TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 208

Text: 169

Line of edition: 2

169. აშირ ი ჲერვეშდ ლზა̈ჲ ზურა̄ლა̈ ნა̄მბავ

Line of edition: 3    მა̈ჲ აჯმბავა თა̈ვირ ი მეჩი ზურალდ? ათხე̄ დვრევ მა̄დ ლა̈სვ ჯვინალდ, ათხეშშა̄ლ
Line of edition: 4    ხინა̄რდ მა̄მ ხვარდად ჯვინალდ. მა̈ჲ ესამა ჭირ ი მეშხე ჟი ისყო̄ლდა. ეჯა მა̈გ
Line of edition: 5    ზურა̄ლა̈შდ ლა̈სვ. მა̈გ მა̄მ მაშყიდ, მარე მა^̄̈ჲ ლა̈მშყედნი, ჩი̄ ქ'ა^̄̈ჯმბა̈ვი.
Line of edition: 6    ჟამობ ჩუ მაშყიდ ი მიჟ ა̈დბურა^̄̈ნ, ეჯა იმჟი მო̄დ მეშყდი. ეჩქას სი̄მაქ ხვასვ.
Line of edition: 7    მი თხვიმ გეზალ ლმა^̄̈რნე̄ლხვი. მიშგვა დის ლვის ხარა ლედი მიშგოვ ი ჴარჴ ჩუ
Line of edition: 8    ლეფტე. ქვინ ამსედა ი ლირდი ლოხვბინახ მიშგო̄ვდ. უსგვა ი იშგვიდ ლზა̈ჲ ხვასვ.
Line of edition: 9    მა^̄̈ნკვი ხამა̈რ ლალდა̈ღთე მაზიზდახ, ეჩქანღო ღველჲა̄ქრეშ. მიშგუ დი მა̈ტყი ლიფთის
Line of edition: 10    ი მასლარე ლინტვლა^̄̈ლის მათვერდა მა^̄̈ნკვი, ეჩქანღო კუკვრე ლიკუ̄კვეს, ღო
Line of edition: 11    ლინჩრეს ი ქანა̈ ლისნეს ი ეჩქანღო მა̈ტყი ლილთეს ი სგვირია̄ქდ ქანა̈ ლილთეს.
Line of edition: 12    ქა ნა̈ჯიშუნღო ჩუ ხვატყვა̈ლდად კვილის, სგვირს ჩუ ხვაქრშად ჟი ნაჯაბუნღო.
Line of edition: 13    ალჲა̈რ გარ ლა̈სვხ ჯვინალდ ზურა̄ლა̈ ლეშდბა̈რ ნავსტატახა̈ნ.
Line of edition: 14    ეშდიშგვიდ ღეთ ლზა̈ჲ ხვი̄რვე̄ლ, ეჩქას ჭიშხ ამფვიშდნეხ მიშგვა ლა̈მთილდ
Line of edition: 15    აშხვ ნაგზა ეჩეჩუ̄ნ ხვარდ, მარე ეჩქა^̄̈ დვრევჟი̄ნ ჭაშვ სგა და^̄̈რ ხეყვნა̄ლ ლიგურგუნა^̄̈ლჩიქდ.
Line of edition: 16    ლამვარს ოდე ხვარდ, ეჩქად ობა̈შ მემციქულდახ ლელა̈ტდ ლისყე̄ნეს,
Line of edition: 17    მარე "ეშხვი ლელა̈ტურ ლამა^̄̈რ'ე̄სერი̄ მა̄დ ოლგენე̄ლი" ი ეშხვი ლელა̈ტ მი̄ჲ
Line of edition: 18    ჟ'ა̈ხვისყ უფგოვშ, მარე ჩუ ობა̈შს ხოხალდა ჭაშუნქა ი ქორშა̈რნქა. აშხვ ზავ
Line of edition: 19    მიშგვა ჯმილს მა̄რე ლახდაგან. ღვაჟა̈რ ქამა̄ვ დეშ ჴედენდახ ლაშდაბთე ი ლეღვეჟმა^̄̈რ
Line of edition: 20    ი ლეზვრა^̄̈ლ ლეშდა̈ბ მა̈გზურალა^̄̈რს ნა̄დ ლეშდა̈ბ. ლა̈ჭმათე ი ლაჴა̈ნთე მიშგვი
