TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 210

Text: 171

Line of edition: 19

171. ზა̈ნთე ლინგზა̄რვა̈ლ

Line of edition: 20       მ'ე̄ჩქას ეშდარ'-ე̄შდჩხარა ლზა̈ჲ ხვი̄რო̄ლ ი ეჯ ზავ ოდე მა^̄̈ნკვი ზა̈ნთე ლა̈ქმათე.
Line of edition: 21    ხოშა̄მ ლაღა̈ლს ჩუ ხოხალდ, ე̄რე ა̈გითე მა̈გ ლჲა̈რ მა̄მ ტეხენდა, მარე "თმი
Line of edition: 22    ღალ ზსყის აკლა̈ვი". ა̈გის მა̈იშდვ დაგრას მა̈გ ხოჩა მა̄რე̄მიშდ ი ნა̈ჲ უმბილდ
Line of edition: 23    ნა̄დ ლე̄ზი ზა̈ნთე ლა̈ქმად. ნა̈ქიმშვ სიმინდს ხვიყიდდად ი ეჯ'ა̄ნღვა^̄̈ნ აგითე ქაფშვ
Line of edition: 24    ი ამნოშ ქა ხვისა^̄̈ლვო̄ლდად. ზა̈ნს თხრილა̈რ ხემთქვა^̄̈ნხ ნაშხვტა̈ მქაფ. ეჯჲარე
Line of edition: 25    ლითხრილა̈ვის შვანა̈რნქა და^̄̈რ იშგდა ი ეჯჲარე ლა̈თხრილა̈ვთე ღურდად. ეჯკა̈ლიბ
Line of edition: 26    ხოლა შუკვა̈რ ლა̈სვხ ლენჴე̄რა ლექვა ი სერთხი ბაჴა̈რქ', ე̄რე სვისტ მა̄რე ჩუბა̄ვ
Line of edition: 27    ლა̈სგიდჟი̄ნ ჩუ იჟო̄რო̄ლდა ი ქა შყედენდა კოჯქა ჭალა̈ჲთე̄'სგა. აშხვ ლინთვ
Line of edition: 28    ლიჰლომა^̄̈ლი ლადა̈ღ ერვეშდ მა̄რ' ო̄ხუ̄გა^̄̈ნდ ი ოჩა̄დდ ზა̈ნთე ლა̈ქმათე. ლეზზა̈რ
Line of edition: 29    ი წერა̈ქვ გუდრა^̄̈ლისგა ნირდახ ი ჟი ნა^̄̈ცუდახ. იმჟი დო ლა̈სვ ეჩხა̄ვშა^̄̈ლიდ ბაჴა̈რქა
Line of edition: 30    შვიდებდ ოჩა̈დდ. იშგნა^̄̈გი მა̄მ ლა̈სვხ ხოჩა შუკვა̈რ, მარე წიბარა̈რშვ ი მიჯვრა̄ლშვ
Line of edition: 31    ხვიგჭად თხუმ ი ეჩჟი̄ნ ესღურდად. აშხვ ლე̄თ ტყაბედნიე̄რ ხვარდად,
Line of edition: 32    ეჩეჩუ̄ნ ღუტუნა̈ჲ ჭანტურიას ზექი კარა̈ვ ხო̄გა̈ნ ი უფასოდ სგა ნიხინდა, ეჩხა̄ვთე̄'სგა,
Line of edition: 33    მარე ქირა̈ჲ მქაფდ ჭალა̈ჲხა̈ნჟი̄ნ მიჩა ქორთე ზექს ნაქფუნა^̄̈ვნა სამ ი ო̄შთხვ
Line of edition: 34    ხერა̈სს. ეჯაჲ მასა̈რდ გარჯ ლა̈სვ ლმშერა მა̄რე̄მიშდ, მარე ეჩურ სგა დე̄მ ნიხინდახ
Line of edition: 35    კარა̈ვთე̄'სგა. მე̄რმა ლადა̈ღ ჯვა̈რთ' ო̄თჰედ ი ეჩნეშ ლახვბინედ ლეშდა̈ბი ლითხე̄ლი.
Line of edition: 36    აშხვ ვა̈რგს ოთა̄გა̈ნდ სოფელისგა. ეჯას თხრილ ხა̄რა ლესყე̄ნე ი ქა ლა̈ნ
Line of edition: 37    თო̄ნე მა̈ზუმვა̈ჲ ნა̄დ ლექვცე. ლახვბინედ ლითხრილა̈ვი ი ჰა̄ვდარღა დე̄მის ფვეშენდად
Line of edition: 38    ი ქუთუ̄ლა̈რმუყვ ტყრისგა ხვა̈თხრილა̈ვდად. საჯნი ნა̈თხრილავი̄რ ქი̄რად
Line of edition: 39    ო̄შთხვ კაპეკ გარ ნუღვა̈ნ ი ლადა̈ღისგა თვით აბა̈ზს ი ობა̈შინ თვით ოხვიშდ შაურს
