TITUS
Svan Chrestomathy (I: Upper Bal): Part No. 204
Page of edition: 144Line of edition: 1
ალ დაშნი ფუსდ ყლე: "ალა თხე̄რე̄მი ლეღვშვ მა̈ბზა̄̈რ ლი, ამი̄ მაშედ მი მიხალ"
Line of edition: 2
ი ხობნე ლიჭვდის: "ელეგენი ქრსდესა, მელეგენი დედასა. ლა̈ჩვსა, ერსკა̈ნსა,
Line of edition: 3
ღვაშსა, ჰილვსა, რა̈ჭვა̈ წკინტილსა, ერევეზისა, ჩენ იყავი ძალი, სამებისა ძალი
Line of edition: 4
შენი, ორონქო, მორონქო, ქრისდეს გარა̄̈ქი, წმინდისა გივორგისა ხანგა̈რისა ძალი
Line of edition: 5
შენი, გამოშორდი, გამეცა̈ლი, სი ეშმა̈კისა ყაფლანი ხარ, სი მურდა̈ლისა დაჭრილისა
Line of edition: 6
ხარ, ონქორო, ქონქორო, თავა̈რ ა̈ნგელოზი, დასწარი ჯვარი შენი! "
Line of edition: 7
ალ ლიჭვდის სუმინ ქა ხეჭვდიხ, ეჩქანღო დაშნა̈ჲს ა̈გით' ა̄̈ჲე̄სგიხ.
Line of edition: 8
სერ შომვა̄ლე ჩუ ხეშრი ა, ქა ხეჴჩენი ბნა̈ბ ლეგდმერდა, ჩუ ინყუ̄რი ი ლიპე̄რვეს
Line of edition: 9
იბნე. ამის ქა ხა̈შთხ', ე̄ჩქას ჩუ ივჟუნი ი ნაუ̄ჟუნღო ჰა̈დვირ ა̈რი, მარე ალამა̈გ
Line of edition: 10
ნაზურჲა̄ლვ ი ნა̈ყირვ მა̈გ ტვინშილდ ხა̄გ ი ქა ვედნილდ გარ იქვთუნა̄̈ლ.
Line of edition: 11
ხოლა ბნა̈ბ ამი̄ მა̈ზგუვა̄̈რს მახა დოშდულჟი̄ნ ხოჴდენი. ამი̄ მა̈ზგუვა̄̈რს ჲერს
Line of edition: 12
ლა̈გურკა̄̈ ლიმზირ ხაგა̈დ ი ჲერს _ გულა̈ გა̈ბრელიშ. ლა̈გურკათე მე̄ზი ლიგურკე
Line of edition: 13
ლადა̈ღ ნეღა̈შტს აჲე̄სგი კა̄ლთე ლა̈გურკათე.
Line of edition: 14
ამი̄ მა̈ზგუვა̄̈რ ვობა̈შ ლიხ ი ამ ლადა̈ღ ლა̈გურკა̄̈ მოლზონა̈რს ობა̈შ ნეღა̈შტ
Line of edition: 15
ხენზვე̄რიხ. ალჲა̈რს ჩვა̈ჲსენიხ კა̄ლა̈რ. ლეგდმერდა ზედა̈ში ხუღვე, ალ ზედშა̈რს
Line of edition: 16
ჩვა̈ყვბეხ, ჩვა̈მზრიხ მჴდა ი მინ ხოჩა ლადა̈ღს ისყე̄ნეხ. გულა̈ თახა̈ლადა̈ღ, გულთ'
Line of edition: 17
ე̄სღრიხ ხოლა ბნბვა̄̈რ. ეჩხა̄ვ ჟინღა̈რ ესყახ ი ზედა̈შ ესღვახ.
Line of edition: 18
ამჩუ̄ნი კა̄ლა̈ გუვა̈რდ ლიმზრ ლი.
Line of edition: 19
13. მა̈ჴფიას იმჟი ხემშედა̄ლდახ შვანე ა̈ქმა̈რ. ჩი
Line of edition: 20
ნუკვიშ ლქა̈ჩს, ჲედ ლუქვინს, მა̄დეჲ ლფხა̈ჲს ი იშგან ნუკვი მო̄შ-მო̄შ ლქა̈ჩს
Line of edition: 21
ი მეთა̄რუნა̄ლ მასტუნას ა̈ქმა̈რ ხემშედა̄ლხ.
Line of edition: 22
ტკიცდ ლ'ე̄რე ხოშა̄მ ლაღა̈ლს ა̈ქმა̈რ ჩუ ხოჟღმახ მასტუ̄ნას მასტუ̄ნვა̈რ მა̄რა.