Line of edition: 21    ჭა̈შ ი მე̄რმე ლა̈ჩჟა ჴედენდახ. ეჩქას ათხეშშა̄ლ მერხა̈ლდ გარ მა̄დ არდა მეზგაისგა
Line of edition: 22    ჩუ ძვირდ გარ ი̄თა̄ლ მა̈გ ი ქორისგა ობა̈შ არდა ზურა̄ლ ი ღვეჟმა̄რე
Line of edition: 23    (\\ ღვაჟმა̄რე). ეჩქანღვ' ა̄ჩა̈დ ჲო̄რი ღეთ ზა̈ჲ ი მიშგუ ჯიმილ ჩვადგა̈რხ. ლდგა̈რჟი̄ნ
Line of edition: 24    ჭირისუფა̈ლ ჩიგარ ზურა̄ლ გარ ლი. ჩუ ნაშდუღუნღო ეშხვი ზა̈ჲ ქ'ა̄მა̄დ ურწყვდ.
Line of edition: 25    ეჩქას მიშგუ მუ ღალ ადგან, ღო მიშგუ ბიძა̈ჲ ი სემი ზა̈ჲ ამა̄დ ურწყვდ.
Line of edition: 26    ტა̈ნიშდ ლახე ჴვედენდა̈ს, ედ ლამნგარისგა ხვარდა̈ს, ლახე იშგნა̈ უკვცირ
Line of edition: 27    ქორ მო̄მ ითხო̄ლდა, ი ედ ლექვე̄რისგა. აშხვ ნაგზანღო გარ მიხინდახ ქორთე.
Line of edition: 28    მაღვე̄ღ ი მეკვა^̄̈რიე̄ლ მეზგუნო̄ლდა მცხუშ ლვინთისგა ი ლატუ̄სა̄ლუშ გარ მაჟ
Line of edition: 29    გენდახ ქა. ერვეშდ ღეთ ლზა̈ჲ ხვი̄რო̄ლ, ეჩქას ნაჭვლაშ ა̈ნკიდხ მიშგვი. ეჩქა^̄̈ ნაჭვლაშვდ
Line of edition: 30    ჲო̄რი ნალჯვემ და̈ბ ლა̈სვ, უ̄ღვა ჴანა̈რ, სემი ფურა̈რ ი ეჩნქა მა^̄̈ღვრა̄ლ.
Line of edition: 31    ეშხვი ზა̈ჲ ქ'ა̄ჩა̈დ ეჩქას გარ ამფიშვდხ ლა̈მთილთე. ეჩეჩუ̄ნ მა^̄̈ნკვი დი̄ნაგეზალ ა̈მთ
Line of edition: 32    ავა^̄̈ნ ი ეჯა ჟ'ა̈ხვირდ ი ეჩქანღო აჩა̈დ ხა̈ნ ი ჲო̄რი ჭყნტა̈რ ა̈მთავა^̄̈ნხ. ამჟი̄ნ ჭა̈ში
Line of edition: 33    ჩვამდაგა̈ნ ი ბოფშა̈რ მი მა̄დხ ლევჴარა^̄̈ლი. მე̄რმაჟი̄ნ ქა̄დ ამწვი̄ლეხ მეჩი მა̄რათე
Line of edition: 34    ი მიშგვა ლამვარდ ეჩხა̈ნი ჯვინელ ნაჭვლაშ ა̈ნკიდხ. ალ ლა̈მთილ ხოჩა მეზგე
Line of edition: 35    ლა̈სვხ, მარე ჭა̈შ ლა̈სვ ხოლა კაფიშ ი ჩიგარ მეცვა̄ლ. მახაღვა̈ჟს (\\ მახეღვაჟს)
Line of edition: 36    ჩი ლელა̈ტდ მაბრა̈ლდა, მარე მი ღალ მა̈გ ჩუ ლეჭკრნე მა̄დ. ამჟი̄ნ მე̄რმე ჯმილ
Line of edition: 37    ამდაგან ლამვარს ი სემი ზა̈ჲ ეჩი̄ ურწყვ ხვა̈სვ. მე̄რმა ჭაშვხა̈ნქა ეშხვი დი̄ნა ი ეშ
Line of edition: 38    ხვი ჭყინტ ა̈მთავა^̄̈ნ. ეზერდ ნა̄დ ეჩქას. ჩუ უ̄თა ხვა̈სვდ, მარე აშხვ ზავ ჟა̈მ ანჴა̈დ.
Line of edition: 39    ჩი ქა ლექა^̄̈ბი ხა̄დ ჯვე̄დიათე. ქორისგა ლეგდ მერდა^̄̈ლ გარ ასა̈დხ. მიშგვი ჭა̈შ,
