TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 209

Text: 170

Line of edition: 18

170. ლეჩხუმთე გზა̄ვრობ ენკანობჲე̄რ

Line of edition: 19       ენკანობჲე̄რ ეშდღეთ მა̄რე აშხუდ ოჩა̈დდ ნიშგვეჲ სოფელხა̈ნქა ჩა̄ჟარშვ ცაგე̄რთე.
Line of edition: 20    ეჩე ენკანობ ლა̈სვ ი ეჩე ხვიყიდდად, ლახე სურუ ძვირ მო̄დ ლა̈სვ, ჯიმს ი
Line of edition: 21    სიმინდს ი იშგან ნეცვნირს, ლახე ვარჩხილ შუნ მა ნუღვა^̄̈ნ.
Line of edition: 22    ქ'ო̄თა̄გა̈ნდ ა̈გიხა̈ნქა ი ეჯ ლე̄თ ლატფა̈რი ძირხა̈ნჟი̄ნ ჟ'ოჩა̈დდ ცხეკი თხუმდ.
Line of edition: 23    ამეჩუ̄ნ ლა̄რაისგა ჩვა̈თვსადგვმა^̄̈ნდ ი ლემესგ ოხვა̄შვედ მასა̈რდ. ჩა̄ჟა̈რდ ჟ'ა̈ნშვემხ,
Line of edition: 24    ეჩქას ლა̈ლკა^̄̈ლ ჩ'ოხკდ̄რედ, ჟ'ოხვბერკლედ ი ლაჩა̈ხვთ' ო̄ფიშდვდ (\\
Line of edition: 25    ო̄ფიშვდდ), ნა̈ჲ ხა̈რჯ ა̈ხვკიდდ. ეშხვი მა̄რე ჟა̈ჴვშ ლცთ' ო̄თზზედ ი ლიც სგ'ა̄ნჴიდ,
Line of edition: 26    ეჩქას ჩვა̈თვხარჯა^̄̈ნდ. გვიანდქა ჩ'ოთყურდად ჩა̄ჟა̈რ ნაწვნა̈ნუნღო. ისგლე̄თ
Line of edition: 27    ირო̄ლ, ეჩქას ჩა̄ჟა̈რდ ხოლა მიჰმა̈ნ ანჩვმინხ. ონშ̄დდ ჟი ი ა̈ხვწვე̄ნედ ჩა̄ჟა̈რ, ა̈ხვშლდედ
Line of edition: 28    ქა ი ეშხვი დე̄სა ხეჩ̄დ. ლოხვბინედ ლითხე̄ლი მაცლანარშვ ი ქახიქა ჟ'ა̈ხვთხედ
Line of edition: 29    ჩუ ლცლ̄რე. და̈შდვ ახშგება ამ ლე̄თ ჩა̄ჟა̈რს ი ეშხვი ჩ'ოთცლ̄რა.
Line of edition: 30    მე̄რმა ლადა̈ღ ჩა^̄̈ჟი პატრონდ ჭშხვშ ვეშგდ ესჭვე̄ნ ა̈გითე ი ნა̈ჲ ლა̈ხვბინედ ლი̄ზი.
Line of edition: 31    ქ'ა^̄̈თვთანღედ ი ჩვოჩა̈დდ მა̄მთე. ამეჩუ̄ნ გალფხა̄ნშ' ე̄ნხვიდხ ი ჩა^̄̈ჟი შელდჟი̄ნ
Line of edition: 32    თვით ეშდ შაურ ანკიდხ ლატფა̈რქა ნა̄ზვიე̄რ. ეჩქას ლატფა̈რ გალფხა̄ნა̈რს ხა̄დხ
Line of edition: 33    ლბგერე. ბეგა̈რურ ქა და^̄̈ს ფიშვდახ. მე̄სმა ლადა̈ღ სგ'ო̄თჰედ ცაგე̄რთე̄'სგა. ამეჩუ̄ნ
Line of edition: 34    ჩიე̄სგი მა̄რად ჟი გვეში ლა̈სვ ი შვანა̈რი ობა̈შ არდახ _ ერხი ჯიმი ლა̈ყიდს ი
Line of edition: 35    ერხი _ სიმინდიშ. ნა̈ჲ ვირჲა̈ჲა̈რ ლა̈ნჭვადხ შიშდ ი ნაკფუნახ მინე-მინე დუქნა̈რთე
Line of edition: 36    ლი̄ზის ი მინეშხა̈ნქა ლიღვჭარს. ინბანა̄ლხ მინე ჯვრილშვ, ერე "ნაჲ ესერ მე̄რმად
Line of edition: 37    ხოჲფა̄მდ ნა̈ყდიხ ჩი̄". ეჩი̄შ მა̄მ ხოხალდახ, ერე ნა̈ჲ თვით სემი ი ოშთხვ მანა̈თ
Line of edition: 38    გარ ნუღვა^̄̈ნ ზანე ნა̈ქიმვ ი სერ მა̄მგვეშ. ნა̈ჲ ჩა̄ჟა̈რ ქ'ო̄თხვიედ მინდვერთე ი ეჩეჩუ̄ნ