Line of edition: 23
ალას ეჯღა იჩომდახ, ერე ეჩუნღო მასტუ̄ნვა̄̈რდ ხოშე̄ლ ნა̈ჲქიმი̄რვ ოხკი̄დე̄ნხ,
Line of edition: 24
მარე ალაჲ ჩუ ლა̈სვ, ერე მახე მეთურიჲე̄ლ ა̈ქიმს ჩუ მა̄მგვეშ ხოხალდა ქა მასმნქა
Line of edition: 25
ი ეჩქას მასტუ̄ნვა̄̈რს ლიმშედა̄ლე მქაფდ ხოშა̄მ ჭირს ი თმის ხოჴდა. ერხი
Line of edition: 26
ხოჩა ლგღებ ა̈ქმა̈რი ხეჩ̄დახ ი ეზერდ ხოხალდახ ლქა̈ჩი ლიმშედა̄̈ლ.
Line of edition: 27
ა̈ქმა̈რ ჟაგა̈რს მინეშშვ ასყე̄ნახ: კახვრას, მაჰლამს, შვარა̈ ჟაგრა̈რს, თათრი
Line of edition: 28
ჟაგრა̈რს ი ამკა̈ლიბა̈რს. მა̈რგიმიშვს იმხა̈ნქა დო ასყე̄ნახ, ამი̄შ და̄̈ს მა ხოხალდა.
Line of edition: 29
ა̈ქმა̈რი ყლახ, ერე "მა̈რგიმიშვს ი ლეხკნა ჟაგრა̈რს სგა̄̈ნქა, თანა̈ღს ეჩხა̈ნჩუხა̈ნ
Line of edition: 30
როქ ლმჴიდვინხ". მა̈რგიმიშვს ხოლა̄მ ძვერი ლა̈ჴჩად იჴმა̈რდახ. ალ მა̈რგიმიშვი
Line of edition: 31
ნადა̄̈სგუნღო მასტუ̄ნვა̄̈რ მა̄რე სურუს იჭი̄რო̄ლდა, ეჯღ' ე̄რე მა̈რგიმიშვ
Line of edition: 32
თა̄მ-თა̄მა̈შდ ხა̈ჴჩა მა̄რა ხოლა̄მ ძვერს ი ეჩი̄ ნადა̄̈სგვა̈რ ყლახ, ერე ოდ ესერ ძვერ
Line of edition: 33
სგა დო ხეჴჩენი მა̄რა (ხოლა ძვერ), ეჩქად ესერ ლქა̈ჩჟი̄ნ ლმნჩხრინე ბერეჟ
Line of edition: 34
ხედი, ეჩჟი̄ნ ესერ მუსტვი̄ნია ლი მა̈რგიმიშვი ლიდე̄სგი ლქა̈ჩისგა.
Line of edition: 35
მა̈ჴფია მა̄რა სკელს ხეყრენი ი წახვქა მა̄̈ნკვი ლათა̄რა ხოჴდენი, ეჯა აშხვ
Line of edition: 36
ა̈დგილს ჟი ხეფკვი, ეჩქანღო მე̄რმა ა̈დგილქა̄დ ხოთხრენი ი სერ ამჟი̄ნ ესჭიმ, ქა
Line of edition: 37
დე̄მჟი ხეჟგი მა̄რა.
Line of edition: 38
ალ მა̈ჴფიას ა̈ქმა̈რ ობა̈შინ ჩუ ხეშდენდახ ჯვინალდ. ა̈ქიმ მასტუ̄ნვა̄̈რი ქორისგა
Line of edition: 39
ჩუ სედენდა ხვა̄̈ინ ლა̄̈თშვ ი ნა̈ბოზს მეშხა ქათალს ხა̈ჴდუნა, ქათალს ხაკუჩ ერე
Line of edition: 40
იშგენ ლა̈ნშა̈ნ დო̄მე ხა̄რე̄ნს ი ჩიავ მეშხე ლმა̄̈რლესვ, ამის ჩვა̈ჲსენდა ეჩქანღო
Line of edition: 41
ა̈ქიმ ქ'ა̄ტფუ̄რა ალ მეშხა ქათალს, ძვერს, ჯიჯვა̈რს ქა ხა̈თიშდა, ძვერს ჩვაკპნა ი
Line of edition: 42
სგა და̄̈სგდა ქათლა̈ ტუფთე̄'სგა. ეჩქანღო ლქა̈ჩ ი ლთა̄რუნა სკელჟი̄ნ გრკიდ
Line of edition: 43
სგა ხადა̄̈სგდა ლკპნა ლეღვს (ქათლა̈შ) ი ქა̄მენქა ქათლა̈ ტუფს ხალფა̈რდა, ეჩ-
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