Line of edition: 40    მიჩა მუხვბე ი ეჩი̄ ხეხვ _ ალჲა̈რ ჩვალდაგა̈რხ ქორისგა უ̄ზნანად. ეჩქას ა̈მჴედე̄ლიხ
Line of edition: 41    სოფლა̈რ ი ქორ ი ლდგარუ ჩ' ოთშიხახ ი კეთილ მა̈გ სგ'ა̄თნახე̄ნა. ეჩქას იმვა^̄̈ჲ
Line of edition: 42    მა^̄̈ნკვი მეზგაისგა ჟა̈მ ქ'ა^̄̈ნთა̈ნო̄ლ ი ჩუ ჲა̈რ ა̈დდაგრო̄ლ, ეჯ მეზგა ი ლდგა̈რს
Page of edition: 148 Line of edition: 1    სოფელ ჩვა̈შიხდა: "ღვ'ე̄სერ სოფელხა̈ნქა ჟა̈მ ქ'ა̄დრინე ი მა̈გ ჟი დე̄მ ა̈ნხვტენი". ჟამ
Line of edition: 2    ქ'ა̄ჩა̈დ სოფელხა̈ნქა, ე̄ჩქას სგ'ო̄ნტა̈ხდ (\\ სგ'ო̄ნტვა̈ხდ) ქორთე, მარე მა̄მგვეშ ენ
Line of edition: 3    ხვი̄დ ხოჩე̄რობა. ღვაჟა̈რდ ქორ, იმჟი̄ნ დო ლა̈სვ, სოფლი ლამურჯუშ ჩვადი̄შგხ.
Line of edition: 4    ჲო̄რი ღეთ კვიდო̄ლ ლეზვებ ა̈ნშდებხ ი მინ ლა̈ქმათ' ა̄ჩა̈დხ. მი̄-ჲ მიშგუ ბოფშა̈რ
Line of edition: 5    მა̈იდშვ ვეთ ონხვა̈ტდ ი მიშგვა ლამვარდ ანჲეხ მინეშთე. ეჩეჩუ̄ნ ხვივჴარა^̄̈ლდა̈ს
Line of edition: 6    ბოფშა̈რს ი მა^̄̈ნკვი̄ გეზლი̄რსი თან ხვა̈ხვტინა̈ს. ზურა̄ლს ეჩქას სურუ ჭირ ხა̄დ:
Line of edition: 7    ლიბრგი, ლიჩო̄რა^̄̈ლი, ლიფცხი, ლითი, ლიბა̄ბე, ლიშყვდი, ლილფრე, ლილგუჰე̄რი,
Line of edition: 8    ლი̄შგა^̄̈ლი, ლირბიე̄ლ, ლინყუ̄ნა^̄̈ლი ი მა̈გ ქა პილთექა. მე̄სმა̄მდ აჯაღდ ქა̄დ
Line of edition: 9    ამწვი̄ლეხ მიშგვა ლამვარდ ათხე ხვა̈რ' ა̄ლ მეზგათე. ჭა̈შ მი̄ჲ ჩუ მალტნ. მე̄სმე
Line of edition: 10    ნაჭვლაშ ალჲა̈რხა̈ნ ქა̄დ ა̈ნკიდხ ნიშგვეჲდ ი მი ლამე̄მხ მა^̄̈ნკვინღო ი ღვეშგმე პილდ
Line of edition: 11    სემი ნაბა̈დ ი სემი შართქვინ კვილი̄შ. სერ მა̄მგვეშ.

Line of edition: 12       ამჟი̄ნ ლა̈სვ ეჩქა წეს. ალ ქორისგა სემი ჭყინტ გეზალ ამთავა^̄̈ნხ. ალჲა̈რ ათხე̄ჲ
Line of edition: 13    აშ ა̈რიხ მა̈გ ი ჩუ ლმჩე ლიხ. ადო მა^̄̈ნკვი გეზლი̄რი ნა̈მჩოშ ადგანხ. მი გარ
Line of edition: 14    ა̈მსა̈დ ქვინ ი ჩუ̄დ ხვა̈რი ჭირი მუნკვლიდ. სემი ჭა̈შ მადგარა, ოხვიშდ გეზალ,
Line of edition: 15    ო̄შთხვ ლაჯმილა, სემი ლავდილა, უსგვა გეზლა̈ გეზლი̄რ ი ეჩნქა ოშა ნა̈თი! თვეთნე
Line of edition: 16    ლაჩა̈ქ დე̄სა მიწვა თხუმჟი̄ნ.

Line of edition: 17          მესტია

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.