს. ამნა̈რდ მაჩე̄ნე ღუმრა̈ ჭშხა̈რ ლიხ,
Line of edition: 27
ეჯღ' ე̄რე მაშე̄ნა̄მ გეჭნიხ, ალჲა̈რ ლახე დო̄სა წვახ, ეჩქას ჟაჴვრა̈შ ი ცხვიმრა̄̈
Line of edition: 28
ჭშხა̈რს იკდ̄რეხ, მარე ეჯჲა̈რ ხონგვმაჲ ლიხ ი ხოხვრა̄მი გეჭნიხ. ალ ჭშხა̈რს
Line of edition: 29
ა̈გითე ჴიდე მა̄რე, ეჯ ლადა̈ღ თხუმა̈რს ქა ხოსყა̄̈ლი ხოჩა̄მდ ი ეჩქანღო მახა ტებდი
Line of edition: 30
ჰა̈ნწს ხაცვმენი, ეჯღ' ე̄რე ჭშხა̈რ ჩუ იფრიხ, ეჩქას თხუმა̄̈რ სგვებინხა̈ნისგა ჩუ
Line of edition: 31
ნომ' ა̄̈დცხირა̄ლე̄ნხ, ადო ეჩქას ჭიშხ ჩუ ცელნი ი მა̄მ ხაყა. ამნქ' ა̄ჯაღ უღვა̄̈
Line of edition: 32
ლასვა̈მს ჩუ ხოფტეხ ი ამჟი̄ნ ჟი ხა̈ჭდეხ, თხუმა̈რს ჟიბა̄ვ ხა̈ჩომ, ეჩჟი̄ნ.
Line of edition: 33
ჭშხა̈რს ლესყე̄ნად მა̄მ ხაყახ, ოდე ჩუ დო იფრიხ. შომვა̄̈ჲ ჭშხა̈რ ლმა̄რე
Line of edition: 34
ლიხ ლესყე̄ნად, ეჩქას მა̄რე ოსპრა̈რს ატა̄ბა̄̈ლი. ოსპრა̈რ ჟაჴვრა̈შ ლიხ ხოშა ლაღა̈ლ,
Line of edition: 35
მა̄დეჲ ცხვიმრა̄̈შ. ალ ოსპრა̈რ ნაჯვდან ო̄შთხვ-ოხვიშდ კამვინ ლიხ. ეჩხა̈ნ-ამხა̈ნ
Line of edition: 36
ჩუ ხოფტ̄რეხ ეჩზუმს, ერე ფა̈კვნა̈რ ჟი ხასკი̄დხ. ეჩქანღო ფა̈კვნა̈რს ატა̄ბეხ.
Line of edition: 37
ალჲა̈რ ნაჯვდან კამინდ ხოშა ზმშვ გარ ლიხ, ისგნჟი̄ნ ჟი ლტა̄ბე ლიხ, ეჩჟი̄ნ ერე
Line of edition: 38
ოსპერ ჟ'ესხეტს ი სა̈ვთეჩუ̄ნ სემი ი ო̄შთხვ ფხულე ხო̄ზდე̄დს.
Line of edition: 39
სა̈ვს სემი ოსპერ, უსგვა ფა̈კვნა ი ეშხუ უ̄ღვა ხაკუჩ. ალ უ̄ღვას, ოსპრა̈რს
Line of edition: 40
ი ფა̈კვნა̈რს ჟ'ამა̄რე, ეჩქას მახა გოგლა̈ნდიშ ი იედ ცხვიმრა̄̈ წირხა̈რჲა̄ქს კვა̈დლა̈რს
Line of edition: 41
ჴიდე. ეჩქანღო სა̈ვს უ̄ღვას ხოსგვრე ჭშხა̈რს ეჩხა̈ნ-ამხა̈ნ ამხა̈ნჟი ჭიშხი შელდჟი̄ნ
Page of edition: 134Line of edition: 1
ფა̈კვნა̄̈ ლასგვრას სიფრითშვ, ჲედ ასალშვ ჟი ხოფტე, ჭიშხს ისგთეჩუ̄ნ, ოსპრიშ
Line of edition: 2
ი ოსპრი უშხვა̄რ ნე̄სგაჟი̄ნ ქა ლა̈ცქფუშ ჲარვ ა̈გის უშხუდ ჟი ხოფტე ხოხვრა̄მ სიფვრითილშვ
Line of edition: 3
ნეწთხარე ლა̈ყრას. ეჩნქა სა̈ვა̈ ჭშხრე კაცხა̈რჟი̄ნ ჩიქე ჩუქვა̄ნჟი
Line of edition: 4
ისგმუყვ ჟი ხოჭი̄რხი კა̄დოშ ი ეჩქანღო ჩუ ხოფტ̄რე თხუმმუყვ. სა̈ვს უ̄ღვას სგა
Line of edition: 5
ხოსგვრეხ, ეჩქანღო ფა̈კვნა̈რს ხოსვა̈ლიხ. ალჲა̈რს ოსპრა̈რს ჟი ხოსგვრეხ, ეჩქანღო
Line of edition: 6
ჩიქე აშხვ ჭიშხი ჰოკერხა̈ნ ი̄ყიხ ჲარვ წირხს. ალჲა̈რს ჟი ხაგვრუზი̄ხ, ოსპრა̈რ
Line of edition: 7
ჟიქა̄ნ ჟი მასა̈რ ფაკვნა̈რჟი ჟი ხაჭშხეხ ი უღვა̄̈ ფე̄დის მეფტაქა ჟი ი̄ყიხ კაცხა̈რს
Line of edition: 8
ი ჟი ხაწრხეხ მეგჭად. ოსპრიშ ი ოსპრი უშხვა̄რ ნე̄სგაჩუ̄ნ ნა̈წრხუნს ჩუ ხოჯვი̄რიხ
Line of edition: 9
ეჩჟი̄ნ, ერე სა̈ვს ჟი ხეთლენი ი ნეწითხვშ ჟი ხა̈ნგჭვეხ. ამჟი̄ნ ქა იხრესიხ ეჩხა̈ნ-
Line of edition: 10
ამხა̈ნ ჭშხა̈რს ი სერ სა̈ვ ლმა̄რე ლი.
Line of edition: 11
ამუნღო სა̈ვს მა̈რჴლა̈რე ლიბემ გარ ხაკუჩ, მა̈რჴლა̈რს ხოშა̄მ ლაღა̈ლს ჯიჰრა̄̈შს
Line of edition: 12
იჩოხ მეგჭაღა.
Line of edition: 13
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