Line of edition: 39    ჩვოფიშვდდ ლაჩა̈ხვისგა. ლაჩა̈ხვ ხეჟხა^̄̈ნ, ადო ჟი ლუცხვლე მელვ გარ ხა̄გა̈ნ,
Line of edition: 40    სერ მა̄მგვეშ. ეშხვ' ა̄ფხნეგ ლა̈ლკა̄ლეშ ი ჩა̄ჟრე მლჩად ოცვირდ ი ნა̈ჲ სგო̄ჩა̈დდ
Line of edition: 41    ქალა̈ქთე̄'სგა. ნიშგვეჲ აფხნეგს ეშხვი ვირჲა̈ჲ ლა̈ხჭვედდა: " ქალაბან ესერ ხუღვე
Line of edition: 42    მა̄, მუშვა̈ნ?" ამის ესნა̈რ ქანა̈ ბალე ლოხვხალდა. "ალ'ე̄სერ ქა მრე̄ს იჰვდი
Page of edition: 149 Line of edition: 1    ამეჩუ̄ნ". ლა̄პა̈რ ესნა̈რ უფგოშ, აჩა̈დ ცხვიმე̄ლი̄დთე ი ეშხვი გუდრა ქანა̈ ბალე
Line of edition: 2    ქ'ა^̄̈ნხი̄ლწ, სგ'ა̄ნჴიდ ქალა̈ქთე̄'სგა, ლა̈ჲბინე ლიტუ̄ლი: "ქანა̈ ბალე! ქანა̈ ბალე!
Line of edition: 3    მარე ამის ჲა̈რ ა̈დყიდნა, ნა̈ჲ ლა̄ცვდ ა̈ხვკიდდ ალ მა̄რე ი გვის ხოხპად შუკვჟი̄ნ
Line of edition: 4    "ქანა̈ ბალე̄მი" ლა̈ქვი̄სგს. აშხვ ა̈დგილს ჯიმ უსგვა̄მ შაურდ ნეთხა^̄̈ნ ფუთ ი ესვა̈ჲს
Line of edition: 5    ნაწხნ, ჟ'ა̈ხვყიდდ თვით უსგვა ფუთ. ესვა^̄̈ჲ მო̄მ ხაწხნხ, ეჯჲა̈რ ძუფთ' ა̄ჩა̈დხ ი
Line of edition: 6    ეჩხა̈ნ ანჴიდხ მე̄რმა ლადა̈ღ სიმინდ ფუთ უსგვა̄მ აბა̈ზდ. ბა̄ზი ჩუ̄დ ოსა̈დდ ცაგე̄რ.
Line of edition: 7    ნა̈ბოზს ერხიდ თვით მანთიშ ი ერხიდ თვით ღეთ სამ მანთიშ ბარდან ა̈ხვყიდდ აშხვ
Line of edition: 8    ვირჲა̈ჲხა̈ნქა. მანა̈თღა ეშდ ალა̈ბს ნაჰვედდა ი ალა ეზერდ ნებჟა^̄̈ნ, მარე ა̈გით'ო̄ნ ჴვა̈დდ
Line of edition: 9    ეჩქას ა̈ხწვე̄ნედ ჟი ი მა̈გ მექვრე ლა̈სვხ ი თა̄რშა̄ლ ესღრდახ. მე̄რმა ლადა̈ღ
Line of edition: 10    დოსგ ოხვა̄გა̈ნდ ქა ცაგე̄რხა̈ნქა. ლელტხაქა უფგოშ სიმინდი შდა̄რა̈რ ა̈ხვყუჩუ̄რედ
Line of edition: 11    ა̈გითე ლეჴდად. ეჩქას შვა̈ნს სიმინდს მა̄დე ი კვეცანი̄ კვეტო̄ლს გარ ხალა^̄̈შდა
Line of edition: 12    მა̈გ. სიმინდი შდა̄რა̈რ ეჩჟი̄ნ ჩუ ხამბჟნ ჩი̄, სერთხი ზურალა^̄̈რს, ერე დეცხა̈ნჩუ̄ნ
Line of edition: 13    ნაშდვ ხოხალდა ჩი̄.

Line of edition: 14       ამ ლე̄თ ჩო̄ლირთე̄'სგ' ო̄ჩა̈დდ ი ამეჩუ̄ნ ნამთივ დაბისგა ჩვა̈თვსადგვმა^̄̈ნდ,
Line of edition: 15    მარე მუჩო̄ლირდ მა̄დ ლანგვა̄ვე ნახთალვისგა. მე̄რმ'ა^̄̈გითე ნა̄დ ლე̄ზი ი ეჩეჩუ
Line of edition: 16    ლერჰე. მე̄რმა ლადა̈ღ ჟ'ოხვა̄გა̈ნდ ლატფა̈რს. წელი ნაფხაკვქა ონღურდად, ეჩქას
Line of edition: 17    აშხვ ჩა^̄̈ჟ ოთშყა̈დ ი სიმინდი ჩვა̈დდა̄ვშა^̄̈ნ ი ფუსდ ღალ ჰა̈რიდ ანჴა̈დ.

Line of edition: 18          ლენჯა^̄̈რ

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.