TITUS
Svan Chrestomathy (I: Upper Bal): Part No. 200
Text: 163
Line of edition: 22
163. სგმა̈რ შვა̈ნისგა
Line of edition: 23
ჟიბე შვა̈ნისგა ობა̈შ ა̈დგილს ანღრი სგიმ, მარე სგმა̈რ მა̈გ მუგუ მა̄მ ლიხ,
Line of edition: 24
მო̄შ-მო̄შ ლიხ ლუყვლუ̄რე: ჲერ ლავფუნალვ ლიხ, ჲერ ლეთრე, ჲერ დი̄რიშ, ჲერ
Line of edition: 25
ქვინლმგენე̄მიშ, ჲერ გოგრიშ ი ჲერ ყვიყვი ჟაგა̈რდი იმა̈რგ.
Line of edition: 26
ლავფუნალ სგიმ ლეთრედ მა̄მ ლი ლჴმა̈შ ი მა̄მ იმა̈რგ, მარე ქა̈რი მა̈ზგუვა̄̈რს
Line of edition: 27
ეზერდ ხომჴერა ალ სგმარშვ ლივფუნა̄̈ლ. დი̄რიშდ ჩი̄ ჩუ შა̄ლ ხაყა, მარე მაჩე̄ნე
Line of edition: 28
ეჯა ლ'ე̄, ხედვა̄̈ჲს ნალჴა̈მში ზუმულდშვ გარ ხუღვე, ეჩნოვშ ლუშგვერდ ჴიცს
Line of edition: 29
ჟი ლიტხე მა̄მ ხაკუ ი შიშდ ქ'ა̄ნყეხ კა̄ქა. ალ დიჲა̈რ ეჩჟი̄ნ ჟი იფუ̄ნჩი. ეჩჟი̄ნ, ერე
Line of edition: 30
კამინვს ღეთ, სგა̄̈ნჩუ̄ნ ჴურვა̈რს იყე̄ნე ი ქა მჭანღო ლეზობდ მუჭხვი გა̈მა̈შ ლი.
Line of edition: 31
ლსგიმ დიჲა̈რს ხოშა̄მ ლაღა̈ლს ლაშდღვა̄ლა̈შდ ანყახ, იმვა̄̈ჲ ჩუ წვა ამკა̈ლიბ სგიმ,
Line of edition: 32
ეჯ სოფლა̈რისგა.
Line of edition: 33
ქვინლმგენე̄მიშდ მო̄შ სგმა̈რ თერახ. ალ სგმა̈რ ლეთრადი ლჴმა̈შ ლიხ ი
Line of edition: 34
ქვინლმგენა-ჲ მა̈ნცინსი ხოჩა ხა̄რხ ნათუნუნღო . ჯიმი ში მა̄მ ხაკუ მეზგა-ჲ სოფელსი
Line of edition: 35
ქვინლმგენა̄ლეშდ, იმვა̈ჲ სგიმ ანღრი. ობა̈შინ, ლახე ქვინლმგენა̄̈ლ ჟი ხეწხვა̈ვიხ
Line of edition: 36
სგიმი გუმა̄როვშ ჯვე̄დჲა̄̈ სოფლა̈რს, ეჩქას ქ'ა̄̈ჲიხ მე̄რმა სოფლა̈რთე ქვინლმგენა
Line of edition: 37
ი მა̈ნცინს ლესგმუნად. ეშხუ ნა̈სგმუნ გარ დეშ ხა̄რხ, სამ ლადა̈ღ ლიხ
Line of edition: 38
ლესგმუ̄ნე გესნიგესნ ი ეჩქანღო აშხვ ღეთ დოშდულმახა მა̄მ ხაკუხ სერ ლისგმუნე,
Line of edition: 39
დეჲ ჯიმი გუმა̄რა ხოჴდენიხ.
Line of edition: 40
ყვიყვი ჟაგრა̈რდ ხაყა, ეჯკა̈ლიბ სგიმ ლენჯა̄̈რ გარ ანღრი ჭალი პილს, ცხვარვა̈შ.
Line of edition: 41
სგიმ ანღრი, ეჯ ა̈დგილს ცხვარვა̈შ ხაჟხა. ამი ლისყის მასა̈რდ ჭირს ხაფსეხ ლენ-
Page of edition: 141Line of edition: 1
ჯა̄რა̈რ. სემი ღეთ ნეღარ ხა̄გ უშხვა̄რჟი̄ნ ი ძღდ სკო̄დი ლი. ჯო̄დი თაკვა̈რ ხუღვეხ,
Line of edition: 2
ეჯჲა̈რს სეგდა̄̈ლს ი იშგან შედა̈რს ხაბემხ ი ეჩნუვშ იტხეხ ჟი სგიმს. ალ სგიმს დირიშდი
Line of edition: 3
ეზერდ ხაყა, ლეთრადი გუნ ლჴმა̈შ ლი. ქვინლმგენე̄მიშდი ეზერ ლი ი
Line of edition: 4
ყვიყვსი ჩუ ხაშიდ ობა̈შინ.
Line of edition: 5
ყვიყვ ჲესვა̄̈ჲ ხა̄რ, ეჯა ალ სგიმი ქვიშა იკედ ძირხა̈ნჟი̄ნ, ეჯას პინტჟი ხაცვმი
Line of edition: 6
ი ყიჲას ჩუ იჭვე̄ნი. ალ ქვიშე სე̄ტ იშა̄ლ ხოთლე ყვიყვს ი გუნ ლფეთე დო ხა̄რ
Line of edition: 7
ყვიყვ, ჩუ ხაშიდ.
Line of edition: 8
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
