TITUS
Svan Chrestomathy (I: Upper Bal): Part No. 223
Text: 182
Line of edition: 25
182. სემი კამინ ჩირიხა̈ჲ
Line of edition: 26
ა̈რიხ სემი ლახვბა. ალჲა̈რს ხორდახ მუ, ჰედვა̈ჲს ხეჟხა̄̈ნ ხა̈ჯი. ალ სამ ლახვბას
Line of edition: 27
ხორდახ სემი ლადჩურა. ალჲარე მუ ხა̈ჯი ლეგდ ა̈დრდა ი აშ ი აშ გარ ხოდრა̄მდ
Line of edition: 28
ირდვნო̄ლ. ვეშგიმპილს ხა̈ჯიდ ქა̄̈ნჰერ მიჩა გეზლი̄რ ი ხა̄̈ქვ, ერე "მინს ესერ
Line of edition: 29
სემი ლავდილა ხორიხ ი ეჯჲარე ლაშგომთე ესერ ლახ ჲა̈რ ანჴეს, ჩი̄ ესერ ქა̄ვ ლახო̄̈მხ,
Line of edition: 30
მა̄̈ჲ ესერ დო ლესვ: და̄̈ვ ლესვ ჰა ჴეც". ალა ჰა̄ლ ქა რა̄̈ქვ, შიშდ ჩუ ადგან.
Line of edition: 31
მე̄სმა-მე̄შთხვა ლადღა̈რს ანჴა̈დ და̄̈ვ ალჲა̈რთე ი მა̄̈ნკვი ხა̈ჯი̄ მანგვამ ხა̄̈ქვ, ეჩუნღო
Line of edition: 32
მაშე̄ნე უდილ ხაშგვმინ, ერე "ალა ესერ მიჩ ხაკუ". ალა ჰა̄ლ ჟ'ა̈ნმეჴრეხ ხოშა̄მ
Line of edition: 33
ლახვბად, ხოლა ლიცვა̄̈ლ ა̈დბინეხ, მარე მაჰვრე̄ნა მუხვბა მა̄მ ხასდიკნდა. ლახ
Line of edition: 34
ჰაჯ მო̄მ ახკიდ და̄̈ვდ, ეჩქა მაჰვრე̄ნა მუხვბე̄მ რა̄̈ქვ, ერ " მინს ესერ დაჴლა̈ ჯო̈გ ხორიხ,
Line of edition: 35
ეჯას ესერ მა̄მ ხელა̄რა̄̈ლ ი ალას ესერ ქა̄ვ ლახვე̄მხ დი̄ნა".
Line of edition: 36
ალა ჩუ მა̄დ ხეჯრავა̄̈ნხ ხოშა̄მ ლახვბას ი შიშდ ქა ლახვე̄მხ ი და̄̈ვდ ესფხიჭე
Line of edition: 37
ი ეშ ლახქარვე.
Line of edition: 38
ამი̄ ლჲანღო ანჴა̈დ ხოშა ჴეც, ამნე̄მი ამჟი ი ამჟი ჩვემინა, იმვა̄̈ჲჟი და̄̈ვდ. ამნე̄მ
Line of edition: 39
ხაშგვმინ მანე̄სგრე უდილ ი ალა ლახ ჟ'ა̈ნმეჴრეხ ხოშა̄მ ლახვბად, მაცლანა̈რს
Line of edition: 40
ესტიტეხ ჴეცი ლაყა̈რდ, "ჰამა ესერ ოთბა̈დვა ამი̄ ლი̄ქვი̄სგ. ჴეცს ესერ ლაჰო̈დნეხა
Line of edition: 41
მინე დაჩვირს?" ლახ დო̄მჟი, ეჩქა მაჰვრენე მუხვბად ხა̄̈ქვ, ერე "კუმში ჯვეგ
Page of edition: 158Line of edition: 1
ესერ ხორიხ, ეჩხა̈ნქა ესერ მა̄მ ხაკუ ნა̄̈თი ი ალ დი̄ნა ესერ ქა̄ვ ლახვე̄მხ". ალა ჰა̄ლ
Line of edition: 2
ქა რა̄̈ქვ, ჴეცდ ესფხიჭე დი̄ნას ი ეშ ლახქარვე. ამი̄ ლჲანღო ანჴა̈დ წელ. ამნე̄მ ხაშგვმინ
Line of edition: 3
მაჰვრე̄ნე უდილ. ათხა ჰა̈დურდ ჩუ ა̈დსოყა̄̈ნხ ხოშა ლახვბა. ალახ დო̄მ ხახვედდახ,
Line of edition: 4
ხოხვრამ მუხვბე̄მ ქა̄დ ლახვე̄მ მიჩა ნალმა̄̈თი გიმ. ალა ჩუ მა̄დ ხეჯრავა̄̈ნხ
Line of edition: 5
ხოშა̄მ ლახვბას ი ქა ლახვე̄მხ მაჰვრე̄ნე უდილ. აჩა̈დ ხა̈ნ ი ლახვბად ასკიბხ, ერე
Line of edition: 6
"აჩა̈დხუ ესერ ლა̈ჩი̄ჟალთე". ესღრიხ ათხე მინდვერ ლეჟა. ადკვარ̄ლეხ ცხემდა̈რ.