Line of edition: 40    ხვასყე̄ნად. ლეზობდ შა̈მ ი ლობიო ნუღვა^̄̈ნ. ნა̈ჲ ა̈გი̄ ნატამვ მასა̈რდ ხვიზობდად
Line of edition: 41    ალჲა̈რს ი ზანა̈რს ეჩჟი̄ნ ქა ხამბჟნხ ნიშგვეჲ ამზუმ ლიზვებ, ერე შვიმ მა̄მ
Line of edition: 42    ხა̄დ. ერხი ნენტრა̄ლხ ი ნაყლახ: "ლაგუჯამ შონ, ყორადილ შონ" ი ამი̄თა̄ნა̈რს,
Page of edition: 150 Line of edition: 1    მარე ნა̈ჲ მა̄მ სერდე ნა̄დ. ჲარვ ნაგზაისგა ჟ'ა̈ხვკვა^̄̈შგდ, ეჩჟი̄ნ ა̈ნსგუვდა ლუზნუ
Line of edition: 2    ლეზვებ: შა̈მ ი ლობიო. ხვამშიად ამჟი̄ნ მა̈ჲ იმე ი მა̈ჲ იმე ჲარვ ღეთ დოშდულმახა.
Line of edition: 3    ამჟი̄ნ აშხვ ნიშგვეჲ აფხნეგს მანცხი' ა̄ხზიგდა ი ხია^̄̈რ ჩუ ვეთ ადგან. სერ ოთხვიედ
Line of edition: 4    ზუგდიდთე ი სგ'ა^̄̈თვჴერნედ დოხვტურთე̄'სგა. ამნე̄მ მხიმ ჟაგრა̈რ მირ ოხვირ
Line of edition: 5    ლეგმერდა ი ამის ალჲა^̄̈რ ლეგ ლეთრე ხა̄დ. ესნა̈რ ალ ჟაგრა̈რ ხინა ლი. ეჩქას
Line of edition: 6    ახვმეჴრედ ჩი̄დ მა^̄̈ნკვი, მა̈ჲ ლმა^̄̈რ ხინა ი იშგენ სგა^̄̈ნჩვი̄ ჟაგრა̈რ. ეჯ მი̄შვ გუნ
Line of edition: 7    ანმუსე ზუგდიდ ი ლილღაჰა^̄̈ლი ლა̈ხვბინედ. ლადა̈ღისგა თვით უსგვა შაურს ჩუ
Line of edition: 8    ხვითხა^̄̈ლდად, ობა̈შინ, მეტსი̄. ლა^̄̈თვშ დი̄რი მნყაცახა̈ნ ხვარდად. ფურნეს ხაყლახ
Line of edition: 9    ი თვით შაურს ნაკა̈დდა ლე̄თისგა ნარდიე̄რ. ამჟი̄ნ თანფა̈ მი̄შვიდ ი ა̈გითე ლა̈ხვბინედ
Line of edition: 10    ლიმა̄რა^̄̈ლ. ა̈ხუნგრიშედ ქა ნა̈ქიმვ, ჲარვ ლადა̈ღ ა̈ხვკვა̈დდ ლანგრიშას ი
Line of edition: 11    თვით ეშდოხვიშდ მანა̈თ ნა̈ხვი̄დ. ამ ლადა̈ღ ჟ'ა̈ხვღვაჭრედ მო̄ლე-მო̄ლე, თვით
Line of edition: 12    ჲო̄რი ფუთ სიმინდ ჟ'ა̈ხვყიდდ ი ლა̈ხვბინედ ლი̄ზი. აშხვ ა̈დგილს ჭვეკქა ნა̄დ ლეჴედ.
Line of edition: 13    ეშხვ ა̄ფხნეგ ჩვაშყა̈დ ჭვეკჩუ̄ნ ი ჭალა̈დ ადჲე. ნა̈ჲ ღალ იმ ლა̈ხვშედენდ ეჩეჩუ̄ნ.
Line of edition: 14    ონჴვა̈დდ ამჟი̄ნ ლუწხვავე. ბაჴა̈რქ' ო̄ნღურდად, ეჩქას ნაჟჰვა̈რ ჟი ლუკვრემე
Line of edition: 15    ლა̈სვხ, ეჩექა წი̄ბა̄რა̈რს დეშ ხვიმრგად ი ლაჴჩნუშ ი ცხა̄ვშ გარ ონღურდად.
Line of edition: 16    ისგ ბაჴა̈რჩუ̄ნ სემ' ა̄ფხნეგ ჩვა̈ნშ̄დხ ი ეჩეჩუ̄ნ ა̈დჴაცხ. ნა̈ჲ თმუშ გარ ა̈ხვგვა̈წდ
Line of edition: 17    ლა̈შდვებთე̄'სგა. იმჟი დო ლა̈სვ ქვინ მეგნე გარ ონჴვა̈დდ ა̈გითე̄'სგა.

Line of edition: 18          ლენჯა^̄̈რ

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.