TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 211

Text: 172

Line of edition: 19

172. ლანგზა̄რავჟი̄ნ ლიჟმუ̄ნე

Line of edition: 20       მუშვა̈ნ მა̄რა ჯვინალდ ხვა̈ჲ ლენგზა̄რვა^̄̈ლ ხა̄დ: ლა̈ქმათე, ჯიმიშ ი სიმინდი ლა̈ყიდთე
Line of edition: 21    ი იშგან ლაღვჭართე, ეჯღ' ე̄რე შვა̈ნისგა დე̄ჲ ვარჩხლი ლათხა^̄̈ლ ლა̈სვ ი
Line of edition: 22    დე̄ჲ იშგენ ლეღვჭა̈რ მა გვეშ ითხო̄ლდა. ობა̈შინ ჴიდახ მეძაგვია^̄̈ლ ქიპს, ნესყა^̄̈ლს,
Line of edition: 23    მურგვა̈ლ ყვითელ საპნილა̈რს, ლა̈ცხნი̄რა̈რს, ლეფრენის, ნეკვთხა̈რს ი იშგან ნეცვნი̄რს.
Line of edition: 24    ალჲა̈რს ჩი̄ ძა̈გვღა, ზურა̄ლა̈ ლუსდგვა̈რღა ი კონრეშ ი მა̄ლვარე ტუფვა̈რღა
Line of edition: 25    ცა^̄̈დდახ. ლინთვისგა შვანა̈რს მუშურქა ი ბაჴა̈რქა ხა̄დხ ლე̄ზი. ზავლადა̈ღ ლაჩა̄ჟ
Line of edition: 26    ლატფა̈რი თანა̈ღქა ი ჩო̄ლრიშ ი ლელტხა^̄̈ აშა̈რს მა̄რე̄მი ლადვა̈შ მა̄მა ლა̈სვ,
Line of edition: 27    მარე ნახვწი ლაც̄გევა̈რ ესღრდახ კოჯრე თხუმა̈რქა. ეჩექა ჩა̄ჟა̈რ ჭშხა̈რს
Line of edition: 28    დეშ ა̈ნგჭვახ ი ფიშრა̄მინ შ̄დენდახ ჭალა̈ჲთე̄'სგა. ლა̄ბა̈რი ჩუ თვეფენდახ ი ჩა̄ჟა̈რი
Line of edition: 29    ჩუ იდა̄ვშო̄ლდახ. ხოფშირა ნაღა̈ლს ჰა̈რიდ ღალ ხა̄დხ ლეტეხ ა̈გითე, მუშვა̈ნ
Line of edition: 30    ეშხუ გარ დე̄მის ღრდა ლანგზა̄რავდ. ფიშირ ხენჴრინო̄ლდახ უშხვა̄რ ი ეჩჟი̄ნ ღრდახ
Line of edition: 31    გზა^̄̈ვრთე, ეჯღ'ე̄რე შუკვჟი̄ნ ლახე ჲა̈ს მა ხაწხნ, უშხვა̄რ ხემშედა̄ლხ. ლახე
Line of edition: 32    ჩუ ჲა̈რ იდგარო̄ლდა, ეჩქას მა̈გ ჟი ხოჭვე̄ნდახ ი ლდგა̈რს საკაცხშვ ჴიდახ ა̈გითე.
Line of edition: 33    მენგზა̄რავ მა̄რე აშხვ ნაგზა^̄̈ ლეზიზს ინყა ქორს, ამის გუდრათე იდა^̄̈სგდა, ეჩნქა
Line of edition: 34    გუდრათე ჲდა^̄̈სგდა წერა̈ქვს, მახა ლშხებ ჩაფლა̈რს, ქანს ი ნა̈უნს იდა^̄̈სგდა,
Line of edition: 35    ეჯღ'ე̄რე შუკვჟი̄ნ ლახე მა ხაწხნ ჲედ ლიბა̄ნდე, მა̄დეი იმვა̄ლე̄მი ჟი ლიხტე,
Line of edition: 36    ლახე მეძმე ი მეჴჩე მა ხა̄დ, ეჩქას ჟი ხემრგო̄ლდახ ა̈გიხა̈ნ ნა̈ჲა̄სგვ ბარგა̈რ. ლალცომა^̄̈რისგა
Line of edition: 37    კა̈ჭ ი ჰაბოდ ხუღვა^̄̈ნხ, ლაჴეჩ გა̈ჩცახა̈ნ ხორიკდა. ოსრი ლახზარაჩუ̄ნ
Line of edition: 38    მუგვლი ხოხვრა ნაჴფი̄ლა̈რ ხოსვდა ი ეშხუ ხაზა̈რ ჟა̈გი ჟი ხოჩხინა^̄̈ნ ლახზარაჩუ̄ნ.
Line of edition: 39    ალ ჟა̈გს, ლახე თმი ხოჴდენდა მა̄რა ი დაგრა ანღელს ხა̄დ, ეჩქა ჩუ ჲრტყვეჲდა.
Line of edition: 40    ალა ლა̈სვ ლაჟგუ̄ნა^̄̈რ ი სერ ლიჟგუ̄ნე მა̄მ ხეკვა̈დდა.

Line of edition: 41          ლენჯა^̄̈რ

Page of edition: 151

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.