Line of edition: 7
ეშხუ ახხვი̄დ კე̄სა̈რშა ლყა̄რჟი, მე̄რმე̄მიში̄ კესა̈რშა ლყა̄რჟი, მაჰვრე̄ნე
Line of edition: 8
მუხვბე̄მი ცხვი დე̄მე ხეგვბენიხ. მანე̄სგრა ი ხოშა̄მ მუხვბე̄მ ლა̈ხხვა ანჴიდხ კე̄სა̈რშე̄რხა̈ნ
Line of edition: 9
ი მაჰვრე̄ნა მუხვბა დე̄მე ხეგვბენი ცხვი. აჩა̈დ აშხვ კოჯთე ი ამჩუ ხაჴლა.
Line of edition: 10
ათხა ქ'ო̄ხბდ ცხვის, ეჩხა̈ნქა აფხვ ანჴა̈დ. ათხ' ა̄ლა ხოლა გვი ლოხო̄სდ. აფხვს
Line of edition: 11
გა̈ნთე ხოჯლიკი, მარე აფხვ დე̄მ ხეყვლენი. სგ'ა̄ჩა̈დ ალა ა̈გითე ი აფხვი სგა ა̈თჭა̈მ.
Line of edition: 12
სგა̄ჲ ლა̄ჩა̈დ ყო̄რსგა̄მენთე, აფხვს ხა̄̈ქუდა ბიდ, ალა ქა ა̈დი̄ღე ი ეჩხა̈ნქა მზეთუნახა̈ვ
Line of edition: 13
ანჴა̈დ, ამნე̄მ ეჯჟი ქ'ა̄ნრჰე ამჩუ ლარდა, ერე მუგვდა ნარჰი ხატვარდა. ათხ'
Line of edition: 14
ა̄ლ მა̄რა გუნ ათჩო̄ნ.
Line of edition: 15
ათხ' ა̄ლა ა̈დკვიჰხ ხოშა ლახვბა̄̈ ლა̈ხხვად ი გუნ ათშო̄ნხ. ალ ზურალა̄̈რ ანჴა̈დხ
Line of edition: 16
ი ალას ბიდ ქ'ო̄თქვითხ, ეჯღა ერე ბიდს ლახ მო̄მ იქვმუნო̄ლ, ალ ზურა̄ლს
Line of edition: 17
და̄̈რ ხა̈მბა ეჯ მა̄რა. მე̄რმა ლადა̈ღ ალა ჟ'ა̈ნბა̈ჟ მზეთუნახა̈ვდ ი ლეგდ ლახბაჟნ.
Line of edition: 18
ა̈დზელა̄ლე ალ ზურა̄ლდ, ჟ'ა̈ხგვა̈ბ ბიდი ნა̈ცლუვა̈რ ეჯ ლა̈მყა̄̈რვლე ყო̄რჟი. ალა
Line of edition: 19
ქ'ა̄ნჴიდ ჟ'ანჭარ̄ლე. მე̄რვაჟიჲ ამჟი ხაყერხ ი მე̄სმაჟი ჩვა̈შიხხ ბიდ, ეჩქა ქა ა̈დკვიჰა̄̈ნ,
Line of edition: 20
ერე ამი̄თა̄ნ სი̄მაქ ესერ ა̈რი ალ ი ალ სოფელისგა. ათხე სი̄მაქ ხატუ̄ლი მიჩა
Line of edition: 21
ჭა̈შს, ერე "ქა̄ვ ესერ აჩა̈დხ მურყვამთე". ქ'ა̄ჩა̈დხ ამხა̄ვ, ჩი̄ გუ ხა̄რხ ალ დი̄ნად,
Line of edition: 22
მარე და̄̈ს ხა̈მბე ალ მაჰვრე̄ნე მუხვბე. ალა ა̈დკვიჰ "სემი კამინ ჩირიხა̈ჲდ" , ანჴა̈დ
Line of edition: 23
ეჯა ამხა̄ვ ა, ალ მურყვამთე. ალას ხეყა̄̈დ სემი ლჭიშხ რა̈შ. ამეჟი ჟი ხასგურდა
Line of edition: 24
ჯა. მურყვამს ხენდო̄̈რჲე̄ლ. ხაკუჩ, ერე ალ სი̄მაქ შნთე ა̈დკვა̈რის, მურყვმა̈ არტბაგა̈ჲქა
Line of edition: 25
ა̈ნსგიდა სი̄მაქ, სგა̄ჲ ოხვგუდირდა სი̄მაქს სემი კამინ ჩირიხა̈ჲ ი ჟი ლა̈ჲსგურე
Line of edition: 26
რა̈შჟი.
Line of edition: 27
ალ სი̄მაქ ლახ იქი̄ზანა̄̈ლ, ეჩჟი ა̈თუ ლი, ერე მეგა̈მხა̈ნჩუ ნა̈პო̄ლ ჩუ შყედნი,
Line of edition: 28
ლახ იგვნი, ეჩქა ეჩჟი ქა უჩხე, ერე მა̈გ ესღვა ნაღვრევს. ჯვე̄დია-ნაჯვდა მინდვერისგა
Line of edition: 29
მურყვამ ლ̄გა̈ნ, ეჩხა̄ვთე̄'სგა სგ'ა̄დჲე სი̄მაქ. ალ ზურა̄ლ გუნ ლუწხვავე
Line of edition: 30
ა̈რი ეჯღა, ერე მიჩა ჭა̈შმი ლიყველ ხამჭირ. მაჰვრე̄ნე მუხვბეს გუნ ათლო̄ნდა ხეხვი
Line of edition: 31
ლიღი. ალა აჩა̈დ მელთერთე. მელთერს ლა̈ხჭვედდა, ერე "მა̈ჲ ესერ ჩვემინას?"
Line of edition: 32
მელთერდ ხა̄̈ქვ, ერე "სემი კამინ ბერჟა̄̈" მიჯვრა̄ვ ესერ ანშკა̄̈დ, აჩა̈დუ ესერ,
Line of edition: 33
ოთჴეჩნი ეშხვი კამინ ბერეჟ, ადჰინე იმვა̄ლათე, აჯაღუ ესერ ა̈დზელა̄ლე ი ოთჴეჩნი
Line of edition: 34
ეშხვი კამინ ბერეჟ, ეჩხა̈ნქა ქა̄დუ ესერ აჩა̈დ ი ოთჴეჩნი მე̄სმე კამინ ბერეჟ, ეჩჩუ
Line of edition: 35
ესერ სგა ა̈თთხა̈ნი ი ა̈დკვიჰე იმვა̄ლა". ანშკა̈დ სემიკამინ ბერეჟ ი ათა̄გა̈ნ შუკვს,
Line of edition: 36
ოთჴა̈ჩ ეშხუ კამინ ბერეჟ, ადჰე აშხვ სოფელთე. ამჩუ ჟი ა̈ნშვემ სარაგჟი. ამხა̄ვთექა
Line of edition: 37
ანჴა̈დხ ბოფშა̈რ. ალჲა̈რს ლახსაკვრა̈ლნდახ. სგ'ა̄ჩადხ ა̈გითე ალ ბოფშა̈რ ი
Line of edition: 38
ხა̄̈ქვხ მინე დედეს, ერე "მიჩა მაჯო̄ნ ესერ ა̈რი სარაგჟი". მინე დი ქ'ა̄ჩა̈დ ამხა̄ვ,
Line of edition: 39
ლოხსგიდა (\\ ლოხსგიდდა) ალას ი ჩვათირ მიჩა ჯმილ ი ალჲა̈რდ გვიმი ხიად
Line of edition: 40
ათჴი̄დხ. სგ'ა̄დჲე ალ ზურა̄ლდ მიჩა ა̈გითე. მიჩა დაჩვირდ ხა̄̈ქვ, ერე "მიჩ ესერ
Line of edition: 41
ლაშე̄რილდ ა̄̈სპე, ჲედ ლაცხნი̄რდ ეჯღა, ერე მიჩ ესერ ჭა̈შ ხორი, ეჯას ამსვა̄ლდა̈
Line of edition: 42
ქვინ მა̄დ ხალა̈ტ. დოსაიმე ჯა̈ყრის მა სი". მაჰვრე̄ნე მუხვბე ლაშე̄რდ ადსიპე. ანჴა̈დ
Line of edition: 43
ათხა მიჩა ჭა̈შ ლა̈თხვჲარხა̈ნ. შიშდ რა̄̈ქვ, ერე "ამსვა̄̈ლდა̈ ქვინ ესერ ხოჴან" .
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
